সেন্ত্রেল ইনফোর্মেশন কমিসনগী অনৌবা শঙলেন অসি শঙ্গাবা ফংজবদা ঐহাক নুংঙাইবা ফাওই। তোঙান তোঙানবা দিপার্তমেন্তশিংগী অপুনবা কন্ত্রীব্যুসন্না মরম ওইদুনা বিল্দিং অসি পীখিবা মতমগী মাংওইননা লোইশিনবা ঙমখীবনি। বিল্দিং অসি শেম শাবদা শরুক য়াখিবা দিপার্তমেন্তশিং অমসুং ওফিসিয়েলশিংবু ঐহাক্না থাগৎপা ফোংদোকচরি। বিল্দিং অসিদা এনভাইরন্মেন্তেল ফ্রেন্দলী গ্রিহ-IV রেতিং ফংলে হায়না ইফমদা খঙহনবীরে। বিল্দিং অসিনা ইনর্জী সেব তৌবগা লোইননা মহৌশাগী ফিভম ঙাক্তুনা থম্বদশু মতেং ওইরগনি। অনৌবা বিল্দিং অসিনা কমিসনগী থবক থৌরম্বু হেন্না ফবা মওংদা কো-ওর্দিনেৎ অমসুং ইন্তিগ্রেৎ তৌবদা মতেং ওইরগনি হায়না ঐহাক্না থাজবা থম্লি। মসিনা কমিসন্দা লাকপা কেসশিং লোইশিনবদা খোংজেল য়াংশিল্লগনি। কেসতা খোংজেল য়াংশিনবা হায়বদি মীয়ামগা মরি লৈনবা সমস্যাশিং অথুবা মতমদা লোইশিল্লগনি হায়বনি।
মরূপশিং, সেন্ত্রেল ইনফোর্মেশন কমিসনগী মোবাইল এপ্লিকেসন হৌদোকপগী খুদোংচাবা অদুশু ঙসি ঐহাক্না ফংজরে। এপ্লিকেসন অসিগী খুত্থাংদা মীয়াম্না অপিল ফাইল তৌবা, ৱাকৎ লানখৎপদা লাইহল্লগনি লোইননা ইনফোর্মেশন কমিসন্না পীরিবা কান্নবশিং মখোয়গী মনাক্তা অথুবা মতমদা য়ৌহল্লগনি। সেন্ত্রেল ইনফোর্মেশন কমিসন্না সিতিজন সর্বিসকীদমক্তা মখল মখা য়াম্লবা খোংথাংশিং লৌখৎলে হায়বা ইফমদা খঙহনবিরে। মীয়ামদা খুদোংচাবা হেঙ্গৎহন্নবা, ৱাকৎশিং অথুবা মতমদা ৱারোইশিন পুরক্নবগীদমক সি আই সিদা তেক্নিক কয়া শিজিন্নরে। মসি হরাওনিঙাই ৱাফমনি মদুদি কমিসন্না মথৌ তৌবা হৌরকপা মতম অদুদগী কেস খ্বাইদগী য়াম্না দিস্পোজ তৌখিবা অসি মমাং চহিনা ওইখি।
মরূপশিং,
দেমোক্রেতিক অমসুং পার্তিসিপেতিব গবর্নেন্সকীদমক ত্রান্সপরেন্সী অমসুং একাউন্তেবিলিতী য়াম্না মথৌ তাই। তঞ্জা অসিদা সেন্ত্রেল ইনফোর্মেশন কমিসনগুম্বা সংস্থানশিংনা ত্রান্সপরেন্সী অমসুং একাউন্তেবিলিতী অনিমক হেঙ্গৎহনবদা মরুওইবা থৌদাং লৌরি। অসিগুম্লবা সংস্থানশিং অসিনা থাজবদা য়ুমফম ওইবা গবর্নেন্সকীদমক কেতালিস্তকী মতৌগুম থবক তৌরি। প্রজানা সরকারদা হেন্না থাজবা থম্নবা অমসুং সরকারনা লৈবাক্কী হ্যুমেন রিসোর্সপু মপুং ফানা শিজিন্নবা ঙম্নবা, ঐখোয়গী লৈবাক্কী প্রজাশিংগী আশাশিং-অপাম্বশিং অদু খঙনা ৱারেপ লৌবা ঙম্নবগীদমক অসিগুম্বা মখলগী সংস্থানশিংগী ভেল্যু য়াম্না লৈ।
মরূপশিং,
ঙসিগী মোর্দন ইনফোর্মেশন হাইৱেগী য়ুম্বী মঙা লৈ, মদুদা ঐখোয়না অমত্তা ওইনা থবক তৌরি।
য়ুম্বীশিং অদুদি-
ৱাহং হংবা,
তাবা,
ইন্তরেক্সন,
এক্ত, অমসুং
ইনফোর্মনি।
