রাস্ত্রপতি জোসেফ বাইদেন অমসুং ফার্স্ত লেদি দোক্তর জিল বাইদেন্না চেবাউ পীরকপদগী লৈঙাক্কী খোঙচৎ অমদা ঐ য়ুনাইতেদ স্তেৎস ওফ অমেরিকাদা চৎলি। মসিগী অখন্নবা চেবাউ অসি ঐখোয়গী লৈবাক অনিগী মরক্তা লৈনরিবা অচেৎ মরুপ-মপাং ওইবা মরী ফগৎলকপগী মমি অমনি।
ঐনা নিউ য়োর্কতগী ঐগী খোঙচৎ হৌগনি, মফম অদুদা জুন ২১ দা য়ুনাইতেদ নেসন্স হেদক্বাতর্সদা য়ু.এনগী লুচিংবশিং অমসুং মালেমগী লৈবাকশিংগী মীয়ামগা লোয়ন্না মালেমগী য়োগ নুমিৎ পাংথোক্কনি। মালেমগী য়োগ নুমিৎ শক খঙনবা ভারতনা পুখৎখিবা ৱাফম শৌগৎখিবা মফম অদুদা মসিগী অখন্নবা থৌরম পাংথোকপা অসিদা ঐনা থাজবা থম্লি।
তুংদা ঐ ৱাশিংতন দি.সিদা চৎকনি। ২০২১গী সেপ্তেম্বরদা ঐগী ইকোন কোনবা য়ু.এস.এ খোঙচৎ মতুংদা ঐনা রাস্ত্রপতি বাইদেনগা উনবগী খুদোংচাবা ফংলে। মসিগী খোঙচৎ অসিনা ঐখোয়গী মরুপ-মপাং ওইবগী মরী হেন্না চেৎশিনহন্নবগী খুদোংচাবা অমা ফংলগনি।
হিরম কয়াদা থবক তৌমিন্নদুনা ভারত-য়ু.এ মরী অসি মাইথোং য়াম্মী। পোৎ-চৈ অমসুং থবক-থৌরমশিংদা য়ু.এস.এ অসি ভারতকী খ্বাইদগী চাউবা ললোন-ইতিক্কী মরুপনি। সাইন্স অমসুং তেক্নোলোজি, লাইরিক-লাইশু, হকশেল, ঙাক-শেন অমসুং সেকুরিতিগী লমশিংদা ঐখোয় নকশিননা থবক তৌমিন্নরি। মরুওইবা অমসুং নৌনা থোরকপা তেক্নোলোজিশিংদা থবক তৌমিন্নবা অসিনা অনৌবা শক্তমশিং ওইরে অমসুং ঙাক-শেনগী উদোগকী লমদা মতেং পীনবা, স্পেস, তেলিকোম, ক্বান্তম, আর্তিফিসিএল ইন্তিলিজেন্স অমসুং বাইওতেক সেক্তরশিংদা মতেং পীনবা হেনগৎলক্লি। মনিং তম্বা অমসুং পুন্না চাউখৎমিন্নবা ইন্দো-পেসিফিক অমগী ঐখোয়গী লৈবাক অনি মখা তানা মতেং পীনরি।
রাস্ত্রপতি বাইদেন অমসুং অতোপ্পা য়ু.এস লুচিংবশিংগা লোয়ন্না ঐখোয়গী লৈবাক অনিগী মতেং পাংনবা ফগৎহন্নবা অমসুং মালেমগী লুপশিং হায়বদি জি-২০, ক্বাদ অমসুং আই.পি.ই.এফকী মতাংদা ঐগা লোয়ন্না খন্ন-নৈনগনি।
রাস্ত্রপতি বাইদেন অমসুং ফার্স্ত লেদি দোক্তর জিল বাইদেন অমসুং অতোপ্পা শক্নাইরবশিংগা লোয়ননা ঐনা লৈঙাক্কী চাক্লেন শরুক য়াগনি।
ভারত-য়ু.এস মরীশিংদা য়ু.এস কংগ্রেসনা মতম পুম্নমক্তা দল অনিমক্না কন্না শৌগৎতুনা লাক্লি। ঐগী খোঙচৎ মনুংদা, কংগ্রেসকী লুচিংবশিংনা চেবাউ পীরকপদগী য়ু.এস কংগ্রেসকী অপুনবা মীফম অমদা ঐ ৱা ঙাংগনি।
মীগা মীগা লৈনবা অচেৎপা মরীশিংনা ঐখোয়গী লৈবাক অনিগী মরক্তা থাজনবা হেনগৎহন্নবগী মচাক অমা ওইরি। ঐখোয়গী খুন্নাইগী মহুৎশিল্লিবা অমেরিকাদা লৈবা ভারতমচাশিং ঐনা উনগনি। ঐখোয়গী ললোন-ইতিক অমসুং শেন থাদবগী থবকশিং ফগৎহন্নবা অমসুং মালেমগী সপ্লাই চেনশিং শেমগৎনবা ঐনা মরুওইবা সি.ই.ও খরগা উনগনি।
ঐগী য়ু.এস খোঙচৎ অসিনা গনতন্ত্র, খেন্নবা অমসুং নিংতম্বদা য়ুম্ফম ওইবা ঐখোয়গী মরীশিং হেন্না চেৎশিনহনগনি হায়না ঐনা থাজৈ। ঐখোয়না পুন্না লেপ্লিবা মখৈ মালেমগী খুদোংচাবশিং মায়োক্নবা ঙমগনি।
রাস্ত্রপতি অবদেল ফাতাহ অল-সিসিনা চেবাউ পীরকপদগী ঐ ৱাশিংতন দি.সিদগী কাইরোদা চৎকনি। অচেৎপা অমসুং মরুপ-মপাং ওইবা লৈবাক অমদা অহানবা ওইনা চৎগদবা অসিদা ঐ হরাওই।
চহি অসিগী ঐখোয়গী গনতন্ত্র দিবস থৌরমদা রাস্ত্রপতি সিসি চীফ গেস্ত ওই ওইখিবদা ঐ হরাওই। থা খরগী মনুংদা হায়রিবা খোঙচৎ অনি অসিনা ইজিপকা ঐখোয়গা লৈনবা মরী অদু ফগৎলকপগী মমি অমা তারে।
ঐখোয়গী সভেত্য অমসুং মাইথোং য়াম্না মরী অসি মখা তানা ফগৎহন্নবা রাস্ত্রপতি সিসি অমসুং ইজিপ সরকারগী সেনিয়র মেম্বরশিংগা ঐগা ৱারি শানগনি। ঐনা ইজিপতা লৈবা ভারতমচাশিংগা উনবগী খুদোংচাবসু ফংগনি।
