প্রধান মন্ত্রী শ্রী নরেন্দ্র মোদীনা ঙসি বিহারগী সিৱানদা লুপা করোর 5,200 হেনবগী চাউখৎ-থৌরাংগী প্রোজেক্ত কয়ামরুম শঙ্গাখ্রে অমসুং উরেপ-উয়ুং তমখ্রে। তিল্লিবা মীয়ামবু তরাম্না ওক্লদুনা, প্রধান মন্ত্রীনা বাবা মহেন্দ্র নাথ অমসুং বাবা হান্স নাথদা ইকায় খুম্নবা উৎখি অমসুং সোহগরা ধামগী শেংলবা মফমবু ইকায় খুম্নবা উৎখি। মহাক্না মা থাৱে ভৱানি অমসুং মা অম্বিকা ভৱানিদা থৌনিখি। প্রধান মন্ত্রীনা লৈবাক অসিগী অহানবা রাস্ত্রপতি, দেশ রত্ন দাক্তর রাজেন্দ্র প্রসাদ অমসুং লোকনায়ক জয়প্রকাশ নরায়নবু নীংশিংখি।
সিৱান অসি ভারতকী নীংতম লানফমদা ইথিল পীবা লমদম অমনি হায়না পল্লদুনা শ্রী মোদীনা হায়খি মদুদি লমদম অসিনা লৈবাক অসিগী গনতন্ত্রবু মপাঙ্গল কনখৎহল্লি অমসুং সংবিধানবু মপাঙ্গল কনখৎহল্লি। মহাক্না হায়খি মদুদি সিৱাননা লৈবাক অসিদা দা. রাজেন্দ্র প্রসাদ, মহাক্না সংবিধান শেম্বা অমসুং লৈবাক অসিগী মায়কৈ তাকপদা মরুওইবা থৌদাং লৌখি অসি পীনবিখি। প্রধান মন্ত্রীনা নুপীশিংদা শক্তি পীনবা হোৎনবদা মহাক্কী পুন্সি কৎথোকখিবা, অচৌবা সোসিএল রিফোর্মর ব্রজ কিশোর প্রসাদকী মওং লৌদুনা সিৱান্না শরুক তমখিবা অদুবুসু থাগৎপা ফোংদোকখি।
শ্রী মোদীনা অসিগুম্বা অচৌবা মীওইশিংগী মিসন অসি কেন্দ্র অমসুং রাজ্য সরকারনা অচেৎপা ফিরেপ অমগা লোয়ননা মাংলোমদা চংশিল্লিবা অসিদা নুংঙাইবা ফোংদোকখি। মহাক্না হায়খি ঙসিগী প্রোগ্রাম অসি মখা তানা চত্থরিবা থবকশিংগী শরুক অমনি। লুপা করোর লিশিং কয়াগী প্রোজেক্তশিং হৌদোক্লি অমসুং উরেপ উয়ুং তম্লি হায়না থৌরম অদুদা প্রধান মন্ত্রীনা লাউথোক্লদুনা মহাক্না হায়খি মদুদি চাউখৎ-থৌরাংগী থৌরাংশিং অসিনা বিহারবু মঙাল লৈবা তুংলমচৎ অমগী মায়কৈদা পুরক্কনি অমসুং চাউখৎপা রাজ্য অমা শেমগৎপদা মতেং পাংগনি। শ্রী মোদীনা হায়খি মদুদি প্রোজেক্তশিং অসিনা সিৱান, সাসরম, বুক্সর, মোতিহারী, বেত্তিয়া অমসুং আররাহগুম্বা মফমশিং চাউখৎহনবদা অচৌবা থৌদাং লৌগনি। মহাক্না হায়খি মদুদি থৌরাংশিং অসিনা লায়রবশিং, শোত্থরবা, দলিতশিং, বেকৱার্দ অমসুং এক্সত্রিমলী বেকৱার্দ কম্ম্যুনিতীশিংগী পুন্সিদা লাইথোকহল্লগনি অমসুং প্রোজেক্তশিং অসিগীদমক বিহারগী মীয়ামদা নুংঙাইবা ফোংদোকখি।
