ব্রাজিলগী রিও দে জেনিরোদা নবেম্বর ১৯,২০২৪ দা পাংথোকখিবা জি-২০ মীফমগী নাকলদা ভারতকী প্রধান মন্ত্রী শ্রী নরেন্দ্র মোদী অমসুং অস্ত্রেলিয়াগী প্রধান মন্ত্রী এন্থোনি অলবানিস অনিশুবা ভারত-অস্ত্রেলিয়া চহিগী মীফম পাংথোকখ্রে।
২০২৫ দা পাংথোক্কদৌরিবা ইন্দিয়া-অস্ত্রেলিয়া কমপ্রেহেন্সিপ স্ত্রাতেজিক পার্তনরশিপকী ৫০শুবা কুমওন থৌরম মাংওইননা, অইং-অশাগী খল হোংলকপা অমসুং রিন্যুএবল ইনর্জি, ললোন-ইতিক অমসুং শেন থাদবা, দিফেন্স অমসুং সেকুরিতি, লাইরিক-লাইশু অমসুং থিজিনবা, স্কিলশিং, চৎথোক-চৎশিন, সাইন্স অমসুং তেক্নোলোজি, লমদম লমদমগী অমসুং মালেমগী থাক্তা মতেং পাংনবা, মীয়াম অমসুং নাতকী মরীশিং অমসুং মীগা মীগা লৈনবা মরীশিং য়াওনা তোঙান-তোঙানবা হিরমশিংদা শিংথাবা য়ানা চাউখৎলকপা অদু মখোয়না খন্নখ্রে।
লৈবাক অনিমক কান্নবা ফংখিবা লৈবাক অনিগী মরক্তা পাংথোকখিবা মরুওইবা থবক কয়া পাংথোকখিবদা প্রধান মন্ত্রী অনিনা অপেনবা ফোঙদোকখ্রে। ভারত অমসুং অস্ত্রেলিয়াগী মরক্তা অৱাংবা থাক্কী মীফম অমসুং মিনিস্তরশিং উনবদা মখোয়না তরাম্না ওকখ্রে। মতেং পাংনবা হেন্না ফগৎহন্নবা প্রধান মন্ত্রীশিংনা অমুক হন্না থাজবা থম্নখ্রে অমসুং লৈবাক অনিমক কান্নবা ফংগদবা থবকশিংদা মীৎয়েং চঙনবা অমসুং থবকশিং য়াংখৎনবা অমসুং ঐখোয়গী লমদমদা শান্তি, তংদু-লৈতাবা অমসুং নুংঙাই-য়াইফবা হেন্না পুরক্নবা থাজবা ফোঙদোক্নখ্রে।
শেন্মিৎলোন, ললোন-ইতিক অমসুং শেন থাদবা
শিংথানিঙাই ওইরবা ইন্দিয়া-অস্ত্রেলিয়া ইকোনোমিক কোওপরেসন এন্দ ত্রেদ এগ্রিমেন্ত (ই সি তি এ) গী মখাদা নাকল অনিগী ললোন-ইতিক অমসুং পোৎ-চৈশিং অমসুং থবকশিংগী কৈথেল ফংহনবদা প্রধান মন্ত্রীশিংনা অপেনবা ফোঙদোকখ্রে। লৈবাক অনিগী শেন-থুমগী মরীশিং মপুংফানা শীজিন্নবা ঙম্নবা থোং মান্নবা অমসুং অনিমক কান্নবা ফংগদবা কমপ্রেহেন্সিপ ইকোনোমিক কোওপরেসন এগ্রিমেন্ত (সি ই সি এ) অমা শেমগৎনবা মখা তানা থবক তৌনবা মখোয়না তরাম্না ওকখ্রে।
