সোমনাথ... হায়রিবা ৱাহৈ অসি তাবদা ঐখোয়গী থমোয় অমসুং ৱাখলদা চাউথোকচবা ফাওই। মসি ভারতকী মরুওইবা মফম অমনি। মসিগী অঙকপা লাইশঙ অসি ভারতকী নোংচুপ থংবা সমুদ্র খোঙবালদা গুজরাতকী প্রভাস পতান কৌবা মফম অমদা লৈ। দৱাদশা জ্যোতির্লিং স্তোত্রমদা ভারত শিনবা থুংনা জ্যোতির্লিং 12 লৈ হায়না পল্লি। স্তোত্রম অসিদা অহানবা ওইনা “सौराष्ट्रे सोमनाथं च..”, হায়বদি অহানবা জ্যোতির্লিং ওইনা সোমনাথকী সিভিলাইজেস্নেল অমসুং স্পিরিচুএলগী মরুওইবা অদুগী খুদম ওইনা পল্লি।
অসুম্নসু হায়নৈ:
লাইবক থিবদি, মীওই করোর কয়াগী ইকায় খুম্নবা অমসুং লাই খুরুফম ওইরিবা মসিগী সোমনাথ অসি থুগাইবগী ৱাখল্লোন্দা থাজবা লাই খুরুমজবদা থাজবা লৈতবা মপানগী লান্মীশিংনা লান্দারকখি।
কুমজা 2026 অসি সোমনাথ লাইশঙগীদমক য়াম্না মরুওইবা অমনি। মসিগী মরুওইবা লাইশঙ অসিদা অহানবা লান্দারকপগী চহি 1000 শুখ্রে। 1026গী জনুৱারীদা গজনীগী মহমুদনা লাইশঙ অসিদা লান্দারকখি, থাজবা অমসুং সিভিলাইজেসনগী অচৌবা খুদম অমা হিংসা অমসুং তমথিবা ইথিলগী খুত্থাংদা মাংহন্নবা হোৎনখি।
অদুম ওইনমক, চহি লিশিং অমগী মতুংদা, সোমনাথপু মাগী অঙকপা মওংদা অমুক হন্না শেমগৎনবা হোৎনখিবগী মতুং ইন্না, লাইশঙ অসি মমাংদগী লৈরম্বা মতৌগুম্না শিংথানিংঙাই ওইদুনা লৈরি। অসিগুম্বা মায়পাকপা অমা ওইনা 2026তা চহি 75 মপুং ফারগনি। মসি মে 11, 1951দা পাংথোকখিবা থৌরম অমদা মতমদুগী ভারতকী রাস্ত্রপতি, দোক্তর রাজেন্দ্র প্রসাদনা শরুক য়ারদুনা নৌনা শেমজিল্লবা লাইশঙ অসিনা ভক্তশিংগীদমক থোঙ হাংদোক্লে।
চহি 1026কী মমাংদা সোমনাথকী অহানবা লান্দারকপা, শহর অদুগী মীয়ামদা চত্থখিবা তমথিবা মীওৎ মীনৈ অমসুং লাইশঙ অদুবু মাংহন তাকহন্নবা হোৎনখিবা থৌদোকশিং অসি পুৱারীগী তোঙান-তোঙানবা ৱারীশিংদা কুপ্না ইরি। অদোম্না মসিবু পাবা মতমদা, অদোমগী থমোয়দা অকিবা পোক্কনি। ৱাহৈ পরেং খুদিংমক্তা তেংথাখোল, তমথিবা অমসুং মতমগী মতুং ইন্না মাঙখিদ্রবা অৱাবা কয়া অমা য়াওরি।
মসিনা ভারত অমসুং মীয়ামগী থৌনাদা করি শাফু পীবগে হায়বদু খন্দুনা য়েংসি। পুম্নমক্কী মথক্তা, সোমনাথ অসি চাউরবা লাইনিংগী ওইবা মরুওইবা মফম অমনি। মসি সমুদ্রগী লম্বীদসু লৈরম্মি, মসিনা শেন্মিৎলোনগী লমদা য়াম্না শক্তি লৈরম্বা খুন্নাই অমা শেমগৎলম্মি, মসিগী সমুদ্রগী ললোন-ইতিক তৌবা মীওইশিংনা মফম অসিগী শিংথানিংঙাই ওইরবা শক্তমশিং অদু মতম চুপ্পদা শৈথাদুনা লাক্লি।