অহানবা য়ুম্বী ৱাহং হংবা অসিগী মতাংদা শন্দোক্না হায়রগদি, সরকারগী পোলিসী অমসুং প্রোজেক্তা হেন্না ফবা গবর্নেন্সকীদমক মীয়ামগী ওইবা ৱাহং পুম্নমক মরু ওই। মাইগোব, মালেমগী খ্বাইদগী চাওবা সিতিজন এঙ্গেজমেন্ত প্লেৎফোর্ম অসিদা মীয়াম্না মখোয়গী ওইবা ৱাহং কয়াগা লোইননা সরকারগা শম্নরি।
ইচল-ইচে অমসুং ইচিল-ইনাওশিং, ইনফোর্মেশন হাইৱেগী অনিশুবা য়ুম্বী অদুদি, তাবনি। ঙসি লৈবাক অসিদা মীয়ামগী ৱাকৎ তারিবা অদুগুম্লবা সরকার লৈরে। সি পি জি আর এ এম এস নত্রগা সোসিএল মিদিয়াদগী ফংলিবা সজেসনশিং অদু সরকার অসিনা পুক্নিং চংনা তারি। ঐখোয়গী সরকার অসিনা কয়ারক হন্না মীয়ামগী সজেসনশিং অমসুং ফীদবেক তারবা মতুং পোলিসীদা অহোংবা ফাওবা পুরকখ্রে।
মরূপশিং, ৱাহং হংবা অমসুং সজেসন অদুক্কী মতিক মরু ওইরিবা অদুগুম্না ইন্তরেক্সন অসি ইনফোর্মেশন হাইৱেগী অহুমশুবা য়ুম্বীনি। ইন্তরেক্সন্না সরকার অমসুং প্রজাশিংগী মরক্তা ইমোস্নেল কনেক্তশু লৈহল্লি হায়না ঐহাক্না খনজৈ। মীয়ামগা লোইননা ইন্তরেক্সন হেঙ্গৎহন্নবা মতম মতমগী ওইনা সর্ভেশু তৌরি। চহি খুদিংগী মে থাদা ঐখোয়না ‘রেত মাই গবর্নমেন্ত’ ইনিসিয়েতিবশু পুদুনা লাক্লি।
মতৌ অসুম্না ইনফোর্মেশন হাইৱেগী মরীশুবা অমসুং মরুওইবা য়ুম্বী অদুদি ‘এক্ত’ অসিনি। ৱাহং হংবা-সজেসন-ইন্তরেক্সনগী মতুং, এক্সন্দা শোত্থরগদি হোৎনরিবা পুম্নমক অরেম্বা তাগনি। জি এস তি ইমপ্লিমেন্ত তৌবা মতম অদুদা ৱাকৎশিং অমসুং পাউতাকশিংদা এক্তিব ওইনা ফোল্লো অপ তৌখি।
মরূপশিং, ‘ইনফোর্ম’ অসি ইনফোর্মেশন হাইৱেগী মঙাশুবা য়ুম্বীনি। সরকারনা পায়খৎলিবা থবক থৌরমশিংগী মরমদা প্রজাশিংদা অচুম্বা খঙহনবা অসি সরকারগী মথৌনি। মরম অদুনা ঐখোয়গী সরকার অসিনা অহানবা ওইনা রিয়েল-তাইম অপদেতেদ, ওনলাইন দাশবোর্দশিংগী খুত্থাংদা ইনফোর্মেশন ফংহন্নবা অনৌবা প্রেক্তিস অমা হৌরে। স্বচ্ছ ভারতকী মখাদা তোইলেৎ কয়া শাখ্রবগে, সৌভাগ্য য়োজনাগী করি প্রোগ্রেস লৈরিবগে, উজ্জ্বালা য়োজনাগী মখাদা এল ই দি কয়া য়াম্না য়েনথোকখ্রবগে, মুদ্রা য়োজনাগী মখাদা লোন কয়া য়াম্না পীখ্রবগে, অসিগুম্লবা মরুওইবা ৱাফম কয়া হৌজিক্তি ওনলাইন্দা ফংলে।
মরূপশিং, ঙসিদি ভারত অসি দিজিতেল্লী ইমপৱার্দ সোসাইতীগী মায়কৈরোমদা য়াঙনা চংশিল্লি।