প্রধান মন্ত্রীশিংনা ‘মেক ইন ইন্দিয়া’ অমসুং ‘ফ্যুচর মেদ ইন অস্ত্রেলিয়া’ না অমগা অমগা মতেং পাংনবা অমসুং মতেং পাংনবগী ওইথোকপশিং খন্নখ্রে অমসুং মসিনা অনৌবা থবকশিং ফংহনগনি, শেন-থুম চাউখৎলকপা হেনগৎহনগনি অমসুং হোংলক্লিবা মালেম অসিদা ঐখোয়গী অফবা তুংলমচৎ অমা শেমগৎপা ঙমগনি হায়না ফোঙদোকখ্রে। কমপ্রেহেন্সিপ স্ত্রাতেজিক পার্তনরশিপ মমি তাহন্দুনা লৈবাক অনি অমনা অমদা শেন থাদবা হেনগৎহন্নবা লুচিংবশিংনা খঙহনখ্রে অমসুং লৈবাক অনিমক্কী শেন্মিৎলোনশিংগী মরক্তা হেন্না মতেং পাংন্নবা লম্বীশিং খঙদোক্নবা অমসুং মাইকৈ অনিমক কান্নবা ফংবা শেন থাদবা পুক্নিং থৌগৎনবা লুচিংবশিংনা খঙহনখ্রে।
অস্ত্রেলিয়া-ইন্দিয়া ব্যুজিনেস একচেঞ্জ (এ আই বি এক্স) প্রোগ্রাম জুলাই ২০২৪ দগী মখা তানা চহি ৪ শাংদোকপদা প্রধান মন্ত্রীশিংনা তরাম্না ওকখ্রে। লৈবাক অনিমক কান্নবা ফংনবা অস্ত্রেলিয়া অমসুং ভারতকী ললোন-ইতিকশিং থাজবা অমসুং থবক পাংথোকপা হেনগৎহনবদা অস্ত্রেলিয়া-ইন্দিয়া ব্যুজিনেস একচেঞ্জনা মখা তানা ইনোৎ পীগনি।
ইনর্জি, সাইন্স অমসুং তেক্নোলোজি, স্পেস
ভারত অমসুং অস্ত্রেলিয়ানা য়াংনা চৎনবা, পুন্না থবক তৌমিন্ননবা অমসুং ক্লাইমেত এক্সন থবক ওইনা পাংথোক্নবা মতেং পাংন্নবা থাজবা থম্লি। সোলার ভি.পি, গ্রিন হায়দ্রোজেন, ইনর্জি তুংশিনবা, রিন্যুএবল ইনর্জি প্রোজেকশিংদা নাকল অনি শেন থাদনবা অমসুং মরী লৈনবা হিরমশিং অমসুং তুংগীদমক রিন্যুএল ৱার্কফোর্সশিংগী স্কিল ত্রেনিং ফগৎহন্নবা অসিগুম্বা হিরমশিংদা থবক ওইনা মতেং পাংন্নবা ঙাক্লৌ পীগদৌরিবা ইন্দিয়া-অস্ত্রেলিয়া রিন্যুএবল ইনর্জি পার্তনরশিপ ( আর ই পি) হৌদোকপদা লুচিংবশিংনা তরাম্না ওকখ্রে।
ললোন-ইতিক্কী মরীশিং হেন্না ফগৎনবা অমসুং সপ্লাই চেন মখল কয়া থোকহন্নবা খুদোংচাবা অমা ওইনা ভারতকী খানিজ বিদেস লিমিতেদ (কাবিল) অমসুং অস্ত্রেলিয়াগী ক্রিতিকেল মিনরেলস ওফিসগী মরক্তা এম.ও.য়ুগী মখাদা থবক খুমাঙচাউশনবদা প্রধান মন্ত্রীশিংনা থাগৎপা ফোঙদোকখ্রে। রিছার্স অমসুং ইন্নোবেসন, স্কিল হেনগৎহনবা অমসুং শীনফম কয়াগী মীওইশিং চৎথোক-চৎশিন তৌনবা, অমনা অমগী কনফরেন্সশিং শরুক য়ানবা অমসুং মালেমগী ক্লিন ইনর্জিগী অওনবা পুরক্নবা থবকশিং মতেং পাংবা ওইনা ক্রিতিকেল মিনরেল চাউখৎনবা থবকশিং মতেং পাংনবা, বেত্তরিশিং অমসুং রুপ তোপ সোলারগী তেক্নোলোজশিং পীনবগী মরুওইবা থৌদাং অদু লুচিংবশিংনা খন্নখ্রে।
