ভারত ইমানা য়াইফরে! ভারত ইমানা য়াইফরে!
ত্রিপুরাগী রাজ্যপাল শ্রী সত্যদেব আর্য়জী, লমদমসিগী নহা অমসুং শক্তি লৈবা মুখ্য মন্ত্রী, শ্রী বিপ্লব দেবজী, ত্রিপুরাগী হান্নগী মুখ্য মন্ত্রী, শ্রী জিশ্নু দেব বর্মাজী, ঐহাক্কী কেন্দ্রগী মন্ত্রী মন্দলদা লৈরিবা মরুপ, ইচন প্রতিমা ভৌমিকজী, শ্রী জ্যোতিরাদিত্য সিন্ধিয়াজী, রাজ্য সরকারগী মন্ত্রী, শ্রী এন্সী দেব বর্মাজী, শ্রী রতনলাল নাথ জী, শ্রী প্রঞ্জিৎ সিন্ধা রাইজী, শ্রী মনোজ কান্তি দেব জী, মীয়ামগী অতোপ্পা মীহুৎশিং অমসুং মশিং য়াম্না লেংবীরক্লিবা ঐহাক্কী নুংশিরবা ইচিল ইনাওশিং!
শবাই কে নমোস্কার। শকল কে দু হজার বাইস বর্সর ওনেক-ওনেক শুভেছা। জাতৌনো খুনুমখা। জান্তোনো বিশী কান্তালনী খা কাহাম য়াফর ঔ। চহি হৌরকপমক্তদা ত্রিপুরাবু ইমা ত্রিপুর সুন্দরীগী থৌজালদগী ঙসি হরাওনীংঙাই ওইরবা থৌওং অহুম ফংলে। অহানবা থৌরম – কন্নেক্তিবিতীগী, অনিশুবা থৌরম –বিদ্যাজ্যোতি মিশন ১০০ স্কুলশিংগী অমসুং অহুমশুবা থৌরম – ত্রিপুরা গ্রাম স্মৃধী য়োজনাগী। ঙসি অসিদা লুপা করোর কয়াগী প্রোজেক্তশিং শঙ্গাবগা লোয়ননা উরেপ উয়ুং তম্লি। অসিগুম্লবা থৌরম অহুমসিগীদমক্তা অদোম খুদিংবু ঐহাক্না থাগৎচরি অমসুং য়াইফ পাউজেল পীজরি।
মরুপশিং,
২১শুবা চহি-চাগী ভারতনা মীওই খুদিংগা লোয়ননা পুম্নমক্কী চাউখৎপা অমসুং পুম্নমক্কনা হোৎনমিন্নবগী মন্ত্রগা লোয়ননা মাং থানা চঙশিল্লি। রাজ্য খরনা শোত্থদুনা লৈহৌবা, রাজ্যগী খরগী মীওইশিংনা তঙাই ফদবা খুদোংচাবশিংগীদমক্তা ৱানা ঙাইবা, অসিগুম্বা খল মান্নদনা চাউখৎপসি লৈবাক্কীদমক্তা মতিক চাবা থৌওং নত্তে, মসি চুমদে। ত্রিপুরাগী মীয়াম্না দিকেদ কয়াদগী অসিগুম্বা ফিভম উদুনা অমসুং থেংনদুনা লাক্লি। মমাংদদি, মফমসিদা শেঞ্জা থুমজাগী গারীনা লেপ্পা লৈতনা চেল্লম্মি অমসুং চাউখৎপগী গারীনা ব্রেক ফাদুনা লেপ্তুনা লৈরম্মি। মমাংগী সরকারদা ত্রিপুরাগী চাউখৎপগী মিৎয়েং অমত্তা লৈরমদে, চাউখৎহনগে হায়বগী ৱাখলসু খল্লমদে। লাইরবা অমসুং শোত্থবা হায়বসি ত্রিপুরাগী মরাইবক্তা ইদুনা লৈরম্লবগুম্নি। অসিগুম্বা ফিভমশিং অসি হোংদোক্নবগীদমক্তা ঐহাক্না ত্রিপুরাগী মীয়ামদা হিরা (ঐচ.আই.আর.এ.) পীগনি হায়না ৱাশকখিবনি। ঐচ.না হাইৱে, আই.না ইন্তর্নেত, আর.না রেলৱেজ অমসুং এ.