মহাক্না মপান লৈবাক্কী খোঙচৎ অমা লোইরগা হলকপদা ঙাইরি হায়বা ৱাফম পল্লদুনা শ্রী মোদীনা হায়খি মদুদি মহাক্না খোঙচৎ মনুংদা মালেমগী খ্বাইদগী চাউখৎলবা লৈবাকশিংগী লুচিংবশিংগা ৱারী শানখি। মালেমগী লুচিংবশিংনা ভারতকী খোঙজেল য়াংনা খুমাং চাউশিল্লকপদা থাগৎপা ফোংদোকখি। প্রধান মন্ত্রীনা হায়খি মদুদি লুচিংবশিং অসিনা ভারত অসি মালেমগী খ্বাইদগী চাউবা অহুমশুবা ইকোনোমিক পাৱরহাউস অমা ওইনা থোরকপা উরি। মহাক্না হায়খি মদুদি বিহারনা অহোংবা অসিদা মরুওইবা থৌদাং অমা লৌগনি। শ্রী মোদীনা হায়খি, "চাউখৎলবা বিহার অমনা লৈবাক অসিগী অপুনবা চাউখৎ থৌরাংদা চাউনা তেংবাংগনি” মসিদা বিহারগী মীয়ামগী শক্তি অমসুং তৌবা ঙম্বগী মতিকনা মতেং পাংশিল্লি। প্রধান মন্ত্রীনা রাজ্য অসিদা আইন চৎনরম্বদগী মতম অদু মুত্থৎপগীদমক মীয়াম্বু থাগৎখি। মহাক্না হায়খি মদুদি বিহারগী ঙসিগী নহারোলশিংনা চহি তরাগী খুজিং অনিগী মমাংদা রাজ্য অসিগী ফীভম অসি ৱারীশিংগী খুত্থাংদা খংই। অরানবা লৈঙাক্কী মতম অদুদা ওইরকখিবা ফীভম অদু মখোয়না মপুং ফানা খঙবা ঙম্লোই হায়না পল্লদুনা শ্রী মোদীনা হায়খি মদুদি চহি চা কয়া ভারতকী চাউখৎপগী লমজিং লমতাকখিবা বিহার অসি মমাংগী লৈঙাক্কী খুদোংচাদবশিংগী মতুং ইন্না মতম অমদদি পন্দুনা লৈবগী খুদম অমা ওইখি।
বিহারগী মীপুম খুদিংমক্কীদমক, মশাগী ইকাই খুম্নবা অসি খ্বাইদগী মরু ওই হায়না পল্লদুনা, প্রধান মন্ত্রীনা হায়খি মদুদি ঐহাক্কী বিহারীগী ইচিল-ইনাওশিংনা অরুবা ফীভমদা ওইরবসু মায় পাকপা ঙম্নবগী অচেৎপা থৌনা উৎলি। মখোয়না মখোয়গী মশাগী ইকাই খুম্নবগী মতাংদা করিগুম্বা অমত্তদা য়াশিন্নবা তৌদে হায়না মহাক্না ফোংদোকখি। অদুম ওইনমক, মমাংগী লৈঙাকশিংনা বিহারগী ইকাই খুম্নবা অদু য়াম্না শোকহনখি হায়না প্রধান মন্ত্রীনা ফোংদোকখি। মহাক্না লায়রবা অসিবু বিহারগী অৱাবদা ওন্থোকখিবা, শেঞ্জা থুমজাগী মওং মতৌ অসিবু য়ানিংদবা ফোংদোকখি। অৱাবা কয়া মায়োক্নরবসু শ্রী নিতিশ কুমারগী লুচিং মখাদা হৌজিক লৈরিবা সরকার অসিনা বিহারবু অমুক হন্না চাউখৎপগী লম্বীদা পুরকখ্রে হায়না মহাক্না হায়খি। হৌখিবা চহি 10-11 অসিদা বিহারদা চাউরাক্না কিলোমীতর 55,000 রুরেল রোদ শেমখ্রে হায়না শ্রী মোদীনা হায়খি। ইমুং করোর 1.5 হেন্না মৈগী কনেক্সন ফংহনখ্রে অমসুং ইমুং করোর 1.5না ঈশিংগী কনেক্সন ফংহনখ্রে হায়না মহাক্না মখা তাখি। রাজ্য শীনবা থুংনা কম্মন সর্বিস সেন্তর 45,000 হেন্না লিংখৎখ্রে হায়না শ্রী মোদীনা ফোংদোকখি। বিহারগী অপীকপা শহরশিংদা অনৌবা স্তার্ত-অপশিং হৌগৎলক্লি হায়নসু মহাক্না ফোংদোকখি।
