ঙসি, জুলাই ৬, মরৈবাক নুংশিবা অমসুং মশাগী ওইজবা থিদনা থবক তৌবগী অচুম্বা ফিদমশিং ঙাক্না চৎলিবা মশিং থিঙমদ্রবা মীওইশিংগী অখন্নবা নুমিৎ অমনি। থৌনা অমসুং ইমা ভারতকীদমক চিংনবা লৈতনা থবক পাংথোকখিবা মহাক্কী পুন্সিনা মুৎপা নাইদ্রবা খুদম অমা ওইখিবা, দোক্তর শ্যাম প্রসাদ মুকর্জিগী চহি ১২৫ শুবা মপোক কুমওন ঐখোয়না পাংথোক্লি। অনৌবা ভারতকী লুচিংবা খর খক্তদা দোক্তর শ্যাম প্রসাদ মুকর্জিগুম্না লৌশিং, মীয়ামগী থবক তৌবা অমসুং অচুম্বদা থাজবা লৈখি।
মহাক য়াম্না লাইনা ঙাকপী-শেনবীবা অমসুং নুংঙাইবা পুন্সি অমা ফংবা ইমুংদা নহা ওইরিবা শ্যাম প্রসাদ পোকখি। মহাক্কী অপোকপা সার অসুতোস মুকর্জি, মহাক্কী মতম অদুদা মাংজিল থাখিবা লাইরিক-লাইশুগী থবক তৌবা অমসুং লৌশিং লৈবা মীওইশিংগী মনুংদা য়াওখি। অদুবু, নুংঙাইবা পুন্সি অমা ফংনবগী লম্বী অমা মহাক্কী মমাঙদা লৈরবসু, মহাক্কী ৱাখলনা মহাক কৎথোক্লবা অমসুং লৈবাক্কী থবক তৌবা মীওই অমা ওইনবা লমজিংখি। লোয়লম লৈঙাক, কাংলুপ নাইবা, মীওইবা খুন্নাইগী অৱাবশিং য়াওনা, মহাক্কী মতমদা থেংনবা অৱাবশিং মহাক্না তুমিন্না য়েংদুনা লৈথোক্লোইদবনি হায়না মহাক্না থাজখি। পুন্সিগী খোঙচৎ অসিদা, নৌরিবা অঙাং অমা অমসুং মহাক্কী লোয়নবী লৈখিদবা য়াওনা, মহাক লনাই ওইবা খুদোংথিবা কয়া থেংনখি। অদুবু হায়রিবা খুদোংথিবশিং অদুনা মহাক্কী ৱাশক চেৎশিনহনখি অমসুং মীয়ামগী থবক তৌনবা মহাক্কী ৱাশক মপাঙ্গল কনখৎহনখি।
করিগুম্বা দোক্তর শ্যাম প্রসাদ মুকর্জিনা মীয়ামগী থবক তৌখিবা অসি মশক তাক্নবা অতোপ্পা ফিদম অমা লৈরবদি, মদু শেৎতোক্নবা য়াদ্রবা ভারত ওইগনি। লৈবাক অসি অনি থোক্না খায়দোক্নবা ইরাং হৌরকপা মতমদা নোংচুপ বেঙ্গল ভারতকী তৎন-থানবা য়াদ্রবা শরুক অমা ওইনবা মহাক্না খোঙফম চেৎনা লেপখি। চহি খরগী মনুংদা, মদুগী থাজবা অদুনা মহাক জম্মু অমসুং কাস্মিরদা চিংশিনখি। জেলদা থম্বনা মহাক মাইথিবা পীবা ঙমখিদে অমসুং নাইতোম লৈহনবনা মহাক মাঙহনবা ঙমখিদে। জেলদা লৈরিঙৈদা মহাক্কী পুন্সি ফিবম চাদনা লোইশিনখি, পান্দম অমা ফংনবা মহাক্না শেমগৎচখিবা মশিং থিঙমদ্রবা মীওইশিংদগী য়াম্না লাপ্না লৈখি। লনাই