রাস্ত্রপতি বাইদেন,
ফর্স্ত লেদী জিল বাইদেন,
শক্নাইরবা মীথিংলেনশিং,
থৱাই য়াওবগী ইথিলনা থল্লবা ইন্দিয়ন-অমেরিকান মরুপশিং,
পুম্নমক্কী মফমদা ঐহাক্না নোল্লুকচরি!
ঐহাক্না অহানবা ওইনা, রাস্ত্রপতি বাইদেনবু ঐহাকপু তরাম্না ওকপীবা অমসুং মগুন লৈবা ৱারোলগীদমক্তা থম্মোই শেংনা থাগৎচরি।
রাস্ত্রপতি বাইদেনবু অদোমগী ফ্রেনশিপকীদমক্তা থাগৎচরি।
মরুপশিং,
হ্বাইত হাউস্তা ঐহাকপু তরাম্না ওকপীরিবা অসিদি ভারতকী মীওই বিলিয়ন 1.4গী মফমদা ইকায় খুম্নবা উৎপনি। থৌওং অসিনা লৈবাক মীয়াম বিলিয়ন 1.4গী মফমদা ইকায় খুম্নবা উৎলি। মসিদি অমেরিকাদা লৈরিবা ভারত্তগী হৌখিবা মীওই মিলিয়ন 4 হেনবগী মফমদা ইকায় খুম্নবা উৎপনি। ঐহাক্না মতৌ অসিগীদমক্তা রাস্ত্রপতি বাইদেন অমসুং দাঃ জিল বাইদেনবু থম্মোই শেংনা থাগৎচরি।
মরুপশিং,
ঐহাক্না দিকেদ অহুমগী মমাংদা মীচম অমা ওইনা অমেরিকাগী খোঙচৎ চৎপা হৌখি। মতমদুদা ঐহাক্না হ্বাইত হাউসপু মপান্দগী য়েংখি। ঐহাক্না প্রধান মন্ত্রী ওইরবা মতুংদা মফমসিদা লাকপগী খুদোংচাবা কয়া ফংজখ্রে। অদুবু, ঙসিদি হ্বাইত হাউসকী থোঙবু মশিং য়াম্লবা ইন্দিয়ন-অমেরিকান খুন্নাইগীদমক্তা অহানবা ওইনা হাংদোক্লি। অমেরিকাদা লৈরিবা ভারতকী খুন্নাইগী মীওইশিংনা মখোয়গী হৈ-শিংবা, শুবা-নোম্বা কনবা অমসুং পুক্নিং চঙবগী মতৌনা ভারতকী মিংচৎপু হেন্না ফজহল্লি। অদোম পুম্নমক্না ঐখোয়গী মরুপ-মপাং ওইবগী মতৌ অসিগী তসেংবা পাঙ্গলনি।
অদোমগী মফমদা ঙসি উৎলিবা ইকায় খুম্নবগী মতৌ অসিগীদমক্তা ঐহাক্না রাস্ত্রপতি বাইদেন অমসুং দাঃ জিল বাইদেনবু থম্মোই শেংনা থাগৎচরি। ঐহাক্না মখোয়গী মফমদা তৌবীমল খঙবা উৎলিবা অসিগী চাং ওনবা ঙম্লোই, অদুগা ঐহাক্না মখোয়বু থাগৎপগী লোইবসু নাইরোই।
মরুপশিং,
ভারত অমসুং অমেরিকাগী খুন্নাই অমসুং চৎন-পথাপশিং অনিমক অসিদি গনতন্ত্রগী ৱাখল্লোন্দা য়ুম্ফম ওইবনি। রাস্ত্রপতি বাইদেন্না পনবগুম্না লৈবাক অনিমক্কী সংবিধানগী অহৌবমক্তদা পল্লিবা ৱাহৈ অনি, “ঐখোয় মীয়াম” হায়বসিনা লৈবাক অনিমক্কী মফমদা চেল্লিবা দাইবর্সিতী অসিদা ঐখোয়না চাউথোকচবগী মতৌ উৎলি।
ঐখোয়না ‘সর্বজন হিতয় সর্বজন সুখায়” (মীপুম খুদিংনা নুংঙাইনা অমসুং লাইনা তিলনা লৈতনা হিংবা ওইসনু) হায়বা তঙাই ফদবা ৱাখল্লোন্দা থাজবা থম্মি। কোবিদ মতুংগী য়ুগ অসিদা, মালেমগী পথাপ্না অনৌবা মওং-মতৌ অমা চেল্লক্লি। মতমসিদা, ভারত অমসুং অমেরিকাগী মরক্তা লৈরিবা মরুপ মপাং ওইবগী মতৌনা মালেম পুম্বগী তৌবা ঙম্বগী মতিক হেনগৎহনবদা য়াম্না তেংবাংগনি। লৈবাক অনিমক্না মালেমগী নুংঙাই য়াইফবা, শান্তি, তংদু লৈতাবা অমসুং শাফবগীদমক্তা পুন্না থবক তৌমিন্ননবা খোঙফম চেৎলি। ঐখোয়গী মপাঙ্গল কনবা স্ত্রেতজিক পার্ত্নরশিপ অসিনা গনতন্ত্রগী মপাঙ্গলগী ময়েক শেংবা খুদম অমা ওইরি।
মরুপশিং,
রাস্ত্রপতি বাইদেন অমসুং ঐহাক্না অতেনবা মতম খরগী মতুংদা ভারত-USকী মরীগা লোয়ননা রিজনেল অমসুং মালেমগী হীরমশিংগী মতাংদা কুপ্না খন্ন-নৈনগনি। ঐখোয়গী ৱারী-ৱাতাই অসি য়াম্না কান্নবা অমসুং অপাম্বা ফংবদা তেংবাংবা ওইগনি হায়বগী ঐহাক্না থাজৈ। ঐহাক্না ঙসিগী নুংথিলদা US কংগ্রেস্তা ৱা ঙাঙবগী খুদোংচাবা অমসু ফংগনি। ঐহাক্না খুদোংচাবা অসিগীদমক্তা য়াম্না নুংঙাইবা ফাওই।
ঐহাক্না ভারত মীয়াম বিলিয়ন 1.4গা লোয়ননা ভারতকী মচু অহুমগী ফিরাল অমসুং অমেরিকাগী “স্তার অমসুং স্ত্রাইপ” অসিনা মতম পুম্বদা মায় পাকপগী অৱাংবা থাক্তা লৈবা ওইসনু হায়না য়াইফ পাউজেল পীজরি।
রাস্ত্রপতি বাইদেন, দাঃ জিল বাইদেন,
অদোমগী মীনুংশি, তরাম্না ওকপীবা অমসুং ঐহাকপু নুংঙাইনা থম্বীবগীদমক্তা ভারত মীয়াম বিলিয়ন 1.4গী মহুৎ শিন্দুনা অদোম্বু থম্মোই শেংনা অমুক্কা হন্না থাগৎচরি।
জয় হিন্দ!
ঈশ্বরনা অমেরিকাবু থৌজানবা ওইসনু।
অদোম্বু থাগৎচরি।