বিহারগী চাউখৎ-থৌরাংগী খোঙজেল য়াঙখৎলক্লি হায়না পল্লদুনা শ্রী মোদীনা মমাংদা চৎনরম্বা আইনগী লৈহনদবগী থৌদাং লৌরম্বা মীওইশিংনা হৌজিক্তি সরকার অমসুং বিহারগী শেন্মিৎলোনগী রিসোর্সশিং অমুক হন্না কন্ত্রোল তৌনবগী খুদোংচাবা অমা থিরি হায়না পনখি। মহাক্না হায়খি মদুদি গ্রুপশিং অসিনা মখোয়গী পান্দমশিং ফংনবগীদমক তোঙান তোঙানবা পাম্বৈশিং শীজিন্নরি। প্রধান মন্ত্রীনা বিহারগী মীয়ামদা য়াম্না চেকশিন্না লৈনবা তকশিনখি। মহাক্না হায়খি মদুদি চাউখৎপা বিহার অমগী মাইকৈদা চৎলিবা খোঙচৎ অসি থিংনবা হোৎনরিবা মীওইশিং অসি থিংজিনবা মথৌ তাই।
প্রধান মন্ত্রীনা হায়খি মদুদি লৈবাক অসিনা লায়রবা মুত্থৎনবা শ্লোগানশিং মতম কুইনদগী তাদুনা লাক্লি, অদুবু মখোয়গী সরকারনা লায়রবা অসি তশেংনা হন্থহনবা ঙমগনি হায়বা উৎখ্রে। শ্রী মোদীনা হায়খি মদুদি হৌখিবা চহী তরা অসিদা ভারত মচা কোতি 25না লায়রবা কোকহনখ্রে। মালেমগী ওইনা শক্নাইরবা ইন্সতিত্যুসনশিং হায়বদি ৱার্ল্দ বেঙ্কনা ভারতকী মায় পাকপগী থাগৎপা ফোংদোকখি। মহাক্না হায়খি মদুদি বিহার অমসুং মরু ওইনা শ্রী নিতিশ কুমারগী মখাদা লৈরিবা সরকার অসিনা লৈবাক্কী মায়পাকপসিদা মরু ওইবা থৌদাং অমা লৌরি। মমাংদা, প্রধান মন্ত্রীনা হায়খি মদুদি বিহারগী মীশিংগী তংখাইদগী হেন্না কা হেন্না লায়রবা কাংলুপকী মনুং চল্লি। অদুম ওইনমক, হৌখিবা চহি 10 অসিদা, বিহারদা মীওই করোর মরিরোম লৈতা লায়রবগী ফীভমদগী ফগৎলকপা ঙমখ্রে।
নীংতম্বা ফংলবা মতুং দিকেদ কয়াগী মতুংদসু, মীওই লাখ কয়ানা লায়রবা ওইদুনা লৈরি হায়বসি হোৎনবগী অৱাৎপা লৈতবনা নত্তে, অদুবু মখোয়না মাংলোমদা চংশিন্নবা পাম্বৈ অমত্তা লৈতবনা মরম ওইবনি হায়না পল্লদুনা শ্রী মোদীনা হায়খি মদুদি মমাংগী লৈঙাক্কী মখাদা মতম শাংনা লৈরকখিবা লাইসেন্স রাজনা মরম ওইদুনা লৈবাক অসি লায়রবা ওইদুনা লৈখি। মহাক্না হায়খি মদুদি মতম অদুদা, সর্ভিস অমসুং খুদোংচাবা খুদিংমক কোতা-পর্মিৎ সিস্তেমগী মখাদা লৈরম্মি, মসিদা খ্বাইদগী পীকপা থবকশিং ফাওবা অয়াবা পীবা মথৌ তাই। মমাংগী সরকারশিংগী মখাদা লায়রবশিংদা য়ুম ফংহন্দনা থমখি, অদুগা মিদ্দলমেনশিংনা রাসন সপ্লাইশিং লৌথোকখি হায়না প্রধান মন্ত্রীনা ফোংদোকখি। মহাক্না হায়খি মদুদি লায়রবশিংগীদমক্তা হেল্থকিয়র অসি ফংহন্দনা থমখি, অমসুং এজুকেসন অমসুং থবক ফংহনবা অসি লেপ্পা লৈত্রবা অৱাবশিং ওইখি। প্রধান মন্ত্রীনা হায়খি মদুদি ইলেক্ত্রিসিতী নৎত্রগা ঈশিং কনেক্সন ফংহন্নবা নাগরিকশিংনা সরকারগী ওফিসশিংদা মশিং লাকঙমদনা চৎপা তাখি। মহাক্না মখা তাখি মদুদি গ্যাস কনেক্সন অমা ফংনবগীদমক্তা এম.পি.গী রিকমেন্দেসন অমা মথৌ তাই, অমসুং থবক অসি শেল পীবা নত্ত্রগা ইনফ্ল্যুন্স য়াওদনা ঙমদে। সিস্তেম অসিনা খ্বাইদগী হেন্না শোকহল্লিবশিং অসি মরুওইনা দলিত, মহাদলিত, বেকৱার্দ অমসুং এক্সত্রিমলী বেকৱার্দ কাংলুপশিংগী মীওইশিংনি হায়না পল্লদুনা শ্রী মোদীনা হায়খি মদুদি হায়রিবা কাংলুপশিং অসিদা লায়রবা মুত্থৎপগী মঙলানশিং উহল্লি, অদুবু থৌওং অসিদা ইমুং খরদি মিলিয়নেয়র অমসুং বিলিয়নেয়র ওইখি।
