প্রধান মন্ত্রী, শ্রী নরেন্দ্র মোদীনা ঙসি ভিদিও পাউজেলগী খুত্থাঙদা স্বিতজরলেন্দগী জিনেভাদা পাঙথোকখিবা ৱর্ল্দ হেল্থ এসেমব্লীগী ৭৬শুবা সেসন্দা ৱা ঙাঙখ্রে।
তিল্লিবা মীয়ামগী মফমদা ৱা ঙাঙলদুনা, প্রধান মন্ত্রীনা তিল্লিবা মীপুম খুদিংমক্কী মফমদা তরাম তরাম্বা ৱাহৈ ফোঙদোকখি অমদি ৱর্ল্দ হেল্থ ওর্গনাইজেসনগীম ফমদা মালেম অসিগী থৌগল তৌরকপা চহি ৭৫ মপুং ফারকপগী পুৱারী ওইরবা পন্দোল অসি য়ৌরকপগীদমক নুংঙাইবা ফোঙদোকখি। দব্লিউ.ঐচ.ও.না মাগী থৌগলগী চহি ১০০ মপুং ফারকপা মতমদা লৈগদবা ফীভমদুগীদমক লাক্কদৌরিবা চহি ২৫সিগী পান্দমশিং শেমদুনা থম্লম্লগনি হায়বগী থাজবসু মহাক্না ফোঙদোকখি।
হকশেলগী লমদা হেন্না পাক চাউনা খুৎশম্ননা চৎমিন্নবগী তঙায় ফদবা ৱাফম ফোঙদোক্লদুনা, প্রধান মন্ত্রীনা কোবিদ-১৯ লাইচৎ মনুংদা মপান থোরকখিবা মালেমগী হকশেলগী আর্কিতেকচরদা লৈরিবা অহোবশিং পুথোকখি অমদি খাঙবা কনবা মালেমগী সিস্তেম অমা শেমগৎনবা অমদি মালেমগী হকশেলগী ফীভম থোং মান্ননা ফগৎহন্নবা পুন্না হোৎনমিন্নবগী মথৌ তাবা ৱাফম থমখি। শ্রী মোদীনা মালেমগী ওইনা তেংবাংনবদা লৈরিবা ভারতকী খোঙফম পুথোকখি অমদি গ্লোবেল সাউথকী লৈবাকশিং য়াওনা লৈবাক ১০০ হেনবদা কোবিদ-১৯ ভেক্সিন দোজ মিলিয়ন ৩০০ লোম লৈবাকসিনা থাখি হায়না পাউদমখি। লাক্কদৌরিবা চহিশিংদা রিসোর্সশিংদা মান্নবা এক্সেস ফংহনবগী লমদা ঙাক্লৌ পীবনা দব্লিউ.ঐচ.ও.গী খ্বায়দগী মরুওইবা প্রাইওরিতী ওইগনি হায়বগী থাজবসু প্রধান মন্ত্রীনা ফোঙদোকখি।
“ভারতকী চৎনরকপা ৱাখল লৌশিংনা হায়রি মদুদি লায়না লৈতবা হায়বসিগা মশা মউ ফবগা মান্নদে”, হায়না প্রধান মন্ত্রীনা হায়রদুনা মীওই অমনা লায়না লৈহন্দনবখক হোৎনবগী মহুত্তা মশা মউ ফনা লৈনবগী মায়কৈদসু খোঙথাঙ অমা থাংজিনগদবনি হায়নসু ফোঙদোকখি। য়োগ, অয়ুর্বেদ অমদি হীরী কোনবনচিংবা হান্নদগী চৎনরকপা থৌওংশিংগী কান্নবা ৱাফমশিং থম্লদুনা, মসিনা হকশেলগী লমদা হকচাঙগী, পুক্নিংগী অমদি খুন্নাইগী ওইবা ৱাফমশিংগী ৱাখৈ পুরকই হায়না প্রধান মন্ত্রীনা শন্দোক্না তাকখি অমদি দব্লিউ.ঐচ.ও.গী অহানবা গ্লোবেল সেন্তর ফোর ত্রেদিস্নেল মেদিসিন ভারত্তা লিংখৎলিবসিদা নুংঙাইবা ৱাফমসু ফোঙদোকখি। চনানগী মরুওইবশিং মীয়ামদা পাক শন্না খঙহনবদসু ইন্তরনেস্নেল ইয়র ওফ মিল্লেতনা মরুওইবা শক্লোন অমা লৌরিবসিদু মহাক্না নুংঙাইবা ফোঙদোকখি।