না এয়রৱেজ হায়বনি। ঙসিদি, হিরা মোদেলগী মতুং ইন্দুনা ত্রিপুরানা ইশাগী কন্নেক্তিবিতী ফগৎহল্লি, ইশাগী কন্নেক্তিবিতী হেনগৎহল্লি। ঐহাক্না মফমসিদা লাক্ত্রিঙৈগী মমাংদা মহারাজ বির বিক্রম এয়রপোর্তকী নৌনা শঙ্গাবা তর্মিনেল বিলদিং অমসুং অতোপ্পা খুদোংচাবশিং য়েংবা চৎলুই। ত্রিপুরাগী সংস্কৃতি, মফমসিগী হেরিতেজ, মফমসিগী আর্কিতেকচরবু এয়রপোর্ত্তগী কুমথরকপা পেসেঞ্জর খুদিংনা ইহানা হান্না উগনি। ত্রিপুরাগী মহৌশাগী ফজবা ওইরো, উনাকোতি চিঙগী ত্রাইবেল মরুপশিংগী কলা ওইরো, নুংগী মীতমশিং ওইরো, এয়রপোর্ত্তা মপুং ওইবা ত্রিপুরা লৈবগুম্না তৌই। খুদোংচাবশিংগী মতাংদা য়েংলুরগদি, মহারাজা বির বিক্রম এয়রপোর্তনা হান্নগা চাংদম্নবদা শরুক অহুম হেন্না চাউবগুম্লে। হৌজিক্তি, মফমসিদা প্লেন দজন অমমুক খাম্বা য়ারগনি। মসিনা ত্রিপুরা খক নত্তনা অৱাং-নোংপোক পুনবগী কন্নেক্তিবিতী হেনগৎহনবদা য়াম্না তেংবাংগনি। মফমসিগী দোমেস্তিক কার্গো তর্মিনেল অমসুং কোল্দ স্তোরেজকী থবকশিং লোইশিল্লকপা মতমদা অৱাং-নোংপোক্কী কারবারদা অনৌবা পাঙ্গল হাপকনি। ঐখোয়গী মহারাজা বির বিক্রম্না মহৈ-মশিং, আর্কিতেকচরগী মতাংদা ত্রিপুরাবু অনৌবা থাক্তা পুখৎপীরমখিবনি। ঙসিদি, মহাক্না ত্রিপুরাগী চাউখৎপা অমসুং মফমসিগী মীয়াম্না পাংথোক্লিবশিং উবদা য়াম্না হরাওরমগনি।
মরুপশিং,
ঙসিদি, ত্রিপুরাগী কন্নেক্তিবিতী হেনগৎহনবগা লোয়ননা মসিবু অৱাং-নোংপোক্কী গেতৱে ওইহন্নবা থবক কয়াসু খোঙজেল য়াঙনা পায়খৎলি। শোরোক, রেল, নোংথক নত্ত্রগা ঈশিং লম্বীগী কন্নেক্তিবিতী ওইরো, ঐখোয়গী সরকারনা মতমগা চুনবা ইনফ্রাস্ত্রকচরদা অসুক য়াম্না মিৎয়েং চঙলিবা অসিগুম্না মমাংগী সরকারনা কৈদৌনুংদা পায়খৎলম্বা লৈতে। ঙসিদি, ত্রিপুরানা হায়রিবা সেক্তরশিং অসিদা কারবারগী অনৌবা হব অমা ওইরক্লি, ত্রেদ কোরিদোর অমা ওইরক্লি। শোরোক অমসুং রেলৱেগা মরী লৈনবা প্রোজেক্ত দজন কয়া অমসুং বাঙ্গলাদেশকা খুৎশম্ননা পায়খৎপা ইন্তর্নেস্নেল ৱাতরৱে কন্নেক্তিবিতীনা মফম অসিবু নৌনা শেমদোকপা হৌরবনি। ঐখোয়গী সরকারনা অগর্তালা-অখোরা রেল লম্বীবু অথুবা মতমদা লোইশিন্নবা কন্না হোৎনরি।
ইচিল ইনাওশিং,
