ঙসি প্রধান মন্ত্রী শ্রী নরেন্দ্র মোদীনা উত্তর প্রদেসকী জেৱারদা নোইদা ইন্তরনেসনেল এয়রপোর্ত শঙ্গাখ্রে। থৌরম অদুদা মহাক্কী চাউথোকচবা অমসুং হরাওবা ফোঙদোক্লদুনা, প্রধান মন্ত্রীনা হায়খি মদুদি ঙসি বিকসিত উত্তর প্রদেস, বিকসিত ভারত অভিয়ানগী অনৌবা পন্দুব অমা হাংদোক্লে। হৌজিক ভারতকী খ্বাইদগী চাউবা রাজ্য অসি মালেমগী এয়রপোর্তশিং মশিং খ্বাইদগী য়াম্না লৈবা রাজ্যশিংগী মনুংদা অমা ওইরে। এয়রপোর্ত অসিগী উরেপ-উয়ুং তমখিবা অমসুং হৌজিক মসি শঙ্গাবা অমসুং অনিশুবদা, অচৌবা এয়রপোর্ত অসি উত্তর প্রদেসতা লৈবদা মহাক চাউথোকচবা ফাওই। রাজ্য অসিনা মহাক রাজ্য অসিগী মীহুৎ ওইনা খনখিবনি অমসুং মহাক এম.পি অমা ওইহল্লে অমসুং হৌজিক রাজ্য অসিগী শক্তম ফজরবা এয়রপোর্ত অসিগা মরী লৈনরে।
অনৌবা এয়রপোর্ত অসিগী কান্নবগী মতাংদা পল্লদুনা, প্রধান মন্ত্রীনা হায়খি মদুদি অগ্রা, মথুরা, অলিগর, ঘজিয়াবাদ, মেরুত, ইতাৱা, বুলান্দসহর অমসুং ফরিদবাদ য়াওনা পাক-চাউরবা লমদম অমা নোইদা এয়রপোর্তনা কান্নবা পীগনি। নোইদা এয়রপোর্তনা নোংচুপ থংবা উত্তর প্রদেসকী লৌমীশিং, অপীকপা অমসুং ময়াই ওইবা ললোন-ইতিকশিং অমসুং নহারোলশিংদা অনৌবা খুদোংচাবা কয়া পীগনি। মফম অসিগী এয়ক্রাফ মালেমগী মফমশিংদা পাইরগনি অমসুং এয়রপোর্ত অসি পাইখৎপা হৌরবা বিকসিত উত্তর প্রদেস অমগী খুদম অমা ওইরগনি। প্রধান মন্ত্রীনা মরুওইনা নোংপোক থংবা উত্তর প্রদেস য়াওনা রাজ্য অসিগী মীয়ামদা হরাওবা ফোঙদোকখি।
মালেমগী হৌজিক ওইরিবা ফিবমগী মতাংদা ৱা ঙাংলদুনা, প্রধান মন্ত্রীনা হায়খি মদুদি ঙসি মালেম শীনবা থুংনা য়াম্না নুঙনাংলে। নোংচুপ এসিয়াদা থা অমা হেন্না লাল অমা চৎথরকপদগী চীঞ্জাক, পেত্রোল, দিজল, গ্যাস অমসুং হারশিং য়াওনা তঙাইফদবা পোৎলমশিংগীদমক লৈবাক কয়া অৱাবশিং মায়োক্নরে। ভারতনা য়াম্লবা শুংদোক্ত্রিবা থাউ অমসুং গ্যাস লাল থোক্লিবা লৈবাকশিংগী পুশিল্লক্লি। অৱাবা অসিগী পোৎলুম চমরবা ইমুংশিং অমসুং লৌমীশিংনা পুদনবা সরকারনা পায়খৎপা য়াবা থবক খুদিংমক পায়খৎলি।
মালেমগী খুদোংচাদবশিং মরক্ত ফাওবা ভারতনা য়াংনা চাউখৎপগী খোঙজেলদা মখা তানা চঙশিল্লিবা অদু পল্লদুনা, প্রধান মন্ত্রীনা হায়খি নোংচুপ থংবা উত্তর প্রদেসদা মসি চয়োল খর অসিদা শঙ্গাখিবা নত্ত্রগা উরেপ-উয়ুং তমখিবা মরিশুবা অচৌবা প্রোজেক্নি। মতম অসিগী মনুংদা, নোআইদা অচৌবা সেমিকন্দক্তর ফেক্তর অমগী উরেপ-উয়ুং তমখ্রে, লৈবাক অসিগী অহানবা দিল্লি-মেরুত নমো ভারত ত্রেন খোঙজেল য়াঙখৎলে, মেরুত মেত্রো পাকথোক-চাউথোক্লে অমসুং ঙসিনা নোইদা ইন্তরনেসনেল এয়রপোর্তনা শঙ্গারে।
