সিয়াবর রামচন্দ্রনা য়াইফরে!
ঐহাক্কী নুংশিরবা লৈবাক মীয়াম, রাম রাম!
পুন্সিগী পুঙফম খরদি মপুনা থৌজানবীবদগী অশেংবা ওইথোকই।
ঙসি অসিদি ঐখোয় ভারত মচাশিং, মালেমদা শন্দোক্না লৈরিবা শ্রী রাম্বু নীংজবশিং খুদিংমক্কী য়াইফরবা পুঙফম অমনি। প্রভু শ্রীরাম্বু নীংজবগী ইথিলনা মাইকৈ খুদিং থনখ্রে। মাইকৈ মরিমক্তা প্রভু শ্রীরামগী মতিক মগুনবু শৈথাবনা থল্লে। মীপুম খুদিংনা পুৱারী ওইরগদবা জনুৱারী 22 ঙাইনরি। হৌজক্তি, অয়োধ্যাদা রাম্লালাগী প্রান-পরতিস্থা পাংথোক্কদবা শুপ্নগী নুমিৎ 11নি খক্তা ঙাইরে। মসিগুম্বা তাঙলবা পুঙফম অসিদা শরুক য়াবগী খুদোংচাবা ফংজবসি ঐহাক্কী লাইবক ফবনি। ঐহাক্কী মফমদদি মসিনা ৱাখলনা লাম্বা ফংলরোইদবা এক্সপেরিএন্স অমা ওইরগনি।
ঐহাক পুক্নিং য়াম্না নুংশিরে। ঐহাক্কী পুন্সিদা অহানবা ওইনা মসিগুম্বা ৱাখল্লোন্না ঐহাকপু লাকহৎলি। পুক্নিং লুপচগী ৱাখল্লোন অমা ঐহাক্না ফাওরি। ঐহাক্কী নুংগী ওইবা মসিগুম্বা ইথিল অসিদি করিগুম্বা অপাম্বা অমা ফোংদোকপগী খুদোংচাবা নত্তে, মসিদি থৌওং অমা ইশানা থেংনজবনি। ঐহাক্না ৱাহৈনা ফোংদোকপা পাম্লবসু, মসিগুম্বা মখলগী ৱাখল্লোন অসি ফোংদোকপা ঙমগদবা ৱাহৈ অমত্তা ঐহাক্কী ইফমদা লৈত্রে। অদোম্না ঐহাক্কী ফিভম অসি খঙবা ঙমগনি হায়না ঐনা খল্লি।
চারোন শুরোন কয়া অমগী চহি কয়াগী মঙলান অসিনা মঙফাওনবা মতমদা ঐহাক্না শরুক য়াবগী তাঞ্জা ফংজরে। ভারত মীয়ামগী মীহুৎ ওইনবা খুৎলায় অমা ওইনা ইশ্বরনা ঐহাকপু শেম্বীবনি। মসিদি অচৌবা থৌদাং অমনি।
“নিমিত মাত্রম ভব স্বয় – সাচিন”
মসিদি অচৌবা থৌদাং অমনি। ঐখোয়গী স্কৃপচরশিংদা হায়নরম্মিবনি, য়গ্যা অমসুং ইশ্বর নীংবগীদমক্তা ঐখোয়না ইশামক্কী লাইওইরবা ৱাখল্লোনবু য়াকাইহনবা তাবনি। মসিগীদমক্তা, অয়াঙবা অমসুং অহকপা কাংলোন কয়া স্কৃপচরশিং অসিদা পীরি অমসুং কাংলোনশিং অসি ইশাবু ইশ্বরগী মফমদা কত্থোক্ত্রিঙৈগী মমাংদা পাংথোক্কদবনি। মরম অদুনা, মসিগুম্বা স্পিরিচুএল ওইবা খোঙচৎ অসিগী অথোইবা মীওই কয়াদগী ঐহাক্না ফংজখিবা কাংলোন কয়া অমসুং মখোয়না তাকপীবা “য়ম-নিয়ম”গী মতুং ইন্না, ঐহাক্না ঙসিদগী হৌনা নুমিৎ 11গী অখন্নবা ইরাৎ থৌনি অমা হৌদোকচরিবনি।
