ভুতানগী নিংথৌ, হিস মেজেস্তী জিগমে খেসর নামগ্যেল ৱাংচুকনা চেবাউ থারকপদগী, ভারতকী ইকাইখুম্নরবা প্রধান মন্ত্রী, শ্রী নরেন্দ্র মোদীনা ২০২৫কী নবেম্বর ১১-১২ ফাওবা নুমিৎ নিনিগী ওইবা ভুতান রাজ্যগী খোংচৎ চৎখি।
খোঙচৎ অদুগী মনুংদা, প্রধান মন্ত্রী মোদীনা ভুতানগী মীয়ামগা লোয়ননা ২০২৫গী নবেম্বর ১১দা চাংলিমিথাংদা হিস মেজেস্তী, মরিশুবা দ্রুক গ্যালপোগী ৭০শুবা মপোক কুমওন পাংথোকপদা গেস্ত ওফ ওনর ওইনা শরুক য়াখি। প্রধান মন্ত্রী মোদীনা থিম্ফুদা চত্থরিবা গ্লোবেল পীস প্রেয়র ফেস্তিবলদসু শরুক য়াখি। হিস মেজস্তী ভুতানগী নিংথৌনা ফেস্তিবল অসিগী মনুংদা মীয়ামগী মফমদা ইকায় খুম্নবা উৎনবা থিম্ফুদা ভারত্তগী পুরকপা লোর্দ বুদ্ধগী পিপ্রাহৱা রিলিক্সকীদমক থাগৎপা ফোংদোকখি।
প্রধান মন্ত্রী, মোদীনা হিস মেজেস্তী দি কিং অমসুং হিস মেজেস্তী দি ফোর্ধ দ্রুক গ্যালপোগা উনখি অমসুং ভুতানগী প্রধান মন্ত্রী দাশো ছেরিং তোবগাইগা ৱারী শানখি। লুচিংবশিংগী মরক্তা খন্ন-নৈনখিবা অদুদা নাকল অনিগী ওইবা তেংবাং পীনবগী মরুওইবা লমশিং অমসুং ম্যুচেল ইন্তরেস্তকী ওইবা রিজনেল অমসুং গ্লোবেল ইশুশিং য়াওখি।
হিস মেজেস্তি দি কিংনা নবেম্বর ১০দা দিল্লীদা থোকখিবা বোম্ব পোখাইবগী থৌদোক্তা থৱায় কয়া অমা মাংখিবদা ভুতানগী নিংথৌ সরকার অমসুং প্রজা মীয়ামগী মাইকৈদগী অৱাবা ফোংদোকখি অমসুং অশোকপা মীওইশিং অথুবা মতমদা ফগৎলক্নবা থৌনিজখি। ভারতকী মাইকৈদগী ভুতানগী তেংবাং অমসুং অমত্তা ওইনা লেপ্পগী পাউজেল অদুবু থাগৎপা ফোংদোকখি।
প্রধান মন্ত্রী মোদীনা ইকোনোমিক স্তিমুলস প্রোগ্রাম য়াওনা ভুতানগী ১৩শুবা চহি মঙাগী থৌরাংদা ভারতনা খোংফম চেৎনা মখোয়গীদমক লেপ্লি হায়না অমুক হন্না ফোংদোকখি। মহাক্না ভুতানগী মরুওইবা চাউখৎ-থৌরাংগী মরুওইবা পান্দমশিং ফংনবা অমসুং সেক্তর পুম্নমক্তা তুং-কোইনগী ওইবা শাহৌ পুরক্নবা ভারতনা অচেৎপা ফিরেপ অমগা লোইননা মতেং পাংগনি হায়না ফোংদোকখি। ভুতানগী ১৩শুবা চহি মঙাগী থৌরাংগী মতমগী মনুংদা ভুতানদা পায়খৎলিবা তোঙান তোঙানবা প্রোজেক্তশিংদা ভারতনা মতেং পাংলিবা অমসুং লৈবাক অসিগী চাউখৎ থৌরাংদা মখোয়না শরুক য়াবগীদমক ভুতানগী মায়কৈনা থাগৎপা ফোংদোকখি।
