প্রধান মন্ত্রী, শ্রী নরেন্দ্র মোদীনা ঙসি নই দিল্লীগী ভারত মন্দপমদা পাঙথোক্লিবা ইন্তরনেস্নেল তেলিকম্ম্যুনিকেসন য়ুনিয়ন – ৱর্ল্দ তেলিকম্ম্যুনিকেসন স্তেন্দর্দাইজেসন এসেমব্লী (ITU-WTSA) ২০২৪দা ইন্দিয়া মোবাইল কংগ্রেসকী ৮শুবা ইদিসন হৌদোকখ্রে। WTSA অসি য়ুনাইতেদ নেসন্স এজেন্সী ফোর দিজিতেল তেক্নোলোজিজ ওইরিবা ইন্তরনেস্নেল তেলিকম্ম্যুনিকেন য়ুনিয়নগী চহি মরি খুদিংগী পাঙথোকপা স্তেন্দর্দাইজেসনগী থবক্কী গভর্নিং কন্ফরেন্সনি। ITU-WTSA ভারত অমসুং এসিয়া-পেসিফিক্তা পাঙথোকপা হন্দক্কী অসিনা অহান্বনি। মসি লৈববাক ১৯০ হেন্বদগী তেলিকোম, দিজিতেল অমসুং ICT সেক্তর মহুৎ শিন্দুনা ইন্দস্ত্রী লুচিংবা, পোলিসী-মেকর অমসুং তেক এক্সপর্ত ৩,০০০ হেন্বনা পুল্লিবা মরুওইবা মালেমগী থৌরম অমনি।
রিলাইন্স JIO-INFOCOMM লিমিতেদকী চেয়রমেন, শ্রী আকাস অম্বানীনা প্রথান মন্ত্রী শ্রী নরেন্দ্র মোদীবু ভারতকী শিংথানিংঙাই ওইরবা দিজিতেল ত্রান্সফোর্মেসন পুরক্লিবা মহাক্কী মীৎয়েঙ শান্বা লুচিংগীদমক থাগৎখি। অহুমশুবা তর্মদা, শ্রী মোদীনা ইন্দিয়ন মোবাইল কংগ্রেসপু (IMC) ইনোভেসন অমসুং কোলাবোরেসনগী মশক নাইবা ফম্পাক অমা ওইহন্দুনা দিজিতেল সেক্তরদা হান্না পানরুদবা মওংদা খুমাঙ চাওশিন্বা পুরক্লি হায়না মহাক্না হায়খি। শ্রী অম্বানীনা ভারত অসি 2G স্পীদতা ৱানা লৈরম্বদগী মালেমগী খ্বায়দগী চাউবা দেতা মার্কেত ওইরক্তুনা অওন্বা চাউনা লাক্লি হায়না ফোঙদোকখি। ভারতনা মোবাইল ব্রোদবেন্দ শীজিন্নবদা ১৫৫শুবা থাক্তা লৈরম্বদগী হৌজিক লৈরিবা থাক অসি ফাওবদা লাক্লিবা খোঙচৎ অসিনা লৈঙাক অমসুং ইন্দস্ত্রীগী মরক্তা লৈরিবা পুন্না চৎমিন্নবগী মতিক অসি তাক্লি হায়বা ৱাফম মহাক্না থমখি। বেঙ্ককা শম্নরমদবা মীওই মিলিয়ন ৫৩০ হেনববু জন ধন একাউন্তকী খুত্থাঙদা পুশিনখিবা, মসিগী মনুংদা য়াম্লবা শরুক অমনা নুপীনা ওইখিববু মহাক্না মখা তানা ফোঙদোকখি। “ইনোভেসনগী লমদা লৈরিবা মোদীজীগী খোঙফম্না লৈবাক অসিগী কাচিন কোয়া থুংনা, কনাগুম্বা অমত্তবু হুন্দোক্লমদনা তেক্নোলোজী য়ৌহন্বা ঙমখিবনি,” হায়না শ্রী অম্বানীনা হায়খি। মহাক্না অর্তিফিসিএল ইন্তলিজেন্স (AI)পু ২০৪৭ ফাওবদা চাওখৎলবা ভারত অমা পুরক্নবগী পান্দমদা তোঙান তোঙানবা সেক্তরশিংদা অওন্বা পুরক্নবা খুৎলায় অমা ওইনা শীজিন্ননবা ৱাফম মহাক্না ফোঙদোকখি অমসুং ভারতকী দেতা লৈবাক মনুংসিদা থমদুনা অচৌবা AI ইকোসিস্তেম অমা লৈহন্নবা দেতা সেন্তর পোলিসী অপদেত তৌনবা ৱাফমসু ফোঙদোকখি।