প্রধান মন্ত্রীনা হায়খি হৌজিক পাল্লিবা সরকার অসিগী থবকশিংনা উত্তর প্রদেসতা অসিগুম্বা শিংথানিঙাই ওইরবা মাইপাকপশিং অসি পুরকপনি। সেমকন্দক্তর ফেক্তরিনা তেক্নোলোজিদা ভারত অত্মনির্ভর ওইহল্লে, মেরুত মেত্রো অমসুং নমো ভারত রেলনা অয়াংবা অমসুং নুংঙাইবা চৎথোক-চৎশিন ফংহল্লে অমসুং জেৱার এয়রপোর্তনা অৱাং ভারত শীনবা থুংনা মালেমগা শম্নহল্লে। হৌজিক পাল্লিবা সরকার অসিগী মখাদা, নোইদানা উত্তর প্রদেস চাউখৎনবা শক্তি লৈরিবা ইঞ্জিন অমা ওইরক্লে।
এয়রপোর্ত প্রোজেক অসিগী পুৱারি শন্দোক্না তাক্লদুনা, প্রধান মন্ত্রীনা হায়খি মদুদি ২০০৩ গী অঙনবা শরুক্ত অতল জিনা জেৱার এয়রপোর্ত অয়াবা পীখি। হৌজিক পাল্লিবা সরকার অসি শেম্বগা অথুবা মতমদা, উরেপ-উয়ুং তমখি, শাবা হৌখি অমসুং হৌজিক মসি থবক হৌরে।
লোজিষ্টিক্স হব অমা ওইনা লমদম অসিনা লৌরিবা থৌদাং পল্লদুনা, প্রধান মন্ত্রীনা হায়খি মদুদি মফম অসি অচৌবা ফ্রেদ কোরিদোর অনিগী মফম অমা ওইরক্লে, পোৎ-চৈ পুবা ত্রেনশিংগীদমক অখন্নবা রেলৱে ত্রেকশিং শেমগৎলে, মসিনা অৱাং ভারতকা বেঙ্গল অমসুং গুজরাতকী সমুদ্রশিংগা শম্নবা হেনগৎহল্লে। দাদ্রিদা হায়রিবা কোরিদোরশিং অসি অমতা ওইনা পুল্লে, হায়বদি লৌমীশিংনা থাবা পোৎথোকশিং অমসুং মফম অসিগী উদ্যোগশিংনা পুথোকপা পোৎথোকশিং কংফাল অমসুং মথক্ত য়াম্না য়াংনা মালেমগী মফম খুদিংমক্ত য়ৌবা ঙম্লে। অসিগুম্বা মখলগী লম্বী-থোঙ অসিনা উত্তর প্রদেস মালেম শীনবা থুংবগী ইনভেষ্টরশিংনা পাম্নবা মফম অমা ওইহল্লে।
লমদম অসিগী শক্তমদা অওনবা লাকপা অসিগী মতাংদা, প্রধান মন্ত্রীনা হায়খি মদুদি ঙসিদি, নোইদা মালেম শীনবা থুংনা তরাম্না ওক্নবা শেম-শারে। মসিগী অপুনবা লমদম অসিনা অত্মনির্ভর ভারতকী ৱাশক মপাঙ্গল কনখৎহল্লে।
প্রোজেক অসি পায়খৎনবা মখোয়গী লমশিং কৎথোকপগীদমক লৌমীশিং থাগৎলদুনা, প্রধান মন্ত্রীনা হায়খি মদুদি লৌউ-শিংউনা লমদম অসিগী শেন্মিৎলোন্দা য়াম্না মরুওইবা মফম অমা কল্লি। অনৌবা মতমগী চৎথোক-চৎশিনগী খুদোংচাবা ফগৎহনবা অসিনা মখা তানা নোংচুপ থংবা উত্তর প্রদেসতা চীঞ্জাক শেম-শাবা ফগৎহনগনি। মফম অসিদগী পুথোকপা লৌউ-শিংউগী পোৎথোক হৌজিক মালেমগী কৈথেলশিংদা য়ৌরগনি।
ভারতনা মপান লৈবাকশিংদগী শুংদোক্ত্রিবা থাউ পুশিল্লকপগী মখা পোল্লিবা অসি হন্থহনবদা চু থাবা লৌমীশিংনা লৌরিবা থৌদাং পল্লদুনা, প্রধান মন্ত্রীনা হায়খি মদুদি চুদগী পুথোকপা ইথানোলনা অচৌবা থৌদাং লৌরি। ইথানোল পুথোকপা অমসুং মসি পেত্রোগা য়ানশিন্নবা হেনগৎহন্দ্রবদি, ভারতনা চহি খুদিংগী অহেনবা শুংদোক্ত্রিবা থাউ বেরেল করোর ৪.৫, হায়বদি লিতর করোর ৭০০ রোম পুশিল্লক্কনি। ঐখোয়গী লৌমীশিংগী থবক শুবা নোম্বা কনবনা অৱাবা মতম অসিদা লৈবাক অসিনা চাউনা মতেং পাংলিবনি।
