প্রধান মন্ত্রী শ্রী নরেন্দ্র মোদীনা ঙসি নৈ দিল্লীগী ভারত মন্দপদা ভারত-য়ুরোপিয়ন য়ুনিয়ন বিজিনেস ফোরমদা ৱা ঙাংখ্রে। থৌরম অদুদা ৱা ঙাংলদুনা প্রধান মন্ত্রীনা ভারত-য়ুরোপিয়ন (EU) বিজিনেস ফোরমদা শরুক য়াবদা নুংঙাইবা ফোংদোকখি। মহাক্না ফোংদোকখি মদুদি য়ুরোইপিয়ন য়ুনিয়ন কাউন্সিলগী রাস্ত্রপতী অমসুং কম্মিসন তু ইন্দিয়ানা লেঙবীরকপা হায়বসি অচম্বা খোংচৎ অমা নত্তে, মসি ভারত-ইয়ুগী অনৌবা য়ুগ অমা হৌবনি। শ্রী মোদীনা পনখি মদুদি ইয়ু লুচিংবশিংনা ভারতকী রিপব্লিক দেদা অথোইবা মীথুংলেন ওইনা শরুক য়াখি, ভারত অমসুং য়ুরোপিয়ন কাউন্সিলনা খ্বাইদগী চাউবা ফ্রী ত্রেদ এগ্রীমেন্ত অমা ঙসি ভারতকী পুৱারীদা CEO কয়ানা শরুক য়াবগা লোইননা লোইশিনখ্রে অমসুং ভারত-ইয়ু ফোরমনা অসিগুম্বা মওংদা চাউনা শীন লাংদুনা পাঙথোকখ্রে। মহাক্না হায়খি মদুদি অসিগুম্বা মায় পাকপা কয়া অসিনা মালেমগী খ্বাইদগী চাউবা গনগন্ত্রগী শক্তি অনিনা মায়কৈ অমদা চঙশিনমিন্নরি।
প্রধান মন্ত্রীনা হায়খি মদুদি অসিগুম্বা চঙশিনমিন্নরিবা অসি শোইবদগী ওইখিবা নত্তে, মার্কেত একনোমি ওইনা ভারত অমসুং ইয়ুনা মান্নবা ভেল্যু, অপুনবা মালেমগী খোংথাংশিং অমসুং মখোয়গী মীয়ামগী মরক্তা মান্নবা মরী লৈ। মহাক্না হায়খি মদুদি অসিগুম্বা মপাঙ্গল লৈরবা য়ুম্বী অসিগা লোইননা মপাং অসিনা অনৌবা পনখৈদা য়ৌরক্লি। শ্রী মোদীনা হায়খি মদুদি হৌখিবা চহি তরারোম অসিদা, লল্লোন ইতীক্না বিলিয়ন য়ুরো ১৮০ য়ৌদুনা শরুক অনি হেনগৎলে, মসিদগী ভারত্তা য়ুরোপিয় কম্পেনী ৬,০০০ হেনবনা চলাইরি অমসুং ইয়ুদগী লাকপা ইনভেস্তমেন্তনা বিলিয়ন ১২০ য়ূরো হেল্লি। মহাক্না মখা তাখি মদুদি ভারতকী কম্পেনী ১,৫০০ হেনবনা ইয়ুদা লৈরি, মসিদা ভারতকী ইনভেস্তমেন্তনা বিলিয়ন ৪০ য়ুরোগী ময়াদা লৈরি। প্রধান মন্ত্রীনা হায়খি মদুদি ঙসি ভারত অমসুং য়ুরোপিয়ন কম্পেনীশিংনা মনুং হুৎচিন্না আর এন্ড দি, মেন্যুফেকচরিং অমসুং সর্ভিস কয়াদা মপাং ওইনা চৎমিন্নরি অমসুং লল্লোন ইতীক্কী লুচিংবশিংনা মপাং অসিগী দ্রাইভর অমসুং বেনিফিসরি ওইরি।
প্রধান মন্ত্রী মোদীনা হায়খি মদুদি হৌজিক্তি অসিগুম্বা মপাং অসি 'খুনাই পুম্বগী ওইবা মপাং" ওইনা থাংগৎকদবনি। মহাক্না ফোংদোকখি মদুদি অসিগুম্বা মঙলান অসিগা লোইননা এফ তি এ অমা মপুং ফাবা ঙমখ্রে মসিনা ভারতনা লেবর ইন্তেন্সিব ওইবা পোত্থোকশিং য়ুরপিয়ন য়ুনিয়নগী কৈথেলদা য়ৌহনবা ঙম্লগনি। শ্রী মোদীনা পনখি মদুদি তেক্সতাইল, জেম্স অমসুং শনা লুপা, ওতো পার্ত অমসুং ইঞ্জিনীয়রিংগী পোত্থোকশিংনা কান্নবা ফংগনি, অদুগা উহৈ, মনা মশীং, প্রোসেস তৌরবা চীঞ্জাক অমসুং শমুদ্রগী পোত্থোকশিংনা অনৌবা খুদোংচাবশিং পীগনি। মহাক্না মখা তাখি মদুদি মসিনা লৌমীশিং, ঙামীশিংদা হকথেংননা কান্নবা পীগনি অমসুং সর্ভিস সেক্তর মরুওইনা আইতি, এজুকেসন, মহৌশাগী হিদাক লাংথকশিং অমসুং লল্লোন ইতীক্তা কান্নবা পীগনি।
