ফ্রেঞ্চ পব্লিকেসন, লিস ইকোসনা লৌখিবা ইন্তর্ভ্যু অমদা পি.এম. নরেন্দ্র মোদীনা গ্লোবল সাউথ অমসুং ৱেস্তর্ন ৱর্ল্দগী মরক্তা শন্দাইনবদা ভারতনা লৌরিবা থৌদাং অসিগী মতাংদা ফোঙদোকখি। মালেমদা খ্বাইদগী মচিন তুমখৎলক্লিবা ভারত অসি হৌজিক মতিকচাবা মফম অমা কনবা মথৌ তারে হায়না মহাক্না ফোঙদোকখি।
ফোরেন মিদিয়া অমগা লোয়ননা য়াম্না তাংনা পাংথোকপা ইন্তরভ্যু অসিদা প্রধান মন্ত্রীনা হায় গ্লোবল সাউথ অমসুং ৱেস্তর্ন ৱর্ল্দগী মরক্তা শন্দাইনবদা ভারতনা লৌরিবা থৌদাং অসি য়াম্না চাওই। গ্লোবল সাউথকী হক অসি মতম কুইনা মীরাইদুনা লৈরক্লে হায়না মোদীনা লিস ইকোসতা ফোঙদোকখি। মসিন মরম ওইদুনা হায়রিবা লৈবাকশিং অসিগী মরক্তা খোইশাওনবা অমা পোকহল্লে হায়না মহাক্না মখা তাখি। ব্রেত্তন ৱুদস ইন্তরনেস্নেল ইন্সতিত্যুসনশিংগী অপুনবা ওইনা রিসফল তৌবা পাম্বগী অপাম্বা ফোঙদোক্লদুনা ভারতকী প্রধান মন্ত্রীনা মালেমদা খ্বাইদগী মচিন তুমখৎলক্লিবা ভারত অসি হৌজিক মতিকচাবা মফম অমা কনবা মথৌ তারে হায়না ফোঙদোকখি। মসি য়ু.এন.গী ক্রেদিবিলিতীগী ইসু খক্তা নত্তে হায়না মোদীনা ফোঙদোকখি। য়ু.এন. সিক্যুরিতী কাউন্সিলনা খ্বাইদগী মচিন তুমখৎলক্লিবা লৈবাক অমসুং খ্বাইদগী চাউনা দিমোক্রেসী চৎপা লৈবাক অসিনা পর্মনেন্ত মেম্বর অমা ওইহন্দনা মালেমগী মতাংদা করম্না ফোঙদোকলিবনো? হায়না মহাক্না ফোঙদোকখি, মসিগা লোয়ননা এসিয়া পেসিফিক রিজন্দা স্ত্রেতেজিক পার্তনর অমা ওইরিবা ফ্রান্সকী রাস্ত্রপতি ইমান্যুল মেক্রোন্না ইন্তরনেস্নেল ওর্দরদা মহাক্কী ৱাখল্লোন ফোঙদোকখি।
২০১৪দগী হৌরদুনা ঐখোয়গী নীংখা তম্বগী ১০০শুবা মপোক কুমোন ওইগদৌরিবা ২০৪৭ ফাওবদা ভারত অসি চাউখৎলবা লৈবাক অমা ওইহন্নবা পান্দমগা লোয়ননা মোদীনা মরুওইনা ইকোনোমিক রিফোর্মশিং হৌদোকখি। ভারত অসি হৌজিক মালেমগী মঙাশুবা খ্বাইদগী চাউবা ইকনোমী ওইরে অমসুং অথুবা মতমদা অহুমশুবা খ্বাইদগী চাউবা ওইনবা লম্বেলদা চংশিল্লি।
ৱেস্তর্ন ভেল্যুশিংগী মরমদা চেকশিন থৌরাং লৌখৎনবা মোদীনা অপাম্বা ফোঙদোকখি অদুগা মালেমগী মফম খুদিংমক্তা লৈরিবা ফিলিসিফী অসি লৌশিনগদবনি অমসুং এনাক্রোনিস্তিক অমসুং চৎনবা য়াদ্রবা ৱাখল্লোনশিং থাদোক্লবা মতমদা মালেম অসি খোঙজেল য়াংনা খুমাং চাউশিনগনি। পৃথিবী অমা লৈগনি অদুবু ফিলোসোফী অমখক লৈবা য়ারোই হায়না মহাক্না ফোঙদোকখি। মোদীনা ভারতকী সোফ পাৱরগী মতাংদসু ফোঙদোকখি, মালেম্না লৈবাক অসিগী সিনেমা অমসুং ম্যুজিক পাম্নরক্লিবা অমসুং অয়ুর্বেদ মেদিসিন নৌনা পাম্নরক্লিবা অমসুং য়োগা অসিবু মালেম পুম্বনা ইমুংগী থবক থৌরম অমা ওইনা পাংথোক্লক্লিবা অসিগী মতাংদা ফোঙদোকখি।
মখাগী অসি ফ্রেঞ্চ ভর্জনগী ইদিৎ তৌরবা ইন্তর্ভ্যু অদুগী মপুংফাবা ত্রান্সক্রিপনি।
ভারত অসি মালেমদা খ্বাইদগী মচিন তুমখৎলক্লিবা লৈবাক অমা ওইরে। মসিনা মালেমগী মীৎয়েংদা লৈবাক অসিগী স্তেতস করম্না হোংলকপগে?
ভারত অসি চহি লিশিং কয়া শুরবা ইনাক খুনবা সিভিলাইজেসন অমনি। ঙসিদি ভারত অসি খ্বাইদগী নহা ওইরিবা লৈবাক অমা ওইরি। ভারতকী খ্বাইদগী মগুন লৈবা লন অসি ঐখোয়গী নহাশিং অসিনি। মালেমগী লৈবাক কয়ানা অহল ওইরক্লিবা অমসুং মখোয়গী মীশীংদা কাইথরক্লিবা মতম অসিদা ভারতকী নহা অমসুং হৈ-শিংলবা ৱর্কফোর্স অসিনা লাক্কদৌরিবা চহি দিকেদ কয়াদা মালেমগী লন ওইরগনি। মসিগী ৱর্কফোর্স অসিগী অখন্নবা মগুনশিংদি ওপন্নেস ওইবা অমসুং দিমোক্রেতিক ভেল্যুশিং য়াওবা, তেক্নোলোজী শিজিন্নবদা ইখৌ লাংবা অমসুং হোংলক্লিবা মালেমগী ফৌভম অসিগা চুশিন্ননবা হোৎবা অসিনি।
ঙসি ফাওবদা ইন্দিয়ন দাইসপোরা অসিনা মখোয়না লৈরুবা মফম অদুগী চাউখৎ থৌরাংদা শরুক তম্লি। মীওইবা খুনাইগী শরুক তরুক থোকপগী অমনা খুমাং চাউশিনবা মতমদা মালেম অসিদা চাউখৎপা অমসুং সস্তেনেবল ওইবা তুংলমচৎ অমা পুরক্কনি।
পেরেলেল ওইদবা সোসিএল অমসুং ইকনমিক দাইভর্সিতীগা লোয়ননা মালেমগী খ্বাইদগী চাউবা দিমোক্রেসী অমা ওইরিবা ঐখোয়গী মাই পাকপনা দিমোক্রেসী লৈরি হায়বসি শন্দোক্না তাক্কনি। মসিগা লোয়ননা মালেমগী খ্বাইদগী চাউবা দিমোক্রেসী অসিদা মতিক চাবা মফম অমা পীনবা ইন্তরনেস্নেল সিস্তেম অমসুং ইন্সতিত্যুসনশিংদা মহৌশানা থাজবা থম্লি।
ভারতনা মালেমদা মতিকচাবা মফম অমা কনবা ঙমলক্লি হায়বগী মরমদা অদোম্না শন্দোক্না তাকপীবা য়াগদ্রা?