অদুম ওইনমক, অহানবা লান্দারক্লবা চহি লিশিং অমগী মতুংদা, সোমনাথকী ৱারী অসি মাং-তাকহনবনা মশক তাক্তে হায়বদা ঐহাক্না চাউথোকচবা ফাওই। মসিনা ভারত ইমাগী মচা কোতি কয়াগী অচেৎপা থৌনাগী মশক তাক্লি।
চহি লিশিং অমগী মমাংদা 1026 হৌখিবা ময়াই চনবা মতমগী হিংসাগী থৌদোক অসিনা অতোপ্পা মীওইশিংনা সোমনাথপু হন্না হন্না লান্দারক্নবা পুক্নিং থৌগৎখি। মসি ঐখোয়গী মীয়াম অমসুং চৎন-লোনচৎপু খুদুম চন্নবা হোৎনবগী হৌরকফম্নি। অদুবু, লাইশঙ অসিদা লান্দারকপা খুদিংগী, মসিবু ঙাকথোক্নবা হোৎনখিবা অমসুং থৱাই ফাওবা কত্থোকখিবা ঐখোয়গী থৌনা ফরবা মপারি মমোম কয়ারুম লৈরমখি। অদুগা মতমগী মতুং ইন্না, চারোন-শুরোন কয়াগী খুত্থাংদা, ঐখোয়গী চাউরবা সিভিলাইজেসনগী মীওইশিংনা মখোয় মশানা খোঙফম চেৎনা লেপতুনা, লাইশঙ অসি অমুক হন্না শেমগৎ শাগৎখি। সোমনাথতা ভক্তশিংনা লাই খুরুম্বা ফংহন্নবা হোৎনখিবা অহিলয়াবাই হোলকরগুম্বা শক্নাইরবশিংবু পোকহনখিবা, অসিগুম্লবা লমদম অসিদা পোকপা অসি ঐখোয় পুম্নমক্কী লাইবক ফবা অমনি।
ইং 1890গী মতমদা, স্বামী বিবেকানন্দনা সোমনাথতা চৎখি অমসুং মসিদা থেংনরকপা অদুনা মহাকপু পুক্নিং থৌগৎখি। মহাক্না ইং 1897দা চেন্নাইদা লেকচর অমা পাংথোকপা মতমদা মহাক্কী ৱাখল্লোন অদু ফোংদোকখি, মহাক্না হায়খি, "খা ভারতকী ভারতকী অরিবা লাইশঙশিং অমসুং গুজরাতকী সোমনাথকুম্বা লাইশঙশিং অসিনা অদোমদা লৌশিং কয়ামরুম অমা তাকপীগনি, লাইরিক কয়াদগী হেন্না জাতিগী পুৱারীগী মতাংদা অদোমদা লৌশিং কয়ামরুম পীগনি। লাইশঙশিং অসিনা চামারক লান্দারকপা অমসুং চামারক নৌনা শেমগৎলকপা কয়াগী খুদম কয়া অমা লৈ, লেপ্পা লৈতনা মাংহনবা অমসুং মতম পুম্নমক্তা মাংখিবা অদুদগী নৌনা শেমগৎলকপা অমসুং হান্নদগী হেন্না মগুন লৈহনবগী মশক অদু খঙজিনগদবনি! মসি জাতিগী ৱাখল্লোন্নি, মসি জাতিগী চৎন-লোনচৎনি। মদুগী মতুং ইনবা ঙমলবদি মাই পাকপা ফংগনি। মদু থাদোক্লবদি নহাক শিগনি; শিবা হায়বসি অদোমগী অমত্তা ঙাইরবা ফল ওইগনি, অদোম্না পুন্সিগী অশেংবা শক্তম অদুগী ৱাংমদা খোঙ থাংলকপা মতমদা, অমত্তা ঙাইরবা মাই পাকপগী মহৈ ওইনা ফংগনি।