প্রধান মন্ত্রী শ্রী নরেন্দ্র মোদীগী দিজিতেল ইন্দিয়াগী মঙলানগী মতাঙদা পল্লুনা, ভারতী এয়রতেলগী ফাউন্দর অমসুং চেয়রমেন, শ্রী সুমিল ভারতী মিত্তলনা ভারতকী তেলিকোম খোঙচৎকী মরমদা ৱাফম কয়া থম্লদুনা, মসিনা তেলিকোম ইনফ্রাস্ত্রকচর অমসুং দিজিতেল তেক্নোলোজীশিংগী লমদা অওন্বা পুরকপগী খোঙজেলবুসু ফোঙদোকখি। “তশেংবা অওন্বদি 4G রিভোলুসনগী মৈ চুখিবা ‘দিজিতেল ইন্দিয়া’গী প্রধান মন্ত্রী মোদীগী মঙলানগা লোয়ননা ২০১৪দগী হৌরকখিবনি। মসিনা, খুঙ্গংগী লমদমশিং য়াওনা মীওই মিলিয়ন কয়াদা স্মার্তফোন শীজিন্ননবা অমসুং মরুওইবা দিজিতেল সর্ভিসশিং শীজিন্নবা ঙম্নবা মপাঙ্গল হাপখি,” হায়না মহাক্না হায়খি। মহাক্না খুঙ্গংগী লমদম য়াওমা মীওই মিলিয়ন কয়াদা স্মার্তফোন অমসুং দিজিতেল সর্ভিস পুরকখিবা 4G তেক্নোলোজীনা অওন্বা পুরকপদা পীরিবা ইথিলগী মরমদা ফোঙদোকখি। প্রদক্সন লিঙ্ক ইন্সেন্তিব (PLI) প্রোগ্রামগী খুত্থাঙদা লমদমসিগী মেনুফেকচরিংদা ইনোৎ হাপ্নবা লৈঙাক্কী থৌশিলশিংনা ভারতপু তেলিকোম ইকুইপমেন্ত পুথোকফম অমা ওইহনখি হায়না মহাক্না ফোঙদোকখি। “ঐখোয়না মপান্দগী পুশিল্লকপদা তাংবগী চাং হন্থহন্নবা খোঙফম চেৎনা লেপ্লি। প্রদক্সন লিঙ্ক ইন্সেন্তিব (PLI) প্রোগ্রামনচিংবা থৌশিলশিংগা লোয়ননা, ঐখোয়না ভারতপু তেলিকোম ইকুইপমেন্তকী মেনুফেকচরিং হব অমা ওন্থোক্লি,” হায়না মহাক্না হায়খি। তুংগী পান্দমশিংগী মতাঙদা খন্নবদা, ভারতনা লাক্কদৌরিবা থা ১২ দগী ১৮ ফাওবসিদা ময়োল্লম অমসুং খুঙ্গংগী মফম শিন্বা থুংনা পাক চাউনা রোল-আউত তৌদুনা ভারতনা 5G তেক্নোলোজীগী লমদা মাঙজিল থানা চৎনবা শেম শাদুনা লৈরে হায়না মিত্তলনা লাউথোকখি। লো আর্থ ওর্বিত (LEO) নেতৱর্ক্কী মতিংগী মতাঙদা খন্নবদা, “হায়রিবা নেতৱর্কশিং অসিনা ঐখোয়গী খ্বায়দগী শিংনবনা থল্লবা মফমশিংদা লৈরিবা কন্নেক্তিবিতীগী অহোবা মেনশিন্দুনা ভারত মচা পুম্নমক খোঙজেল য়াঙবা ইন্তরনেত সর্ভিস ফংহনগনি,” হায়না মহাক্না ফোঙদোকখি।
