ঙসি প্রধান মন্ত্রী শ্রী নরেন্দ্র মোদীনা লুচিংদুনা ৭-এল.কে.এমদা লৈবা মহাক্কী য়ুমদা লাক্লিবা কালেন্দা নুংশাগী মৈশা ঙাকথোক্নবা থৌরাং তৌরিবশিং হন্না য়েংশিন্নবা অৱাংবা থাক্কী মীফম অমা পাংথোকখ্রে।
মথং থা খরদা ওইরকপা য়াবা নোংজু-নুংশাগী ফিবমশিং অমসুং কুমগী নোং নিংথিনা চুবা য়াবগী ফিবম অমগী মতাংদা ইন্দিয়া মেতিওরোলোজিকেল দিপার্তমেন্ত(আই এম দি)না প্রধান মন্ত্রীদা পাউদমখি। নোং-চিংগী ফিবম্না নিংথম লৌরোক্কী মহৈ-মরোংশিংদা পীরিবা চৈথেং অমসুং মরুওইবা মহৈ-মরোংশিংগী ওইরকপা য়াবা পোৎথোক-চাথোক্কী মতাংদশু প্রধান মন্ত্রীদা পাউদমখি। লৌউ-শিংউগী ইথৈ পীনবা, শা-ষনগী মচীঞ্জাক পীনবা অমসুং থক্নবা ঈশিং ফংহন্নবা পায়খৎলিবা থবকশিংগী ফিবমশু য়েংশিনখি। অৱা-অনা থেংনরকপা মতমদা দরকার ওইবা মচাকশিং ফংহন্নবা রাজ্যশিং অমসুং হোস্পিতালশিংনা শেম-শারিবশিংগী মতাংদশু প্রধান মন্ত্রীদা পাউদমখি।মৈশানা থোকহনবা অৱা-অনাগী থৌরাং তৌরিবশিং অমসুং থেংন্নবা পায়খৎলিবা থবকশিংগী মতাংদা প্রধান মন্ত্রীদা পাউদমখি।
মীফম অদুদা প্রধান মন্ত্রীনা হায়খি মীয়াম; মেদিকেলগী শীনফমদা লৈরিবশিং, মিউনিসিপাল অমসুং পঞ্চয়াত বোদিশিং; মৈহৌ-লাংপোক কন্নবা লৈরিবশিং য়াওনা তোঙান-তোঙানবা মরীলৈনবশিংগী তোখাইবা ৱাখল তাহনবদা শীজিন্নগদবা মচাকশিং শেম-শাগদবনি। কা হেন্না শাবা মতমদা কমদৌনা থেংনগনি হায়বগী মতাংদা স্কুলগী অঙাংশিং ৱাখল তাহন্নবা মল্তিমেদিয়া লেকচর সেসনশিং পাংথোক্নবা হোৎনগদবনি। য়াম্না লাইনা ফংবা য়াগদবা মওংশিংদা কা হেন্না শারকপা মতমদা তৌগদবা অমসুং তৌরোইদবশিংগী মতাংদা চৎন-কাংলোনশিং শেমগদবনি অমসুং মীয়ামদা পাক-শন্না খঙহন্নবা জিঙ্গলশিং, ফিল্মশিং, পমফ্লেতশিং শেমগদবনি অমসুং য়েন্থোক্কদবনি।
য়াম্না লাইনা খঙগদবা অমসুং য়ৌহন্নবা মওং অমদা নুমিৎ খুদিংগী নোংজু-নুংশাগী ফিবম মাংজৌন্না লাউথোক্নবা প্রধান মন্ত্রীনা আই.এম.দিদা পাউতাক পীখ্রে। মীয়াম্না মতৌ তাবা চেকশিন-থৌরাংশিং লৌখৎপা য়ানবা মওং অমদা নুমিৎ খুদিংগী নোংজু-নুংশাগী ফিবম মাংজৌন্না লাউথোক্নবা তি.ভি নিউজ চেন্নেলশিং, এফ.এম রেদিওনা নুমিৎ খুদিংগী মিনিত খরা কাইথোক্নবা ৱাফমশু মীফম অদুদা খন্নখি।
হোস্পিতাল খুদিংমক্কী অকুপ্পা ফাইয়ার ওদিৎশিং তঙাইফদনা পাংথোক্নবা অমসুং হোস্পিতাল খুদিংমক্তা ফাইয়ারফাইত্তরশিংনা মোক দ্রিলশিং পাংথোক্নবশু প্রধান মন্ত্রীনা তকশিনখি। লান্মৈ চাকপা থেংন্নবা পুন্না থবক তৌমিন্নবগী তঙাইফদবগী মতাংদশু খন্নখি। উমংদা লান্মৈ চাকপা মাংজৌন্না ঙাকথোক্নবা অমসুং থেংন্নবা মতেং পাংনবা থবকশিংদা অহোংবা পুরক্নবগী মতাংশু মীফম অদুদা খন্নখি।
শা-ষনগী মচীঞ্জাকশিং ফংহনবা অমসুং ঈশিং তুংশিনফমশিংদা ঈশিং ফংবগী মতাংদা য়েংশিন্নবা প্রধান মন্ত্রীনা পাউতাক পীখি।কা হেনবা নোংজু-নুংশাগী ফিবমশিংদা মহৈ-মরোংশিং ফজনা লীদুনা থম্নবা থৌরাং তৌনবা এফ.সি.আইদা খঙহনখ্রে।
মীফম অদুদা প্রধান মন্ত্রীগী প্রিন্সিপাল সেক্রেতরি, হোম সেক্রেতরি, হেল্থ অমসুং ফেমিলি ৱেলিফিয়ার মিনিস্ত্রিগী সেক্রেতরি, এগ্রিকলচর অমসুং ফার্মর ৱেলফিয়ার মিনিস্ত্রিগী সেক্রেতরি, আর্থ সাইন্সেস মিনিস্ত্রিগী সেক্রেতরি অমসুং এন.দি.এম.এগী মেম্বর সেক্রেতরি শরুক য়াখি।