প্রধান মন্ত্রী, মোদীনা গেলেফু মাইন্দফুলনেস সিতীগীদমক হিস মেজেস্তীগী মঙলান অদু মংফাওনহন্নবগীদমক ভারত সরকারনা মপুং ফানা মতেং পাংগনি হায়না ফোংদোকখি। মহাক্না ইনভেস্তরশিং অমসুং গেলেফুদা লাকপা মীওইশিং লায়না চত্থোক চৎশিন তৌনবগীদমক অসামগী হাতিসরদা ইমিগ্রেশন চেক পোস্ত অমা থম্নবা ৱারেপ লৌখিবগী ৱাফম ফোঙদোকখি। গ্যালসুং একাদেমীশিং শাগৎপদা ভারত সরকারনা মতেং পাংখিবা অসিগীদমক নিংথৌনা থাগৎপা ফোংদোকখি।
হিস মেজেস্তী দি কিং অমসুং প্রধান মন্ত্রী মোদীনা ২০২৫কী নবেম্বর ১১দা পুন্না মেগাৱাত ১০২০গী পুনাতসাংচু-II হাইদ্রো ইলেক্ত্রিক প্রোজেক্ত অসি ভগবান বুদ্ধগী শেংলবা পিপ্রাহৱা রিলিক্সকা লোইননা শঙ্গাখি। প্রোজেক্ত অসিনা ভুতান অমসুং ভারতকী মরক্তা হাইদ্রোপাৱরগী লমদা লৈনরিবা মরুপ-মপাং ওইবগী মরী অমসুং পুন্না থবক তৌমিন্নবগী খুদম অমনি। মখোয়না পুনাতসাংচু-IIদগী ইলেক্ত্রিসিতী ভারত্তা এক্সপোর্ত তৌবা হৌরকপবু তরাম্না ওকখি। নাকল অনিমক্না ২০২৪গী মার্চকী জোইন্ত ভিজন ওন ইনর্জী পার্তনরশিপ ইমপ্লিমেন্ত তৌবদা নুংঙাইবা ফোংদোকখি।
লুচিংবশিংনা মেগাৱাত ১২০০গী পুনাতসাংচু-১ হাইদ্রো ইলেক্ত্রিক প্রোজেক্তকী মরুওইবা দাম স্ত্রকচরগী থবক অমুক হন্না হৌনবা য়ানখিবা অদু তরাম্না ওকখি অমসুং প্রোজেক্ত অসি অথুবা মতমদা লোইশিন্নবা হোৎনবদা য়ানখি। লোইশিল্লবা মতুংদা, পুনাতসাংচু-১ অসি সরকার অনিমক্না পুন্না শেমগৎমিন্নবা খ্বাইদগী চাউবা হাইদ্রোইলেক্ত্রিক প্রোজেক্ত ওইগনি।
মখোয়না ভুতান্দা হায়দ্রোপাৱর প্রোজেক্তশিংদা ভারতকী কম্পেনীশিংনা হকথেংননা শরুক য়াবা অদুবু তরাম্না ওকখি। ভুতানগী ইনর্জী প্রোজেক্তশিংদা শেল থাদনবগীদমক ভারত সরকারনা লুপা বিল্লিয়ন ৪০গী কন্সেস্নেল লাইন ওফ ক্রেদিৎ লাউথোকপগীদমক ভুতানগী মাইকৈদগী থাগৎপা ফোংদোকখি।
ইন্তিগ্রেতেদ চেক পোস্তশিং থম্বা য়াওনা ঙমখৈগী মরক্তা কনেক্তিবিতী ফগৎহনবা অমসুং ঙমখৈগী ইনফ্রাস্ত্রকচর হেনগৎহনবগী মরুওইবা অদু নাকল অনিমক্না ফোংদোকখি। নবেম্বর ২০২৪দা দররঙ্গাদা ইমিগ্রেশন চেক পোস্ত অমসুং ২০২৫গী মার্চ থাদা জোগিগোফাদা ইনলেন্দ ৱাতরৱেজ তর্মিনেল অমসুং মল্তিমোদেল লোজিস্তিক্স পার্কনা থবক তৌবা হৌরকপা অদুবু মখোয়না তরাম্না ওকখি। নাকল অনিমক্না সেপ্তেম্বর ২০২৫দা ক্রোস-বোর্দর রেল লিংকশিং (গেলিফু-কোক্রাঝার অমসুং সামতসে-বানরহাত) শেমগৎনবা মেমোরেন্দম ওফ অন্দরস্তেন্দিং (MoU)দা খুৎয়েক পীনখিবা অমসুং প্রোজেক্ত অসি ইমপ্লিমেন্ত তৌনবা প্রোজেক্ত স্তিয়রিং কমিতী শেমখিবা অদুসু তরাম্না ওকখি।
