ঙরাং প্রধান মন্ত্রী শ্রী নরেন্দ্র মোদীনা গুজরাতকী সুরত্ত শাগৎলিবা বুল্লেত ত্রেন ষ্টেসন য়েংখ্রে অমসুং মুম্বাই-অহমেদবাদ হায়-স্পিৎ রেল কোরিদোরগী খুমাঙচাউশিনবা য়েংশিনখ্রে। মহাক্না ভারতকী অহানবা বুল্লেত ত্রেন প্রোজেক্কী কাংবুগা ৱারি শানখি অমসুং পান্দমশিং ফংনবা খোঙজেল অমসুং অপীবা মতমগী মনুংদা থবকশিং পাংথোকপা য়াওনা প্রোজেক্কী খুমাঙচাউশিনবগী মতাংদা হংখি। খুদোংথিবা অমতা য়াওদনা প্রোজেক অসি ফজনা য়াংনা চৎশিল্লি হায়না শিন্মীশিংগী প্রধান মন্ত্রীদা ফোঙদোকখি।
রিবার কেজশিং ৱেলদিং তৌনবা রোবোতকী য়ুনিতশিং শীজিন্নরিবা গুজরাতকী নাভসারিদা লৈবা নোইজ বেরিয়র ফেক্তরিদা থবক তৌরিবা কেরলাদগী ইঞ্জিনিয়ার অমনা মহাক্না থেংনবশিং পাউদমখি। ভারতকী অহানবা বুল্লেত ত্রেন শাবদা মহাক্না পাংথোকখিবা থবকশিংদা করি ফাওবগে অমসুং পুৱারি ওইরবা মাইপাকপা অসিগীদমক মখোয়গী ইমুং-মনুংশিংদা করি পাউ পীবগে হায়বগী মতাংদা প্রধান মন্ত্রীনা হংখি। ভারতকী অহানবা বুল্লেত ত্রেনগী থবক তৌবা শরুক য়াবদা মহাক্না চাউথোকচবা ফোঙদোকখি অমসুং মসি “মঙলানগী প্রোজেক” অমনি অমসুং মহাক্কী ইমুংগী “চাউথোকচবা তাঞ্জা” অমনি হায়না মহাক্না ফোঙদোকখি।
লৈবাক্কী থবক তৌবগী ৱাখল্লোন মমি তারদুনা, প্রধান মন্ত্রীনা হায়খি লৈবাক্কী থবক পাংথোক্নবা অমসুং অনৌবা খর পাংথোক্নবা ৱাখল্লোন লাকপা মতমদা, মদুনা পুক্নিং থৌগৎনবগী হৌরকফম অমা ওইরকই। মহাক্না ভারতকী স্পেসকী খোচৎকা চাংদম্নখি, লৈবাক অসিগী অহানবা সেতেল্লাইত থাগৎখিবা সাইন্তিষ্টশিং করি ফাওরমগনি হায়না নিংশিংখি অমসুং ঙসিদি সেতেল্লাইত চা কয়া থাগৎলে।
প্রোজেক অসিদা লিদ ইঞ্জিনিয়ার মেনেজর ওইনা থবক তৌরিবা বেঙ্গালুরুদগী শ্রুতিনা দিজাইন অমসুং ইঞ্জিনিয়ারিং কন্ত্রোগী থবকশিংগী মতাংদা শন্দোক্না তাকখি। মহাক্না হায়খি মদুদি থবক অসিগী তাঙ্কক খুদিংমক্ত, মহাক্কী কাংবুনা অফবা অমসুং ফত্তবশিং নৈনখি, পাম্বৈশিং পুথোকখি অমসুং লেপ্পা লৈতনা থবকশিং পাংথোক্নবা অতোপ্পা পাম্বৈশিং থিখি।
প্রধান মন্ত্রীনা হায়খি করিগুম্বা মফম অসিগী ফংলকপা লৌশিং লৌশিন্দুনা থম্লবা অমসুং ব্লু বুক অমগুম্না শেম্লবদি, বুল্লেত ত্রেনশিং পাক-শান্না পায়খৎপদা লৈবাক অসি মপুংফানা চঙশিনগনি। ভারতনা হঞ্জিন-হঞ্জিন চাংয়েং তৌবা তোক্কদবনি অমসুং মদুগী মহুত্ত হৌজিক লৈরিবা নমুনাশিং অসিগী মতৌ তমগদবনি। করিগীদমক থবক খর পায়খৎলিবনো হায়বা নাখৈ শেংনা খঙলবদি মতৌ তম্বা কান্নগনি। অমরোমদা, পান্দম লৈতনা নত্ত্রগা মাইকৈ খঙদনা মতৌ তম্বদগী চেকশিনগদবনি। অসিগুম্বা রেকোর্দশিং থমজিনবনা তুংগী মহৈরোয়শিংদা কান্নবশিং পীগনি অমসুং লৈবাক শেমগৎপদা মতেং পাংগনি। ঐখোয়না ঐখোয়গী পুন্সি কৎথোক্কনি অমসুং লৈবাক্কীদমক মমল য়াম্লবা খর থম্লমগনি।