অদিত্য বির্লা গ্রুপকী চেয়রমেন, শ্রী কুমার মঙ্গলম বিরলানা দিজিতেল কন্নেক্তিবিতীগী মরুওইবা খঙদুনা লৈঙাক্না হন্বা লৈতনা পীরিবা ঙাক্লৌ অমসুং ভারতপু হেন্না কন্নেক্তেদ, এম্পৱার্দ অমসুং ইনক্লুজিব ওইবা দিজিতেল নেসন অমগী মায়কৈদা থৌদুনা পুরিবা রিফোর্ম কয়া হৌখিবা চহিশিংসিদা হৌদোকখিববু পুথোক্তুনা থমখি। লৈঙাক্না মীয়ামগী অমসুং বিজিনেসশিংগী চপ মান্নবা মওংদা দিজিতেল ইনফ্রাস্ত্রকচর পাকথোক চাউথোকহন্নবা অমসুং দিজিতেল এদোপসন খোঙজেল য়াঙখৎহন্নবা লৈঙাক্না লেপ্তনা পীরিবা ইনোৎপুসসু মহাক্না শিংথাখি। প্রধান মন্ত্রীনা MSMEগী মতাঙদা মাইক্রো, স্মোল অমসুং মেদিয়ম এন্তরপ্রাইজশিংদা ঙাক্লৌ খ্বায়দগী য়াম্না পীননবা ফোঙদোকখিবা ৱাফম নীংশিংলদুনা, মখোয়না ভারতকী অপিকপা বিজিনেসশিংবু তুংগীদমক শেম শাদুনা লৈহন্নবা দিজিতেল ত্রান্সফোর্মেসন য়োকখত্তুনা ঙাক্লৌ খ্বায়দগী য়াম্না পীননবা খোঙফম চেৎনা লেপ্লি হায়না শ্রী বিরলানা হায়খি। মহাক্না 5G, IoT, AI অমসুং ক্লাউদ সর্ভিসনচিংবা তেক্নোলোজীশিংদা মীৎয়েঙ থম্বগী মরুওইবা ৱাফম থমখি অমসুং ভারতকী MSMEs শিংবু শেন্মিৎলোন খুমাঙ চাওশিলহন্বদা মপাঙ্গল হাপকদবা মখোঙ য়াঙবা দিজিতেল ইকোসিস্তেম অমা শেমগৎপা য়াগনি হায়না থাজবা ফোঙদোকখি। ভারতনা তেলি-মেদিসিন্দা শিংথানিংঙাই ওইবা চাংদা তেলিকম্ম্যুনিকেসন কন্সলতেসন করোর ১০ য়ৌবা ঙমখ্রে হায়না পাউদম্লদুনা, মসি ভারত মচা খুদিংমক্কী য়াম্না চাউথোকচনিংঙাইগী ৱাফম অমনি হায়খি। হৌখিবা চহিদা লৈঙাক্কী রিগুলেতর অমসুং ইন্দস্ত্রীনা পাম্বৈ পুরকখিবা খ্বায়দগী মরুওইবা ৱাফমশিংগী মরক্তা অমা পল্লদুনা, শ্রী বিরলানা স্পাম কন্ত্রোল অমসুং ফ্রোদ প্রোতেক্সনগী মতাঙদা ফোঙদোকখি। ভারতকী তেলিকোম সেক্তরগী মরমদা ৱা ঙাংলদুনা, মহাক্না প্রধান মন্ত্রীগী দিজিতেল ইন্দিয়াগী ইচঙ থৌরবা মঙলানবু থাগৎখি। মখোয়না লৈঙাক্কী লেপ্পা লৈতবা ঙাক্লৌগা লোয়ননা মখোয়গী থৌদাং লৌবা ঙমগনি, অমসুং প্রধান মন্ত্রীগী দিজিতেল ইন্দিয়াগী পান্দম ফংবা ঙমগনি হায়বগী থাজবা ফোঙদোকখি। মহাক্না লৈঙাক, খোঙবুশিং, অমসুং তেলিকোম কম্ম্যুনিতী পুম্ববু হৌখিবা চহি অসি তোপ তোপ্পা চহি অমা ওইহনখিবগীদমক থাগৎখি।
