গুজরাতকী গান্ধীনগরদা পাংথোকপা জি-২০ হেল্থ মিনিস্তরশিংগী মীফমদা ভিদি মেসেজগী খুৎথাংদা প্রধান মন্ত্রী শ্রী নরেন্দ্র মোদীনা ৱা ঙাংখ্রে।
ভারতকী অনা-লায়য়েংগী লমদা শরুক য়ারিবা দোক্তর মিল্লিয়ন ২.১, নর্স মিল্লিয়ন ৩.৫, পেরামেদিক্স মিল্লিয়ন ১.৩, ফার্মাসিস্ত মিল্লিয়ন ১.৬ অমসুং অতোপ্পা মিল্লিয়ন কয়াগী মহুৎশীন্দুনা থৌরম অদুদা শরুক য়াখিবা শক্নাইরবশিং প্রধান মন্ত্রীনা তরাম্না ওকখি।
জাতিগী মপা গান্ধীজি পল্লদুনা, প্রধান মন্ত্রীনা হায়খি গান্ধীজিনা হকশেল অসি য়াম্না মরুওইনা লৌখি অমসুং ‘কি তু হেল্থ’ কৌবা লাইরিক অমা মহাক্না ইখি। কনাগুম্বা অমা হকচাং অমসুং পুক্নিং-ৱাখল ফনা লৈবা হায়বসি হকচাং ফবা কৌই, হায়বদি হকচাং ফবা হায়বসি পুন্সিগী য়ুম্ফম্নি।
সংস্কৃতকী স্লোক অমা প্রধান মন্ত্রীনা থিখি; ‘হকচাং ফবনা খ্বাইগী মমল য়াম্বা লন্নি অমসুং হকচাং ফবনা থবক খুদিংমক পাংথোকপা ঙমগনি’।
প্রধান মন্ত্রীনা হায়খি হকশেলনা ঐখোয়গী ৱারেপশিংগী ময়াইদা থমগদবনি হায়বা কোবিদ-১৯ লাইচৎনা ঐখোয়দা নিংশিংহল্লে। মতম অদুদা মালেমগী লৈবাকশিংগী মতেং পাংনবগী মরুওইবা ঐখোয়দা উৎখি অমসুং হিদাকশিং অমসুং তিকাশিং ফংহনবা নত্ত্রগা ঐখোয়গী মীয়াম ময়ুমদা পুরকপদা মতেং পাংনবগী মরুওইবা অদু খঙখি।
কোবিদ-১৯ তিকা মালেমদা ফংহনবগী মতাংদা ভারতনা লৌখিবা থৌদাংগী মতাংদা প্রধান মন্ত্রীনা হায়খি গ্লোবেল সাউথ য়াওনা লৈবাক ১০০ হেনবদা ভারতনা তিকা দোজ মিল্লিয়ন ৩০০ ফংহনখ্রে।
প্রধান মন্ত্রীনা হায়খি অৱা-অনা মায়োক্নবা ঙম্বা হায়বসি লাইচৎ মনুংদা তমখিবা খ্বাইদগী চাউবা পারানি। মালেমগী হকশেলগী থবকশিং অসি অৱা-অনা মায়োক্নবা ঙমগদবনি। মথংগী লাইচৎ থেংননবা ঐখোয় মাঙজৌননা ঙাকথোক্কদবনি, থৌরাং তৌগদবনি অমসুং থবক পায়খৎকদবনি। মসি ঙসিগী অমগা অমগা শম্নরবা মালেম অসিদা অখন্নবা অমনি। হকশেলগী ৱাফমশিং অসি অতেনবা মতমগী মনুংদা মালেমগী অতোপ্পা মফমশিং শোকহনবা ঙম্মী হায়বা লাইচৎ মনুংদা ঐখোয়না উরে।
শ্রী মোদীনা হায়খি, ভারত্তা ঐখোয়না অচুম্বা অমসুং পুম্নমক কোনশিনবা থৌরাং অমা লৌখৎখি। ঐখোয়গী হকশেলগী মচাক-মথুমশিং পাকথোক-চাউথোকহনখি, মহৌশাগী অনা-লায়য়েংগী থবকশিং ফগৎহনখি অমসুং মীওই খুদিংমক্তা মমল হোঙনা অনা-লায়য়েংগী খুদোংচাবা ফংহনখি। মালেমগী য়োগ নুমিৎ মালেমগী লৈবাকশিংনা পাংথোকপা অসি মালেমনা অচুম্বা হকশেলগী থবকশিং পাম্নরকপগী খুদম্নি। ২০২৩ অসি মালেমগী মিল্লেতশিংগী চহি হায়না থৌরম পাংথোক্লি। ভারত্তা শ্রী অন্ন নত্ত্রগা মিল্লেতশিং হায়না খঙনরিবা অসিনা হকশেলগী কান্নবা কয়া পীরি।
প্রধান মন্ত্রীনা হায়খি হকচাং ফবা অমসুং নুংঙাইবনা কনাগুম্বা অমগী অৱাবা খাংবা ঙম্বগী থৌনা হেনগৎহনগনি। ঐখোয়না গুজরাতকী জামনগরদা দব্লিউ.ঐচ.ও গ্লোবেল সেন্তর ফোর ত্রেদিসনেল মেদিসিন লিংখৎপা মাইকৈ অসিদা থাংজিনবা মরুওইবা খোঙথাং অমনি। জি-২০ হেল্থ মিনিস্তরশিংগা লোয়ননা মহৌশাগী লায়য়েং কাংলোনগী মতাংদা দব্লিউ.ঐচ.ও গ্লোবেল সম্মিৎ পাংথোকপা অসিনা মসিগী কান্নবা লৌবা হেনগৎহল্লগনি। মালেমগী ওইনা মহৌশাগী ওইবা লায়য়েং কাংলোনশিংগী পুক্কৈ অমা শেমগৎপা হায়বসি ঐখোয়না অপুনবা ওইনা পায়খৎকদবা থবক্নি।