“হৌখিবা চহি 11 অসিদা, ঐখোয়গী সরকারনা লায়রবশিংগী লম্বীদা লৈরিবা খুদোংচাদবা খুদিংমক লৌথোক্নবা হোৎনরি। মসিগী মহৈ ওইনা, উবা ফংবা অমসুং কান্নরবা মহৈশিং হৌজিক থোরক্লি।" মহাক্না হায়খি মদুদি হৌখিবা চহি তরা অসিদা, লৈবাক শিনবা থুংনা লৈরিবা লায়রবা ইমুং করোর 4 হেনবনা সরকারগী থৌরাংশিংগী মখাদা পক্কাগী য়ুম ফংখ্রে অমসুং লাক্কদৌরিবা চহিশিংদা অহেনবা য়ুম করোর 3 শাবা হৌরগনি। শ্রী মোদীনা অকনবা ৱাফম থমখি মদুদি চাউখৎ-থৌরাং অসিনা বিহারগী লায়রবশিং, দলিতশিং, মহাদলিতশিং, বেকৱার্দ অমসুং এক্সত্রিমলী বেকৱার্দ কাংলুপশিংগী ইমুংশিংদা কান্নবা ফংহল্লে। প্রধান মন্ত্রী অৱাস য়োজনাগী মখাদা, রাজ্য অসিদা পক্কা য়ুম লাখ 57 হেন্না শাখ্রে। সিৱান দিস্ত্রিক্ততা, লায়রবশিংগীদমক য়ুম লাখ 1.10 হেন্না শাখ্রে হায়না প্রধান মন্ত্রীনা ফোংদোকখি। থবক অসি লেপ্পা লৈতনা চত্থরি হায়না মহাক্না ফোংদোকখি। মহাক্না হায়খি মদুদি বিহারদা ইমুং 50,000গী মথক্তা হাউজিং ইস্তোলমেন্ত ঙসি কাইথরি। শ্রী মোদীনা অয়াম্বা য়ুমশিং অসি মমাশিং অমসুং ইচে-ইচলশিংগী মিংদা রেজিস্তর তৌবদা অখন্ননা নুংঙাইবা ফোংদোকখি। মহাক্না চাউথোকচবা ফোংদোকখি মদুদি মমাংঙৈদা মখোয়গী মিংদা করিগুম্বা অমত্তা লৈরমদবা নুপীশিংনা হৌজিক চাউথোকচবা পোক্লবা য়ুমগী মপু ওইরে।
সরকারনা লায়রবশিংদা য়ুম শানবা খক্তা নত্তনা লেম্না রাসন, মৈ অমসুং ঈশিং ফংহনবগী খুদোংচাবসু পীরি হায়না পল্লদুনা প্রধান মন্ত্রীনা হায়খি মদুদি হৌখিবা চহিশিংদা লৈবাক শিনবা থুংনা অনৌবা ইমুং করোর 12 হেন্না তোতি ঈশিংগী কনেক্সন পীখ্রে। সিৱান জিলা খক্তদা ইমুং লাখ 4.5 হেনবনা অহানবা ওইনা থক্নবা ঈশিং ফংহল্লে হায়না মহাক্না ফোংদোকখি। শ্রী মোদীনা হায়খি মদুদি সরকারনা খুঙ্গংগী ইমুং খুদিংদা তেপ কনেক্সন অমসুং শহরগী মফমশিংদা মতিক চাবা থক্নবা ঈশিং ফংহন্নবা পান্দমগা লোয়ননা থবক তৌরি। হৌখিবা চহিশিংদা পাইপলাইন অমসুং সিৱেজ ত্রিৎমেন্ত প্রোজেক্ত কয়া বিহারগী তোঙান তোঙানবা শহরশিংদা পায়খৎলে হায়না মহাক্না ফোংদোকখি। মহাক্না মখা তাখি মদুদি অনৌবা পাইপলাইন অমসুং সিৱেজ ত্রিৎমেন্ত প্লান্তশিং অসি হৌজিক্তি শহর কয়াগীদমক অয়াবা পীখ্রে। প্রধান মন্ত্রীনা হায়খি, প্রোজেক্তশিং অসিনা লাইরবশিং অমসুং মিদ্দল ক্লাসকী ইমুংশিংগী পুন্সি মহিংদা চাউনা অহেনবা খুদোংচাবা পীগনি।