ঐহাক্না মসি ফংফম থোকপা মফম অমা ফংবা ঙমলকপনি হায়না হায়বা পাম্মি। মতম কয়াগী মমাংদগী ভারতনা মালেমগী শেন্মীৎলোনগী শাহৌদা, তেক্নোলোজীগী খুমাং চাউশিনবদা অমসুং মীওইবা খুনাইগী চাউখৎ থৌরাংদা শরুক তম্বদা মাংলিজ থাদুনা লাক্লি। ঙসিদি মালেম পুম্বদা ঐখোয়না অৱাবা অমসুং শিংনবা কয়ামরুম মায়োক্নরে। রিসেসন, ফুদ সিক্যুরিতী, ইনফ্লেসন, সোসিএল তেন্সনশিং অসি মখোয়গী মরক্তা খরনি। মসিগী মালেমগী মরাই চাইথরকপা মতম অসিদা ঐখোয়গী মীয়ামদা নৌনা কনফিদেন্ত লাকপা, তুংলমচৎকী মতাংদা ওপ্তিমিজম অমা অমসুং মালেমদা মদুবু মফমচাবা অমদা পুনবা ইখৌ লাংবা অদু উবা ফংই।
ঐখোয়গী দিমোগ্রাফিক দিভিদেন্দ, ঐখোয়গী মরা চেৎলবা দিমোক্রেসী অমসুং সিভিলাইজেসনগী ওইবা থৌনা অসিনা ঐখোয়না তুংলমচৎতা মাংলোমদা চংশিনবা মতমদা লম্বেল তাক্লগনি। ঐখোয়না মালেমগী অৱাবশিং কোকহনবা মতমদা, হেন্না কোহেসিব ওইবা মালেম অমা শেম্বা, অশোনবশিংগী অপাম্বশিংগী খোল্লাউ লাওবা অমসুং মালেমগী শান্তি অমসুং চাউখৎ থৌরাংদা ঐখোয়গী ঈথৌদাং মশক খংই। ভারতনা মালেমগী দিসকোর্সতা মশাগী ওইবা অখন্নবা অমসুং মশক থোকপা মীৎয়েং অমসুং খোঞ্জেল অমা পুরকই- অমসুং মম পুম্বদা শান্তিগী, অফবা শেন্মীৎলোন, অশোনবা লৈবাকশিংগী অপাম্বা অমসুং ঐখোয়গী কমন ওইবা শীংনবশিং কোকহন্নবা মতম পুম্বা লেপ্লি।
মল্তিলেতরেল এক্সন্দা ভারতকী থাজবা অসি চহি লিশাং শিৎনা লৈরক্লে। দি ইন্তরনেস্নেল সোলর এলাইন্স দি কোলিসন ফোর দিজাস্তর রেসিলেন্ত ইনফ্রাস্ত্রকচর, দি ৱান সন, ৱান ৱর্ল্দ, ৱান গ্রিদ ইনিসিএতিব, ভারতকী ইন্দো পেসিফিক ওসীন ইনিসিএতিবশিং অসি মসিগী ৱাখল্লোন অসিগী খুদমশিংনি। নত্ত্রগা লৈবাক ১০০গী মথক্তা ঐখোয়গী কোবিদ ভেক্সিনশিং সপ্লাই তৌখিবা অমসুং অতোপ্পশিংগা লোয়ননা ওপন সোর্স দিজিতেল প্লেতফোর্ম অমা ওইরিবা কোৱিন অসি অথিংবা লৈতনা শিয়র তৌখিবা অসিসুনি। মালেমগী অৱাবা তারবা মতমদা মালেমগদা য়ুনিতী পুরকপা, কোহেসন, শান্তি অমসুং চাউখৎ-থৌরাংগী পোরম য়াৎপদা ভারত অসি মালেমগী তৎন-থানবা য়াদ্রবা শক্তি অমনি। ভারতনা চাউখৎলিবমখৈ মালেমগী য়াইফনা হোৎনবা হেনগৎলক্কনি অমসুং ঐখোয়গী তৌবা ঙম্বা অমসুং রিসোর্সশিং অসি মীওইবা খুনাইগী য়াইফনবগী হোৎনবা হেল্লক্কনি, অতোপ্পাশিংদা অপনবা পীরোই অমসুং মালেমদা শিংনবা ওইরোই।
অদোমগী ৱাখল্লোন্দা ভারতকী সোফ্ত পাৱরগী য়ুম্বীশিং অসি করিনো?
মসি ভারতকী সোফ্ত পাৱরগী হৌরকফম ওইরিবা ঐখোয়গী সিভিলাইজেসনগী ইথোস অমসুং হেরিতেজনি। মসি মরাং কাইনা লৈবা অসি ঐখোয়গী লাইবক ফবনি। ঐখোয়গী এক্সপোর্তশিং অসি কৈদৌনুংদা লান অমসুং অপনবা পীবা ওইদে অদুবু য়োগ, অয়ুর্বেদ, স্পিরিচ্যুএলিতী, সাইন্স, মেথমেতিক্স অমসুং এস্ত্রোলোজী ওই। ঐখোয়না মতম পুম্বদা মালেমদা শান্তি অমসুং খুমাং চাউশিনবা পুরক্নবা হোৎনৈ।
ঐখোয়না খুমাং চাউশিনবা অমসং চাউখৎলবা লৈবাক অমা ওইবা মতমদা ঐখোয়গী হৌখিবা মতমদগী ইকাইখুম্নবা অমসুং ইথিল ফংগনি হায়না ঐখোয়না থাজবা থম্মি অমসুং মসি ঐখোয়না অতোপ্পা লৈবাকশিংগা চৎমিন্নরবা মতমদতা ফংবা ঙমগনি। ভারতকী চৎন-লোনচৎ অমসুং সিভিলাইজেসন্দা নৌনা অপাম্বা পোকলকপা অসি ঐখোয়গী লাইবক ফবনি। য়োগ অসি ঙসিদি য়ুমথোংগী থবক থৌরম অমগা মান্নরে। অয়ুর্বেদকী মহৌশাদগী লৈরক্লবা মেদিসিন অসি ময়াম্না পাম্নরি। ভারতকী সিনেমা, মথেল-লুকোই, ম্যুজিক অমসুং জগোই অসি মালেম পুম্বদা পাম্নরক্লে।
ঐখোয়না মহৌশাগা পুন্না চৎমিন্নবা অসিনা অঈং অশাগী খল কাইহন্দবা অমসুং তুং কোইনা চৎকদবা পুন্সি মহিং অমদা পুরি। ঐখোয়না দিমোক্রেতিক্কী ওইবা ৱাখল্লোনশিংদা চৎনা থাজবা অমসুং বাইব্রেন্ত ওইবা দিমোক্রেসী অসিনা ইন্তরনেস্নেল গভর্নেন্সকী হেন্না একাউন্তেবল ওইবা, ইনক্লুসিব ওইবা অমসুং রিপ্রজেন্তেতিব সিস্তেম ওইবা পাম্মি অমসুং মীওই কয়াদা অশা অমসুং ইথিল পীবা পাম্মি। ঐখোয়গী শান্তিগী পাম্বা, ওপন্নেস ওইবা, ইংচিকপা অমসুং পুন্না হিংমিন্নবা; ঐখোয়গী বাইব্রেন্ত দিমোক্রেসীগী মাই পাকপা; ঐখোয়গী নাৎ, চৎন-লোনচৎ অমসুং ফিলোসোফীগী থোইদোক হেন্দোক্না ইনাক খুনবা; শান্তি, থাক মান্নবা মালেম অমা ওইহন্নবা লেপ্পা লৈত্রবা খোলাউ; অমসুং ইন্তরনেস্নেলগী আইন অমসুং শান্তিদা ঐখোয়না লৌরিবা থৌদাং অসিনা মরম ওইদুনা ভারতনা মচিন তুমখৎলকপা অসি পুম্নমক্না তরাম্না ওক্লি অমসুং মালেমদা অকিবা ফাওদে। মসিশিং অসি ভারতকী সোফ্ত পাৱরগী য়ুম্বীশিংনি।
হৌখিবা চহি খরা অসিদা ভারত অমসুং য়ু.এস.কী মরী অসি অঙকপা ফংনা ফগৎলক্লি। মসি হৌজিক করিগী ওইরিবনো অমসুং মসিগী মরুমদা লৈরিবা ভারতকী ৱাখল্লোন অসি করিনো?