ITUগী সেক্রেতরী জেনেরেল, মিস দোরীন বোগদন মার্তিন্না ২০২৪ ৱর্ল্দ তেলিকম্ম্যুনিকেসন্স সস্তেন্দর্দাইজেসন এসেমব্লী অমসুং ইন্দিয়া মোবাইল কংগ্রেস অনি পুন্না পাঙথোকমিন্নবা থৌরম অসিদা প্রধান মন্ত্রীগা পুন্না শরুক য়ামিন্নবা ফংবা অসি চাউথোকচনিংঙাইবা মশক্নি হায়খি। মসি ITU অমসুং ভারতকী মরক্তা লৈনরিবা অচেৎপা মরীগি মতিক লৈবা খুদম অমনি হায়না মহাক্না হায়খি অমসুং মমাঙ চহিদা ITU এরিয়া ওফিস এন্দ ইনোভেসন সেন্তর শঙ্গাবদা প্রধান মন্ত্রীগা শানখিবা ৱাহন্থোক লৈবা ৱারীবুসু নীংশিংখি। মালেমগী লুচিংবশিংনা চয়োল খরগী মমাঙদা নিউ য়োর্কতা পুন্না উনদুনা পেক্ত ওফ ফ্যুচর এন্দ ইতস গ্লোবেল দিজিতেল কম্পেক্ত চৎননবা য়ানদুনা মালেমগী মফমদা দিজিতেল ফ্যুচরগী মতিক লৈবা পাউজেল অমা পীখিবা থৌদোক্কী মরমদা মহাক্না ৱাফম কয়া থমখি। প্রধান মন্ত্রীনা গ্লোবেল দিজিতেল গভর্নেন্স লৈহনবগী মথৌ তাবা ৱাফম ফোঙদোকখিবা অমসুং ভারতনা থবক্না উত্তুনা লুচিংদুনা চৎনিংবগী অমসুং মাগী দিজিতেল পব্লিক ইনফ্রাস্ত্রকচরবু মালেম পুম্বগা তাথোক তাশিন তৌনিংবগী অপামবা ফোঙদোকখিববু মহাক্না নীংশিংখি। ভারতনা G20 প্রেসিদেন্সী পায়খিবা মতমদা DPI না অচৌবা প্রাইওরিতী ওইখিবগী মতাঙদা পল্লদুনা, মিস বোগদন মার্তিন্না হীরমসিদা ITU না নোলেজ পার্ত্নর অমা ওইরকপদা নুংঙাইবা ফোঙদোকখি। মালেম অসিনা য়ুনিফাইদ পেমেন্ত ইন্তরফেসকী লমদা ভারতনা ফংবা ঙমখিবশিং অসিদগী তমশিন্বা য়াবা কয়ামরুম লৈ হায়না মহাক্না ফোঙদোকখি। স্তেন্দর্দ্সনা থাজবা পুরকই অমসুং মখোয়সিনা অসিগুম্বা ফম্পাক অসিবু চলাইরিবা ইঞ্জিন ওইদুনা পাক চাউনা মথৌ চলাইদুনা ভারত মচা খুদিংমক্তা মোবাইল দিভাইস এক্সেসকী খুত্থাঙদা পুন্সিদা অহোংবা পুরকপা মখলগী সর্ভিস ফংহল্লি হায়না মহাক্না ফোঙদোকখি। মিস বোগদন মার্তিন্না মখা তারদুনা, থাজবনা ইনক্লুজন পুরকই অদুগা ইনক্লুজন্না হৌজিকসু ওফলাইন্দা লৈরিবা মীওই কাঙলুপশিং য়াওনা মীপুম খুদিংগীদমক দিজিতেল অমসুং ইমর্জিং তেক্নোলোজীশিংগী মতিং মপুং ফানা ফুদোকহল্লি হায়খি। মসি এসিয়াদা পাঙথোকপা অসিগুম্বা মখলগী অহান্বা মীফম অমনি হায়রদুনা, মহাক্না ইচঙ থৌনা পুন্না হোৎনমিন্ননবা ৱাফম থমখি। লাক্কদৌরিবা নুমিৎ ১০নিসিদা ইন্তরনেস্নেল স্তেন্দর্দকী শক্লোনবু গ্লোবেল দিজিতেল গভর্নেন্সকী য়ুম্ফম ওইনা হেন্না মপাঙ্গল কনখৎহল্লগনি হায়না মহাক্না থাজবা ফোঙদোকখি। মহাক্না AI বু মরম চুম্না শীজিন্নবগী মতাঙদসু ফোঙদোকখি অমসুং তেক্নোলোজিগী খোঙজেলগা দিজিতেল ইনক্লুজনগা তুনা চৎমিন্নহন্নবা ৱাফম থমখি।