ইনফোর্মেশন তেক্নোলোজী শিজিন্নবনা প্রোসেসশিং লাইথোকহনবতা নত্তনা তেক্নিক অসিনা ত্রান্সপরেন্সী অমসুং ক্বালিতী ওফ সর্বিসশু লৈহল্লে। মনরেগাগী মখাদা পায়খৎলিবা থবকশিং, প্রধান মন্ত্রী আৱাস য়োজনাগী মখাদা পায়খৎলিবা থবকশিং অদু জীও-তেগিং তৌহন্দুনা, সেতলাইৎ ফোতোশিংগী খুত্থাংদা য়েংশিল্লি। চহি কয়াদগী পন্দুনা লৈরক্লবা ইরিগেসন প্রোজেক্তশিং অদু মোনিতর তৌনবা দ্রোন শিজিন্নবশু হৌরে। মমাং চয়োলদা পাংথোকখিবা প্রগতিগী মীফমদা কেদর্নাথপু নৌনা শেমগৎ শাগৎপগী থবক থৌরমশিং দ্রোন কেমেরা অমগী খুত্থাংদা মোনিতর তৌখিবা অদু ময়ামগী মফমদা নিংশিংজরি।
মরূপশিং, অনৌবা সিস্তেম লাকপা মতমদা অরিবা অদুনা মহুৎ শিনখি। ঐখোয়গী সরকারনা গুদ্স এন্দ সর্বিসেসকী পব্লিক প্রোক্যুরমেন্তকীদমক গবর্নমেন্ত-ই-মার্কেৎ হায়বদি জি ই এম প্লেৎফোর্ম শেম্লে। সরকারগী পোৎ লৈশিনবদা শেঞ্জা থুমজা মুত্থৎপদা, সরকারগী পোৎ লৈবগী থৌরম ত্রান্সপরেন্ত ওইহনবদা জি ই এম পোর্তেলনা অচৌবা থৌদাং লৌরি। জি ই এম পোর্তেলগী খুত্থাংদা লৈবাক অসিগী খ্বাইদগী পীক্লবা ইন্তরপ্রিনর, লৈবাক্কী কাচিন কোয়াদা লৈরিবা ত্রাইবেলশিংনশু মখোয়গী পোত্থোকশিং অদু সরকারদা দাইরেক্ত য়োনবা ঙমহল্লে। মসিদা নত্তনা সরকারনা তোঙান তোঙানবা থাক্তা প্রোসেসশিং লাইথোকহল্লবশু সিস্তেমদা ত্রান্সপরেন্সী পুরক্নবা হোৎনরি। আর্তিফিসিএল ইন্তেলিজেন্স অমসুং দাতা মাইনিংগী খুত্থাংদা প্রজাদা থাজনীংঙাই ওইবা অমসুং কান্নরবা ইনফোর্মেশন ফংহল্লি।
মরূপশিং, সিস্তেমদা ত্রান্সপরেন্সী হেঙ্গৎলক্লিবা মখৈ ইনফোর্মেশনগী ইচেল হেঙ্গৎহন্দুনা সরকারদা মীয়াম্না থাজবা হেঙ্গৎহল্লি। হৌখিবা চহি অহুম-অহুম মখাইদা ঐখোয়গী সরকারগী সিস্তেমদা অহোংবা পুরক্তুনা মীয়ামগী থাজবা অসি লেপ্পা নাইদনা হেঙ্গৎহন্নবা থবক তৌরি। তশেংনা ইনফোর্মেশনগী অসিগুম্লবা মওং মতৌ অসিদা সেন্ত্রেল ইনফোর্মেশন কমিসনগী মরুওইবা থৌদাং য়াওরি।
মরূপশিং, ঙসি মফম অসিদা ঐহাক্না অতোপ্পা হিরম অমদশু খন্ন-নৈনবা পাম্লি। ঐখোয়গী লৈবাক অসিদা আর তি আই এক্তকুম্না এক্ত রাইৎলিগী প্রিন্সিপলদশু য়াম্না হকচিন্না পুক্নিং চংবা মথৌ তাই। পাব্লিক ইন্তরেক্সন য়াম্না পাংথোক্লিবা সি আই সিগুম্বা সংস্থানশিংদা মীয়াম্বু এক্ত রাইৎলিগী মতাংদা হেন্না ফজবা মওংদা খঙহনবা য়াগনি হায়না ঐহাক্না থাজৈ।
হৌজিক থেংনরিবা অসি খঙনা, তুংদা মায়োক্নগদবশিং অদু খঙনা মরি লৈনবা সংস্থান পুম্নমক্না মশাগী অধিকার অমসুং মশাগী থৌদাংগী মরক্তা বেলেন্স থম্দুনা থবক তৌবা তাই। সেন্ত্রেল ইনফোর্মেশন কমিসন্না, ইনফোর্মেশনগী খুত্থাংদা মতৌ অসুম্না মীয়ামবু এম্পৱার তৌবগী থবক মখা চৎথখিগনি হায়বগী থাজবা অসিগা লোইননা ঐহাক মতাং অসিৱাইদা লোইশিনজরি ।
অমুক হন্না ময়াম পুম্নমক্কী মফমদা য়াইফ-পাউজেল পীজরি।
থাগৎচরি!!!