চহিচা অসিনা ওল্লকপদা অফবা মরী লৈরে হায়বসি অচুম্বনি। মসি হৌখিবা চহি মাপল অসিদা খোঙজেল য়াংখৎলকখি অমসুং অনৌবা থাকশিংদা য়ৌখি। সরকার, পার্লিয়ামেন্ত, ইন্দস্ত্রী, একাদেমীয়া অমসুং মীয়াম্বু ওইরো লৈবাক অনি অসিগী স্তেকহোল্দর খুদিংমক্না ঐখোয়গী মরী অসি ফগৎহনবদা পাক শন্না মতেং পাংলকখি। ঐখোয়গী মরী অসি ফগৎনবা য়ু.এস. কংগ্রেসনা লেপ্পা লৈতনা বাইপার্তিসনগী মতেং পীরকখি।
হৌখিবা চহি মাপল অসিদা তোঙান তোঙানবা এদমিনিস্ত্রেসনশিংদা য়ু.এস.কী লুচিং মখাদা ঐআক্না অফবা রেপোর্ত অমা ফংবা ঙমখি। জুন্দা য়ুনাইতেদ স্তেতসতা ঐহাক্না চৎখিবা লৈবাক্কী খোঙচৎ অদুগী মনুংদা রাস্ত্রপতি জো বাইদেন অমসুং ঐহাক্না থোইদোক হেন্দোকপা মীয়ামগী মরীগা লোয়ননা মালেমগী খ্বাইদগী চাউবা দিমোক্রেসী অনিগী মরী অসিনা চহিচা অসিগী মীয়াম্না শোন্নহৌরগদবা মরী অমা ওইরগনি থাজবা থমখি। মসিগী মরমদি মসিগী মরী অসি ঐখোয়গী মতম অসিদা থেংনরিবা অৱাবশিং মায়োক্ননবা অমসুং গ্লোবল ওর্দর অসি শেম্বদা অফবা মওংদা মতেং পাংনবা অপাম্বশিং, ৱাখল্লোন, কত্থোকপা অমসুং কম্প্লিমেন্তরিশিংদা য়ুম্ফম ওইদুনা শেমখিবননি।
ইন্তরনেস্নেল ওরদরদা শিংনবা কয়ামরু হেনগৎলকপনা ঐখোয়গী মরী অসি য়াম্না খোঙজেল য়াংনা অমসুং থৌদাং লৈনা মাংলোমদা চংশিল্লি। মরী অসিদা অমগা অমগা থাজবা থম্বা হায়বসি য়াম্না মরুওইবা মচাকশিংনি। ফ্রী, ওপন ইনক্লুসিব অমসুং বেলেন্স ইন্দো পেসিফিক রিজন অমা শেম্বা হায়বসি অপুনবগী পান্দম অমনি। ঐখোয়না মসি অতোপ্পা পার্ত্নরশিংগা মফম অসিদা অমসুং মফম অসিগী ৱাংমদা পাংথোকপা পাম্মি।
স্তেন্দর্দ অমসুং নোর্মশিং শেম্নবা, ক্রিতিকেল অমসুং ইমর্জিং তেক্নোলোজীশিং য়াওনা রেসিলেন্ত গ্লোবল সপ্লাই চেন শেম্নবা, মাইপাকপা গ্রীন ইনর্জী ত্রাঞ্জিসন অমা শেম্নবা, মরুওইবা সেক্তরশিংদা মেন্যুফেকচরিং হেনগৎহন্নবা, অচৌবা দিফেন্স ইন্দস্ত্রিএল পার্তনরশীপ অমা শেম্নবা ঐখোয়না পুন্না হোৎনরি। ঐখোয়না মফম অসিদা অমসুং মফম অসিগী ৱাংমদা অতোপ্পা লৈবাকশিংগা পুন্না থবক পাইখৎলি অমসুং মল্তিলেতরেল ইন্সতিত্যুসনশিং শেমগৎলি। মসিশিং অসি মরী অসিবু ফগৎহল্লিবা মচাক অদুদি মরুওইবা অপুনবগী পান্দম খুদিংমক্নি। ঐখোয়গী লৈবাক অনি অসি পুন্না চৎমিন্নবা মথৌ তাই অমসুং ঐখোয়গী মতম অসিদা থেংনরিবা শিংনবশিং মায়োক্ননবা কন্সত্রক্তিব ওইবা থৌদাং অমা লৌনবা অমসুং গ্লোবল ওর্দর শেম্বদা চাউনা মতেং পাংনবা হোৎনগনি।
অদোম্না ভারত অসি গ্লোবল সাউথকী নেচরেল লীদর অমনি হায়না লৌবরা?
মালেম অসিগী লুচিংবশিং মশিং য়াম্মি হায়না ঐহাক্না লৌই অমসুং ভারতনা মফম অমহেক্তা নম্ফুদা কল্লোইদবনি। ঐহাক্না তশেংনা খনজবদা, ঐখোয়গী অপুনবা থৌনা অমা অমসুং অপুনবা গ্লোবল সাউথ অসিগী অপুনবা লুচিং অমা মথৌ তাই মরমদি মসিগী খোল্লাউ অসি হেন্না মপাঙ্গল কন্নবা অমসুং কম্ম্যুনিতী খুদিংমক্না মশাগী ওইনা লুচিংবা ওইনবনি। মসিগী অপুনবা লুচিং অসি শেমগৎনবা ভারতনা লুচিংবা অমা ওইনা থবক পাংথোক্নবা ৱাখল্লোন অদু খনবগী মথৌ তাদে আয়না ঐহাক্না খল্লি।
গ্লোবল সাউথকী হকশিং অসি মতম শাংনা মীরাইবীদুনা থম্লে হায়বসিসু অচুম্বনি। মসিনা মরম ওইদুনা গ্লোবল সাউথকী মেম্বরশিংগী মরক্তা অশাওবা অমা পোক্লকই অমসুং মখোয়বু নম্ফুদা থবক তৌহনবা অদুবু ৱারেপ লৌরমদাইদনা মখোয়বু মীরাইবগী থৌওং থেংনদবা নত্তে। দিমোক্রেসীগী অশেংবা থৌনা অদু গ্লোবল সাউথ অসিদা ইকাই খুম্নদ্রে। করিগুম্বা ঐখোয়না দিমোক্রেসীগী অশেংবা থৌনা অদুগা লোয়ননা থবক পাইখৎলবা অমসুং চপ মান্নবা ইআকি খুম্নবা উৎলবা, চপ মান্নবা হক পীরবদি মালেম অসি হেন্না শক্তি লৈবা, অমসুং হেন্না মপাঙ্গল লৈবা কম্ম্যুনিতী অমা ওইরগনি হায়না ঐহাক্না থাজবা থম্মি। গ্লোবল সাউথ অসিবু শেম্লিবা অচৌবা মেজোরিতী অসিগী অপাম্বা অদু ঐখোয়না খংনা কোকহনবা ঙম্লবদি ইন্তরনেস্নেল ওর্দরদা ঐখোয়না থাজবা পীবা ঙম্লগনি। ঐখোয়না গ্লোবল ইন্সতিত্যুসন অসি হেন্না রেসিলেন্ত ওইহনবা ঙমলগনি।
অনিশুবদা ভারতনা গ্লোবল সাউথতা মশা মথন্তনা করম্না খনবগে হায়বদু য়েংশি। করিগুম্বা গ্লোবল সাউথ অসিনা অৱাংবা থাক অমা কানবা হোৎনবা মতমদা তঙাইফদনা চংগদবা মপাঙ্গল অদু ভারতনা ওইবা ঙমগনি হায়না ঐহাক্না খল্লি। গ্লোবল সাউথকী ওইনা ভারতনা গ্লোবল নোর্থকা মরী শেমগৎপা ঙমগনি। মরম অদুনা মসিগী মপাঙ্গল অসি মসিগী লংদাই ওইবা য়াগনি। মরম অদুনা মসিগী মপাঙ্গল অসি হেন্না কলহনবা মথৌ তাই।
মালেমগী ইন্সতিত্যুসনশিংদা গ্লোবেল সাউথকী খোঞ্জেল তাদে হায়না অদোম্না কয়ারক হন্না হায়খ্রে। মালেমগী ইন্সতিত্যুসনশিং অসিদা সাউথকী খোঙফম হেনগৎহন্নবা অদোমগী করি থৌরাং লৈবগে?