কেন্দ্র অমসুং রাজ্যগী সরকারনা চাউখৎ-থৌরাংবু খ্বাইদগী অৱাংবা থাক্তা থম্লকপা মতমদা, চাউখৎপগী খঙজেলসু দবল ওই। মরম অদুনা, মতাং অসিদা দবল ইঞ্জিনগা চাংদম্নবা য়াবা অমত্তা লৈতে। দবল ইঞ্জিন সরকার, হায়বদি ফেসিলিতীশিংবু নীংথিনা শিজিন্নবা, মীয়ামগী অপাম্বা নীংথিজনা খঙবা, মীয়ামগী তৌবা ঙম্বগী মতিকপু খুমাং চাউশিলহনবা, সেবা তৌবগী ৱাখল্লোন লৈবা অমসুং খোঙফম চেৎপা হায়বনি। দবল ইঞ্জিন সরকার হায়বদি ৱারেপশিংগী মঙফাওনফম হায়বনি। অদুগা দবল ইঞ্জিন সরকার হায়বদি নুংঙাই য়াফনবগীদমক্তা মীয়াম পুন্না হোৎনমিন্নবা হায়বনি। ঙসি, মফমসিদা মুখ্য মন্ত্রী ত্রিপুরা গ্রাম স্মৃধী য়োজনা অমা হৌদোক্লিবা অসি পনখ্রিবা ৱাফম অসিগী খুদম্নি। য়ুম্থোং খুদিংদা থক্নবা তোতি ঈশিং ফংলকপা, লাইরবা খুদিংগী পক্কা য়ুম লৈরকপা অদুগা ঐহাক্না প্রোজেক্তশিং অসিগী বেনিফিশরী খরগা উন্নখি। স্কিমশিং অসিদগী মখোয়না থেংনখিবগী মতাংদা নীংথিনা খঙনবা ঐনা স্কিমশিং অসি য়েংশিল্লম্লিবনি। ঐহাক্না নুপীমচা অমা থেংনখি। মহাক্না য়ুম অমা ফংবা হায়বসি শোইদ্রবনি, হৌজিক্তি থবক হৌবতা ঙাইরি, ফক্লাং খাগদবা ৱাৎলি। অদুবু মহাক্না অদুক্কী মতিক হরাওখি, হরাওমন্দনা মমিত্তগী মপী তারকপা লেপ্পা লৈখিদে। অসিগুম্বা হরাওবা অসিবু সরকারনা লৈবাক মীয়ামগীদমক্তা কত্থোক্লিবনি। ইমুং খুদিংগী মীওইগী মনাক্তা অয়ুশমান য়োজনাগী কার্দ পায়রকপা, অসিগুম্বা ইমুং অমগা ঐহাক্না উনখি। ইমুংদুগী মমা অমসুং নহা ওইরিবা মচানুপাদু কেন্সননা নাবনি। অয়ুশমান ভারত য়োজনাগী খুত্থাংদগী ইমা, মচানুপাগী পুন্সি কন্নবা চুন্নবা খুদোংচাবা ফংগনি। লাইরবশিংগী মনাক্তা ঙাকথোক্নবা চুংগোই লৈরগনি, অঙাং খুদিংনা মহৈ তম্বা ফংলগনি, লৌমী খুদিংগী কে.সি.সি. কার্দ লৈরগনি, খুঙ্গং খুদিংদা অফবা শোরোক লৈরগনি, অদুগা লাইরবশিংনা মশাদা থাজবগী চাং হেনগৎলগনি, লাইরবশিংগী পুন্সি মহিং লাইথোক্লগনি, ঐহাক্কী লৈবাক্কী মীয়াম খুদিংনা মপাঙ্গল লৈরগনি। অসিগুম্বা থাজবা অসিদা য়ুম্ফম ওইরগা ঐখোয় খুদিংনা নুংঙাই য়াইফগনি। মরম অদুননি, ঐখোয়না স্কিমগী বেনিফিশরী খুদিংদা ইশানা চত্তুনা য়ৌহনগদবনি অমসুং স্কিমশিংবু সেচ্যুরেসন তৌবগী মাইয়োক্তা চৎকদবনি হায়না লাল কিলাদা হায়খ্রিবা। অসিগুম্বা চহি অসিদা ত্রিপুরানা স্তেতহুদ ফংখিবগী চহি ৫০শুবা চহিদা খোঙদারক্লি। খুঙ্গং অমসুং