প্রধান মন্ত্রীনা মখা তানা হায়খি মদুদি ইথানোলনা লৈবাক অসিগী কান্নবা পীবা খক নত্তনা লৌমীশিংদসু চাউনা কান্নবা পীরি, লুপা করোর লাখ ১.৫ রোমগী ফোরেন একচেঞ্জ কনবা ঙম্লে। মাঙদা চু থাবা লৌমীশিংনা মখোয়গী শেনফমশিং ফংনবা চহি কয়া ঙাইখি। ঙসিদি, হৌজিক পাল্লিবা সরকার অসিগী থবকশিংদগী চু থাবা লৌমীশিংগী ফিবম শিংথাবা য়ানা ফগৎলে।
প্রধান মন্ত্রীনা হায়খি মদুদি এয়রপোর্তশিং খুদোংচাবশিং খক নত্তনা চাউখৎপদা মতেং পাংলি। ভারতকী এভিএসন ইনফ্রাষ্ট্রকচর শিংথাবা য়ানা পাকথোক-চাউথোক্লে। ঙসি লৈবাক অসিদা এয়রপোর্ত ১৬০ হেন্না লৈরে অমসুং হৌজিক নোংথক্কী লম্বীদা মেত্রো সহরশিং খক নত্তনা অপীকপা সহরশিং ফাওবা য়ৌরে। হৌজিক পাল্লিবা সরকার অসিনা মীচম মীয়াম নোংথক্ত চৎথোক-চৎশিন লাইহল্লে। উত্তর প্রদেসকী এয়রপোর্ত মশিং ১৭ য়ৌরে।
উরান স্কিমগী কান্নবা পল্লদুনা, প্রধান মন্ত্রীনা হায়খি মদুদি এয়রপোর্তশিং শাবগা লোয়ননা, মথক্ত পাইবগী মমল লায়রবা ইমুংশিংনা শীজিন্নবা ঙম্বগী মনুংদা থম্নবা সরকারনা থবক পায়খৎলি। উরান স্কিমগী মখাদা তিক্কেতশিং কক্তুনা অহোংবা মমলদা মীওই করোর ১.৬০ হেন্না মথক্ত চৎথোক-চৎশিন তৌখ্রে। হন্দক কেন্দ্র সরকারনা লুপা করোর ২৯,০০০ কাইথোকপগী অয়াবা পীদুনা মখা তানা উরান স্কিম পাকথোক-চাউথোকহল্লে, মসিগী মখাদা লাক্লিবা চহিশিংদা অপীকপা সহরশিংদা অনৌবা এরপোর্ত ১০০ অমসুং অনৌবা হেলিপেদ ২০০ শারগনি। মসিদা উত্তর প্রদেসসু কান্নবা য়াম্না ফংগনি।
ভারতকী এভিএসন সেক্তর য়াংনা চাউখৎলক্লিবা অসিগী মতাং পল্লদুনা, প্রধান মন্ত্রীনা হায়খি অনৌবা এয়রপোর্ত শেমগৎলকপগা লোয়ননা, অনৌবা এয়রক্রাফশিংসু দরকার ওইরক্কনি, তোঙান তোঙানবা এয়রলাইনশিংনা অনৌবা প্লেন কয়াগী ওর্দরশিং পীরক্কনি। মসিনা পাইলোতশিং, কেবিন ক্রিয়ু অমসুং শেমজিন-শাজিনবগী মীওইশিং য়াওনা নহারোল কয়াদা খুদোংচাবা কয়া পীগনি। দরকার ওইবশিং ফংহনবা ঙম্নবা ঐখোয়গী সরকারনা এভিএসন সেক্তরদা ত্রেনিংগী খুদোংচাবশিং হেনগৎহল্লে।
ভারতকী এভিএসনগী থবক্ত লৈরিবা অচৌবা অৱাৎপা অমা পল্লদুনা, প্রধান মন্ত্রীনা হায়খি মদুদি মেন্তনেন্স, রিপ্যার, ওভরহোল (এম আর ও) সেক্তর অসি য়াম্না মরুওই। ভারতকী এয়রক্রাফশিংগী চাদা ৮৫ মেন্তনেন্স, রিপ্যার, ওভরহোলগীদমক মপান লৈবাকশিংদা চৎলি। মেন্তনেন্স, রিপ্যার, ওভরহোল সেক্তরদা ভারত অত্মনির্ভর ওইনবা সরকারনা ৱারেপ লৌরে অমসুং ঙসি জেৱারদা মেন্তনেন্স, রিপ্যার, ওভরহোল ফেসিলিতি অমা শানবা উরেপ-উয়ুং তম্লে। মসি শাবা লোইরকপদা, মসিনা ভারত অমসুং মপান লৈবাকশিংগী এয়রক্রাফকী থবক তৌগনি, লৈবাক অসিগী শেন ফংহনগনি, ঐখোয়গী শেন ভারত মনুংদা লৈহনগনি অমসুং নহারোলশিং থবক কয়া পীগনি।
