ঙসি, অচৌবা থৌরম অসিদা লৈবাক শীনবা থুংনা শরুক য়ারে- জয় সেবালাল, জয় সেবালাল।
মহারাস্ত্রাগী রাজ্যপাল সি.পি রাধাকৃষ্ণন জি, চীফ মিনিস্তর একনাথ সিন্দে জি, কেন্দ্রগী মন্ত্রীমন্দলগী ঐগী মরুপশিং সিবরাজ সিংহ চৌহান, রজিব রঞ্জন সিংহ, মহারাস্ত্রাগী দিপুতি চীফ মিনিস্তর দেবেন্দ্র ফেনাবিস, অজিত পৱার, কেন্দ্র অমসুং রাজ্য সরকারগী অতোপ্পা মিনিস্তরশিং, এম.পিশিং, এম.এল.এশিং অমসুং অথাপ্পা মফম কয়াগী লাক্লিবা বঞ্জারা ফুরুপকী ইনাওশিং অমসুং ইচলশিং, লৈবাক শীনবা থুংবগী লৌমী ইনাওশিং অমসুং ইচলশিং, অতোপ্পা শক্নাইরবা মীওইশিং, মহারাস্ত্রাগীগী ঐগী ইনাওশিং অমসুং ইচলশিং, ৱাসিমগী শেংলবা লমদম অসিদগী পোহারাদেবী মাতাগী মফমদা ঐনা কোক নোঞ্জরি। ঙসি, নবরাত্রি মনুংদা, মাতা জগদম্বগী লাইশঙদা ঐনা ইমাগী থৌজাল ফংজরে। ঐনা সান্ত সেবালাল মহারাজ অমসুং সান্ত রাম-রাও মহারাজগী সমাধিশিংদা চৎলুরে অমসুং মখোয়দগী থৌজালশিং ফংলে। ফম্বাক অসিদগী, ঐনা শক্নাইরবা সাধু অনিমক্কী মফমদা ঐনা কোক নোঞ্জরি।
ঙসি অথৌবা লান্মী অমসুং গোন্দৱানা মহারানি দুর্গবতি জিগী মপোক নুমিৎনি। হৌখিবা চহিদা, লৈবাক অসিনা ৫০০শুবা মহাক্কী মপোক কুমওন পাংথোকখ্রে। ঐনা রানি দুর্গবতিগী মফমদা ইকায়খুম্নবা উৎচরি।
মরুপশিং,
ঙসি হরিয়ানাদা ভোৎ থাদনরি। মশিং য়াম্না ভোৎ থাদনবা ঐনা মরৈবাক নিংবা হরিয়ানাগী মীয়ামদা ঐনা হায়জরি। অদোমগী ভোৎনা হরিয়ানা চাউখৎপগী অনৌবা থাকশিংদা পুখৎকনি।
মরুপশিং,
শেংলবা নবরাত্রি মনুংদা, পি.এম কিষান সম্মান নিধিগী ১৮শুবা ইন্সতোলমেন্ত থাদোকপগী খুদোংচাবা ঐনা ফংলে। ঙসি, লৈবাক অসিগী লৌমী করোর ৯.৫ গী একাউন্তশিংদা লুপা করোর লিশিং ২০ চঙহনখ্রে। মহারাস্ত্রাগী দবল ইঞ্জিন সরকারনা রাজ্য অসিগী লৌমীশিংদা কান্নবা শরুক অনি পীরে। নমো সেতকারি মহাসম্মান য়োজনাগী মখাদা, মহারাস্ত্রাগী লৌমী লাখ ৯০ হেনবদা লুপা করোর ১৯০০ রোম পীখ্রে। ঙসি, লৌউ-শিংউ, শা-ষন লোইবা অমসুং ফার্মর প্রদুসর ওর্গনাইজেসন(এফ পি ও)গা মরী লৈনবা লুপা করোর চা কয়াগী প্রোজেকশিং মীয়ামদা কৎথোকখ্রে। পোহারাদেবীগী থৌজালগা লোয়ননা, লরকি বেহেন য়োজনাগী বেনিফিসরিশিংদা মতে পাংবগী খুদোংচাবা অমা ঐনা ফংলে। স্কিম অসিনা নারী শক্তিগী মপাঙ্গল হেনগৎহল্লে। মহারাস্ত্রাগী ইনাওশিং অমসুং ইচলশিং অমসুং লৈবাক অসিগী ইনাওশিং অমসুং ইচলশিং ঐনা হরাওবা ফোঙদোকচরি।