লাইরবশিংগী য়াইফনবা পায়খৎলিবা স্কিমশিংবু মীওই খুদিংনা য়ৌহন্নবা হোৎনবদা ত্রিপুরানা লৈবাক্কী অতৈ রাজ্যশিংদগী হান্ননা মাংজিল থানা লৈরিবনি। গ্রাম স্মৃধী য়োজনানা ত্রিপুরাগী অসিগুম্বা রেকোর্দ অসিবু হেন্না ফগৎহল্লগনি। খুঙ্গং খুদিংগী লাইরবা ইমুং খুদিংদা খুদোংচাবা ২০দগী তাদনা শোইদনা ফংহনগনি। অসিগুম্বা পান্দম্বু ১০০%গী চাংবা ফংবা রাজ্যশিংদা লুপা লাখ কয়াগী ইন্সেন্তিবকী শেনফম পীগনি হায়বা ৱাফম অসিসু ঐহাক্না য়াম্না পামজৈ। মসিনা চাউখৎ থৌরাংগীদমক্তা য়াম্না ফবা চাংদম্নবা অমা লৈহনগনি।
মরুপশিং,
ঙসি ত্রিপুরাদা পাল্লিবা সরকার অসিনা লাইরবগী অৱাবা খঙই অমসুং মখোয়গী তেংবাংবগী অপাম্বা লৈ। ঐখোয়গী মীদিয়াগী মরুপশিংনা মসিগী মতাংদা ৱারী কয়া শাদে, মরম অদুনা ঐহাক্না খুদম অমখক থমজনীংই। ত্রিপুরাদা পি.এম. অৱস য়োজনা গ্রামিনগী থবক হৌখিবা মতমদা, সরকারগী কচচা য়ুমগী ৱাহন্থোক্কা মরী লৈননা শিংনবা অমা লাকখি। মমাংগী সরকারনা জিংঘনা কুপ্পা য়ুমশিংদি কচচা য়ুম হায়না লৌরোই হায়বা ৱাফম অমা লৈরমখি। হায়বদি, য়ুম মনুংনা কয়ামুক ফত্তবা ওইরবসু, ফক্লাং অদুসু লৈবাক্না খাবা ওইরবসু, অদুগা য়ুম্থক্না জিংধনা কুপ্লবদি, য়ুম অদু কচচানি হায়রোই হায়বসিনি। মসিনা মরম ওইদুনা, ত্রিপুরাগী মীয়াম কয়ানা য়োজনা অসিগী কান্নবা ফংদনা লৈরমখি। ঐহাক্কী মরুপ বিপ্লব দেব জীনা হীরম অসিগী মতাংদা ঐহাক্কী নাক্তা লাকখিববু ঐহাক্না থাগৎচনীংই। কেন্দ্র সরকারগী মমাংদা ৱাফম খুদিংমক মহাক্না থমখি, খুদমগা লোয়ননা থমখি। মসিগী মতুংদগী, সরকারনা কাঙলোনশিংদা অহোংবা পুরকখি, ৱাহন্থোকসু ওন্থোকখি অমসুং মসিনা মরম ওইদুনা ত্রিপুরাগী লাইরবা ইমুং লাখ ১গা লিশিং ৮০ হেনবনা পক্কা য়ুমগী মপু ওইবা য়াখি। হৌজিক ফাওবগী ওইনা, ত্রিপুরাগী মীওই লিশিং ৫০ হেনবনা পক্কা য়ুম ফংবসু হৌখ্রে। ইমুং লাখ ১গা মখায়দসু ময়ুম শানবা অহানবা ইন্সতোল্মেন্তসু হন্দক্তা থাদোকখ্রে। মমাংগী সরকারনা করম্না থবক তৌরম্মি অমসুং হৌজিক্কী দবল ইঞ্জিন সরকারনা করম্না থবক তৌই হায়বসিগী মতাংদা অদোম্না হেন্না খঙলবনি।
ইচিল ইনাওশিং,