স্পেস এজেন্সি অমসুং স্পেস ইন্দস্ত্রিগী থাকশিং অনিমক্তা লৈবাক অনিগী মরক্তা স্পেসকী লমদা মতেং পাংনবা হেনগৎলকপদা প্রধান মন্ত্রীশিংনা তরাম্না ওকখ্রে। গগানয়ান মিসনশিংদা মতেং পাংবা, ২০২৬ দা ভারতকী লঞ্চ ভেহিকল অমদা অস্ত্রেলিয়াগী সেতেল্লাইতশিং থাগৎনবা থৌরাং তৌরিবা অমসুং লৈবাক অনিগী স্পেস ইন্দস্ত্রিশিংগী মরক্তা অপুনবা প্রোজেকশিং পায়খৎলিবা অসি মতেং পাংনবগী খুদম ওইরে।
দিফেন্স অমসুং সেকুরিগী লমদা পুন্না থবক তৌমিন্নবা
কমপ্রেহেন্সিপ স্ত্রাতেজিক পার্তনরশিপকী দিফেন্স অমসুং সেকুরিতি য়ুম্বীগী মখাদা খুমাঙচাউশিনবদা প্রধান মন্ত্রীশিংনা তরাম্না ওকখ্রে। লৈবাক অনিমক দিফেন্স অমসুং সেকুরিতিগী মরী ফগৎহন্নবা পান্দম মমি তাহন্দুনা, ২০২৫ দা দিফেন্স অমসুং সেকুরিতি কোওপরেসনগী জোইন্ত দিক্লারেসন নৌথোকহন্নবা অমসুং মপাঙ্গল কনখৎহন্নবা মখোয়না অপাম্বা ফোঙদোকখ্রে। লৈবাক অনিমক্কী সেকুরিতি হেনগৎহন্নবা অমসুং লমদম অসিগী শান্তি অমসুং সেকুরিতিদা মরুওইনা মতেং পাংনবা লৈবাক অনিগী মরক্তা অশানবা মীৎয়েং থম্বা দিফেন্স অমসুং সেকুরিতিগী পুন্না থবক তৌমিন্নবগী মতাংদা প্রধান মন্ত্রীশিংনা থাজবা ফোঙদোক্নখ্রে। য়াম্না তোইনা লাল তম্বা অমসুং লৈবাক অমনা অমদা চৎথোক-চৎথোকশিন হেনগৎলকপা অমসুং লৈবাক অমনা লৈবাক অমদা চৎথোক-চৎশিনগী মতেং পাংনদুনা থবক তৌমিন্নবা হেনগৎলকপদা লুচিংবশিংনা থাগৎপা ফোঙদোকখ্রে।
সমুদ্রগী হিরমদা খঙবা হেনগৎনবা থৌরাংশিং অমসুং ঙাক-শেনগী মতেং পাংনবা হেনগৎনবা ই-পাউ পীথোক-পীশিন তৌনবা, মরী লৈনবশিং অমসুং খুদোংচাদবশিং কোকহন্নবা হোৎনবা অমসুং মনিংতম্বা, খুদিংমক কোনশিনবা, শান্তি লৈবা, তংদু-লৈতাবা অমসুং নুংঙাই-য়াইফবা ইন্দো-পেসিফিক অমগী থবক তৌনবা পায়খৎলিবা থবকশিং লুচিংবশিংনা তরাম্না ওকখ্রে। সমুদ্রগী শরুক্তা সেকুরিতি লৈহন্নবা পুন্না থবক তৌমিন্ননবা লম্বী অমা শেম্বা হায়না মখোয়না য়ানখ্রে। থবক তৌবা খুৎলোয়নবা লৈবাক অমনা অমগী ঙমখৈশিংদা মখা তানা এয়রক্রাফশিং থম্বা হায়না প্রধান মন্ত্রীশিংনা য়ানরে।