ভারকী অরিবা খুৎইশিংনা মালেম অসিবু ইমুং অমগুম উননবা ঐখোয়দা তম্বিরি হায়রদুনা প্রধান মন্ত্রীনা “বসুদৈব কুতুম্বকম” হায়বা ৱাহৈবু পনখি। মহাক্না “মালেম অমা, ইমুং অমা, তুংলমচৎ অমা” হায়রিবা জি২০গী থীম অসিগী মতাঙদা ৱাফমশিং থম্লদুনা ভারতনা হকচাঙ ফবগী লমদা মঙলিবা মঙলান্দি ‘মালেম অমা হকশেল অমা’ হায়বসিনি হায়খি। ভারতকী মঙলান অসি মীওইবখক্তদা লোইদে, শা-উচেক, উপাল ৱাপাল অমদি অকোয়বগী ফীভম য়াওনা ইকোসিস্তেম পুম্ববু কোনশিল্লি হায়বা ৱাফমসু শ্রী মোদীনা ফোঙদোকখি। ঐখোয়গী ইকোসিস্তেম পুম্বা মশা মউ ফরবা মতমদা ঐখোয়না মশা মউ ফনা লৈবা ঙমগদৌরিবনি হায়না মহাক্না হায়খি।
হেল্থকেয়রগী এভাইলেবিলিতী, এক্সেসিবিলিতী অমদি এফোর্দেবিলিতীগী মতাঙদা হৌখিবা চহি খরসিদা ভারতনা ফংবা ঙমখ্রবশিং পল্লদুনা, প্রধান মন্ত্রীনা মালেমগী খ্বায়দগী চাউবা হেল্থ ইন্স্যুরেন্স স্কীম – অয়ুস্মান ভারত, হকশেলগী ইনফ্রাস্ত্রকচর পাক চাউনা শেমগৎলক্লিবা, লৈবাকসিগী ইমুং মিলিয়ন কয়াদা সেনিতেসন অমদি থক্নবা ঈশিং ফংহন্নবগী থৌরাংনচিংববু খুদম ওইনা পীখি। ভারতনা হোৎনরিবা কয়াসিনা লৈবাকসিগী লাস্ত মাইল ফাওবদা হকশেলগী ফীভম ফগৎহন্নবগী পান্দম থম্লি হায়রদুনা, প্রধান মন্ত্রীনা ভারতকী খেন্নবা ফীভমশিং কোনশিন্দুনা চৎলিবা পরম অসিনা অতোপ্পা লৈবাকশিংগী চৎন-কাঙলোন অমসু ওইরকপা য়াগনি হায়বা ৱাফম থমখি। শ্রী মোদীনা অসিগুম্বা থৌরাংশিং শেন্থোক য়ামজদবা লৈবাকশিংদা পায়খৎপদা দব্লিউ.ঐচ.ও.দা ঙাক্লৌ পীনিংবগী অপাম্বা ফোঙদোকখি।
মহাক্কী ৱারোল লোইশিল্লদুনা, প্রধান মন্ত্রীনা পুম্নমক্কী মফমদা হকশেলগী খুদোংচাবা ফংহন্নবগীদমক চহি ৭৫ চুপ্না থবক তৌরকপগীদমক দব্লিউ.ঐচ.ও.বু শিংথাখি। দব্লিউ.ঐচ.ও.গুম্বা মালেমগী ইনস্তিত্যুসনশিংগী থৌদাং তুংদা লাক্কদৌরিবা শিংনবশিং থেংনবদা হেন্না মরু ওইরক্কনি হায়বা ৱাফমসু মহাক্না থমখি। “ভারতনা হেন্না মশা মউ ফবা মালেম অমা শেমগৎনবগী থৌরাং খুদিংমক্তা মতেং পাংননবা ভারতনা খোঙফম চেৎনা লেপ্লি,” হায়বা ৱাফমগা লোয়ননা প্রধান মন্ত্রীনা মহাক্কী ৱারোল লোইশিনখি।
