প্রধান মন্ত্রী শ্রী নরেন্দ্র মোদী জুলাই ১৩- জুলাই ১৫,২০২৩ দা ওফিসিএল ওইবা খোঙচৎ অমদা ফ্রান্স অমসুং য়ু.এ.ইদা চৎকনি।
ফ্রান্সকী রাস্ত্রপতি ইম্মানুএল মেক্রোন্না চেবাউ পীরকপদগী প্রধান মন্ত্রী জুলাই ১৩-জুলাই ১৪,২০২৩দা পেরিস্ত চৎকনি। জুলাই ১৪, ২০২৩দা বেস্তাইল দে পেরেদতা প্রধান মন্ত্রী গেস্ত ওফ ওনর ওইনা শরুক য়াগনি অমসুং থৌরম অদুদা ভারতকী আর্মদ ফোর্সকী সর্বিস অহুমগী কন্তিজেন্ত অমা শরুক য়াগনি।
প্রধান মন্ত্রীনা রাস্ত্রপতি মেক্রোনগা ৱারি শানগনি। প্রধান মন্ত্রী ইকায়খুম্নবা উৎপা ওইনা রাস্ত্রপতি মেক্রোন্না ওফিসিএল ওইবা চাক্লেন অমা শীনগনি অমসুং লনাই ওইনা চাক কৌগনি।
প্রধান মন্ত্রীনা ফ্রান্সকী প্রধান মন্ত্রী উনগনি অমসুং সিনেত অমসুং ফ্রান্সকী নেসনেল এশেমব্লিগী প্রসিদেন্ত উনগনি। মহাক্না তোখাইনা ফ্রান্সতা লৈবা ভারতমচাশিং, ভারত অমসুং ফ্রেঞ্চ কম্পেনিশিংগী সি.ই.ওশিং অমসুং শক্নাইরবা ফ্রেঞ্চগী মীওইশিংগা উনগনি।
চৎলিবা চহি অসি ভারত-ফ্রান্সকী অচেৎপা মরুপ-মপাং ওইরকপগী চহি ২৫ শুবা চহিনি অমসুং হিরম কয়াদা হায়বদি নাৎ, সাইন্তিফিক, লাইরিক-লাইশু অমসুং শেন-থুমগী লমদা মখা তানা মতেং পাংননবা ৱারি শানবগী খুদোংচাবা অমা প্রধান মন্ত্রীগী খোঙচৎ অসিনা পীরগনি।
তুংদা, জুলাই ১৫দা প্রধান মন্ত্রী য়ু.এ.ইদা চৎকনি। প্রধান মন্ত্রীনা য়ু.এ.ইগী রাস্ত্রপতি অমসুং অবু ধাবীগী লৈঙাকপা সৈখ মোহমদ বিন জয়েদ অল নাহয়ানগা ৱারি শানগনি। ভারত-য়ু.এ.ইগী অচেৎপা মরুপ-মপাং ওইবা মরী তপ্না-তপ্না মপাঙ্গল কনখৎলক্লি অমসুং ইনর্জি, লাইরিক-লাইশু, অনা-লায়য়েং, চীঞ্জাক, ফিনতেক, ঙাক-শেন অমসুং নাৎ য়াওনা তোঙান-তোঙানবা হিরম কয়াদা লৈরিবা মরীশিং হেন্না ফগৎনবা লম্বীশিং মশক খঙদোক্নবা প্রধান মন্ত্রীগী খোঙচৎ অসিনা খুদোংচাবা পীরগনি। য়ু.এ.ইনা য়ু.এন.এফ.সি.সি.সিগী কোপ-২৮গী প্রসিদেন্ত ওইবা অমসুং মালেমগী ৱাফম কয়াগী মতাংদা খন্নবা খুদোংচাবা অমা মীফম অদুনা পীগনি অমসুং ভারতনা জি-২০গী প্রসিদেন্ত ওইরিবা অসিদা য়ু.এ.ই অখন্নবা ইনভাইতি অমা ওইরিবা অসিগী মতাংদা খন্নগনি।