মীওই অমনা অরোইবা ওইনা কৎথোকপনা রাজনিতিগী অওনবশিং পুরকখিবা অমসুং লৈবাক অসিনা নিংশিংহৌবা তাঙ্কক কয়া পুৱারিদা য়াওরি। দোক্তর মুকর্জিগী অরোইবা খোঙচৎ অসিগুম্বা তাঞ্জা ওইখি। আচার্য বিনোবা ভাবেনা হায়খি মদুদি মহাক্না থাজবা মরম অমগীদমক দোক্তর মুকর্জি মহাক মশামক থৱায় কৎখি। চহি কয়াগী মতুংদা, ২০১৯ দা আর্তিকল ৩৭০ অমসুং ৩৫(এ) লৌথোকখিবা অদু মহাক্না লৈবাক্কীদমক থৱায় কৎখিবদা পীবা খ্বাইদগী মতিক চাবা ইকায়খুম্নবনি।
দোক্তর মুকর্জিনা ভারত হান্না মাঙদা থমখি অমসুং ভারতকী গুনশিং হান্না মাঙদা থমখি। মতম অদুগী অরিবা থায়নগী ৱাখল্লোনশিং থুগায়দুনা মহৈলোয়শঙশিং শেমগৎতুনা অমসুং অনৌবা থবকশিং পায়খৎতুনা মহাক্না থবক অসি পাংথোকখি। মহাক কলকাতা য়ুনিভর্সিতিগী খ্বাইদগী নহা ওইবা ভাইস চান্সেল্লর ওইখি। মহাক মশাগী ওইজবা তোঙনবা মওং অমদা, মরৈবাক নুংশিবা অমসুং তুংগী খনবা অফবা অহোংবা কয়া মহাক্না পুরকখি। লাইরিক-লাইশুগী থবক তৌবা মীওইশিংগী মীফম অমদা ৱা ঙাংবদা, দোক্তর মুকর্জিনা হায়খি, “মহৈলোয়শঙশিং অসি ক্লার্কশিং অমসুং শেন য়ামদনা পীবা য়াবা ষ্টাফশিং পুথোক্নবা ফেক্তরশিং ওইনা উবা অরানবনি। ঐখোয়না ঐখোয়গী মহৈরোয়শিং অসি ম্যুনিসিপাল কোর্পোরেসনশিং, প্রোভিন্সিএল অমসুং সেন্ত্রেল লেজিসলেচরশিংগুম্বা ঐখোয়গী মশানা মশাবু লৈবাক ঙাকচনবা লোয়শঙশিংগী লুচিংবশিং ওইনবা শেমগৎকদবনি অমসুং শেন-থুম, ললোন-ইতিক অমসুং উদ্যোগশিংগুম্বা তোঙান তোঙানবা হিরমশিংদা মাইকৈ তাক্কদবনি”।
মহাক্কী লমজিং মখাদা, লাইব্রেরিগী মচাক-মথুমশিং ফগৎহনবা, সাইন্সতা থিজিনবগী থবক হেনগৎহনবা, কলাগী পোৎলমশিংদা থিজিনবা পুক্নিং থৌগৎপা অমসুং লৌউ-শিংউদা কোর্সশিং হাংদোকপগুম্বা তোপ-তোপ্পা থবকশিং কলকাতা য়ুনিভর্সিতিনা পায়খৎখি। মহাক্না শান্নবা, ওজাশিং ত্রেনিং পীবা অমসুং মহৈরোয়শিংগী য়াইফনবা থবক পায়খৎপগুম্বা হিরমশিংদা পুক্নিং চঙখি। মহৈরোয়শিং অমসুং এলুম্নাইশিংদা চাউথোকচবা অমা পোক্নবা, জনুৱারি ২৪ দা য়ুনিভর্সিতিগী ফাউন্দেসন দে পাংথোকপা মহাক্না হৌদোকখি। য়ুনিভর্সিতিগী ঈশৈ অমা শুর পান্নবা মহাক্না গুরুদেব তেগোরদা হায়জখি।