মমাংগী দিসপেন্সনগী ত্রেক রেকোর্দ অদু য়ানীংদবা ফোংদোক্লদুনা শ্রী মোদীনা হায়খি মদুদি মখোয়গী থবকশিং অসি বিহার অমসুং ইনভেস্তমেন্তকী মায়োক্তা লেপ্পা লৈতনা চত্থরি। মহাক্না হায়খি মদুদি পার্তীশিং অসিনা চাউখৎ-থৌরাংগী মতাংদা ৱা ঙাংবা মতম খুদিংদা, মীশিংনা শো লোল্লবা দুকানশিং, থিংজিল্লবা ললোন-ইতিকশিং, অমসুং লায়রবা ইন্দস্ত্রীশিং নিংশিংলি। প্রধান মন্ত্রীনা হায়খি মদুদি মসিনা মরম ওইদুনা অসিগুম্বা পার্তীশিংনা বিহারগী নহাশিংগী থাজবা ফংবা ঙমখিদে। মহাক্না হায়খি মদুদি হায়রিবা পার্তীশিং অসিনা পুৱারীগী ওইবা মওংদা অৱাংবা থাক্কী ইনফ্রাস্ত্রকচর, মাফিয়াগী লৈঙাক, আইন লৈতবা অমসুং শেঞ্জা থুমজাগী থবকশিংবু শৌগৎলি।
প্রধান মন্ত্রীনা হায়খি মদুদি বিহারগী হৈ-শিংলবা নহারোলশিংনা মফম অদুদা পায়খৎলিবা থবকশিং অদু কুপ্না য়েংশিল্লি অমসুং গ্রাউন্দদা তৌরিবা থবক অদু ইভাল্যুএৎ তৌরি। বিহারদা NDগী চাউখৎ-থৌরাংগী মোদেলগী মরুওইবা খুদম অমা ওইনা মহাক্না মারহৌরা লোকোমোতিব ফেক্তরীবু পনখি। মহাক্না লাওউথোকখি মদুদি মারহৌরা ফেক্তরীদা পুথোকপা অহানবা ইঞ্জিন অসি পুৱারীগী ওইবা মাইলস্তোন অমা ওইদুনা অফ্রিকাদা এক্সপোর্ত তৌরি। শ্রী মোদীনা ফোংদোকখি মদুদি হায়রিবা ফেক্তরী অসি মমাংগী লৈঙাক্না শোত্থরবা জিলা অমা ওইনা লৌখিবা সরন জিলাদা লৈ। মহাক্না হায়খি মদুদি ঙসিদি, হায়রিবা জিলা অসিনা মালেমগী মেনুফেকচরিং অমসুং এক্সপোর্ত মেপতা মফম অমা কনবা ঙম্লে। বিহারগী গ্রোথ ইঞ্জিনবু থিংজিনখিবা মমাংগী লৈঙাকপশিংবু মরাল শিদুনা, প্রধান মন্ত্রীনা হায়খি মদুদি বিহারদা শাবা ইঞ্জিন অমনা হৌজিক্তি অফ্রিকাদা ত্রেনশিংদা পাৱর পীরগনি। মহাক্না হায়খি মদুদি মসি চাউথোকচনীংঙাইনি। বিহার অসি 'মেদ ইন ইন্দিয়া' মেনুফেকচরিংগী মরুওইবা মফম অমা ওইরক্লগনি হায়না প্রধান মন্ত্রীনা থাজবা থমখি। মহাক্না মখা তাখি মদুদি মখনা, মহৈ-মরোং অমসুং মনা-মশিংগুম্বা লোকেল প্রদক্তশিং অসি মালেমগী কৈথেলশিংদা য়ৌহনবতা নত্তনা বিহারগী ফেক্তরীশিংদা পুথোকপা পোৎলমশিং অসি মালেমগী দিমান্দ ফংহনগনি। “বিহারগী নহাশিংনা পুথোকপা পোৎলমশিংনা আত্মনির্ভর ভারতকী মঙলানবু মপাঙ্গল কনখৎহল্লগনি” হায়না শ্রী মোদীনা ফোংদোকখি।