প্রধান মন্ত্রীনা ফোংদোকখি মদুদি মালেমগী লল্লোন ইতীক্না মরুওইবা ঈহৌ অমা কম্পেনীশিংনা মখোয়গী মার্কেতকী খোংথাং কয়া লৌখৎপগা লোইননা হৌরক্লি। মহাক্না হায়খি মদুদি অসিগুম্বা মতম অসিদা এফ তি এ অসিনা লল্লোন ইতীক্কী তাইবঙদা নাকল অনিমক্তা চেবাও পীদুনা পাউজেল অমা শন্দোক্লি। শ্রী মোদীনা থাজবা থমখি মদুদি লল্লোন ইতীক্কী লুচিংবশিংনা এফ তি এদগী লাক্লিবা খুদোংচাবশিং অসি মপুং ফানা শীজিন্নগনি হায়খি।
শ্রী মোদীনা মখা তারদুনা ভারত অমসুং য়ুরোপিয়ন য়ুনিয়ন্না লল্লোন ইতীক্কী মপাংশিংদা কান্নবা পীগদবা মান্নবা মরুওইবা হীরম কয়া অমা লৈ হায়রদুনা মহাক্না মরুওইবা হীরম অহুম পুখৎখিঃ অহানবদা ত্রেদ, তেক্নোলজী অমসুং ক্রিতিকেল মিনরেলশিং অসি লানগী খুৎলাই ওইনা শীজিন্নরক্লিবা মতম অসিদা অসিগুম্বা কিনিংঙাই ওইবা ফিভম অসি পুন্না হোৎনমিন্নদুনা ময়াই চমহনবা তঙাইফদে। মহাক্না লল্লোন ইতীক তৌরিবশিংদা ই ভি, বেত্তরি, চিপ অমসুং এ পি আইশিংদা থাজবা থম্বা হন্থহনবগা লোইননা থাজনিংঙাই ওইবা সপ্লাই চেন অমা শাগৎমিন্ননবগী অপাম্বা থমখি। অনিশুবদা, মহাক্না হায়খি মদুদি ভারত অমসুং ইয়ু অনিমক্না ঙাকশেলগী ইন্দস্ত্রী অমসুং ফ্রন্তিয়র তেক্নোলোজীদা মায় ওনশিন্দুনা ঙাকশেল, স্পেস, তেলিকোম অমসুং এ আইদা হেন্না মপাং ওইমিন্নবগী অপাম্বা থমখি। অহুমশুবদা মহাক্না ফোংদোকখি মদুদি তরু তনানবা অমসুং তুং কোইনা চৎকদবা তুংলমচৎ হায়বসিনা নাকল অনিমক্কী মরুওইবা থবকনি হায়রদুনা গ্রীন হায়দ্রোজেন, সোলর ইনর্জি অমসুং স্মার্ত গ্রিদশিংদা অপুনবা রিসর্চ অমসুং ইনভেস্তমেন্ত পীনবগী অপাম্বা থমখি। শ্রী মোদীনা মখা তাখি মদুদি ইন্দস্ত্রীশিংনা অপীকপা মোদুলর রিএক্তর অমসুং তুংকোইনা চৎকদবা মোবিলিতীদা পুন্না হোৎনমিন্নগদবনি অমসুং ঈশিং মেনেজমেন্ত, সর্কুলর একনোমী অমসুং তুং কোইনা চৎকদবা লৌউশিংদা মীৎয়েং থমগদবনি হায়খি।
প্রধান মন্ত্রীনা হায়খি মদুদি ঙসিগী পুৱারী ওইহৌরগদবা ৱারেপ অসিগা লোইননা অখন্নবা থৌদাং অমা লল্লোন ইতীক তৌরিবা খুনাইগী মমাংদা তাদুনা লৈরে। মথংগী খোংথাং অসি লল্লোন ইতীক তৌরিবা মীয়াম্না লৌখৎকদবনি "বোলদি নখোয়গী কোর্ততা তাদুনা লৈরে"। শ্রী মোদীনা হায়খি অমত্তা ওইবগী মপাংনা থাজবা হেনগৎহনগনি, পুম্নমক্তা য়ৌহনবা ঙমগনি অমসুং পাক চাউথোক্কনি। মহাক্না হায়খি অপুনবা থৌরাংগা লোইননা মান্ননা চাউখৎমিন্নবা ঙমগনি। প্রধান মন্ত্রীনা মীপুম খুদিংমক্তা থৌনা হেনগৎহনবগা লোইননা মালেম পুম্বগী দবল ইঞ্জিন ওইহন্নবা আপিল তৌরদুনা মহাক্কী ৱারোল লোইশিনখি।
য়ুরোপিয়ন কম্মিসনগী প্রেজিদেন্ত মিস উর্সুলা ভোন দর লেয়েন, ইন্দিয়ন অমসুং য়ুরোপিয়ন বিজিনেস লিদরশিংস থৌরম অদুদা শরুক য়াখি।