মীয়াম খুদোংচানবা অমসুং মখোয়গী শেন অমসুং মতম মাঙহন্দনবা সরকারনা পায়খৎলিবা থবকশিং পল্লদুনা, প্রধান মন্ত্রীনা হায়খি মদুদি মেত্রো অমসুং বন্দে ভারতগুম্বা অনৌবা রেলগী থবকশিং পাকথোক-চাউথোক্লে। দিল্লি-মেরুত নমো ভারত রেলদা পেসেঞ্জর করোর ২.৫ হেনবা তোঙখ্রে। দিল্লি অমসুং মেরুতকী মরক্ত চৎথোক-চৎশিন তৌবদা পুং কয়া চঙলম্বা অদু হৌজিক মিনিত খরদা চৎপা য়ারে।
প্রধান মন্ত্রীনা হায়খি মদুদি বিকসিত ভারত অমা শেমগৎনবা ঐখোয়গী সরকারনা মমাঙদা অমুক্ত ওইখিদ্রিবা মওংদা অনৌবা ইনফ্রাষ্ট্রকচরদা শেন থাদরে। হৌখিবা চহি ১১ দা, ইনফ্রাষ্ট্রকচরগী বজেত শরুক ৬ হেনগৎলে, হায়ৱেশিং অমসুং এক্সপ্রেসৱেশিংগীদমক লুপা করোর লাখ ১৭ চাদিং তৌখ্রে অমসুং কিমি লাখ ১ হেনবগী হায়ৱেশিং শেমগৎলে। ২০১৪ গী মমাঙদা রেলৱে কিমি ২০,০০০ ইলেক্ত্রিক ফংহল্লম্বদগী হৌজিক কিমি ৪০,০০০ দা মৈ ফংহল্লে, হৌজিক ব্রোদ-গেজ নেতৱার্ক চাদা ১০০ মৈ ফংহল্লে। অহানবা ওইনা কাস্মির তম্পাক অমসুং অৱাং-নোংপোক্কী কোনুংশিং রেল য়ৌরে, লোয়ননা হৌখিবা চহি ১০ দা হিথাংফমশিংগী থবক তৌবা ঙম্বা শরুক অনিদা হেনগৎলে অমসুং কংফাল মনুংগী ঈশিং লম্বী মশিং মখা তানা হেনগৎলক্লি। বিকসিত ভারত অমগী দরকার ওইবা হিরম খুদিংমক্ত য়াম্না য়াংনা ভারতনা থবক পায়খৎলি।
মালেমগী খুদোংচাদবা মরক্ত অপুনবা ওইনা থবক পায়খৎনবা অমসুং লৈবাক্কী অপুনবা পুরক্নবা তকশিল্লদুনা, প্রধান মন্ত্রীনা হায়খি মদুদি হৌজিক চৎথরিবা লাল অসিনা থোকহনবা খুদোংচাদবশিং কোকহন্নবা মহাক্না সংসদতা য়াম্না শাংনা ৱা ঙাংখ্রে অমসুং চীফ মিনিষ্টরশিংগা লোয়ননা ৱা খন্নখ্রে। ৱাখল লৈতানা অমসুং খাংবা কনবগা লোয়ননা অৱাবা অসি মীয়াম্না মায়োক্নগদবনি, মসি ভারতমচাশিংগী খ্বাইদগী কনবা মপাঙ্গলনি। ভারতমচাশিংগী য়াইফনবা অমসুং ভারতকী য়াইফনবা থবক পায়খৎপা হায়বসি করিনো, মদু ভারত সরকারগী থৌশিল অমসুং লাল্লোংনি। লৈবাক অসিগী অপুনবা থবকশিংদা রাজনিতি দল খুদিংমক্না শৌগৎকনি হায়না মহাক্না থাজবা থম্লি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
UP has now emerged as one of the states with the highest number of international airports in India. pic.twitter.com/6KW3flH1EG
— PMO India (@PMOIndia) March 28, 2026
Airports are not just basic facilities in any country, they give wings to progress. pic.twitter.com/RTILJUTCtz
— PMO India (@PMOIndia) March 28, 2026
Our government is making unprecedented investments in modern infrastructure to build a Viksit Bharat. pic.twitter.com/N1DTWOVhOk
— PMO India (@PMOIndia) March 28, 2026