জনুৱারী 2023, ঐখোয়গী G20 প্রসিদেন্সীনা হৌখিবদা ঐহাক্না গ্লোবেল সাউথকী সম্মিত অমা শিনখি। লৈবাক 125না শরুক য়াখি। ভারতনা গ্লোবেল সাউথকী হীরমশিং নম হাদুনা শোইদনা পুখৎকদবনি হায়না পুম্নমক্না য়ানবা অমা পুরকখি।
ঐখোয়গী G20 প্রসিদেন্সী মনুংদা অমসুং ৱান আর্থ, ৱান ফেমিলী, ৱান ফ্যুচরগী থীমগী মখাদা ঐখোয়গী পান্দমশিংগী মনুংদগী মরু ওইবা অমদি গ্লোবেল সাউথকী খোঞ্জেল ওইবা হায়বসি ওইহনখি। ঐখোয়না গ্লোবেল সাউথকী প্রাইওরিতী অমসুং ইন্তরেস্ত অসিবু G20গী খন্ন-নৈনবা অমসুং ৱারেপশিংগী ময়োলদা লৈহন্নবা হোৎনখি। ঐহাক্না অফ্রিকাগী য়ুনিয়নবু G20গী পর্মানেন্ত মেম্বরশিপ ওইহনবগী ৱাহৌদোক থমখি।
গ্লোবেল সাউথকী মতাংদা ৱা ঙাঙবদা, ঐখোয়না নোর্থকী মাইয়োক্তা ফিদম অমত্তা শেম্নবা হোৎনবা নত্তে। তসেংবদি, মসিদি ৱান ৱর্ল্দ, ৱান ফ্যুচরগী পান্দম্বু খুমাং চাউশিলহন্নবা হোৎনবগী থৌওংনি। অতোপ্পা অলতর্নেতিব অমদি, হোংবা নাইরিবা মালেম, শরুক হেন্না খাইদোক্লবা, নোংচুপকী মাইয়োক্তা অতোপ্পা হায়না লৈবা, ঐখোয়গী মালেমগী মিৎয়েং মান্ননা য়েংদবশিংগী মাইয়োক্তা মফম খরা পীবা, অমসুং অতোপ্পা মহুৎ শিনবা য়াবা পথাপ পাম্বা মালেম অমনি। রাস্ত্রপতি মেক্রোনসু ৱাখল্লোন অসিবু শৌগৎলি হায়না ঐহাক্না খল্লি। ন্যু গ্লোবেল ফাইনান্সিং পেক্ত সম্মিৎ শিনবগী মপুং ওইবা ইথিলসু মসিমক্নি।
UN সেক্যুরিতী কাউন্সিলদা ভারত অসি পর্মানেন্ত মেম্বর ওইগদবনি হায়না অদোম্না তকশিন্দুনা লাক্লি। মসিগী হীরম অসিদা মাঙজগদৌরিবা অসি UNনা ওইগদরা?
মসিদি মাঙজবা খক্কী নত্তে, মসিদগী হেন্না চাউবা হীরম অমনি। মালেমগী অনিশুবা লাঞ্জাওগী মতুংদা শেমখিবা মলতিলেতরেল গবর্নেন্স স্ত্রকচর অসিগী মতাংদা মালেম্না পুকচেল শেংনা খন্ন-নৈনবগী মথৌ তারে হায়না ঐহাক খল্লি।
ইন্সতিত্যুসন অসি শেমখ্রবা চাউরাকপা দিকেদ নিপানগী মতুংদা মালেম অসিদা অহোংবা কয়া লাকখ্রে। মেম্বর লৈবাক্কী মশিংসু শরুক মরিদগী হেন্না হেনগৎলকখ্রে। মালেমগী শেন্মিৎলোনগী মওং-মতৌসু হোংলে। ঐখোয়না অনৌবা তেক্নোলোজীগী য়ুগতা হিংলি। অনৌবা শক্তি কয়া অমা থোক্লক্লে অমসুং মখোয়না মালেমগী খলদা অহোংবা লৈহল্লে। অইং-অশাগী ফিভম হোংলকপা, সাইবর সেক্যুরিতী, তেরোরিজম, স্পেস সেক্যুরিতী, লাইচৎ য়াওনা ঐখোয়না অনৌবা শিংনবা মাইয়োক্নরি। অহোংবা লাকপশিংগী মতাংদা ঐহাক্না হায়বগী লোইবা নাইরোই।
ঙসিগী হোংলবা মালেমসিদা ৱাহং কয়া অমা লাক্লি – মসিনা ঙসিগী মালেমগী মশক তাক্কদোইরা? মখোয় শেমখিবগী থৌদাং মখোয়না পাংথোকপা ঙমগদৌরিবরা? মালেমগী লৈবাকশিংনা মসিগী ওর্গনাইজেসনশিং অসি মরু ওই নত্ত্রগা কান্নবা পুরক্লি হায়না খল্লিবরা?
UN সেক্যুরিতী কাউন্সিল অসিনা অখন্নবা ওইনা, ৱাফম অসিগী চুনবা খুদম অমা ওইরি। অফ্রিকা অমসুং লাতিন অমেরিকাগী অপুনবা মহাদেশ অসিবু থওইবীদ্রবদা মসিবু মালেমগী লুপ অমগী মরু ওইবা মশা অমনি হায়না ঐখোয়না করম্না লৌগদৌরিবনো? মখোয়গী মীশিং খ্বাইদগী য়াম্বা লৈবাক অমসুং খ্বাইদগী চাউবা গনতন্ত্র অসিনা পর্মানেন্ত মেম্বর ওইদ্রবকান অসিদা মখোয়না মালেমগীদমক্তা ৱাফম থম্মি হায়না করম্না হায়রিবনো? মীচঙ মীখায় নাইবা মেম্বরশিপকী থৌওং লৈবনা নুং পাউনা উহনবা ৱারেপ লৌবা ঙমদ্রে, মসিনসু মালেমগী ঙসিগী শিংনবশিংগা মাইয়োক্নবদা অৱাবা ওইরিবনি।
ভারতনা করি থৌদাং লৌফম থোকপগে হায়বা ৱাফম য়াওনা UN সেক্যুরিতী কান্সিলগী মনুংদা করি অহোংবা লাকহন্নিংবগে হায়বগী মতাংদা লৈবাক অয়াম্বনা ময়েক শেংনা খঙনরে হায়না ঐহাক খল্লি। ঐখোয়না মখোয়গী খোঞ্জেল তাদুনা মখোয়গী পাউতাক ইনবগী মথৌ তাই। ফ্রান্সনা হীরম অসিগা মরী লৈননা লেপ্লিবা ময়েক শেংবা খোঙফম অসি ঐহাক্না থাগৎচনীংই।
অদোমগী ইং 2047গী ভারতকী পান্দম অসি করিনো? মালেমগী খল ঙাকপদা ভারতনা লৌগদৌরিবা থৌদাং অসি অদোম্না করম্না উবগে?
ঐখোয়গী নিংতম্বগী চহি 100 মপুং ফাবা চহি, ইং 2047 অসিগীদমক্তা ঐখোয়না ময়েক শেংলবা পান্দম অমগা লোয়ননা হোৎনরি। ঐখোয়না ইং 2047দা ভারত অসি চাউখৎপা লৈবাক অমা ওইনা উবা পাম্মি। এজুকেসন, হেল্থ, ইনফ্রাস্ত্রকচর অমসুং খুদোংচাবগুম্বা মীয়ামগী তঙাই ফদবা খুদিংমক পীবা ঙম্বা চাউখৎপা লৈবাক অমা ওইনা উবা পাম্মি।
লৈবাক মীয়াম খুদিংমক্না মশাগী হক ফংবা, লৈবাক অসিদা লৈরিবা মশাগী থাক অমসুং মফম খঙবা অমসুং মশাগী তুংগী মতমগী মতাংদা তংদু লৈতানা লৈবা মতিক লৈবা অমসুং মীয়াম পুম্বনা শরুক য়াবা ফেদেরেল দিমোক্রেসী অমা ভারতনা মতম পুম্বদা ওইগনি।
ভারতনা ইন্নোভেসন অমসুং তেক্নোলোজীগী লমদা মালেমগী লুচিংবা ওইগনি। সস্তেনেবল ওইবা পুন্সি মহিং, তরু-তনানবা তুরেল, হিগোক মচুগী অতিয়া অমসুং বাইওদাইবর্সিতী অমদি লম্লক্কী শা-ঙানা থনবা উমং লৈবা লৈবাক অমা। ঐখোয়গী শেন্মিৎলোন্না খুদোংচাবা কয়াগী তুংফম ওইগনি, মালেমগী চাউখৎ থৌরাংগী ইঞ্জিন ওইগনি অমসুং মালেমগী স্কিল অমসুং তেলেন্তকী হৌরকফম ওইগনি। ভারতনা গনতন্ত্রগী মপাঙ্গলগী মতিক চারবা খুদম অমা ওইগনি। মালেমগী আইন অমসুং মলতিলেতরেলিজমগী লিচৎ শাজৎনা তেংবাংদুনা মলতিপোলর ওইবা মালেম অমা ওইহনবদা ঐখোয়না তেংবাংগনি।
নোংচুপ্লোমগী ভেল্যুনা হৌজিকসু য়ুনিভর্সেল দাইমেন্সন লৈরি হায়না অদোম্না খনবরা নত্ত্রগা অতোপ্পা লৈবাকশিংনা মশাগী লম্বী য়াৎফম থোকই খনবরা?
