জপানগী প্রধান মন্ত্রী ফুমিও কিসিদানা চেবাউ পীরকপদগী, জপান্না প্রসিদেন্দ ওইরিবা জি-৭ মীফম শরুক য়ানবা জপানগী হিরোসিমাগীদমক ঐনা খোঙশাল্লগনি। ভারত-জপান মীফম শরুক য়ানবা হন্দক মহাক ভারত্তা লাক্লম্লবা মতুংদা অমুক হন্না প্রধান মন্ত্রী কিসিদাগা উনবা অসি য়াম্না নুংঙাইবা অমা ওইগনি। চহি অসিদা ভারতনা জি-২০গী প্রসিদেন্দ ওইবনা হন্দক্কী জি-৭ মীফমদা ঐনা শরুক য়াবা অসি ভারতকী ওইনা য়াম্না মরুওই। মালেম্না মায়োক্নরিবা অৱাবশিং অমসুং মখোয় থেংন্নবা অপুনবা ওইনা থবক তৌমিন্নবগী মতাংদা জি-৭ লৈবাকশিং অমসুং অতোপ্পা লৈবাকশিংগা ৱারি শানগনি হায়না ঐনা থাজবা থম্লি। ঐনা হিরোসিমা জি-৭ মীফম শরুক য়ারিবা লুচিংবা খরগা নাকল অনিগী ওইবা ৱারি শানগনি।
জপান্দগী ঐনা পোর্ত মোরসবে, পাপুৱা নিউ গুইনিয়াদা চৎকনি। মসি ঐগী অহানবা খোঙচৎ ওইগনি, ভারতকী প্রধান মন্ত্রী অমনা পাপুৱা নিউ গুইনিয়াদা চৎপা অহানবা ওইগনি। ঐনা মে ২২,২০২৩দা পাপুৱা নিউ গুইনিয়াগী প্রধান মন্ত্রী জেমস মারাপেগা লোয়ন্না ৩শুবা ফোরম ফোর ইন্দিয়া-পেসিফিক আইলেন্দস কোওপরেসন(ফিপিক ৩ সম্মিৎ) পুন্না শরুক য়াগনি। মসিগী মরুওইবা মীফম অসি শরুক য়ানবা চেবাউ পীবদা পেসিফিক আইলেন্দ কন্ত্রি ১৪ (পি আই সি) শরুক য়ানবা অয়াবা পীরকপদা ঐ হরাওই। ২০১৪দা ঐগী ফিজি খোঙচৎ মনুংদা মীফম অসি হৌদোকখি অমসুং অইং-অশাগী ফিবম হোংলকপা, তুংকোইনা চৎনগদবা চাউখৎ-থৌরাংগী থবকশিং, কেপাসিতি বিল্দিং, ত্রেনিং, হকশেল, ইনফ্রাস্ত্রকচর অমসুং শেন-থুমগী মতাংদা পেসিফিক আইলেন্দ কন্ত্রি লুচিংবশিংগা ৱারি শানগনি অমসুং পুন্না থবক তৌমিন্নগনি হায়না ঐনা থাজবা থম্লি।
ফিপিক মীফমগী থবকশিংগী মথক্তা, ঐনা পাপুৱা নিউ গুইনিয়াগী গভর্নর জেনেরেল বোব দাদে, প্রধান মন্ত্রী মরাপে অমসুং পি.আই.সি লুচিংবা খরগা ৱারি শানগনি।
মতুং তারকপদা, প্রধান মন্ত্রী অলবানিসনা চেবাউ পীরকপদগী ঐ অস্ত্রেলিয়াগী সিদনিদা চৎকনি। চহি অসিগী মার্চ থাদা নিউ দিল্লিদা পাংথোকখিবা অহানবা ইন্দিয়া-অস্ত্রেলিয়া এন্নুয়েল সম্মিৎগী মখা চৎথরকপা অমসুং ঐখোয়গী লৈবাক অনিগী মরীশিংগী মতাংদা খন্ননবা ঐখোয়গী নাকল অনিগী মীফমশিংনা খুদোংচাবা ফংগনি হায়না ঐনা থাজবা থম্লি। ঐনা অস্ত্রেলিয়াগী সি.ই.ওশিং অমসুং ললোন-ইতিক্কী লুচিংবশিংগা ৱারি শানগনি অমসুং অখন্নবা থৌরম অমদা সিদনিদা লৈবা ভারতমচাশিংগা উনগনি।