নীংতম্লবা মতুংদা সোমনাথ লাইশঙ অসি অমুক হন্না শাগৎপগী থৌদাং অসি সরদার বল্লভভাই পতেলনা লৌখি। ইং 1947গী দিৱালীগী মতমদা চৎখিবা খোঙচৎ অমনা মহাকপু য়াম্না পুক্নিং চিংশিনখি অমসুং মহাক্না মফম অদুদা লাইশঙ অদু অমুক হন্না শেমগৎলগনি হায়না লাউথোকখি। অরোইবদা, মে 11, 1951দা, সোমনাথকী চাউরবা লাইশঙ অমা ভক্তশিংগীদমক্তা হাংদোকখি অমসুং দোক্তর রাজেন্দ্র প্রসাদসু থৌরম অদুদা শরুক য়াখি। শক্নাইরবা সর্দার সাহিবনা পুৱারী ওইরবা নুমিৎ অসি উবা ফংলরোই, অদুবু মহাক্কী মঙলান অদু মপুং ফাহনবগী থৌওং অসি লৈবাক পুম্বগী মমাংদা উবা ফংহল্লগনি। মতমদুগী প্রধান মন্ত্রী, পন্দিৎ জৱাহরলাল নেহরুদি মসিগী থৌরাং অসিদা পুক্নিং থৌগৎখিদে। মহাক্না ইকাই খুম্নরবা রাস্ত্রপতি অমসুং মন্ত্রীশিংবু অখন্নবা থৌরম অসিগা মরী লৈনহন্নবা পামখিদে। মহাক্না অখন্নবা থৌরম অসিদা ইকাই খুম্নরবা রাস্ত্রপতি অমসুং অতোপ্পা মন্ত্রীশিং শরুক য়াবা পামখিদে। অদুবু দোক্তর. রাজেন্দ্র প্রসাদনা থাজবা থমখি অমসুং মদুগী মতুংদা পুৱারী ওইখি। সর্দার পতেলবু য়াম্না কান্নবা মওংদা মতেং পাংখিবা কে.এম. মুন্সিগী হোৎনবশিং নীংশিংদনা সোমনাথকী ৱারোল অমত্তা মপুং ফাদে। মহাক্কী সোমনাথকী মতাংদা ইখিবা লাইরিক, "সোমনাথঃ দি শ্রাইন ইতর্নেল" অসি য়াম্না ইনফোর্মেতিব অমসুং এজুকেতিব ওই।
তশেংনমক, মুনশি জিগী লাইরিক্কী মমিং অসিনা তাকপগুম্না, ঐখোয় অসি লাইনিং লাইশোল অমসুং মতম চুপ্পগী ওইবা চাউখৎপগী ৱাখল্লোন লৈ হায়না থাজবা থম্লিবা সিভিলাইজেসন অমনি। ঐখোয়না থাজবা থম্লি মদুদি মতম চুপ্পগী পুক্নিংদা লৈরবা থাজবা অসি মুৎথৎপা য়ারোই, গীতাগী মমিং লৈরবা ৱাহৈদা পল্লিবা অসুম্না “नैनं छिन्दन्ति शस्त्राणि…”. খুদোংচাদবা অমসুং লান্থেংনবশিংবু মায়োক্নদুনা, শিংথানিংঙাই ওইনা লেপ্লিবা সোমনাথ অসিদগী হেন্না ঐখোয়গী সিভিলাইজেসন অসিগী শিংথানিংঙাই ওইরবা খুদম অমত্তা লৈতে।
চহি চা কয়া লান্দারকপা অমসুং মীনাই নাইথাংগী অৱাবা কয়া মায়োক্নদুনা লাক্লবা মালেমগী চাউখৎপগী খ্বাইদগী মঙাল লৈবা মফম অমা ওইরিবা ঐখোয়গী লৈবাক অসিদা অদুমক হায়রিবা ৱাখল্লোন অসি উবা ফংলি। ঐখোয়গী ভেল্যু সিস্তেম অমসুং ঐখোয়গী মীয়ামগী অচেৎপা ফিরেপ অসিনা ঙসি ভারত অসি মালেমগী মীৎয়েং চিংশিল্লি। মালেম অসিনা ভারতপু আশা অমসুং থাজবগা লোয়ননা উরি। মখোয়না ঐখোয়গী ইন্নোবেতিব ওইরবা নহাশিংদা ইনবেস্ত তৌবা পাম্মি। ঐখোয়গী আর্ত, কলচর, ম্যুজিক অমসুং হরাও কুহ্মৈ কয়া মালেম শীনবা থুংনা শন্দোক্লি। য়োগ অমসুং আয়ুর্বেদনা মালেম শীনবা থুংনা শাফু পীরি, মসিনা হকচাং ফনা হিংবদা মতেং পাংলি। মালেমগী খ্বাইদগী খুদোংচাদবা শিংনবশিং অসিগী সোলুসনশিং অসি ভারতনা পীরি।