ইমপ্লোইয়ি অমনা শৈরেং অমা থিদুনা মহাক্না থাগৎপগী ৱাহৈশিং ফোঙদোকখি অমসুং মহাক্কী কৎথোকপা অদু প্রধান মন্ত্রীনা থাগৎপা ফোঙদোকখি।
খোঙচৎ অদুদা য়ুনিয়ন মিনিষ্টর শ্রী অশ্বিনি বৈষ্ণব শরুক য়াখি।
নুঙগীৱারোল
লৈবাক অসি য়াংনা চৎথোক-চৎশিনগী যুগ অমা পুরক্নবা খুদম অমা ওইরিবা ভারতকী খ্বাইদগী চাউবা ইনফ্রাষ্ট্রকচর প্রোজেক অমা ওইরিবা মুম্বাই-অহমেদবাদ হায়-স্পিৎ রেল কোরিদোর (এম এ ঐচ এস আর)গী শেমগৎ-শাগৎলিবগী ফিবম য়েংশিন্নবা প্রধান মন্ত্রীনা সুরত্ত শেমগৎ-শাগৎলিবা বুল্লেত ত্রেন ষ্টেসন্দা চৎখ্রে।
গুজরাত অমসুং দাদ্রা অমসুং নাগর হাভেলিদা কিলোমিতর ৩৫২ অমসুং মহারাষ্ট্রাদা কিমি ১৫৬ য়াওনা মুম্বাই-অহমেদবাদ হায়-স্পিৎ রেল কোরিদোরগী অশাংবা অসি চাউরাক্না কিমি ৫০৮ নি। সবরমতি, অহমেদবাদ, অনন্দ, বদোদারা, ভরুচ, সুরত, বিলিমোরা, ভাপী, বোইসার, বিরার, থানে অমসুং মুম্বাই য়াওনা মরুওইবা সহরশিং কোরিদোর অসিনা শম্নহনগনি অমসুং ভারতকী চৎথোক-চৎশিনগী ইনফ্রাষ্ট্রকচরদা অওনবা অমা পুরক্কনি।
মালেমগী থাকশিং য়ৌনা অৱাংবা থাক্কী ইঞ্জিনিয়ারিংগী তেক্নিকশিংগা লোয়ননা শেমগৎলি অমসুং প্রোজেক অসিদা কিমি ৪৬৫ (লম্বীগী চাদা ৮৫) গী ভাইয়াদকশিং য়াওরি, লমদা য়ারিবমখৈ অকায়বা পীদে অমসুং অশোই-অঙাম থোক্তবা হেনগৎহল্লে। হৌজিক ফাওবদা কিমি ৩২৬ গী ভাইয়াদক লোইশিনখ্রে অমসুং তুরেলগী থোঙ ২৫ গী মনুংদা থোঙ ১৭ শাবা লোইশিনখ্রে।
প্রোজেক অসি লোইশিল্লকপদা, বুল্লেত ত্রেনশিংনা মুম্বাই-অহমেদবাদগী মরক্ত চৎথোক-চৎশিনগী মতম পুং অনিদা হন্থহনগনি, য়াংনা, নুংঙাইনা অমসু লাইনা সহরশিংগী মরক্ত চৎথোক-চৎশিনগী অওনবা পুরক্লগনি। অপুনবা কোরিদোর পরিংদা প্রোজেক অসিনা ললোন-ইতিক, তুরিজম অমসুং শেন-থুমগী থবকশিং হেনগৎহনগনি, লমদম অসি চাউখৎপা য়াংশিনহনগনি।
সিবিল ৱার্কশিং অমসুং ত্রেক-বে থাবা মপুংফানা লোইশিন্দুনা, কিমি ৪৭ গী সুরত-বিলিমোরা সেক্সন মপুংফানা লোইশিনবগী তাঙ্কক য়ৌরে। সহর অসিগী মালেমদা মমিং চৎলবা দাইমন্দ ইন্দষ্ট্রিদগী ইথিল লৌদুনা সুরত ষ্টেসনগী দিজাইন য়েকপনি অমসুং মসিদা চিংলেম্বা অমসুং থবক ওইনা পাংথোকপা য়াবা অনিমক মমি তারে। ঙাইফমশিং, তোইলেতশিং অমসুং পোৎ-চৈ য়োনফমশিং য়াওহন্দুনা পেসেঞ্জরশিং নুংঙাইনবা অকনবা মীৎয়েং থমদুনা ষ্টেসন অসি দিজাইন তৌবনি। মসিনা সুরত মেত্রো, সিতি বসশিং অমসুং ভারত রেলৱে নেতৱাকশিংগা অপনবা লৈতনা শম্নবগী খুদোংচাবা পীগনি।