মরুপশিং,
ঙসি ঐনা মফম অসিদা লাক্ত্রিঙৈদা, ঐনা পোহারাদেবীদা বঞ্জারা হেরিতেচ ম্যুজিয়ম অমা শঙ্গাখ্রে। ম্যুজিয়ম অসিনা লৈবাক অসিগী তুংগী মীরোলশিংদা অরিবা চৎনবী অমা ওইরিবা, অচৌবা পুক্কৈ অমা ওইরিবা বঞ্জারা নাত মশক তাক্লগনি। ঐনা অদোমগী মফমদা হায়জরি, ফম্বাক্তা ফম্লিবশিংদা ঐনা হায়জর, ঙসি মফম অসি থাদোক্ত্রিঙৈদা বঞ্জারা হেরিতেচ ম্যুজিয়ম য়েংবীয়ু। ঐনা দেবেন্দ্র জি থাগৎপা ফোঙদোকচরি। অহানবা সরকার মনুংদা মসি শানবা ৱাফম মহাক্না হৌদোকখি অমসুং ঙসি ঐনা ম্যুজিয়ম অসি ফজনা শাবা উরে, ঐ অপেনবা ফাওই অমসুং হরাওই অমসুং অদোম্না মসি শোইদনা য়েংনবা ঐনা হায়জরি অমসুং মতম খরগী মতুংদা মসি য়েংনবা অদোমগী ইমুং-মনুংগী মীওইশিং য়েংহনগদবনি। পোহারাদেবীদা বঞ্জারা ফুরুপকী শক্নাইরবা মীওই খর উনরুবা মতুংদা ঐনা হল্লকপনি। মখোয়গী হেরিতেচ ম্যুজিয়ম অসিদা থমদুনা ইকায়খুম্নবা উৎপা অমসুং শকখঙবদা মখোয়না চাউথোকচবা অদু মখোয়গী মাইথোংশিংদা উবা ফংলে। বঞ্জারা হেরিতেচ ম্যুজিয়মগীদমক ঐনা অদোমগী মফমদা হরাওবা ফোঙদোকচরি।
মরুপশিং,
কনাগুম্বা অমতনা হংবীদ্রবা মীওইশিং মোদীনা লাৎলি। ভারতকী খুন্নাইগী পুন্সিদা, ভারত শেমগৎলকপগী খোঙচত্তা, ঐখোয়গী বঞ্জারা ফুরুপনা অচৌবা থৌদাং অমা লৌরি। হিরম খুদিংমক্তা, কলা ওইগরো, নাত ওইগেরা, অধ্যাতিক, লৈবাক্কী ঙাক-শেন, ললোন-ইতিক ওইগেরা, ফুরুপ অসিগী শক্নাইরবা মীওইশিংনা লৈবাক অসিগীদমক পাংথোকখিদবা করি লৈবগে? রাজা লখিসাহ বঞ্জারা মপান লৈবাক্কী লৈঙাকপশিংগী মীওৎ-মীনৈ অশুক্কী মতিক থেংনখি। লৈবাক্কী থবক তৌনবা মহাক্কী পুন্সি কৎথোকখি। সান্ত সেবালাল মহারাজ, শ্বামী হাথিরাম জি, সান্ত ঈশ্বর সিংহ বাপুজি, সান্ত দোক্তর রামরাও পাবু মহারাজ, সান্ত লক্সমন চাইত্যা পাবুজি য়াওনা, ভারতকী অধ্যতিক্কী মঙাল পীনবা অচৌবা শক্তি পীখিবা মশিং য়াম্লবা সাধুশিং ঐখোয়গী বঞ্জারা ফুরুপকী মীওইশিংনি। মীরোল অমগী মতুংদা মীরোল অমা, চহি চা অমসুং লিশিং কয়া, ফুরুপ অসিনা ভারতকী নাত অমসুং চৎনবীশিং ঙাক-শেন্দুনা লাক্লি। নিংতম লালহৌ মনুংদা, বৃতিস সরকারনা ফুরুপ অসি ফত্তবা থবক তৌবা মীওইশিংনি হায়না লাউথোকখি।
মরুপশিং,
