প্রধান মন্ত্রী শ্রী নরেন্দ্র মোদীনা ঙসি দিল্লীদা নেস্নেল কেদেত কোর্পস রেলীদী শরুক য়াখ্রে। রেলী অদুদা প্রধান মন্ত্রীনা গার্দ ওফ ওনর য়েংশিনখি অমসুং তোঙান তোঙানবা এন.সি.সি. কন্তিনজেন্তশিং অমসুং অতোপ্পা মরূপ ওইবা অমসুং য়ুমলোন্নবা লৈবাকশিংদগী লাকপা কেদেতশিংগী মার্চ পাস্তসু য়েংখি।
বোরো অমসুং ব্রু-রিয়াং এগ্রীমেন্ত
অৱাং নোংপোক্কী চাউখৎ থৌরাংগী হোৎনরিবশিংদা ঙাংলদুনা প্রধান মন্ত্রীনা হায়খি মদুদি মমাংদদি রিজন অসি থৌওইবিরমদে অমদি এক্সত্রিমিজম লান্থেনরম্মি, মরাল লৈজদবা কয়া হিংসাদা শিখ্রে। মহাক্না মখা তাখি মদুদি নাকল অমরোমদা অৱাং নোংপোক্কী চাউখৎ থৌরাংগীদমক মমাংদা অমুক্তা ওইখিদ্রিবা মওংদা প্লানশিং সরকার অসিনা পায়খৎলে অমসুং অতোপ্পা নাকল অমরোমদা স্তেকহোল্দর পুম্নমক্কা লোয়ননা ৱারী শান্নবা হৌরে। বোরো এগ্রীমেন্ত অসি মসিগী মহৈনি। মসি য়ং ইন্দিয়াগী ৱাখল্লোন্নি।
মিজোরাম অমসুং ত্রিপুরাগী মরক্তা ব্রু-রিয়াং এগ্রীমেন্তকী মতুংদা ব্রু ত্রাইবকী চহী ২৩ লীরবা প্রোব্লেম লোইশিনখ্রে। মসি য়ং ইন্দিয়াগী ৱাখল্লোন্নি। ঐখোয়না পুম্নমকপু পুরদুনা, পুম্নমকপু চাউখৎহন্দুনা, পুম্নমক্কী থাজবা ফংদুনা লৈবাক অসি মাংলোমদা চংশিল্লি।
সিতিজনশিপ এমেন্দমেন্ত এক্ত
প্রধান মন্ত্রীনা হায়খি মদুদি লৈবাক অসিগী নহাশিংগীদমক সিতিজনশিপ এমেন্দমেন্ত এক্তকী মতাংদা অচুম্বা খংবা দরকার ওই। নিং তম্লবা মতুংদগী, নিং তম্লবা ভারতনা পাকিস্তান, বঙ্গলাদেশ, আফগানিস্তানদা লৈরিবা হিন্দুশিং-সিখশিং অমসুং অতোপ্পা মাইনোরিতীশিংদা ৱাশকখি মদুদি করিগুম্বা মখোয়না দরকার ওইরগদি মখোয়না ভারত্তা লাকপা য়াগনি। ভারতনা মখোয়গীদমক লেপ্লি হায়না মহাক্না ৱাশকখি। মহাক্না মখা তাখি মদুদি মসি গান্ধী জীগীসু অপাম্বনি, মসি ১৯৫০দা পাংথোকখিবা নেহরু-লিয়াকৎ এগ্রীমেন্তকী স্পিরিতসু ওইখি। প্রধান মন্ত্রীনা হায়খি, “অসিগুম্লবা মীওইশিং অসিদা চত্থরিবা পুৱারী ওইরবা ইনজস্তিস অসি থিংনবা, ঙসিদি ঐখোয়গী সরকারনা সিতিজনশিপ এমেন্দমেন্ত এক্ত পুরক্লে, ভারতকী লীরবা ৱাশক অদু মপুং ফাহন্নবা অসিগুম্লবা মীওইশিংবু ভারতকী সিতিজনশিপ পীরি।”
ইন্দো বঙ্গলাদেশ ঙমখৈগী চয়েৎনবা
প্রধান মন্ত্রীনা ফোংদোকখি মদুদি ভারত অমসুং বঙ্গলাদেশকী ঙমখৈ লমদমশিংদা চয়েৎনবা লোইশিন্নবা অচেৎপা অনৌবা খোংথাং লৈরমদে। মহাক্না হায়খি মদুদি ঙমখৈগা চয়েৎনবা লৈরিবা ফাওবা মীতোপ চংশিল্লকপা লেপখিরোই। চয়েৎনবা অসি লোইশিন্দনা থম্বনা নরোন্দা চংলকপশিংদা অহাংবা লম্বী অমা পীরি, নখোয়গী রাজনিতী চত্থদুনা লৈখি।
মহাক্না হায়খি মদুদি সরকার অসিনা অমনা অমগী ৱাফম তাদুনা, অমনা অমবু খংমিন্নদুনা অমসুং লৈবাক অনিমক্না য়ানরবা সোলুসন অমা থিদোক্তুনা বঙ্গলাদেশকা লোয়ননা ঙমখৈগী চয়েৎনবা য়ানবা পুরক্লে। মহাক্না অপেনবা পোকখি মদুদি ঙসিদি ঙমখৈগী চয়েৎনবা লোইশিনবদা নত্তনা ভারত অমসুং বঙ্গলাদেশকী মরক্তা লৈনরিবা মরী পুৱারী ওইবা মওংদা হেঙ্গৎলে অমসুং লৈবাক অনিমক্না পুন্না লৈত-লায়রা থেংনমিন্নরি।
কতারপুর কোরিদোর
প্রধান মন্ত্রীনা হায়খি মদুদি পার্তিসন্না গুরুদ্বারা কার্তারপুর সাহিবপু ঐখোয়দগী লাপথোকহনখি, মসিবু পাকিস্তানগী শরু অমা ওইহনখি। কার্তারপুর অসি গুরু নানক্কী লমদম ওইরম্মি। লৈবাক অসিগী মীওই কোতি কয়াগী থাজবা শেংলবা মফম অদুগা লোইনরম্মী হায়না মহাক্না মখা তাখি। মহাক্না হায়খি মদুদি চহী তরাগী খুজিং কয়াদগী সিখ ভক্তশিংনা কর্তারপুরদা অরাইবা মওংদা য়ৌনবা অমসুং গুরু ভুমিদা খুরুমজনবা তঞ্জা ঙাইদুনা লাকখি। মসি সরকার অসিনা কর্তারপুর কোরিদোর শেম্লবা মতুংদা ফংবা ঙম্লে।