মতম কয়াগী মমাংদগী, সোমনাথনা পুন্সিগী তাঙ্কক কয়াগী মীওইশিংবু পুনশিন্দুনা লাক্লি। চহি চা কয়াগী মমাংদা, শক্নাইরবা জৈন লাইনিংবা, কালিকাল সরৱাগনা হেমচন্দ্রচার্যনা সোমনাথতা লাকখি। মফম অদুদা লাই খুরুম্লবা মতুংদা মহাক্না “भवबीजाङ्कुरजनना रागाद्याः क्षयमुपगता यस्य।” হায়বা ৱাহৈ অমা হায়রম্মি। মসিগী ৱাহন্থোক্তি - মালেমগী মাংহন তাকহনবগী ৱাখল্লোনশিং অসি, নুংশিবা অমসুং অৱা-অনা পুম্নমক কোকপিবা ঙম্বগী মতিক অদুনা মাংহনবা ঙম্মি। ঙসিসু, সোমনাথনা ৱাখল অমসুং থম্মোয়গী মনুংদা লৈবা অঙকপা করিগুম্বা অমবু পুথোরকপা ঙম্বগী মতিক অদু লৈরি।
1026তা অহানবা লান্দারক্লবা চহি লিশিং অমগী মতুংদা, সোমনাথকী সমুদ্র অসি মতম অদুদা ওইরম্বা মওংদা অদুমক মতিক ময়াই চেন্দুনা লৈরি। সোমনাথকী তোর্বানবু চামথোক্লিবা ইথক ইপোম অদুনা ৱারী অমা শাগৎলি। থৌদোক কয়া থোকখ্রবসু ইথক ইপোমগুম্না মসিনা হেন্না হেন্না ফজবা হেনগৎলক্কনি।
মমাংগী মতমদা লান্দারকখিবা মীওইশিং অসি হৌজিক্তি নুংশিৎতা য়াওবা উফুলগা পানখক ওইরে, মখোয়গী মমিংশিং অসি মাং-তাকহনবগা মান্নৈ। মখোয়শিং অসি পুৱারীদা য়াওবা ফুতনোতশিং ওইনা লৈহৌরগনি অদুগা সোমনাথ অসিনা মশেক মঙাল থোক্না, মালেম পুম্বগী ওইনা মশক থোক্না, 1026তা লান্দারকখিবা থৌদোক অদুনা মাংহনবা ঙমখিদ্রবা মুৎনাইদ্রবা ৱাখল্লোন অদুবু নিংশিংদুনা লৈরগনি। সোমনাথ অসি আশাগী ঈশৈ অমনি মসিনা ঐখোয়দা হায়রি মদুদি নুংশিদবা অমসুং ফেনাতিজিমনা মতম খরগী ওইনা মাংহনবা ঙম্বা য়াই অদুবু অফবগী শক্তিদা থাজবা থম্বা অসিনা মতম চুপ্পগী ওইনা শেমগৎপগী শক্তি লৈ।
চহি লিশিং কয়াগী মমাংদা লান্দারকখিবা অমসুং মদুদা লেপ্পা লৈতনা লান্দারকখিবা সোমনাথ লাইশঙ অসি অমুক্কা হন্না শেমগৎপা ঙম্লবদি, ঐখোয়না ঐখোয়গী চাউরবা লৈবাক অসিবু চহি লিশিং কয়াগী মমাংদা লান্দারকপশিং অদুগী মমাংদা লৈরম্বা মগুন অদু অমুক্কা হন্না ফংবা ঙমগনি। শ্রী সোমনাথ মহাদেবকী য়াইফ-মঙ্গোলগা লোইননা, মালেম পুম্বগী য়াইফনবগীদমক থবক তৌনবা ঐখোয়বু লমজিংলিবা সভ্যতাগী লৌশিংনা লমজিংলিবা বিক্সিৎ ভারত অমা শেমগৎনবা ঐখোয়না অনৌবা ৱারেপ লৌদুনা মাংলোমদা চংশিল্লি।
জয় সোমনাথ!