নিংতম্লবা মতুংদা বঞ্জারা ফুরুপ য়েংশিনবা অমসুং মখোয়দা উৎফম থোকপা ইকায়খুম্নবা উৎপা অসি লৈবাক অসিগী থৌদাংনি। মতম অদুদা কংগ্রেস সরকারনা করি তৌবীখিবগে? কংগ্রেসকী থৌশিলশিংদগী ফুরুপ অসি জাতিগী ইচেলদা তোখাই তাহনখি। নিংতম্লবা মতুংদা ইমুং অমনা কংগ্রেস দল পায়খিবদগী অহৌবদগী হৌনা মপান লৈবাক্কী ৱাখল্লোন অমা চেনবা হৌখি। বৃতিস সরকারগুম্না, কংগ্রেসকী ইমুং অসিনা দলিতশিং, তোল্লবশিং অমসুং ত্রাইবেলশিং মখোয়গা চপ মান্নৈ হায়না খনখিদে। বৃতিসনা মসিগী হক অসি মখোয়দা পীরম্বা মরমনা ভারত অসি ইমুং অমা খক্তনা পানগদবনি হায়না মখোয়না খল্লি। মরম অদুনা হায়রিবা মীওইশিং অসিনা মতম পুম্নমক্তা বঞ্জারা ফুরুপতা হন্থবা মীৎয়েং অমা য়েংলিবনি।
মরুপশিং,
কেন্দ্রগী এন.দি.এ সরকারনা নোমেদিক অমসুং সেমি-নোমেদিক ফুরুপশিংগী ৱেলফিয়ার বোর্দ অমা শেম্লে। খুন্নাই অসিগী নাত অমসুং চৎনবীদা উৎফম থোকপা ইকায়খুম্নবা উৎনবা বি.জে.পি সরকার অমসুং এন.দি.এ সরকারনা লেপ্তনা থবক পায়খৎলি। চাউখৎপগী খোঙচেল য়াংখৎলকপগা লোয়ননা, রাজ্য সরকারনা সান্ত সেবালাল মহারাজ বঞ্জারা তান্দা সমরিধি অভিয়ানশু হৌদোক্লে।
মরুপশিং,
পায়খৎলিবা থবকশিং অসিগী মরক্তা, কংগ্রেস অমসুং মহা-অঘাদিনা অদোমদা য়েংলিবা মীৎয়েং অদু অদোম নিংশিংলমগনি। ফদনাবিসনা চীফ মিনিস্তর ওইবা মতমদা, পোহারাদেবী লাইফম শেমগৎনবা থৌরাং অমা তৌখি। অদুবু, তাঞ্জা অদুদা মহা-অঘাদি সরকার লাকখি অমসুং মসিগী থবক অসি থিন্থখি। সিন্দে জিনা লুচিংবা সরকার লাকপদগী পোহারাদেবী লাইফম শেমগৎপগী থবক খুমাঙচাউশিল্লে। ঙসি, স্কিম অসিগীদমক লুপা করোর ৭০০ চাদিং তৌরে। লাইফম অসি শেমগৎপা অসিনা ভক্তিশিংদা নুংঙাইহল্লগনি অমসুং মসিগী অকোয়বদা লৈরিবা মফমশিংগী চাউখৎ-থৌরাং য়াংখৎহল্লগনি।
মরুপশিং,
বি.জে.পিনা দল অসিগী থৌশিলশিংগা লোয়ননা খুন্নাইগী তোল্লবশিং পুখৎলকপা পাম্মী। অদুগা, কংগ্রেসনা কমদৌনা হুরানগদগে হায়বা খক খঙই। লায়রবশিং লায়রনা হিংবা কংগ্রেসনা পাম্মী। মপাঙ্গল শোনবা অমসুং লায়রবা ভারত কংগ্রেসকা চুনৈ অমসুং দল অসিগী রাজনিতি অসি মসিদা ফজনা পাংথোকই। মরম অদুনা অদোম্না কংগ্রেসতকী য়াম্না চেকশিনগদবনি। ঙসিদি, কংগ্রেস অর্বান নেক্সালশিংগী কাংবু অমনা মপুংফানা থবক তৌরে। করিগুম্বা মীওই খুদিংমক অমতা ওইরবদি, লৈবাক অসি থুগায়না মখোয়গী পান্দম মাইথিরগনি হায়না কংগ্রেসনা খল্লি। মরম অদুনা, মখোয়না মখোয় মশেল মরক্তা খৎনবা মখোয়না পাম্মী। কংগ্রেসকী খুদোংথিনিঙাই ওইরবা পান্দমশিং কনানা শৌগৎলিবগে হায়বা লৈবাক শীনবা থুংনা য়েংলি। ভারত চাউখৎপা পামদবা মীওইশিং হৌজিক কংগ্রেসকী অচেৎপা মরুপশিং ওইরে। মরম অদুনা, হৌজিক অমতা ওইনা পুনবগী মতম অদু লাক্লে। ঐখোয়গী অপুনবা খক্তনা লৈবাক অসি কনবা ঙমগনি।