ঐখোয়না ঙসিগী মালেমসিদা হৌজিক য়েংলুবা মতমদা, মালেমগী মফম অমা হেক্তগী ৱাখল খনবগী থৌওং, মালেমগী মফম অমা হেক্তদা হোৎনবগী মতৌ, মালেমগী মফম অমা হেক্তদা লৈবা ফিলোসোফীনা মশাগী মতমগা চুনবা মওং-মতৌ অমা লৈজৈ অমসুং মখোয়না মরম ওইরগা ঐখোয়গী ঙসিগী মালেমসিদা য়ৌরক্লিবনি হায়না ঐনা খল্লি। মথং-মনাও কায়বা অমসুং চুনদ্রবা থৌওংশিংদগী নান্থোকপা ঙম্বা মতমদা মালেম্না খোঙজেল লৈনা চাউখৎপা ঙম্মি। ঐখোয়না চুন্দ্রবা থৌওংদগী থুনা নান্থোকপা ঙম্লিবমখৈ, ঐখোয়না অনৌবা থৌওং শিজিন্নবা ঙমগনি।
অদুনা, নোংচুপ নত্ত্রগা নোংপোক্না হেন্না ফৈ, অমগী ৱাখল খনবগী থৌওংনা অমদগী হেন্না ফৈ হায়বা মিৎয়েং ঐহাক্তি য়েংদে। চহি লিশিং কয়াগী মমাংদা ইরম্লবা ঐখোয়গী বেদনা নাকল খুদিংদগী অফবা ৱাখল্লোন লাকহল্লু হায়না তাকপীরি। মালেমসিদা লৈবা অফবা খুদিংমকপু থাগৎপা, য়াজবা অমসুং ইনবা ঙম্বগী মতৌ ঐখোয়দা লৈগদবনি। মরম অদুনা, বাসুদৈবা কুতুম্বাকম, ৱান আর্থ, ৱান ফেমিলী, ৱান ফ্যুচর হায়রিবা ঐখোয়গী G20গী থীমদা য়েংলুবা মতমদা ঐখোয়না ফিলোসোফী অমত্তগী মতাংদা পন্দে হায়বা অদোম্না উরিবনি।
অদোম্না ইং 2014দগী হৌদুনা শেন্মিৎলোনগী ওইবা থৌশিল থৌরাং কয়া পায়খৎখ্রে। শেন্মিৎলোনবু মখা তানা করম্না চাউখৎহনগে হায়না অদোম্না খনবগে?
ঐখোয়গী শেন্মিৎলোনগী চাউখৎ থৌরাংগী থৌওং অসিদি মীয়াম্না ময়োলদা থম্বা ৱাখল্লোন্না মতম পুম্বদা লমজিংদুনা লাক্লি। খুদোংচাবা খ্বাইদগী য়ামদনা ফংবা মীওইশিংদা অহেনবা মিৎয়েং চঙবা ৱারেপ কয়াবু ঐখোয়না থবক্তা ওন্থোক্নবা হোৎনরি। লাস্ত মাইল কন্নেক্তিবিতী, য়ুম্থোং খুদিংদা য়ৌবা হায়বসিদা ঐখোয়না মিৎয়েং চঙলিবা অসি য়াম্না মায় পাক্লে। দিজিতেল তেক্নোলোজী শিজিন্নবগী থৌওংনা মসিগী মপুং ওইবা মরম অমনি।
ঐখোয়না সোসিএল অমসুং ইকোনোমিক ইনক্লুজন অমসুং এম্পাৱর্মেন্ত তৌবগী থাকপু মমাংদা অমুক্তা পাংথোকখিদ্রিবা মওংদা খুমাং চাউশিনহল্লে। ঐখোয়না হৌজিক ফাওবদা লাইরবশিংগী য়ুম মিলিয়ন 40 হেনবা অমসুং তরু-তনানবা সেনিতেসনগীদমক্তা অমাংশঙ মিলিয়ন 110 শাখ্রে। ঐখোয়না চাউরাকপা মীওই মিলিয়ন 500কী বেঙ্ক একাউন্ত হাংদোকপীখ্রে অমসুং মাইক্রোক্রেদিত লোন মিলিয়ন 400 পীথোকখ্রে। ঐখোয়না ইমুং মিলিয়ন 90দা কুকিং গ্যাস কন্নেক্সন পীখ্রে অমসুং মীওই মিলিয়ন 500তা হেল্থ ইন্স্যুরেন্স কবরেজ লেম্না ফংহনখ্রে।
দিজিতেল তেক্নোলোজী শিজিন্নবা অমসুং ভারতকী দিজিতেল পব্লিক ইনফ্রাস্ত্রকচরগী ইহৌ অসিনা ভারত্তা য়ুনিভর্সেল বেঙ্কিং পুরক্লে। মসিনা কোবিদ হেক হৌবদগী মীয়ামদা বিলিয়ন য়ুরো 300 হেন্না হকথেংননা য়েন্থোকপা, মীওই মিলিয়ন 800কী মফমদা চানবা চিঞ্জাক লেম্না পীবদা য়াম্না তেংবাংখি। ঙসিদি, মালেমগী রীএল তাইম দিজিতেল ত্রাঞ্জেক্সনগী 46%দি ভারত্তা পাংথোক্লি।
মীপুম খুদিংগী তৌবা ঙম্বগী মতিক ফুদোকহনবগী পান্দমগা লোয়নবা ইকোনোমিক রিফোর্ম কয়া ঐখোয়না ইং 2014দগী থবক ওইনা পাংথোক্তুনা লাক্লি। ঐখোয়না কারবার তৌবা লাইহনবদা মিৎয়েং চঙলি অমসুং ভারত মচা খুদিংগী মফমদা ওন্তোপ্রিনরগী ইথিল লৈহন্নবা পুক্নিং থৌগৎলি। ঐখোয়না ইন্নোভেসন অমসুং স্তার্তঅপশিংবু খুমাং চাউশিনহল্লি। ভারত অসি হৌজিক্তি মালেমগী ওইনা স্তার্তঅপকী খ্বাইদগী অহুমশুবা চাউবা ইকোসীস্তেম ওইরবনি।
ঐখোয়না ইনভেস্তরশিংদা তেংবাংনবগীদমক্তা মাংজৌননা হায়বা ঙম্বা, নুং-পান ফাওনা উবা অমসুং তংদু লৈতাবা পোলিসীগী চৎনবী অমা লৈহল্লি। ঐখোয়না লোং তর্ম গ্রোথ অমসুং দিভেপমেন্তকী মরু ওইবা ফম্বাক ওইরিবা এজুকেসন অমসুং তেক্নোলোজীদা মিৎয়েং চঙলি। ঐখোয়না তেক্নোলোজীগী লমদা মালেমগী লুচিংবা অমা ওইবা, ভারতপু AI, ক্বান্তম কম্প্যুতিং, সেমিকন্দক্তর, স্পেস অমসুং দিফেন্সকী গী লমদা লমজিংবা প্লেয়র অমা ওইবগী পান্দম থম্লি।
ঐখোয়না ইনফ্রাস্ত্রকচরগী চাউখৎ থৌরাংদা মপুং ওইবা মিৎয়েং চঙলি। শোরোক, রেলৱে, এয়রপোর্ত, হিথাংফম, পাইপলাইন নত্ত্রগা পাৱর স্তেসন্দা লৈরক্লিবা অহোংবগী খোঙজেল অমসুং পাক চাউবসি মমাংদা অমুক্তা থোকখিদ্রিবা মওংদনি। গতী-শক্তি প্রোগ্রাম্না লোজিস্তিক্সকী মমল হন্থহল্লে অমসুং থৌরাং য়াত্তুনা চাউখৎ থৌরাং পুরকপগী থৌওং ওইথোকহনবদা তেংবাংলি। প্রদক্সন লিঙ্ক ইন্সেন্তিব স্কিম অমসুং নেস্নেল ইনফ্রাস্ত্রকচর পাইপলাইন প্রোজেক্তনা মেন্যুফেকচরিংগী লমদা ভারত্তা অচৌবা মতেং পাংলি। ঐখোয়গী শেন্মিৎলোন অসি হৌজিক মালেমগী খ্বাইদগী মঙাশুবা চাউবা ওইরে অমসুং অথুবা মতমদা মালেমগী খ্বাইদগী অহুমশুবা চাউবা ওইরগনি।
মালেমগা নক্ননা চৎমিন্নবা হায়বসিনা ঐখোয়গী শেন্মিৎলোনগী থৌরাংগী মরু ওইবা শরুক অমা ওইরি। ঐখোয়গী মেক ইন ইন্দিয়াগী পান্দম অসিনা ভারতপু মালেমদগী লাপ্না থমগদৌবা নত্তে। ইং 2030গী চহি মাপনগী মমাংদা পেরিস কম্মিতমেন্তকী পান্দম ফংবা G20গী অমত্তা ঙাইরবা লৈবাক ঐখোয়না ওইরে। ঐখোয়না ইং 2047 ফাওবগী মনুংদা ভারতপু চাউখৎপা শেন্মিৎলোন অমা ওইহন্নবা খোঙফম চেৎলি।
চাইনানা মশাগী দিফেন্সকী মতিক হেনগৎহন্নবা য়াম্লবা শেনফম কয়া থাদরি। মসিনা লমদম অসিগী সেক্যুরিতীগী ফিভমদা অকি তুজুংবা পোকহনবগী ৱাফম লৈবরা?