সেক্তর অমা চাউখৎপগীদমক্তা মরী লৈনবা খুদোংচাবা লৈবগী তঙাই ফদবগুম্না মফমদুগী মীওইশিংনা থবক পাংথোকপা ঙম্বগী মতিক লৈবগী চপ মান্ননা তঙাই ফদবা লৈ। ঐখোয়গী তুংগী হৌরক্কদবা চারোন শুরোনশিংনা ঐখোয়দগী হেন্না মতিক লৈবা অসি হৌজিক মতমগী অপাম্বনি। মসি য়াম্না তঙাই ফদবনি। ২১শুবা চহি-চা অসিদা ভারতপু মতমগা চুনহনবা ঙমগদবা মিৎয়েং শানবা নহা লৈহন্নবগীদমক্তা অনৌবা এজুকেসন পোলিসীদা অনৌবা কাঙলোন কয়া চৎনহনখি। মসিদা লোকেলগী লোলদা মহৈ তম্বীবগী হীরমসু অহেনবা মিৎয়েং চঙখি। হৌজিক্তি, ত্রিপুরাগী মহৈরোইশিংনা মিসন-১০০ বিদ্যা জ্যোতি কেম্পেনগী কান্নবা ফংলগনি। স্কুলশিংদা লুপা করো কয়া থাদদুনা লৈহল্লিবা হৌজিক্কী মতমগা চুনবা খুদোংচাবশিংনা মহৈ তম্ববু হেন্না লাইথোকহল্লগনি অমসুং মহৈ তম্বগী খুদোংচাবা ফংবসু হেনগৎহল্লগনি। মরু ওইবা খোঙথাং অমা ওইনা, স্কুলশিংদা অতল তিঙ্করিং লেব, আই.সি.তি. লেব অমসুং ভোকেস্নেল লেব লৈহল্লিবা অসিদগী ত্রিপুরাগী নহাশিংনা ইন্নোভেসন, স্তার্ত-অপ অমসুং য়ুনিকোর্নশিংগা লোয়ননা আত্মানির্ভর ভারত অমা ওইহনবা ঙম্নবা শেম শারগনি।
মরুপশিং,
কোরোনাগী অসুক য়াম্না তাঞ্জা অসিদসু ঐখোয়গী নহাশিংদা খুদোংচাদবা নংহন্দনবগীদমক্তা ঐখোয়না থৌরাং কয়া পায়খৎখি। হয়েংদগী লৈবাক শিনবা থুংবগী চহি ১৫দগী ১৮ ফাওবগী মীওইশিংদা লেম্না তীকা কাপ্পগী থবক হৌরগনি। মহৈ তম্লিবশিংনা মীপায়বা পোক্তনা মহৈ তম্বা, পরিখা তাবা ঙম্বা হায়বসি য়াম্না মরু ওইবনি। ত্রিপুরাদা তীকা কাপ্পগী থবকসু য়াম্না কন্না পায়খৎলি। মীওই ৮০% হেনবনা অহানবা দোজকী তীকা কাপ্নখ্রে অমসুং মীওই ৬৫%না অনিশুবা দোজ কাপ্নখ্রে। চহি ১৫দগী ১৮ ফাওবগী তীকা থাবগী পান্দম্বু ত্রিপুরানা খোঙজেল য়াঙনা ফংবা ঙমগনি হায়বগী ঐহাক্না থাজবা থম্মি।
মরুপশিং,
ঙসিদি, দবল ইঞ্জিন সরকার অসিনা খুঙ্গং ওইরো, শহর ওইরো, পুম্নমক্কী অমসুং চাং মান্ননা চাউখৎহন্নবা কন্না হোৎনরি। লৌউ-শিংউবদগী হৌরগা উমংগী পোত্থোক, সেল্ফ হেল্প গ্রুপ্তগী হৌরগা সেক্তর খুদিংদা পায়খৎলিবা থবকশিং অসিনা ঐখোয়গী খোঙফম চেৎপা অসিগী খুদম্নি। অপিকপা লৌমী, নুপীশিং নত্ত্রগা উমংগী পোত্থোক্কী মখা পোঞ্জবা ঐখোয়গী ত্রাইবেল মরুপশিং ওইরো, ঙসিদি মখোয়বু অমত্তা ওইনা পুন্সিন্দুনা অচৌবা পাঙ্গল অমা শেম্লি। ঙসি, ত্রিপুরানা বেম্বু কুকিজ কুম্বা পেক তৌরবা পোত্থোক লোঞ্চ তৌরিবা অসিগী মরুমদা ত্রিপুরাগী ইমা-ইবেল, ইচে-ইচলশিংগী