দিফেন্স ইন্দস্ত্রি অমসুং মেরিতাইম ইন্দস্ত্রি য়াওনা রিছার্স অমসুং মেতরিএলগী মতেং পাংনবগী মরুওইবা প্রধান মন্ত্রীশিংনা ফোঙদোকখ্রে অমসুং পর্থতা পাংথোকপা ইন্দিয়ান ওসিন দিফেন্স এন্দ সেকুরিতি ২০২৪ কনফরেন্স অমসুং মেলবোর্নদা লেন্দ ফোর্সেস এক্সপোজিসন্দা অহানবা ওইনা ভারত শরুক য়াখিবা অদু খঙজিনখি। লৈবাক অমনা অমগী অচৌবা দিফেন্স ত্রেদ এক্সপোজিসনশিংদা শরুক য়াবা য়াওনা ভারত অমসুং অস্ত্রেলিয়াগী দিফেন্স ইন্দস্ত্রিশিং অমসুং দিফেন্স স্তার্দঅপশিংগী মরক্তা থবক তৌমিন্নবা হেনগৎহনবগী দরকার ওইবা অদু মখোয়না খন্নখি। কান্নবা ৱাফমশিং খন্ননবা অমসুং মখা তাবা থবকশিং পায়খৎনবা মতুং তারকপদা ভারত অমসুং অস্ত্রেলিয়াগী দিফেন্স ইন্দস্ত্রি দেলিগেতশিংগী মরক্তা চৎথোক-চৎশিন তৌননবা মখোয়না থাজবা থমখি।
পর্লিয়ামেন্তগী থবকশিংদা মতেং পাংনবা
লৈবাক অনিগী পর্লিয়ামেন্তগী মরক্ত মতেং পাংনবা অসি কমপ্রেহেন্সিপ স্ত্রাতেজিক পার্তনরশিপকী মরুওইবা শরুক অমনি অমসুং মখা তানা চৎথোক-চৎশিন তৌননবা থাজবা থম্লি।
লাইরিক-লাইশু, শান্নবা অমসুং মীগা মীগা লৈনবা মরীশিং
মীগা মীগা লৈনবা মরীশিং ফগৎলকপা অসিনা মখা তানা ঐখোয়গী লৈবাক অনিগী মরীশিং ফগৎলক্লিবা অসি খঙলদুনা, ভারতকী হেরিতেচদা অস্ত্রেলিয়ামচাশিংনা পাংলিবা মতেং লুচিংবশিংনা তরাম্না ওকখি অমসুং মসিগী ‘অহিংবা থোং’ অসি মখা তানা মপাঙ্গল কনখৎহনবা হায়না য়ানরে।
বেঙ্গালুরুদা অস্ত্রেলিয়াগী অনৌবা কন্সুলেত-জেনেরেল হাংদোকপা অমসুং ব্রিসবেন্দা ভারতকী অনৌবা কন্সুলেত-জেনেরেল হাংদোকপদা প্রধান মন্ত্রীশিংনা তরাম্না ওকখ্রে। হায়রিবা থবকশিং অসিনা মখা তানা ললোন-ইতিক অমসুং শেন থাদবগী মরীশিং অমসুং নাতকী মরীশিং ফগৎহনগনি হায়বগী থাজবা ফোঙদোকখ্রে।
