ভিদিও কনফরেন্সকী খুৎথাংদা ফেব্রুৱারি ২৭গী অয়ুক পুং ১১ তাবদা প্রধান মন্ত্রী শ্রী নরেন্দ্র মোদীনা ইন্দিয়ান তোই ফিয়ার ২০২১ হৌদোক্কনি।
অঙাং অমগী ৱাখল-লৌশিং ফগৎহনবা অমসুং অঙাংশিংগী লেংবা-ওৎপা অমসুং তম্নিংবা-খঙনিংবগী লৌশিং হেনগৎহনবদা শান্নপোৎশিংনা মরুওইবা থৌদাং অমা লৌরি। অগস্ত ২০২০গী মহাক্কী মন কি বাত ৱারোলদা প্রধান মন্ত্রীনা হায়খি শান্নপোৎশিংনা থবক ওইনা পাংথোকপা হেনগৎহনবা খক নত্তনা অচৌবা মীওই অমা ওইনিংনবা মতেং পাংই। অঙাং অমা ফগৎহনবদা শান্নপোৎশিংগী মরুওইবা পল্লদুনা, ভারত্তা শান্নপোৎ শাবা পুক্নিং থৌগৎনবা মমাঙদা প্রধান মন্ত্রীনা অকনবা ৱাফম থমখ্রে। প্রধান মন্ত্রীগী পান্দম অদু ফংনবা ইন্দিয়ান তোই ফিয়ার ২০২১ শীনবনি।
ফিয়ার অসিগী মরমদা
ফিয়ার অসি ফেব্রুৱারি ২৭দগী মার্চ ২, ২০২১ ফাওবা পাংথোক্কনি। শান্নপোৎ শাবগী ইন্দস্ত্রি চাউখৎহন্নবা ভর্চুএল প্লেতফোর্ম অমদা উনবা অমসুং ৱারি-ৱাতাই শানবা পুক্নিং থৌগৎনবা লৈগদবশিং, য়োনগদবশিং, মহৈরোয়শিং, ওজাশিং অমসুং দিজাইন্নরশিং য়াওনা মরী লৈনবা খুদিংমক পুন্নবা ফিয়ার অসিনা পান্দম থম্লি। প্লেতফোর্ম অসিগী খুৎথাংদা, সেক্তর অসিদা শেন থাদবা হেনগৎহন্দুনা অমসুং মপান্দা থাদোকপা য়োকখৎতুনা কমদৌনা ভারতনা তুংদা মালেমগী ওইনা শান্নপোৎ শাফম অমা ওইনা শেমগৎনবা সরকার অমসুং ইন্দস্ত্রি পুন্না খন্নগনি।
ই-কমর্সকা শম্নবা ভর্চুএল একজিবিসন অমদা রাজ্য অমসুং য়ুনিয়ন তেরিতোরি ৩০গী একজিবিতর ১০০০ হেনবনা মখোয়গী পোৎথোকশিং উৎকনি। ফিয়ার অসিদা ভারতকী মমাঙঙৈগী শান্নপোৎশিং অমসুং ইলেকত্রোনিক শান্নপোৎশিং, প্লস তোইশিং, পজলশিং অমসুং গেমশিং য়াওনা অনৌবা মতম অসিগী শান্নপোৎশিং উৎকনি। শান্নপোৎ দিজাইন তৌবা অমসুং শাবগী লমদা হৈশিংলবা ভারত অমসুং মালেমগী ৱাঙাংলোইশিংগা লোয়ন্না ৱেবিনারশিং অমসুং ৱারি-ৱাতাই শানবগী থৌরমশিং ফিয়ার অসিদা পাংথোক্কনি। অঙাংশিংগী ওইনা, মমাঙঙৈগী শান্নপোৎশিং শাবা উৎপা অমসুং শান্নপোৎশিংগী মিউজমশিং অমসুং ফেক্তরিশিং ভর্চুএল ওইনা য়েংবা য়াওনা তোঙান-তোঙানবা থৌরমশিং শরুক য়ানবগী খুদোংচাবা অমা ফিয়ার অসিদা য়াওরি।