অচৌবা থৌদাং লৈরি। লৈবাকপু সিঙ্গল য়ুজ প্লাস্তিক্তগী নিংতম্বা ফংহনবগী হীরমদা ত্রিপুরাগী অচৌবা থৌদাং য়াওরি। মফম অসিদা শারিবা ৱাগী শুমচিৎ, ৱাগী বোতল অমসুং অসিগুম্বা ৱাগী পোত্থোকশিংগী মালেমদা চাউরবা কৈথেল অমা লৈরক্লি। মসিগুম্বা ৱাগী পোত্থোক পুথোকপদগী মরুপ লিশিং কয়াগী থবক লৈনরি। ৱাগা মরী লৈনবা আইন্দা অহোংবা লাকপদা খ্বাইদগী কান্নবা ফংখিবশিংদি ত্রিপুরাগী মীয়ামনি।
মরুপশিং,
ত্রিপুরাদা ওর্গানিক ফার্মিংগী মতাংদসু য়াম্না ফজবা মওংদা থবক পায়খৎলি। কিহোম ওইরো, মনম নুংশিবা চেঙ ওইরো, য়াইঙং ওইরো, মোরোক ওইরো, মসিগা মরী লৈনবা লৌমীশিংগীদমক্তা লৈবাক অমসুং মালেমদা য়াম্না চাউরবা কৈথেল অমা লৈরে। ত্রিপুরাগী অপিকপা লৌমীশিংগী পোত্থোকশিং অসি ঙসিদি কিসান রেলগী খুত্থাংদা অগরতালাদগী দিল্লী য়াওনা অতোপ্পা শহর কয়াদা অহোঙবা ভারাদা অমসুং মতম য়াম্না চঙদনা য়ৌবা ঙম্লে। মহারাজা বির বিক্রম এয়রপোর্ত্তা চাউরবা কার্গো সেন্তর অমা শারিবা অসিনা মফমসিগী ওর্গানিক ফার্মিংগী পোত্থোকশিংবু মীরমগী কৈথেল ফাওবা য়াম্না লায়না য়ৌহনবা ঙম্লগনি।
মরুপশিং,
চাউখৎপগী হীরম খুদিংদা ত্রিপুরানা মাংজিল থাবগী হৈনবী অমা ঙসি লৈরিবসি ঐখোয়না ঙাক্তুনা থম্বগী মথৌ তাই। লৈবাক্কী মীচম মীয়াম, লৈবাক্কী অথাপ্পা মফমশিংদা লৈরিবা মীওই খুদিংনা লৈবাক্কী শেন্মিৎলোন চাউখৎপদা শরুক য়ানবা মপাঙ্গল লৈবা হায়বসি ঐখোয়গী ৱারেপ্নি। অসিগুম্বা ৱারেপশিং অসিদগী ইথিল লৌরদুনা ঐখোয়না হান্নদগী শরুক অনি হেন্না থবক তৌবা তাবনি। অদোমগী থাজবা, নুংশিবা অমসুং থৌজানবীবা অসিনা ঐখোয়গী খ্বাইদগী চাউরবা লন্নি। ঐহাক্না ঙসি এয়র্পোর্ত্তগী লাকপা মতমদা মীওই খুদিংনা নুংশিনা কৌরকপশিং তাখি, উখি। অদোমগী অসিগুম্বা নুংশিবীবা অসিবু ঐহাক্না দবল ইঞ্জিনগী পাঙ্গল অসিগী মতুং ইন্না শরুক অনি থোক্না চাউখৎপগী মওংদা হন্দোক্কনি। অদুগা ত্রিপুরাগী মীয়াম্না নুংশিবীরিবা অসিমক তুংদসু লেংদনা অদুমক নুংশিবীগনি হায়বগী থাজবা থম্লি। ঐহাক্না অদোম খুদিংবু চাউখৎপগী প্রোজেক্তশিং অসিগীদমক্তা থাগৎপা ফোংদোক্লি। ইমা ত্রিপুরাশুন্দরির নিকোত, আপ্নার পরিৱারের শোমৃধী, উরাজ্যের শারবিক বিকাস কাম্না কোরছি কে ধনবাদ...জান্তোনী হম্বাই! ভারত ইমানা য়াইফরে!!!