ভুতানদা তঙাই ফদবা পোৎলমশিং অমসুং ফর্তিলাইজরশিং লেপ্পা লৈতনা সপ্লাই তৌনবগীদমক ভারত সরকারনা লৌখৎলিবা খোঙথাংশিং অদু ভুতানগী মায়কৈদগী থাগৎপা ফোংদোকখি। নাকল অনিমক্না অনৌবা থৌরাং অসিগী মখাদা ভারত্তগী ফর্তিলাইজরগী অহানবা কন্সাইনমেন্ত লাকপদা নুংঙাইবা ফোংদোকখি।
নাকল অনিমক্না STEM, ফিনতেক অমসুং স্পেসকী অনৌবা লমশিংদা মতেং পীনবা হেনগৎলকপগী মতাংদা নুংঙাইবা ফোংদোকখি। মখোয়না UPIগী অনিশুবা তাঙ্কক্কী থবকশিং অদুবু তরাম্না ওকখি, মসিনা ভুতানদগী ভারত্তা লাকপা মীওইশিংদা QR কোদ স্কেন তৌদুনা লোকেল মোবাইল এপ্লিকেসনশিং শিজিন্নদুনা পেমেন্তশিং তৌবা য়াহল্লগনি। স্পেস কোওপরেসনগী মতাংদা জোইন্ত প্লান ওফ এক্সন ইমপ্লিমেন্ত তৌবদা মখোয়না অপেনবা ফোংদোকখি। ভুতানদা STEM এজুকেসন অমসুং হেল্থকেয়র সর্ভিসশিং হেনগৎহনবদা ভারতকী ওজাশিং অমসুং নর্সশিংনা লৌখিবা মমল য়াম্লবা শিংথানিংঙাই ওইরবা থৌদাংশিংবুসু মখোয়না থাগৎখি।
লুচিংবা অনিমক্না রাজগিরদা লৈবা রোয়েল ভুতান তেমপল শঙ্গাবদা অমসুং ভুতানগী লাইশঙ অমসুং গেস্ত হাউস শানবগীদমক ভারত সরকারনা বরানসীদা লম পীবগী ৱারেপ লৌবদা নুংঙাইবা ফোংদোকখি।
খোঙচৎ অদুগী মনুংদা লৈবাক অনিগী মরক্তা মখাদা পীরিবা মেমোরেন্দম ওফ অন্দরস্তেন্দিং অসি খুৎয়েক পীনখি:
a. রোয়ল গবর্নমেন্ত ওফ ভুতান (RGoB)গী ইনর্জী অমসুং নেচরেল রিসোর্সস মন্ত্রালয় অমসুং ভারত সরকারগী ন্যু অমসুং রিন্যুৱেবল ইনর্জী মন্ত্রালয়গী মরক্তা রিন্যুৱেবল ইনর্জীগী লমদা খুৎশম্নদুনা থবক তৌমিন্নবগী MoU;
b. হকশেল অমসুং হিদাক-লাংথক্কী লমদা খুৎশম্নদুনা থবক তৌমিন্ননবগী মতাংদা RGoBগী হকশেল মন্ত্রালয় অমসুং GoIগী হকশেল অমসুং য়াইফ-য়ুম্বাল মন্ত্রালয়গী মরক্তা MoU;
c. PEMA সেক্রেতরিয়েৎ অমসুং GoIগী নেস্নেল ইন্সতিত্যুত ওফ মেন্তেল হেল্থ এন্দ ন্যুরো সাইন্সেসগী মরক্তা ইন্সতিত্যুস্নেল লিঙ্কেজ শেমগৎনবা MoU।
ভুতান-ভারতকী পার্তনরশিপ অসি অচেৎপা থাজবা, নুংশিজরবা মরূপ-মপাং ওইবগী মরী, অমগা অমগা ইকায়- খুম্নবা অমসুং থাক খুদিংমক্তা অমনা অমবু খঙনবগী মরীদা য়ুম্ফম ওইরগা শেম্বা মরীনি অমসুং মসিবু মী মশেল, প্রাজা মশেলগী মরক্তা অচেৎপা মরী লৈনবগা লোয়ননা নক্নবা ইকোনোমিক অমসুং দিবেলপমেন্ত কোওপরেসন লৈবনা মরম ওইরগা মরী অসিবু হেন্না মপাঙ্গল কনখৎহল্লি। খোঙচৎ অসিনা লৈবাক অনিগী মরক্তা চাং নাইনা অৱাংবা থাক্কী এক্সচেঞ্জ তৌনবগী চৎনবী অদু অমুক হন্না ফোংদোকখি অমসুং নাকল অনিমক্না মসি তুংলমচত্তা মখা চত্থনবা য়ানখি।