ইন্দো-পেসিফিক্কী লমদমদা লৈরিবা ঐখোয়গী অপাম্বা অসি য়াম্না পাক চাউই, অমসুং লৈনরিবা মরীসু য়াম্না চেৎলি। লমদম অসিগী ওইনা থম্বা ঐখোয়গী পান্দমদি ঐহাক্না ৱাহৈ অমা – SAGAR অসিদা ফোংদোক্লে, মসিনা তাকপদি সেক্যুরিতী এন্দ গ্রোথ ফোর ওল ইন দি পেসিফিক রিজন হায়বনি। ঐখোয়না তুংগী মতম অমা ওইহন্নিংলিবা অসিদা শান্তি হায়বসি তঙাই ফদবা ওই, মসিমক শোইদনা লৈগনি।
চয়েৎনবা খুদিংমক ৱারী শাদুনা অমসুং দিপ্লমেসীগী খুত্থাংদা শান্তি ওইনা ৱারোইশিন পুরকপা, লৈবাক খুদিংমক, মালেমগী আইন অমসুং কাঙলোন্দা য়ুম্ফম ওইবা মালেমগী পথাপ পুম্নমকপু ইকায় খুম্নবা হায়বগী খোঙফম অসিদা ভারতনা মতম পুম্বদা লেপ্তুনা লাক্লি। ঐখোয় মশেলগী থাজনবা ঙাক্নবগীদমক্তা হায়রিবা ৱাফম অসিগী মরু ওইবসি হান্নদগী য়াম্না হেনগৎলে। মসিগী খুত্থাংদা ঐখোয়না রিজনেল অমসুং মালেমগী মতম শাংনা চৎকদবা শান্তি অমসুং নুংঙাই য়াইফবগী মাইকৈদা শরুক তম্বা য়াগনি হায়না ঐহাক্না থাজৈ।
মফম অসিদা উংখৎনবগী চাং হেনগৎলক্লি। ভারত য়াওনা লৈবাক কয়া অমনা অনম কনবা চাইনাগী মতৌনা থোকহনবা শিংনবা মাইয়োক্নরি। চাইনাগা মতৌ অসুম্না উংখৎনরিবা অসিদা অদোম্না ফ্রান্সতগী করম্বা স্ত্রেতজিক তেংবাং ফংগনি হায়বগী থাজবা থম্বগে?
রাজনীতি, ঙাক-শেল, সেক্যুরিতী, শেন্মিৎলোন, হ্যুমেন সেন্ত্রিক দিভেলপমেন্ত অমসুং সস্তেনেবিলিতী কোওপরেসন পুম্নমক কোনবা অচৌবা মিৎয়েংদা য়ুম্ফম ওইবা অমসুং হীরম খুদিংমক মনুং চনবা স্ত্রেতজিক পার্ত্নরশিপ অমা ভারত অমসুং ফ্রান্সকী মরক্তা লৈনরি। মান্নবা পান্দম অমসুং ভেল্যু লৈবা লৈবাক অনিনা প্লুরিলেতরেল ওইবা এরেঞ্জমেন্ত নত্ত্রগা রিজনেল ইন্সতিত্যুসনশিংদা বাইলেতরেল ওইনা পুন্না থবক তৌমিন্নবা মতমদা, মখোয়না শিংনবা অমা হেক্তগা মাইয়োক্নবা ঙমগনি। ইন্দো-পেসিফিক লমদমদা লৈরিবা মরী অসি য়াওনা, ঐখোয়গী পার্ত্নরশিপ অসিনা লৈবাক অমত্তগী মাইয়োক্তা লৈতে। ঐখোয়গী পান্দমদি লমদম অসিদা লৈরিবা ঐখোয়গী শেন্মিৎলোন অমসুং সেক্যুরিতীগী ইন্তরেস্ত ঙাক শেনবা, চত্থোক চৎশিন তৌবা অমসুং লল্লোন ইতিক্কী নিংতম্বা লৈহনবা, অমসুং লমদম অসিদা চৎনরিবা মালেমগী আইনগী কাঙলোনবু খুমাং চাউশিলহনবনি। ঐখোয়না অতোপ্পা লৈবাকশিংগা মখোয়গী মতিক হেনগৎহন্নবা অমসুং মশাগী ৱারেপ কয়া নিংতম্না লৌজবা ঙমহন্নবা থবক তৌমিন্নৈ। মসিগা লোয়ননা, ঐখোয়না লমদম অসিগী শান্তি অমসুং তংদু লৈতাবগী ফিভম খুমাং চাউশিলহনবা পাম্মি।
হৌজিক্কী য়ুগ অসি লানগী য়ুগ নত্তে হায়না অদোম্না সেপ্তেম্বর থাদা ভ্লাদিমির পুতিনগী মফমদা হায়খি। লান অসি হৌজিক পাকথোক চাউথোরক্লি অমসুং মসিনা “গ্লোবেল সাউথ”তা পীরিবা চৈথেং অসি য়াম্না চাউরে। ভারতনা য়ুক্রেন লানগা মরী লৈননা লেপ্লিবা খোঙফম অসি হেন্না চেৎশিনহনখিগদরা?