মরুপশিং,
কংগ্রেসকী অতোপ্পা থবক অমা মহারাস্ত্রাগী মীয়ামদা খঙহনবা ঐনা পাম্মী। হন্দক দিল্লিদা লুপা করোর লিশিং কয়াগী দ্রগশিং ফাবগী পাউ অদোম তারম্লগনি। হায়রিবা দ্রগশিং অদুগী মপু কনা ওইরমগনি? মসিগী লুচিংবা কংগ্রেসকী লুচিংবা অমনি। নহারোলশিং দ্রগ পীজদুনা অমসুং শেন পীদুনা মীখল থেংনবা অমসুং মাইপাকপা কংগ্রেসনা পাম্মী। মসিগী খুদোংথিবা অসি ঐখোয়না খঙগদবনি। মসিগী লানফম অসি অপুনবা ওইনা ঐখোয়না মাইপাক্কদবনি।
মরুপশিং,
ঙসিদি, ঐখোয়গী সরকারগী ৱারেপ খুদিংমক, থৌশিল খুদিংমক বিকসিত ভারতকীদমক কৎথোক্লে। বিকসিত ভারতকী অচৌবা য়ুম্ফম অসি ঐখোয়গী লৌমীশিংনি। ঙসিদি লৌমীশিংগী য়াইফনবা অচৌবা থবকশিং পায়খৎলে। ঙসি ফার্মর প্রদুসর ওর্গনাইজেসন ৯২০০ লৈবাক অসিগী মীয়ামদা কৎথোক্লে। ঙসি লৌউ-শিংউগী ইনফ্রাস্ত্রকচর প্রোজেক কয়াশু শঙ্গারে। হায়রিবা প্রোজেকশিং অসিনা লৌউ-শিংউগী পোৎথোকশিং থমফম, শেম-শাবা অমসুং মেনেজমেন্তগী কেপাসিতি হেনগৎহল্লগনি। হায়রিবা থবকশিং অসিনা লৌমীশিংগী শেন্থোক হেনগৎহনবদা মতেং পাংলগনি। মহারাস্ত্রাদা লৌমীশিংগী এন.দি.এ সরকারগী মখাদা খুদোংচাবা শরুক অনি ফংলে। একনাথ সিন্দে জি সরকারনা লৌমীশিংগীদমক ইলেক্ত্রিসিতি বিল জিরোদা হন্থহল্লে।
মরুপশিং,
মহারাস্ত্রা অমসুং বিদরভাগী লৌমীশিং চহি কয়া অৱাবা কয়া মায়োক্নদুনা লাক্লি। লৌমীশিং লায়রনা অমসুং তোন্না হিংনবা কংগ্রেস সরকারনা হোৎনবা য়াবা হোৎনদনা তোকখিদে। রাজ্য অসিদা মহা-অঘাদি সরকার লৈরিবমখৈ, মসিগী পান্দম অনি লৈরি। অহানবা পান্দমদি, লৌমীশিংগা মরী লৈনবা প্রোজেকশিং লেপহনবা। অনিশুবদা, হায়রিবা প্রোজেকশিং অসিদগী শেঞ্জা-থুমজা তৌদুনা শেন তানবনি। ঐখোয়না কেন্দ্রদগী মহারাস্ত্রাগী লৌমীশিংগী শেন থাখি অদুবু মহা-অঘাদি সরকারনা মদু য়েন্থোক্নখি অমসুং শীজিন্নখি। কংগ্রেসনা মতম পুম্নমক্তা লৌমীশিংগী পুন্সি অৱাবা তাহনখি। দল অসিনা ঙসি ফাওবা হান্নগী অরিবা গেম অদু শান্নরি। মরমদি কংগ্রেসনা পি.