প্রধান মন্ত্রী, শ্রী নরেন্দ্র মোদিনা ঙসি গুরাতকী এহমদাবাদতা এস.জি.ভি.পি. গুরুকুলদা ভৱ ৱন্দনা পর্বগী থৌরমদা ৱা ঙাংকি। থৌরম অসি পুজ্য শাস্ত্রিজী মহারাজকী পুনশি ৱারি – ‘শ্রী ধর্মজিৱন গথা’ ফোংবগী থৌরমদা শিনখিবনি।
থৌরম অদুদা ৱা ঙাংলদুনা, প্রধান মন্ত্রীনা হায়খি মদুদি অফাওবা মীশিংগী মখোয়না তৌরম্বা থবকশিং অমসুং ৱারিশিং অসি অনম্বা মতমদা অইবা ওইনা থম্বগী মহুত্তা ৱাখলদা নিংশিংদুনা অমসুং চিনহায়গী চৎনবীদা ওইনা লৈহৌই। পুজ্য শাস্ত্রিজী মহারাজকী পুনশি ৱারি অসিনা লৌশিং তানশিনবা অমসুং খুনাইগী সেবাদা কৎথোক্লবা শক্নাইরবা মীশক অমগী মশাগী ওইজবা থাদোক্লবা পুনশি অমা, অইবা ওইনা উৎলগনি হায়না মহাক্না হায়খি। পুজ্য শাস্ত্রিজী মহারাজনা ময়ামগী য়াইফনবগী মতাংদা হায়খিবা ৱাফম অদুবু পল্লদুনা, প্রধান মন্ত্রীনা মহাক্কী ‘সবকা সাথ, সবকা ৱিকাস, সবকা বিস্বাস অমসুং সবকা প্রয়াস’কী ভিজন অসি শাস্ত্রিজী মহারাজগুম্বা অফাওবশিং অসিদগী ৱাখল-লৌশিং লৌই অমসুং মসি ‘সর্বজন হিতয় অমসুং সর্বজন সুখয়’গী ৱাখল্লোন অসিদা য়ুমফম ওই হায়না হায়খি।
প্রধান মন্ত্রীনা হায়খি অরিবা ভারতকী গুরুকুলগী চৎনবী অসি ‘সর্বজন হিতয়’গী শক্তম্নি মরমদি মফম কয়াদগী লাকপা গুরুকুলগী মহৈরোইশিংনা পুন্না তম্মিনৈ। মসিগী চৎনবী অসিদা য়াম্না ফজরবা মমাংঙৈগী মতম অমসুং চাউথোক্নিংঙাই ওইরবা তুংদা লাক্কদবা মতমগা শমজিন্নহল্লিবা মরী অদুবু পুদুনা চৎলি। চৎনবী অসিনা লৈবাক অসিগী চমজরবা মীচম প্রজাশিংদা ধর্মগী, চৎনবীগী ওইবা অমসুং খুনাইগী মতাংদা ৱাখল-লৌশিং পী। শাস্ত্রিজীনা মহাক্কী গুরুকুল অসিগী খুত্থাংদা মালেম অসিগী মীওই কবা অমগী পুনশি শেমখি। “মহাক্কী পুনশি অদু চুম্নগী ৱাপাও শন্দোকপা অমসুং য়াথং পীবা নত্তে, চৎনরোল অমসুং তপস্যাগী লেপ্পা লৈতনা চেনথরিবা ঈচেলনি অমসুং থৌ পাংথোকপগী লম্বিদা মহাক্না লেপ্তনা লমজিং-লমতাকপীরি”, হায়না প্রধান মন্ত্রীনা হায়খি।
এস.জি.ভি.পি. গুরুকুলগা লৈনরিবা মহাক্কী মরী অদুবু নিংশিংলদুনা, প্রধান মন্ত্রীনা অচৌবা ইন্সতিত্যুশনগী মমাংঙৈগী ৱাখল-লৌশিংদা মোদর্নিতীগী ইলেমেন্তশিং অদু পনখি। শাস্ত্রিজীনা মতমগী তঙাইফদবা অদুগী মতুং ইন্না মমাংঙৈগী লৌশিংবু শিজিন্নবা অমসুং পন্দুনা লৈহন্দবা হায়বসিদা মরু ওইবা থমখি হায়না প্রধান মন্ত্রীনা হায়খি।
প্রধান মন্ত্রীনা হায়খি মদুদি সন্তশিং অমসুং ভক্তি মুভমেন্তনা নিংখা তম্বগী খোংজংগী ইহৌ অসি শাগৎপদা য়াম্না মরু ওইবা থৌদাং লৌখি। মহাক্না হায়খি মদুদি গুরুকুলগী ইমুংনা আজাদি কা অমৃত মাহোতসব অমসুং অমৃত কালদা শরুক য়ানবা চোংথোরকপা য়াগনি। লাইচৎ অমসুং য়ুক্রেনদা থোক্লিবা খুদোংথিবা মতম অসিনা মরম ওইদুনা থোকহনবা তম্বা ঙমদবশিং অদুবু পল্লদুনা, প্রধান মন্ত্রীনা আত্মানির্ভর্তাগী মরু ওইবা অদু হন্না-হন্না হায়খি। মহাক্না গুরুকুলগী ইমুংদা ভোকল ফোর লোকল ওইনবা হায়খি। মহাক্না মখোয়দা নুমিৎ খুদিংগী শিজিন্নরিবা পোৎলমশিংগী লিস্ত অমা শেমদুনা মপান লমদগী পুশিল্লকপা পোৎশিংদা মপাল তাংবগী চাং অদু খন্দুনা য়েংনবা হায়খি। করিগুম্বা পোৎশক অমা ভারতমচা অমগী হুমাংনা শেম্বা ওইরবদি, মদু মতম চুপ্পদা অদুনা হেন্না মরু ওইনা লৌগদবনি। অসিগা চপ মান্ননা ইমুং অসিনা সিঙ্গল য়ুস প্লাস্তিক শিজিন্নবা লেপ্তুনা স্বচ ভারত অভিয়ানদা শরুক য়াবা য়াগনি। মহাক্না মখোয়দা অরু-অনান হেনগৎহন্নবগীদমক্তা কাংলুপ ওইনা স্তেচু ওফ য়ুনিতী নত্রগা লোকল স্তেচুগুম্বা মফশিংদা তোইনা চৎনবা হায়খি। মহাক্না পৃথিবী ইমা অসিবু কেমিকেল অমসুং অতোপ্পা কয়া অমনা শোকহনবদগী কন্নবা নেচরেল ফার্মিংবু য়োকখৎপগি তঙাইফদবা অদুগী মতাংদসু মরু ওইনা পনখি। গুরুকুলনা মসিদা য়াম্ন আমরু ওইবা থৌদাং লৌবা ঙমগনি হায়না প্রধান মন্ত্রীনা হায়খিল
মহাক্না অরোইবদা গুরুকুল ইমুংনা পুজ্য শাস্ত্রিজী মহারাজনা তম্বীরম্বা-তাকপীরম্বা পাউতাকশিং অদু ইন্দুনা অনৌবা মওংদা আজাদি কা অমৃত মাহোতসব পাংথোক্নবা হায়জরদুনা লোইশিনখি।