ঐহাক্না রাস্ত্রপতি পুতিন অমসুং রাস্ত্রপতি জেলেন্সকীগা কয়ারম হন্না ৱারী শাখ্রে। ঐহাক্না রাস্ত্রপতি জেলেন্সকীগা হিরোশীমাদা উন্নখি। ঐহাক্না রাস্ত্রপতি পুতিনগসু হন্দক্তা ৱারী শাখি। ভারতকী খোঙফম অসিদি ময়েক শেংবনি, নুং-পান ফাওনা উবনি অমসুং অহোংবা নাইদবনি। হৌজিক অসি লানগী য়ুগ নত্তে হায়না হায়খিবনি। দাইলোগ অমসুং দিপ্লোমেসীগী খুত্থাংদা শিংনবা অসিগী ৱারোইশিন পুরক্নবা ঐহাক্না নাকল অনিমক্তা হায়রি। ইরাং অসিবু লোইশিনবদা মতেং ওইগদবা থম্মোই শেংবা থবক খুদিংমক্তা ভারতনা তেংবাংনবা শেম শারি হায়না ঐহাক্না মখোয়দা হায়রিবনি।
লৈবাক খুদিংমক্না অতোপ্পা লৈবাক্কী মনিং তম্বা অমসুং তেরিতোরিএল ইন্তিগ্রিতীবু ইকায় খুম্নবগী থৌদাং লৈ, মালেমগী আইন ইনবগী থৌদাং লৈ অমসুং UNগী চার্তর ইন্দুনা চৎকদবনি হায়না ঐহাক্না থাজৈ।
ইরাং অসিনা অপুনবা মালেমসিদা, অখন্ননা গ্লোবেল সাউথতা পীরিবা চৈথেংশিং অসিবু ঐখোয়না য়াম্না লুনা লৌই। কোবিদ লাইচৎকী চৈথেং মাইয়োক্নদুনা লৈরিবা লৈবাক কয়ানা হৌজিক ইনর্জী, চিঞ্জাক অমসুং হকশেলগী শিংনবা, শেন্মিৎলোন তপথরকপা, পোৎ-লমগী মমল ৱাংলকপা অমসুং শেল পুশিল্লুবগী পোৎলুম অমুক মাইয়োক্নবা হৌরে। লান অসি লোইশিনফম থোকই। সাউথকী লৈবাকশিংনা থেংনরিবা শিংনবা কয়া অসিদা ঐখোয়না মিৎয়েং চঙফম থোকই।
হন্দক্কী চহিসিদা ভারত অমসুং ফ্রান্সকী মরক্তা লৈরিবা স্ত্রেতজিক পার্ত্নরশিপনা চহি 25 মপুং ফারগনি। লৈবাক অনিসিগী মরী অসি অদোম্না করম্না করম্না ফোংদোক্কনি?
খ্বাইদগী অহানবা ওইনা, ঐহাক্না ভারত মচা বিলিয়ন 1.4গী মাইকৈদগী ফ্রান্স, লৈবাক অসিগী সরকার অমসুং ঐহাক ইশামক্কী মাইকৈদগী রাস্ত্রপতি মেক্রোনবু 14শুবা জুলাই নেস্নেল দে সেলেব্রেসন অসিদা ঐহাকপু অথোইবা মীথুংলেন ওইনা শরুক য়ানবগীদমক্তা ভারত্তা পাউজেল পীবিরকপগীদমক্তা থম্মোই শেংনা থাগৎচরি। থৌরম অসিগীদমক্তা ফ্রান্সতা চৎপা হায়বসি ঐহাক্কী লাইবক ফবনি। ঐখোয়গী স্ত্রেতজিক পার্ত্নরশিপকী 25শুবা চহি কুমওন ওইবগীদমক্তা চহি অসি অখন্নবা অমসু ওইরি। মসিদি ভারত অমসুং ভারত-ফ্রান্সকী নুংশি চান্নবগী মরীদা ইকায় খুম্নবা উৎপনি।
স্ত্রেতজিক পার্ত্নরশিপ অসিনা চহি 25 মপুং ফারকপা অসিগী ওইনদি, ঐখোয়না হৌজিক অসি তর্নিং পোইন্ত অমদা লৈরে হায়না ঐহাক্না ফাওই। লাইচৎ মতুংগী মালেমগী পথাপ অমসুং মসিনা লৌরক্লিবা মওং-মতৌ অসিদা য়েংলুরবদি, ঐখোয়গী স্ত্রেতজিক পার্ত্নরশিপনা থেংনরিবা অফবা/কান্নবা এক্সপেরিএন্সশিং অসিদি তুংলমচৎকী মাইকৈদা থাংজিনবা মরু ওইবা খোঙথাং অমনি হায়না খল্লি। অদুনা, ঐখোয়গী স্ত্রেতজিক পার্ত্নরশিপকী মথংগী চহি 25কীদমক্তা রোদমেপ অমা শেম্নবা ঐখোয়না খৌরাংনা ঙাইরি, রোদমেপ অসি ঐখোয়গী মরী অসিগীদমক্তা য়াম্না মরু ওইগনি হায়না ঐহাক খল্লি।
মরী অসি য়াম্না ফবা ফিভমদা লৈরি। মসিগী মপাঙ্গল য়াম্না কল্লি, থাজবা য়ারি অমসুং লেপ্তনা চাউখৎলি। খ্বাইদগী অরুবা ফিভমশিংদা মসিনা তংদু লৈতানা অমসুং নীংহন্নবা লৈতনা লৈরি। মসিনা খুদোংচাবা কয়া থীবদা থৌনা ফরি অমসুং মিৎয়েং শাল্লি।
ঐখোয়গী মরক্তা লৈনরিবা থাজনবা অসিগী চাংদম্ননীংঙাই লৈতে। মসিদি ঐখোয়গী মান্নবা ভেল্যু অমসুং পান্দমদগী ওইরকপনি। ঐখোয়গী মরক্তা স্ত্রেতজিক ওতোনোমীগী অচৌবা ইথিলমা লৈনরি। ঐখোয় অনিমক্না মালেমগী আইনবু ইকায় খুম্নৈ। ঐখোয় অনিমক্না মলতিপোলর মালেম অমা পাম্মি। ঐখোয় অনিমক্না মলতিলেতরেলিজমদা অচেৎপা থাজবা থম্লি।
স্পেস অমসুং দিফেন্সকুম্বা স্ত্রেতজিক লমশিংদা লৈনরিবা ঐখোয়গী মরী অসিদি দিকেদ মঙাগী মমাংদগীনি। মতম অদুদি, নোংচুপ লৈবাকশিংনা ভারত্তা অফবা মিৎয়েং য়েংদবা মতম্নি। অদুনা, ফ্রান্সনা ঐখোয়গী স্ত্রেতজিক পার্তনরশিপ ওইনা লাউথোকখিবা নোংচুপ মাইকৈগী অহানবা লৈবাক ওইবদা থোইদোক্না ঙক্নীংঙাই লৈতে। মতম অদু মালেমগী অরুবা মতম অমনি, ভারতকীসু অরুবা মতম্নি। ঐখোয়গী মরীনা মতম অদুদগী হৌনা লৈবাক অনিমক খক্তা নত্তনা জিওপোলিতিকেলগী ওইনা য়াম্না মরু ওইবা পার্ত্নরশিপ অমা ওইরকখি।
ঐহাক্না ইং 2014দা ওফিস্তা হেক লাকখিবদগী, ঐহাক্না ফ্রান্সকা লৈনরিবা স্ত্রেতজিক পার্ত্নরশিপ অসিদা অহেনবা মরু ওইবা পীদুনা লাকখি। ঐহাক্না ওফিস্তা হেক চঙবগী চহি অমগী মনুংদা এপ্রিল 2015দা ফ্রান্সকী অহানবা খোঙচৎ চৎখি। ফ্রান্সকী নিংতম্বা অমসুং শান্তিগীদমক্তা মালেমগী অহানবা লাঞ্জাওদা লান শোক্নখিবা ভারত লান্মী 140,000গী থৌদাংশিংবু ফ্রান্স মীয়াম্না ইকায় খুম্নখিবগী মওংবু ঐহাক্না ইকায় খুম্নজৈ। ফ্রান্সকী সিমিত্রী 163দা ভারত লান্মী 9000বু নীংশিংবগী মতৌ অসি য়াম্না নুংশি। ঐহাক্না ইং 2015দা ন্যুবে-চেপেল সিমিত্রীদা চৎপগী খুদোংচাবা ফংজখি। পার্ত্নরশিপ অসিবু বাইলেতরেল ফ্রেমৱর্ক অমা ওইবদগী হেন্দোক্তুনা মালেমগী য়াইফনবগীদমক্তা ঐহাক্না ফ্রেঞ্চ লুচিংবশিংগা, অখন্না রাস্ত্রপতি মেক্রোনবু রাস্ত্রপতি ওইনা খল্লবা মতুংদা য়াম্না নক্না থবক তৌখি।
ফ্রান্সকা লৈনরিবা মরী অসিবু করম্না হীরম্না হেন্না নকশিলহনগদগে?