অস্ত্রেলিয়া অমসুং ভারতকী মরক্ত চৎথোক-চৎশিনগী খুদোংচাবশিং অসি শেন-থুম চাউখৎনবগী মরুওইবা মচাক অমনি হায়বা প্রধান মন্ত্রীশিংনা খঙলে। ভারতকীদমক ওক্তোবর ২০২৪ দা অস্ত্রেলিয়াগী ৱার্কিং হোলিদে মেকর ভিসা প্রোগ্রাম হৌদোকপদা মখোয়না তরাম্না ওকখ্রে অমসুং শীনফমশিং থবক তৌরিবশিং চৎথোক-চৎশিন পুক্নিং থৌগৎনবা অমসুং ভারতকী খ্বাইদগী হৈথোই-শিংথোইবা স্তেম গ্রেজুয়েতশিং খর অস্ত্রেলিয়াগী ইন্দস্ত্রিশিংদা থবক তৌবা ঙম্নবা অস্ত্রেলিয়াগী মোবিলিতি এরেঞ্জমেন্ত ফোর তেলেন্তেদ আর্লি প্রোফেসনেলস স্কিমস (মেতস) হৌদোক্নবা থাজবা থম্লি।
লাইরিক-লাইশুগী লমদা মতেং পাংনবগী মরুওইবা অদু খঙলদুনা, অস্ত্রেলিয়াগী য়ুনিভর্সিতিশিংনা মখোয়না কেম্পসশিং ভারত্তা লিংখৎপদা প্রধান মন্ত্রীশিংনা অপেনবা ফোঙদোকখ্রে। ওক্তোবর ২০২৪ দা পাংথোকখিবা অনিশুবা অস্ত্রেলিয়ান ইন্দিয়া ইজুকেসন এন্দ স্কিলস কাউন্সিলগী মীফমনা লাইরিক-লাইশু অমসুং স্কিলশিংগী মতেং পাংনবা হেনগৎহনবদা মতেং পাংলে হায়না প্রধান মন্ত্রীশিংনা ফোঙদোকখ্রে।
লৈবাক অনিগী মরীশিং হেন্না ফগৎনবা, মীগা মীগা লৈনবা মরীশিং অমসুং কলচরেল একচেঞ্জশিং ফগৎনবা শান্নবনা পীরিবা খুদোংচাবশিং লুচিংবশিংনা ফোঙদোকখ্রে। কেপাসিতি বিল্দিং, লৈবাক অমনা অমদা ত্রেনিং পীবা অমসুং শীন্মীশিং চাউখৎহনবা, স্পোর্তস সাইন্স অমসুং মেদিসিন অমসুং মরুওইবা শান্নবগী থৌরমশিং শীন-লাংবগী মতাংদা থবক তৌমিন্নবা হায়না মখোয়না য়ানরে।
লমদম লমদমগী অমসুং মালেমগী লৈবাকশিং মতেং পাংনবা
মনিংতম্বা অমসুং ঙমখৈগী অপুনবা শক্তম ইকায়খুম্নবা লৈবা অপনবা পীদবা, খুদিংমক কোনশিনবা, তংদু-লৈতাবা, শান্তি লৈবা অমসুং নুংঙাই-য়াইফবা ইন্দো-পেসিফিক অমা ওইহন্নবা মখোয়গী থাজবা প্রধান মন্ত্রীশিংনা অমুক হন্না থমখ্রে। মনিংতম্না জহাজ হোনবা অমসুং ফ্লাইত পাইবা য়াওনা য়ু.এন কনভেন্সন ওন লো ওফ সি (য়ু এন সি এল ও এস) য়াওনা মালেমগী লোশিংগী মখাদা সমুদ্রগী শরুকশিংদা মনিংতম্না থবক তৌবা অমসুং হকশিং শীজিন্নবা ঙম্বগী মরুওইবা অদু প্রধান মন্ত্রীশিংনা ফোঙদোকখ্রে।