মসিগুম্বা য়াইফরবা পুঙফম অসিদা ঐহাক্না মীয়াম, ঋশি-মুনি অমসুং ইশ্বরগী মফমদগী থৌজাল নিজরি অমসুং ইশ্বরগী শাইওন অমনি হায়নরিবা মীয়াম্নসু ঐহাকপু থৌজানবীয়ু, ঐহাক্কী মাইকৈদগী অৱাৎপা লৈহনবদীবা ওইয়ু হায়না অদোম্না ঐহাক্কীদমক্তা থম্মোই শেংনা থৌজানবীয়ু।
মরুপশিং,
ভগ্বান রাম্না মশক থোকপা মতম খরা লেনখিবা নাশিক ধাম – পঞ্চবতীদগী নুমিৎ 11গী ইরাৎ থৌনি অসি হৌজবা ঙম্বসিদা ঐহাক্না নুংঙাইবা ফাওজৈ।
ঙসিগী নুমিৎ অসিগীদমক্তা ঐহাক্না নুংঙাইবা ফাওজবগী মরম অমসু লৈরি। ঙসিগী নুমিৎ অসিদি স্বামী বিবেকানন্দজী মপোক নুমিৎসু ওইরিবনি। চহি লিশিং কয়াদগী ওৎপীদুনা লাক্লবা ভারত মচাশিংগী থৱাই-হকচাংবু অনৌবা ইনোৎকা লোয়ননা য়াকাইহনখিবা মীওই অদুদি স্বামী বিবেকানন্দ মশামক্নি। মহাক্না পীরম্বা ইথিল অমসুং ইশাদা থাজবগী মতৌ অদুনা ঙসিদি নীংথিরবা রাম মন্দিরগী শক্তম লৌদুনা ঐখোয় পুম্নমক্কী শক্তাক ওইনা মীপুম খুদিংগী মাঙদা লেপ্লরে।
অমুক্কা হেন্না নুংঙাইবা থৌদোক অমসু লৈরি। ঙসি অসি ইমা জিজাবাইগী মপোক নুমিৎ ওইবনি। অথোইবা মীওই অমগী শক্তম লৌবা ছত্রপতি শিবাজী মহারাজপু ইমা জিজাবাইনা পোকপীখিবনি। ঐখোয়না ঙসি ঐখোয়গী ভারতপু অমত্তা ওইদুনা মপাঙ্গল লৈবা লৈবাক অমা ওইনা উরিবসিদা ইমা জিজাবাইগী অচৌবা থৌদাং য়াওরিবনি।
অদুগা মরুপশিং,
ঐহাক্না ইমা জিজাবাইবু নোল্লুক্না ইকায় খুম্নবসিদা ঐহাক্কী ইমা ইবেম্মবু নীংশিংলকপা হায়বসিদি মহৌশাগী ওইবা থৌওংনি। ঐহাক্কী ইমানা মশাগী পুন্সিগী অরোইবা মিৎকুপ ফাওবদা সিতা-রামগী মিংলেন লৌজখিবনি।
মরুপশিং,
প্রান-প্রতিস্থাগী য়াইফরবা পুঙফম...
লাইওইরবা খুৎশেমগী মদুগুম্বা ৱাখল তাবা পুঙফম...
স্পিরিচুএল এক্সপেরিএন্সকী মদুগুম্বা খুদোংচাবা...
খ্বাইদগী শেংলবা মফমদুদা করিমত্তা থোক্লোইদবরা...!!!
মরুপশিং,
ঐহাক ইশামক শেংলবা অমসুং য়াইফরবা পুঙফম অদুদা শরুক য়াজগনি। অদুবু, ঐহাক্কী ৱাখলদদি, ভারত মচা করোর 140গা ঐহাক্কী মিহুন খুদিংগা লোয়নদুনা লৈগনি। অদোমগা ঐহাক্কা লৈমিন্নগনি...রাম্বু নীংজবা মীপুম খুদিংগা ঐহাক্কা লৈমিন্নগনি। অদুগা, মসিগুম্বা কন্সিয়সনেস অসিদি ঐখোয় পুম্নমক্না অমত্তা ওইনা শরুক য়ামিন্নগদবা পুঙফম্নি। রাম মন্দিরগীদমক্তা মশাগী পুন্সি কত্থোক্লবা মশিং থীঙমদ্রবা মীওই কয়াগী ইথিলশিংবু ঐহাক্না শাগোন্নদুনা পুগনি।
কত্থোকপা অমসুং চুম্থোকচবা ঙম্নবা লাইনীংবগী মদুগুম্বা মীতমশিং...