বিহারদা শেমগৎলক্লিবা মোদর্ন ইনফ্রাস্ত্রকচর অসিনা রাজ্য অসিগী চাউখৎপদা মরুওইবা থৌদাং অমা লৌগনি হায়না পল্লদুনা প্রধান মন্ত্রীনা হায়খি মদুদি বিহার শীনবা থুংনা লম্বী-থোং, রেলৱেজ, এয়র ত্রেবেল অমসুং ৱাতরৱেজদা মমাংদা অমুক্তা ওইখিদ্রিবা মওংদা ইনভেস্তমেন্ত তৌরি। বিহারনা অনৌবা ত্রেনশিং লেপ্তনা ফংলি হায়না মহাক্না পনখি। মসিগী মনুংদা খ্বাইদগী নৌবা ভন্দে ভারত ত্রেনশিং য়াওরি। শ্রী মোদীনা মরুওইবা মাইলস্তোন অমসু লাউথোকখি। মহাক্না হায়খি মদুদি সাৱান হৌদ্রিঙৈ মমাংদা, বাবা হরিহর্নাথকী লমদম অসি অনৌবা ভন্দে ভারত এক্সপ্রেসকী খুত্থাংদা বাবা গোরখনাথকী লমদমগা শম্নহনখ্রে। মহাক্না মখা তাখি মদুদি অনৌবা পত্না-গোরখপুর ভন্দে ভারত ত্রেন অসিনা পুরভাঞ্চলদা লৈরিবা ভগবান শিবাগী ভক্তশিংদা মোদর্ন ওইবা চৎথোক-চৎশিনগী ওপ্সন অমা পীরি। প্রধান মন্ত্রীনা অকনবা ৱাফম থমখি মদুদি ত্রেন অসিনা ভগবান বুদ্ধগী তপস্যা তৌফম অমসুং মহাক্কী মহাপরিনির্ভান ফংখিবা মফম, কুশিনগরগী মরক্তা মরুওইবা লিঙ্ক অমা ওইনা মথৌ তৌরি।
প্রধান মন্ত্রীনা হায়খি মদুদি অসিগুম্বা থবকশিং অসিনা বিহারদা ইন্দস্ত্রীএল অমসুং কম্মর্সিএল এক্তিবিতী হেনগৎহনবতা নত্তনা তুরিজম সেক্তরদা চাউনা কান্নবা পীগনি। মহাক্না হায়খি মদুদি হায়রিবা চাউখৎ থৌরাংশিং অসিনা বিহারবু মালেমগী তুরিজম মেপতা হেন্না মশক থোক্না উবা ফংহনগনি। মসিনা মরম ওইদুনা বিহারগী নহারোলশিংগীদমক্তা থবক ফংহন্নবগী মশিং য়াম্লবা খুদোংচাবা কয়া ফংলগনি হায়না মহাক্না অকনবা ৱাফম থমখি।
সংবিধানগী ৱাখল্লোন অসি মীপুম খুদিংমক্তা চপ মান্নবা খুদোংচাবশিং ফংহন্নবা অমসুং খেৎনবা লৈহন্দবা অসিনি হায়না ফোংদোক্লদুনা শ্রী মোদীনা 'সবকা সাথ, সবকা বিকাস'গী মন্ত্রগী খুত্থাংদা মসিগী ৱাখল্লোন অসিগীদমক সরকারনা লেপ্লিবা অদু অমুক হন্না ফোংদোকখি। মহাক্না মসিবু মমাংগী লৈঙাক্কী থৌওংগা চাংদম্নখি, মখোয়গী পোলিসী অসি মখোয়গী ইশাগী কান্নবা খক্তদা মতেং পাংদুনা "ফেমিলি-ফার্স্ত" দিবেলপমেন্ততা য়ুম্ফম ওই হায়না ফোংদোকখি। মখোয়না মখোয়গী ইমুংগী য়াইফনবগীদমক্তা বিহার অমসুং লৈবাক শিনবা থুংনা লৈরিবা ইমুং মিলিয়ন কয়াগী কান্নবা মাংহনবগীদমক মহাক্না মখোয়বু মরাল শিখি। প্রধান মন্ত্রীনা অকনবা ৱাফম থমখি মদুদি দোক্তর. বি.আর. অম্বেদকরনা অসিগুম্বা দাইনেস্তিক পোলিসীগী মায়োক্তা কন্না লেপখি, অমসুং পার্তীশিং অসিনা মহাক্কী লেগেসীবু হঞ্জিন হঞ্জিন্না ইকায় খুম্নদে হায়না মরাল শীখি। মহাক্না অতোপ্পা পার্তী অমা য়াওবা হৌখিবা থৌদোক অমদা দোক্তর. অম্বেদকরগী ফোতোগ্রাফ অসি ইকাই খুম্নদে হায়না ফোংদোকখি, অমসুং বিহার শিনবা থুংনা লাল্লে হায়জনবা দিমান্দ তৌবগী পোস্তরশিং থোরকখি। অদুম