ঐখোয়গী মরীনা শেন্মিৎলোন, সোসিএল, কলচরেল, অমসুং লৈবাক অনিগী মরক্কী মীয়ামগী মরক্তা য়াম্না চেৎশিনবা হেনগতলক্লি। ঐখোয়গী ত্রেদনা ইং 2014দগী শরুক অনি হেনগৎলে। হন্দক্কী চহিমক্তদা, ভারতকী এয়রলাইন অনিনা এয়রবস্তগী প্লেন 750 হেনবগী ওর্দর পীখ্রে। মীয়ামগী ইয়াইফনবগীদমক্তা দিজিতেল পব্লিক ইনফ্রাস্ত্রকচর শিজিন্নবগী পান্দম ফংমিন্ননবা লৈবাক অনিমক্না য়াম্না নক্না হোৎনরি। সোলর, নুংশিৎ অমসুং ক্লীনা হাইদ্রোজেন য়াওনা ক্লীন ইনর্জীগী লমদা য়াম্না নক্না তেংবাংনরি।
রাস্ত্রপতি মেক্রোন্না মরী অসিবু হেন্না চেৎশিলহন্নবা খোঙথাং কয়া অমা পায়খৎখ্রে। মমাংগী চহি, ইং 2022দা, ভারতনা পেরিস বুক ফেয়র, কান ফিল্ম ফেস্তিবেল, ভিভাতেক, পেরিস ইনফ্রাস ৱিক অমসুং ইন্তর্নেস্নেল সিতেক ৱিক্কী কন্ত্রী ওফ দি য়র ওইখি। দিফেন্স কোওপরেসনসু খোঙজেল য়াঙনা চাউখৎলক্লি। ঐখোয়গী লৈবাকশিংগীতা নত্তনা অতোপ্পা লৈবাকশিংগী ওইনা দিজাইন তৌমিন্নবা অমসুং মেন্যুফেকচর তৌমিন্নবগী থৌওং য়াওনা ঐখোয়না তসেং-তসেংবা ইন্দস্ত্রীএল পার্ত্নরশিপ অমসু হৌদোক্লে।
ঐখোয়না মালেমগী ৱারী শাবগী ফম্বাকশিংদা হান্নদগী হেন্না নকশিন্ননা তেংবাংনরি। ঐখোয়না পুন্না ইন্তর্নেস্নেল সোলর এল্লাইএন্স হৌদোকখি। ঐখোয়না হৌজিক বাইওদাইবর্সিতী, সিঙ্গল য়ুজ প্লাস্তিক শিজিন্নবা লেপ্পা, দিজাজতর রেজিলিএন্ত ইনফ্রাস্ত্রকচর অমসুং সমুদ্রগী রিসোর্স ঙাক শেনবগী মতাংদা থবক তৌমিন্নরি।
UNগী ইন্সতিত্যুসনশিংবু নৌনা শেমদোকপা ওইরো, ক্লাইমেত চেঞ্জ নত্ত্রগা তেরোরিজমগী মাইয়োক্তা লান্থেংনমিন্নবা ওইরো, ঐখোয়গী তেংবাংনবা অসি য়ুনাইতেদ নেসন্সতা অখন্ননা পাঙ্গল হেনগৎলক্লি। খ্বাইদগী নৌবা ওইনা, ঐখোয়না রাস্ত্রপতি মেক্রোনগী অনৌবা গ্লোনেল ফাইনান্সিং পেক্ত সম্মিত্তা য়াম্না নক্ননা থবক তৌমিন্নখি। নো মনী ফোর তেরর ফাইনান্সিংগী খোঙথাং অসিদা ঐখোয় অনিনা লুচিংবা ওইখি।
রাস্ত্রপতি মেক্রোনগী ৱাখল্লোনগা ঐখোয়গা য়াম্না মান্নৈ হায়না ঐহাক্না ফাওই। মসিদা নত্তনা, ঐখোয় অসি থবক তৌমিন্নদা মহৌশানা ওইনা য়াম্নসু চুনৈ। ঐহাক্না মসিগীদমক্তা মহাকপু য়াম্না থাগৎচনীংই। ঐখোয়গী পার্ত্নরশিপ অসি ইন্দো-পেসিফিক লমদমগী শান্তি অমসুং তংদু লৈতাবগী ওইনা য়াম্না মরু ওইরি। ঐখোয়না ফ্রান্সপু ঐখোয়গী খ্বাইদগী অহানবা অমসুং মকোক থোংবা গ্লোবেল পার্ত্নরনি হায়না খল্লি।
ফ্রান্স অসি ইন্দো-পেসিফিক লমদমদা ভারতকী য়ুম্লোন্নবা অমসু ওইরি। লমদম অসিদা ভারত অমসুং ফ্রান্সনা করম্বা মখলগী তেংবাংনবগী থৌওং পাংথোক্কদগে?
ঐহাক্না হায়খ্রবদুনি, ভারত-ফ্রান্সকী স্ত্রেতজিক পার্ত্নরশিপ অসি ইন্দো-পেসিফিক লমদমগী ফিভমদা অহোংবা পুরকপদা য়াম্না মরু ওইবা পার্ত্নরশিপ অমনি। ঐখোয় অনিনা ইন্দিয়ন ওসীনগী লমদমগী মরু ওইবা রেসিদেন্ত পাৱর অনিনি।
ঐখোয়গী পার্ত্নরশিপ্না নিংতম্বা, ৱাখল চাওবা, ইনক্লুসিব ওইবা, তেক্ত কায়দবা অমসুং তংদু লৈতাবা ইন্দো-পেসিফিক লমদম অমগীদমক্তা অমসুং ঐখোয়গা মিৎয়েং মান্নবা অতোপ্পা লমদমশিংগা থবক তৌমিন্নবগী থৌওং কয়া খুমাং চাউশিলহনবগী পান্দম থম্লি। সমুদ্র লৈমাইদগী স্পেস ফাওবগী ওইনা মপাঙ্গল লৈবা দিফেন্স অমসুং সেক্যুরিতীগী মচং কয়া অয়া লৈ। লমদম অসিদা লৈবা লৈবাকশিংগী তেংবাং পীবা অমসুং সেক্যুরিতীগী হীরমদা তেংবাংনবা অমসুং কাঙলোন শেম্নবা রিজনেল ইন্সতিত্যুসনশিংবু মপাঙ্গল লৈহনবসু মরী অসিনা পাম্লি।
ঐখোয়না ভারতকী দিফেন্স ইন্দস্ত্রীএল বেজ অমসুং ঐখোয়গী জোইন্ত ওপরেস্নেল কেপেবিলিতী মপাঙ্গল লৈহনবগী থবক খক্তমক পাংথোকপা নত্তে। ঐখোয়না অতোপ্পা লৈবাক্কী সেক্যুরিতীগী তঙাই ফদবশিংগী মতাংদসু তেংবাংনগনি। মসিগী মনুংদা দিফেন্স ইক্বিপমেন্তসু য়াওরি। মরী অসিনা মসিদগীসু য়াম্না হেনবা থবক পাংথোক্কনি। শেন্মিৎলোন, কন্নেক্তিবিতী, হ্যুমেন দিভেলপমেন্ত অমসুং সস্তেনেবল ওইবা খোঙথাং কয়া অমসু মসিদা য়াওরি। থৌওংশিং অসিনা অতোপ্পা লৈবাকশিংবু ঐখোয়গী শান্তি অমসুং নুংঙাই য়াইফবগী থবকশিং অসিদা য়াওনবা পুক্নিং চীংশিনগনি। পার্ত্নরশিপ অসিনা রিজনেল কোওপরেসনগী খুদোংচাবা কয়া হাংদোক্কনি। মখা তারকপদা, ইন্দিয়ন ওসীনগী মফমশিগদগী হেন্দোক্তুনা ঐখোয়না পেসিফিক লমদমশিংদা তেংবাংনবগী থৌওংসু হেনগৎলি। ঐখোয়গী পার্ত্নরশিপ অসিদা মশাগী ইন্দো-পেসিফিক্কী থৌরাং লৈজরিবা EUসু মনুং চলহনগনি। ঐখোয়না EUগা লোয়ননা EU-ভারত কন্নেক্তিবিতী পার্ত্নরশিপ অমা হান্নদগী লৈরবনি।
লৌথোকফম : লেস ইকোস