এম-কিষান সম্মান নিধি য়োজনা পামদে। কংগ্রেসনা য়োজনা অসি নোক্নরি, লৌমীশিংদা শেন পীবা থিংলি। মরমদি, লৌমীশিংগী একাউন্তশিংদা চঙখিবা শেনফমশিং মখোয়না লৌবা ফংলরোই। য়ুম্লোন্নরিবা রাজ্য কর্নাতকাগী ফিবম ঙসি য়েংউ। মহারাস্ত্রাগী মহায়ুতি সরকারগুম্না, কর্নাতকাদা বি.জে.পি সরকারনা লৌমীশিংদা শেন পীরি। কর্নাতকাদগী বঞ্জারা ইমুং কয়া মফম অসিদা শরুক য়ারি। কর্নাতকাদা কংগ্রেস সরকার হেক লাকপদগী, মখোয়না লৌমীশিংদা শেন পীবা লেপখ্রে। রাজ্য সরকার অসিনা ইরিগেসনগী প্রোজেক কয়া লেপহনখ্রে। কংগ্রেসনা কর্নাতকাদা মরুশিংগী মমল হেনগৎহল্লে। মীখল মমাঙদা লোন কোকপীগনি হায়না অরানবা থাজবা পীবা অসি কংগেসনা হৈনজবা থোক্নি। তেলঙ্গানাদা, হায়রিবা মীওইশিং অসিনা লোন কোকপীগনি হায়না ৱাশক্তুনা সরকার পায়রকখি। সরকার শেমখিবা মতম য়াম্না কুইরে। করিগীদমক মখোয়গী লোনশিং কোকপীদ্রিবনো হায়না লৌমীশিংনা হৌজিক হংলি।
মরুপশিং,
ঐখোয়না মহারাস্ত্রাদশু কাওরোইদবনি, কংগ্রেস অমসুং মহা-অঘাদি সরকারনা ইরিগেসনগা মরী লৈনবা থবক কয়া লেপহল্লে। এন.দি.এ সরকার লাকপা মতমদা, মসি য়াংনা পায়খৎখি। মহারাস্ত্রা সরকারনা ৱাইনগঙ্গা-নালগঙ্গা তুরেলশিং শম্নহন্নবা থৌরাং অমা অয়াবা পীখ্রে। লুপা করোর লিশিং ৯০ রোমগী প্রোজেক অসিনা অমরাবতি, য়াবতমাল, অকোলা, বুলধানা, ৱাসিম, নাগপুর অমসুং ৱার্ধাদা ঈশিংগী অৱাবা কোকহনগনি। লশিং অমসুং নুংহৱায় থাবা লৌমীশিংদা মহারাস্ত্রা সরকারনা মতেং পীরি। লশিং অমসুং নুংহৱায় থাবা লৌমী অমমমদা লুপা লিশিং ১০ পীরে। হন্দক অমরাবতিদা তেক্সতাইল পার্ক শানবা উরেপ-উয়ুং তমখ্রে। হায়রিবা পার্ক অসিনা লশিং থাবা লৌমীশিংদা মতেং পাংগনি।
মরুপশিং,
লৈবাক অসিগী শেন-থুম চাউখৎহনবদা মাংজিল থানবা ঐখোয়গী মহারাস্ত্রাগী খুদোংচাবা কয়া লৈরি। লৌমীশিং, শিন্মীশিং, দলিতশিং, তোল্লবশিং অমসুং মীওই খুদিংমক মপাঙ্গল কনখৎহল্লবা মতমদা মসি ওইথোক্কনি। অদোমগী থৌজালশিং মখা তানা পীগনি হায়বগী থাজবা ঐনা থম্লি। ঐখোয় অমতা ওইনা বিকসিত মহারাস্ত্রা অমা অমসুং বিকসিত ভারত অমগী মঙলান মঙফাওনবা ঙমগনি। ঐনা অমুক হন্না ঐখোয়গী লৌমীশিং অমসুং ঐগী বঞ্জারা ইনাওশিং অমসুং ইচলশিং থাগৎপা ফোঙদোকচরি।
ঐগা লোয়ননা হায়মিন্নসি
ভারত মাতা কি জয়!
ভারত মাতা কি জয়!
ভারত মাতা কি জয়!
অদোম থাগৎপা ফোঙদোকচরি।