চহি 500 ৱানা ঙাইজরকপা...
খাঙবা কন্দুনা ঙাইরকখিবা মদুগুম্বা শাংলবা মতম কয়া...
কত্থোকপা অমসুং চুম্থোকচবা ঙম্নবা লাইনীংবগী মশিং থীঙমদ্রবা থৌদোকশিং...
কৎপীবা অমসুং কত্থোকপগী ৱারী কয়া...
মমিং খঙহৌদ্রবা মীওই কয়া লৈখ্রে, অদুবু মখোয়গী পুন্সিগী পান্দম অমখক্তি লৈখিবনি। মদুদি, রাম মন্দির অমা লৈবা হায়বসিনি। মখোয়গুম্বা মীওই কয়াগী অনিংবা অপাম্বগা ঐহাক্কা শাগোন্নগনি।
লৈবাক মীয়াম করোর 140না ঐহাক্কা লোয়নদুনা ঐহাক্না মখোয়গী লোয়ননা শেংলবা মফমদুদা চঙজবা মতমদা, ঐহাক ইথন্তা নত্তে, অদোম পুম্নমক ঐহাক্কা লোয়নরি হায়না ঐহাক্না খঞ্জগনি।
মরুপশিং, মসিগী নুমিৎ 11নি অসিদি ঐহাক খক্কী নত্তে, ঐহাক্কী ৱাখল্লোনগী মালেমসিদা অদোম পুম্নমকসু শরুক য়ারিবনি।
ঐহাক্কী ইফমদা ফাওরিবা ইথিল অসিগা চপ মান্ননা ঐহাক্না অদোমগী ইথিলবুসু ঐহাক্না রাম্লালাগী খুয়াখাদা কৎচগনি।
মরুপশিং,
ইশ্বর অসিদি ‘নিরাকর’ ওই হায়বা অশেংবা অসি ঐখোয় পুম্নমক্না খঙলে। অদুগা ইশ্বরনা, মিৎনা উবা শাইওন ওন্দুনসু, ঐখোয়গী স্পিরিচুএল খোঙচৎ অসিদা পাঙ্গল হাপ্লি। মীওইবা অমদা ইশ্বরগী শক্তম অমা চেল্লি হায়বসিদি ঐহাক ইশামক উরে অমসুং ফাওরে। ঐহাক্না ইশ্বরমক্নি খনবা মীওইশিংনা ঐহাকপু থৌজানবীদুনা মখোয়গী ৱাখল্লোনবু ৱাহৈনা ফোংদোকপীরকপা মতমদা, ঐহাক্কী ইফমদা অনৌবা শক্তি অমা পীবি। ঙসিদি, ঐহাক্না অদোমগী থৌজাল পামজরি। মরম অদুনা, অদোম্না ঐহাকপু থৌজানবীবা ওইনা অদোমগী ৱাখল্লোনবু ঐহাক্কী ইফমদা ৱাহৈনা ফোংদোকপীনবা ঐহাক্না হায়জরি। অদোমগী থৌজালগী ৱাহৈ খুদিং অদু ঐহাক্কী ইফমদদি শুপ্নগী ৱাহৈ ওইরোই, মন্ত্রা অমা ওইগনি। মদুনা মন্ত্রা অমগুম্না ঐহাক্কী ইফমদা পাঙ্গল হাপকনি। অদোমগী ৱাহৈ অমসুং ৱাখল্লোনশিং পুম্নমক অদোম্না নমো এপ্তা ফোংদোকপা য়াগনি।
মরুপশিং,
ঐখোয় পুম্নমক প্রভু শ্রীরামগী মিংলেন্দা লুপচরসি। ৱাখল্লোন অসিগা লোয়ননা ঐহাক্না অদোম পুম্নমকপু অমুক্কা হন্না ইকায় খুম্নজরি।
জয় সিয়ারাম
জয় সিয়ারাম
জয় সিয়ারাম