ওইনমক, পার্তীশিং অসিনা দলিৎশিং অমসুং মহাদলিৎশিংগীদমক অশেংবা ইকায় খুম্নবা লৈতে হায়না পল্লদুনা মহাক্না হায়খি মদুদি কৈদৌনুদা লাল্লে হায়না হায়জরোই হায়না মহাক্না ফোংদোকখি। শ্রী মোদীনা হায়খি মদুদি মমাংগী দিসপেন্সনশিংনা দা অম্বেদকরগী মমি মখোয়গী খোঙয়াদা থমখি, অদুবু মহাক্না দোক্তর অম্বেদকরবু লুম্না লৌজৈ। মহাক্না মখোয়বু দোক্তর অম্বেদকরবু খোঙ্গোইনদুনা মঙোন্দগী মখোয় মশাবু হেন্না চাউবা ওইনা উৎনবা হোৎনৈ হায়না মরাল শিখি অমসুং বিহারগী মীয়াম্না বাবা সাহেব ইকায় খুম্নদবা অসি কৈদৌঙৈদসু কাউবা লৈরোই হায়না মহাক্না ফোংদোকখি।
বিহারগী খোঙজেল য়াংনা খুমাং চাউশিল্লকপদা মথৌ তাবা লোঞ্চিং পেদ অসি শ্রী নিতিশ কুমারগী হোৎনবশিংগী খুত্থাংদা হান্ননা শেম শারে হায়না প্রধান মন্ত্রীনা ফোংদোকখি। বিহারবু চাউখৎপগী অনৌবা অৱাংবা থাক্তা পুখৎনবা পুন্না থবক তৌমিন্নবা অসি হৌজিক মখোয়গী এল্লাইন্সকী থৌদাংনি হায়না মহাক্না অকনবা ৱাফম থমখি। শ্রী মোদীনা বিহারগী নহারোলশিংদা থাজবা থমখি। মহাক্না হায়খি মদুদি মখোয়না পুন্না থবক তৌমিন্নরবদি রাজ্য অসিগী অরিবা মতমগী শক্নাইবগী মগুন অদু অমুক হন্না ফগৎহল্লগনি অমসুং বিহারবু চাউখৎলবা ভারত অমগী শক্তি লৈরবা ইঞ্জিন অমা ওইহল্লগনি। মহাক্না হৌজিক পায়খৎলিবা চাউখৎ-থৌরাংশিংগীদমক মহাক্কী য়াইফ-পাউজেল পীদুনা ৱারোল পীবা লোইশিনখি।
বিহারগী গভর্নর শ্রী আরিফ মোহমদ খান, বিহারগী মুখ্য মন্ত্রী শ্রী নিতিশ কুমার, কেন্দ্রগী মন্ত্রীশিং শ্রী রাজীব রঞ্জন সিংহ, শ্রী জিতেন রাম মঞ্জি, শ্রী গিরিরাজ সিংহ, শ্রী চিরাগ পাসৱান, শ্রী নিতিয়ানন্দ রাই, শ্রী রাম নাথ থাকুর, দা. রাজ ভুশন চৌধরী, শ্রী সতীশ চন্দ্র দুবে অমসুং অতৈ মকোক থোংবা মীওইশিংসু থৌরম অদুদা শরুক য়াখি।
বেকগ্রাউন্দ
বিহারগী ইনফ্রাস্ত্রকচর অমসুং সোসিও-ইকোনোমিক দিবেলপমেন্তদা অচৌবা শাহৌ অমা পীরদুনা প্রধান মন্ত্রীনা সিৱানদা চাউখৎ-থৌরাংগী প্রোজেক্ত কয়াগী উরেপ-উয়ুং তমখ্রে অমসুং শঙ্গাখ্রে।
লমদম অসিদা রেলৱে ইনফ্রাস্ত্রকচর হেনগৎহন্দুনা, প্রধান মন্ত্রীনা লুপা করোর 400 হেনবগী অনৌবা বৈশালী-দেওরিয়া রেলৱে লাইন প্রোজেক্ত শঙ্গাগনি অমসুং হায়রিবা লম্বী অসিদা অনৌবা ত্রেন সর্বিস অমা লমথাখ্রে। মসিগী মথক্তা, অৱাংথংবা বিহারদা কন্নেক্তিবিতী হেনগৎহন্নবগীদমক, প্রধান মন্ত্রীনা মুজফরপুর অমসুং বেতিয়াগী খুত্থাংদা পাৎলিপুত্রা অমসুং গোরখপুরগী মরক্তা ভন্দে ভারত এক্সপ্রেসসু লমথাখ্রে।