ইন্দো-পেসিফিক্তা অফবা, অচুম্বা পুরক্নবা মালেমগী অফবা পাংথোক্নবা শাফু অমা ওইনা ক্বাদকী খুৎথাংদা মতেং পাংনবা হেনগৎহন্নবা, মনিংতম্বা, অপনবা লৈতবা, খুদিংমক কোনশিনবা অমসুং অৱাবা কয়া মায়োক্নবা ঙম্বা লমদম অমা ওইহন্নবা মখোয়গী পান্দম অদু খুমাঙচাউশিন্নবা প্রধান মন্ত্রীশিংনা মখোয়গী থাজবা অমুক হন্না পীখ্রে। মরুপ ওইরিবা লৈবাকশিং লাইচৎশিং অমসুং লায়নাশিং থেংননবা; মহৌশাগী ওইবা অমাং-অতাশিং থেংননবা; সমুদ্রগী মরমদা খঙবা অমসুং সমুদ্রগী সেকুরিতি হেনগৎহন্নবা অচৌবা প্রোজেকশিং পায়খৎনবা ক্বাদনা হৌজিক পায়খৎলিবা থবকশিং; অৱাংবা থাক্কী ফিজিকেল অমসুং দিজিতেল ইনফ্রাস্ত্রকচরশিং শেমগৎলিবা; মরুওইবা অমসুং নৌনা থোক্লকপা তেক্নোলোজিশিংদা শেন থাদবা অমসুং কান্নবা লৌবা; ক্লাইমেত চেঞ্জগী অৱাবশিং মায়োক্নবা; সাইবর সেকুরিতি ফগৎহনবা; অমসুং তুংগী মীরোলগী তেক্নোলোজিগী লুচিংবশিং শেমগৎপগী মতাংদা থবক তৌমিন্নবা হায়না মখোয়না য়ানরে। ২০২৫ দা ভারত্তা ক্বাদ লুচিংবশিংগী মীফমদা অস্ত্রেলিয়া তরাম্না ওক্নবা প্রধান মন্ত্রী মোদীনা থাজবা থমখ্রে।
অসিয়ান্না ময়াইদা লৈহনবা অমসুং ইস্ত এসিয়া সম্মিৎ, অসিয়ান রিজনেল ফোরম অমসুং অসিয়ান দিফেনস মিনিস্তরস মিতিং প্লস য়াওনা অসিয়ান্না লুচিংবা লমদম অসিগী ফিবম অমা শেমগৎনবা প্রধান মন্ত্রীশিংনা মখোয়গী থাজবা অমুক হন্না ফোঙদোকখ্রে। অসিয়ান আউতলুক ওন ইন্দো-পেসিফিক ( এ ও আই পি) থবক ওইনা পাংথোক্নবা মখোয়না শৌগৎপা ফোঙদোকখ্রে। ইন্দো-পেসিফিক ওসিন ইনিসিয়েতিপ ( আই পি ও আই) গী মখাদা হৌজিক মতেং পাংনরিবা অসি মখোয়না খঙজিল্লে অমসুং সমুদ্রগী লনশিং তুংকোইনা শীজিন্নবা ঙম্নবা অমসুং অইং-অশাগী খল হোংলকপগী চৈথেং হন্থহন্নবা মেরিতাইম ইকোলোজি ঙাক-শেনবা অমসুং মেরিন পোল্লুসনগী চৈথেং হন্থহনবগী লমদা মতেং পাংনবা হেনগৎহন্নবা মখোয়না ফোঙদোকখ্রে।
অস্ত্রেলিয়া অমসুং ভারতনা পুন্না য়ুম্বু ওইদুনা অস্ত্রেলিয়াগী পর্থতা ইন্দিয়ান ওসিন কনফরেন্স ২০২৪ মাইপাক্না পাংথোকখিবদা প্রধান মন্ত্রীশিংনা থাগৎপা ফোঙদোকখ্রে। লমদম অসিগী খুদোংচাদবশিং কোকহন্নবা ভারত মহাসাগর লমদমগী মরুওইবা লুপ অমা ওইরিবা ইন্দিয়ান ওসিন রিম এসোসিএসন ( আই ও আর এ ) দা মখোয়না কন্না শৌগৎখি অমসুং ২০২৫ দা ভারতনা আই.ও.আর.এগী চিয়ার লৌবা মতমদা পুন্না থবক তৌমিন্ননবা থাজবা ফোঙদোকখ্রে।