প্রধান মন্ত্রীনা হায়খি হকশেল অমসুং মহৌশাগী অকোয়বগী ফিবমগা মরী লৈনৈ। অফবা নুংশিৎ, অফবা থক্নবা ঈশিং, মচি ওইবা চীঞ্জাক মরাং কাইনা ফংবা অমসুং অশোই-অঙাম লৈতবা লৈফম অসি হকচাং ফনা হিংনবা মরুওইবা মচাকশিংনি। অইং-অশা অমসুং হকশেলগী থবকশিং পায়খৎনবা মখোয়না থবক লৌখৎলকপদা প্রধান মন্ত্রীনা শক্নাইরবশিং থাগৎখি। মহাক্না হায়খি এন্তি-মাইক্রোবিএল রিসিস্তেন্স(এ এম আর)গী অকিবা থেংননবা পায়খৎলিবা থবকশিং থাগৎনিঙাইনি।
প্রধান মন্ত্রীনা হায়খি এন্তি-মাইক্রোবিএল রিসিস্তেন্স অসি মালেমগী মীয়ামগী হকশেলদা অচৌবা খুদোংথিবা অমনি। জি-২০ হেল্থ ৱার্কিং গ্রুপনা “ৱাল হেল্থ”তা পুক্নিং চঙবদা হরাওবা ফোঙদোক্লদুনা প্রধান মন্ত্রীনা হায়খি “মালেম অমা, হকশেল অমা”গী ঐখোয়গী পান্দম অসিনা মীওইবশিং, শা-উচেকশিং, পাম্বীশিং অমসুং অকোয়বগী ফিবম য়াওনা অপুনবা ইকোসিস্তেমগী হকচাং ফগনি। গান্ধীজিগী পাউজেলগী অপুনবা মীৎয়েং অসিনা কনা অমতা নাথৈরমদে।
হকশেলগী থবকশিং মাইপাকপা অসি মীয়াম শরুক য়াবনা মরুওইবা মরম অমনি হায়না ফোঙদোক্লদুনা প্রধান মন্ত্রীনা হায়খি মসিনা মরম ওইদুনা ঐখোয়গী লেপ্রোসি মুৎথৎনবা খোঙজং মাইপাকপনি। ঐখোয়না অশা চাউনা পায়খৎলিবা তি.ভি মুৎথৎনবা থবক অসিদা মীয়াম শরুক য়ানবা পুক্নিং থৌগৎলি। লৈবাক অসিগী মীয়াম তি.বি মুৎথৎনবা মরুপ নত্ত্রগা নি-ক্ষে মিত্রা ওইনবা তকশিল্লি অমসুং মখোয়না তি.বি অনাবা মীওই মিল্লিয়ন ১ রোম মতেং পাংলে।
প্রধান মন্ত্রীনা হায়খি মালেমগী ওইনা ২০৩০দা পান্দম থম্লিবা অসিদগী ঙনখৎনা তি.বি মুৎথৎনবা লম্বীদা ঐখোয় লৈরে। দিজিতেলগী থবকশিং অমসুং অনৌবা থবকশিংনা মীয়ামদা হকশেলগী থবকশিং লাইনা ফংহল্লে। তেলি-মেদিসিনগী খুৎথাংদা অরাপ্পা মফমশিংদা লৈবা অনাবশিংদা অফবা মগুন লৈবা লায়য়েংবগী খুদোংচাবশিং ফংহল্লে। ভারতকী নেসনেল প্লেতফোর্ম, ই-সঞ্জিবানিগী কান্নবা লৌদুনা হৌজিক ফাওবদা তেলি-হেল্থ কন্সলতেন্সি মিল্লিয়ন ১৪০ পাংথোকখ্রে।
প্রধান মন্ত্রীনা হায়খি ভারতকী ক্রাউন প্লেতফোর্মনা মাইপাক্না মীওইবগী পুৱারিদা খ্বাইদগী চাউবা তিকা থাবগী থবক পাংথোকখ্রে। মসিনা তিকা দোজ বিল্লিয়ন ২.২ ফংহনবদা মতেং পাংখি অমসুং মতম চানা মালেম্না শকখঙলবা তিকাগী শক্তাকচেশিং ফংহনখি। দিজিতেল হেল্থগী মালেমগী থবকশিংনা অপুনবা ওইনা মফম অমদা তোঙান-তোঙানবা দিজিতেল হেল্থগী থবকশিং পুনশিনবা ঙমগনি।
প্রধান মন্ত্রীনা হায়খি ঐখোয়গী অনৌবা থবকশিং মীয়ামগী য়াইনবা শীজিন্নরসি। ঐখোয় অনিরক থোক্না ফন্দ থাদবা তোক্লসি। ঐখোয় মরম চানা তেক্নোলোজিগী খুদোংচাবা ফংহনসি। মসিগী থবক অসিনা গ্লোবেল সাউথকী লৈবাকশিংগী হকশেলগী অৱাৎশিং মেনশিনবা ঙমহনগনি অমসুং মীওই খুদিংমক হকশেলগী খুদোংচাবা পীনবা ঐখোয়গী পান্দম ফংনবা খোঙথাং অমা নকশিনহল্লে।
প্রধান মন্ত্রীনা অরোইবদা হায়খি, মীওই খুদিংমক হরাওবা ওইরসনু, খুদিংমক অনাবা লৈতবা ওইরসনু। অদোমগী থবকশিং মাইপাক্নবা ঐনা অদোমগী মফমদা য়াইফ-পাউজেল পীজরি।
