ভারতকী ৭৭শুবা নিংতম্বা নুমিৎ থৌরমদা লাল কিলাদগী ৱা ঙাংবদা, ভারতমচা করোর ১৪০গী থবকশিংনা ভারতনা মালেমগী খ্বাইদগী চাউবা ৫শুবা ইকোনোমি ওইবা ঙম্বনি হায়না প্রধান মন্ত্রী শ্রী নরেন্দ্র মোদীনা ফোঙদোকখ্রে। মহাক্না হায়খি মসি সরকারনা নারোন্দা শেন হুরানবা থিংবা, অকনবা ইকোনোমি অমা শেমগৎপা অমসুং লায়রবশিংগী য়াইফনবা শেন খ্বাইদগী য়াম্না চাদিং তৌবদগী ওইথোকপনি।
প্রধান মন্ত্রীনা হায়খি ঙসি ঐনা লৈবাক অসিগী মীয়ামদা হায়নিংবদি লৈবাক অসিগী শেন-থুমগী ফিবম ফগৎলকপা মতমদা, শেনফম অদু লৈবাক্কী পুক্কৈ চোন্দে, মসিনা লৈবাক অসিগী তৌবা অমসুং লৈবাক অসিগী মীয়ামগী তৌবা ঙম্বা হেনগৎলকই। লৈবাক অসিগী মীয়ামগী য়াইফনবা শিকি অমা ফাওবা চাদিং তৌনবা সরকারনা ৱাশক লৌরবা মতমদা মশা মরোমদোম মসিগী ফল ফংগনি। চহি ১০গী মমাঙদা, ভারত সরকারনা রাজ্যশিংগী লুপা করোর লাখ ৩০ চাদিং তৌখি। হৌখিবা চহি ৯দা মসিগী মশিং অসি লুপা করোর লাখ ১০০ য়ৌরে। হায়রিবা মশিং কয়া অসি উবদা, অচৌবা অওনবা অমা লাক্লে হায়বা অদোম ফাওগনি অমসুং মসিনা তৌবা ঙম্বা অঙকপা ফংনা হেনগৎলে।
মশানা মশাবু থবক পীজবগী মতাংদা, প্রধান মন্ত্রীনা হায়খি, মশানা মশাবু থবক পীজনবা নহারোলশিংদা লুপা করোর লাখ ২০ হেন্না পীখ্রে। মীওই করোর ৮ অনৌবা ললোন-ইতিক্কী থবক হৌখ্রে অমসুং ললোন-ইতিক তৌবা মীওই খুদিংমক্না মীওই অমা নত্ত্রগা অনি থবক পীরে। মরম অদুনা, মুদ্রা য়োজনাগী কান্নবা ফংলবা মীওই করোর ৮না অনৌবা মীওই করোর ৮-১০ থবক পীরে।
কোবিদ-১৯ লাইচৎকী মতাংদা, শ্রী মোদীনা হায়খি, কোবিদ-১৯ লাইচৎ মনুংদা লুপা করোর লাখ ৩.৫গী লোন পীদুনা সরকারনা এম.এস.এম.ইশিং শেন পুৎথবদগী কনখি। মখোয় শিবা য়াদে, মখোয়দা থৌনা পীখি।
অনৌবা মিদল ক্লাসশিং থোরকপগী মতাংদা প্রধান মন্ত্রীনা হায়খি, লৈবাক অসিদা লায়রবা হন্থরকপা মতমদা, মিদল ক্লাসশিংগী শক্তি য়াম্না হেনগৎলে। লাক্লিবা চহি ৫গী মনুংদা লৈবাক অসি মালেমগী মকোক থোংবা ইকোনোমি অহুমগী মনুংদা চল্লগনি। ঙসি মীওই করোর ১৩.৫ লায়রবা কোকপদগী মিদল ক্লাসকী থৌনা হেনগৎলে। লায়রবশিংনা পোৎ লৈবা ঙম্বগী শক্তি হেনগৎলে, মিদল ক্লাসকী ললোন-ইতিক তৌবা ঙম্বগী শক্তি হেনগৎলে। খুঙ্গংদা পোৎ লৈবগী শক্তি হেনগৎলকপা মতমদা, সহরশিংদা শেন-থুমগী ফিবম য়াংনা চৎলে। অমগা অমগা শম্নবা অসি ঐখোয়গী শেন-থুমগী খোঙচৎনি। মসিদা থৌনা পীদুনা ঐখোয় মাঙলোমদা চৎখৎপা পাম্মী।
প্রধান মন্ত্রীনা হায়খি ইনকম তেক্সকী লিমিত লুপা লাখ ২দগী লুপা লাখ ৭তা হেনগৎলকপা মতমদা, তোলোব চাবা কাংবু অমসুং মরুওইনা মিদল ক্লাসশিং কান্নবা য়াম্না ফংলে।
হৌজিক মালেম্না অপুনবা ওইনা থেংনরিবা অৱাবশিংগী মতাংদা প্রধান মন্ত্রীনা হায়খি, মালেম অসি হৌজিক ফাওবা কোবিদ-১৯ লাইচৎকী অৱাবদগী কোকপা ঙমদ্রি অমসুং লালনা অনৌবা অৱাবা অমা পীরে। ঙসি মালেম অসিনা পোৎকী মমল হেনগৎলকপগী অৱাবা মায়োক্নরি।
পোৎকী মমল হেনগৎলকপা থিংনগী মতাংদা প্রধান মন্ত্রীনা হায়খি, পোৎকী মমল হেনগৎলকপা থিংনবা ভারতনা খ্বাইদগী ফবা থবকশিং পায়খৎলে। ঐখোয়গী থবকশিং অসিনা মালেমগী থবকশিংদগী হেন্না ফবনি হায়না ঐখোয়না খন্দে, পোৎকী মমল হেনগৎলকপগী অৱাবা হন্থহন্নবা মাইকৈ অসিদা ঐনা পায়খৎপা য়াবা থবকশিং পায়খৎকনি। মমল হেনগৎলকপা থিংনবা ঐনা মখা তানা হোৎনখিগনি।