"মেক ইন ইন্দিয়া - মেক ফোর ৱার্ল্দ"গী মংলান অদু মখা তানা পুখৎতুনা, প্রধান মন্ত্রীনা রিপব্লিক ওফ গিনিদা এক্সপোর্ত তৌনবগীদমক মারহৌরা প্লান্তদা শাবা স্তেৎ-ওফ-দি-আর্ত লোকোমোতিব অমসু লমথাখ্রে। মসি ফেক্তরী অসিদা পুথোকপা অহানবা এক্সপোর্ত লোকোমোতিবনি। মখোয়শিং অসি হাই-হোর্সপাৱর ইঞ্জিনশিং, এ.সি. প্রোপলসন সিস্তেম, মাইক্রোপ্রোসেসরদা য়ুম্ফম ওইবা কন্ত্রোল সিস্তেমশিং, এর্গোনোমিক কেব দিজাইনশিং অমসুং রিজেনরেতিব ব্রেকিংগুম্বা তেক্নোলোজীশিং য়াওরি।
গঙ্গা তুরেলগী কঞ্জার্বেসন অমসুং রিজুভেনেসনগীদমক মহাক্কী অচেৎপা ফিরেপ অদুগী মতুং ইন্না, লমদম অসিগী মীয়ামগী মথৌ তাবশিং ফংহন্নবা লুপা করোর 1800 হেনবগী মমল ওইগদবা নমামি গঙ্গে প্রোজেক্তকী মখাদা সিৱেজ ত্রিৎমেন্ত প্লান্ত (STP) তরুক শঙ্গাখ্রে।
প্রধান মন্ত্রীনা বিহারগী তোঙান তোঙানবা শহরশিংদা লুপা করোর 3000 হেনবগী ৱাতর সপ্লাই, সেনিতেসন অমসুং STPশিংগীদমক উরেপ উয়ুংসু তমখ্রে, মসিগী পান্দমদি শহরশিং অসিগী প্রজাশিংদা থক্নবা ঈশিং মরাং কায়না ফংহন্নবনি।
লমদম অসিদা পাৱর ইনফ্রাস্ত্রকচরদা অচৌবা শাহৌ অমা পীরদুনা প্রধান মন্ত্রীনা বিহারদা 500 MWhগী বেতরী ইনর্জী স্তোরেজ সিস্তেম (BESS)গী উরেপ উয়ুং তমখ্রে। স্তেন্দ এলোন BESS অসি মুজাফফরপুর, মোতিহারী, বেতিয়া, সিৱান য়াওনা রাজ্য অসিগী গ্রিদ সবস্তেসন 15দা ইনস্তোল তৌরি। সব-স্তেসন খুদিংমক্তা ইনস্তোল তৌগদবা বেতরীগী কেপাসিতী অসি 20দগী 80 MWh ফাওবা ওইগনি। মসিনা দিস্ত্রিব্যুসন কম্পনীশিংদা ইলেক্ত্রিসিতী অসি অৱাংবা মমলদা লৈবদগী কনবা ঙমগনি, মসিনা হান্ননা স্তোর তৌখ্রবা ইলেক্ত্রিসিতী অদু গ্রিদ অদুদা হাপচিন্দুনা কঞ্জ্যুমরশিংদা হকথেংননা কান্নবা পীগনি।
প্রধান মন্ত্রীনা বিহারদা PMAY Uগী কান্নবা ফংলবা মীওই 53,600 হেনবদা অহানবা ইন্সতোলমেন্তসু পীখ্রে। PMAY Uগী য়ুম 6600 হেন্না শঙ্গাবা লোইরবা মতুংদা গ্রীহ প্রবেস থৌরম পাংথোক্নবা মহাক্না কান্নবা ফংলবা মীওই খরদা শোশিং খুৎশিন্নগনি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
बिहार समृद्ध होगा और देश की समृद्धि में भी बड़ी भूमिका निभाएगा: PM @narendramodi pic.twitter.com/ZCu7NPMC1a
— PMO India (@PMOIndia) June 20, 2025
बीते एक दशक में रिकॉर्ड 25 करोड़ भारतीयों ने गरीबी को पराजित किया है: PM @narendramodi pic.twitter.com/Ye5p9MReIS
— PMO India (@PMOIndia) June 20, 2025
बिहार, मेड इन इंडिया का एक बड़ा सेंटर बनेगा: PM @narendramodi pic.twitter.com/VIwOQErN3s
— PMO India (@PMOIndia) June 20, 2025