পেসিফিক ইথৎ লৈবাকশিংগী দরকার ওইবশিং ফংহনবদা মতেং পাংনবা পেসিফিক্ত মতেং পাংবা হেনগৎহনবগী মরুওইবা অদু প্রধান মন্ত্রীশিংনা য়ানরে অমসুং ক্লাইমেত এক্সন, হকশেল অমসুং লাইরিক-লাইশুগী লম য়াওনা পেসিফিক্কী মরুওইবশিং হৌজিক লৈবাক অনিমক্না মতেং পাংলিবা অসি মখোয়না খঙজিল্লে। লমদম অসিগী খুদোংচাদবশিং কোকহন্নবা পেসিফিক আইলেন্দস ফোরম অমসুং মসিগী ব্লু পেসিফিক কন্তিনেন্তগী ২০৫০ স্ত্রাতেজিনা লৌরিবা মরুওইবা থৌদাং অদু মখোয়না খন্নখ্রে। ফোরম ফোর ইন্দিয়া-পেসিফিক আইলেন্দস কোওপরেসন (ফিপিক) গী খুৎথাংদা পেসিফিক ইথৎ লৈবাকশিংদা চাউখৎ-থৌরাংগী থবকশিংদা ভারতনা লৌরিবা থৌদাং প্রধান মন্ত্রী অলবানিসনা থাগৎপা ফোঙদোকখ্রে। ভারত মহাসাগর লমদমদা চাউখৎ-থৌরাংগী থবকশিং শৌগৎনবা লৈবাক অনিমক্না থাজবা ফোঙদোক্নখ্রে।
মালেমগী হৌজিক ওইরক্লিবা ফিবমশিংদা প্রধান মন্ত্রীশিংনা মখোয়গী ওইবা ৱাফমশিং ফোঙদোক্নখ্রে। হৌজিক চৎথরিবা মুক্নবশিং ৱারি শান্নদুনা অমসুং কুতনিতিগী খুৎথাংদা ৱারোইশিন পুরক্নবা প্রধান মন্ত্রীশিংনা অমুক হন্না তকশিনখ্রে। তেরোরিজম ফাইনান্স থেংননবা মালেমগী লুপ অমা ওইরিবা ফাইনান্সিএল এক্সন তাক্স ফোর্সকী থবকশিং ফগৎহনবা য়াওনা তেরোরিজমগী অকিবশিং থেংননবা লৈবাকশিং পুন্না থবক তৌমিন্নবগী মরুওইবা অদু লুচিংবশিংনা খন্নখ্রে। লুচিংবা অনিমক্না অমতা ওইনা তেরোরিজম অমসুং মসিগী মওং খুদিংমক য়াম্না কন্না য়ানিংদবা ফোঙদোকখ্রে।
লৈবাক অনিগী থবকশিং খুমাঙচাউশিনবদা প্রধান মন্ত্রীশিংনা মখোয়গী অপেনবা ফোঙদোকখ্রে অমসুং লৈবাক অনিমক কান্নবা ফংনবা অমসুং লমদম অসিগী কান্নবা ফংনবা মখা তানা মরীশিং ফগৎহনবা হায়না মখোয়না থাজবা পীনখ্রে। কমপ্রেহেন্সিপ স্ত্রাতেজিক পার্তনরশিপ চহি ৫০ মপুংফারকপগী মরুওইবা অদু খঙলদুনা, কান্নবা মওং অমদা ২০২৫ দা মসিগী খুমাঙচাউশিনবা অসি হরাওবা ফোঙদোক্নবা প্রধান মন্ত্রীশিংনা তরাম্না ওকখ্রে। ২০২৫ দা মথংগী ইন্দিয়া-অস্ত্রেলিয়া চহিগী মীফম পাংথোক্নবা মখোয়না থাজবা থমখ্রে।