মসিগী ৱাখল্লোন অসিগী অতোপ্পা খুদম অমা, মহাক্কী পুন্সিগী অরোইবা শরুক্ত উবা ফংখি, মতম অদুদা ভারতীয় জন সংঘ শেম্নবা মহাক্না ৱারেপ লৌখি। কংগ্রেস দল মফম শীনবা থুংনা লৈবা মতম অমদা, ঐখোয়গী নাৎকী হৌরকফমশিংগা শাগোন্ননা লৈমিন্নবগা লোয়ননা ভারত চাউখৎনবা ৱা ঙাংনবা অতোপ্পা খোল্লাউ অমগী মরম কয়া লৈরি হায়বা মহাক্না খনখি। দলগী সিম্বল লৈবাক্না শাবা থাউমৈ, দিয়ানা ওইখি। থাউমৈ অমা উবদা ইচম চম্বা য়াই, অদুবু মসিনা অমম্বা মাঙহন্নবগী শক্তি মসিদা য়াওরি। মসিমক ভারতীয় জন সংঘনা মপান ফগৎলকপা চহিশিংদা পাংথোকখিবা থবকশিং অদুনি।
ভারতকী অহানবা ইন্দষ্ট্রি অমসুং সপ্লাই মিনিষ্টর ওইনা দোক্তর শ্যাম প্রসাদ মুকর্জিনা থবক পুরিঙৈ মনুংদা মহাক্কী চাউখৎপগী ৱাখল্লোন অসি খুদিংমক কোনশিনবা অমসুং মীওইবগী য়াইফনবা খনবা রাজনিতিৱালা অমা ওইনা মশক তাকখি। নৌনা নিংতম্বা ফংলবা লৈবাক অমদা ইকায়খুম্নবা, খুদোংচাবা অমসুং থাজবা অমুক হঞ্জিন্নবা উদ্যোগ অসি পাম্বৈ অমা ওইনা মহাক্না উখি। শেন তানবা অমসুং মগুন হেনগৎহনবদা মহাক্না ইকায়খুম্নবা উৎখি। দামুদোর ভেল্লি কোর্পোরেসন, সিন্দ্রি ফর্তিলাইজর প্লান্ত অমসুং অফবা উদ্যোগকী থৌশিলগুম্বা মাংজিল থাবা থবকশিংগী খুৎথাংদা ভারতকী অনৌবা উদ্যোগকী য়ুম্ফমশিং থোনবগা লোয়ননা, মহাক্না ভারতকী অরিবা মপাঙ্গলশিং মীরাইখিদে। হেন্দলুমশিং, য়ুমগী উদ্যোগশিং, খুৎহৈবশিং অমসুং তেক্সতাইলগী শিন্মীশিংনা কৎথোক্লবা লুচিংবা অমা ফংখি।
ঐ মফম অসিদা লনাই থেংনখিবা ৱারি অমা লিগে। মশাগী ওক্নবা পোৎথোক পুথোক্নবা ময়েক শেংলবা পান্দম অমগা লোয়ননা সিন্দ্রি প্লান্ত লিংখৎনবা দোক্তর শ্যাম প্রসাদ মুকর্জিনা থবক পায়খৎখি, মদু লৈবাক অসি চহি কয়া পাল্লকখিবা মীওইশিংনা মীরাইখি। প্লান্ত অসি অমুক হিঙ্গৎনবা ঐখোয়গী সরকারনা খুদোংচাবা ফংবদা ঐ চাউথোকচৈ। মসি থৌরম অসিদা মফম অসিদা পাংথোক্কদবা খ্বাইদগী মরুওইবা থবকশিংগী মনুংদা য়াওরে।
ভারত সভেত্যগী চৎনবীদা চহি কয়াদগী হৌনা ৱারি শানবা অমসুং খন্ন-নৈনবনা অচৌবা মফম অমা কন্দুনা লাক্লি। মসিগী গনতন্ত্রগী ৱাখল্লোন অসি দোক্তর শ্যাম প্রসাদ মুকর্জিদা চেনখি। মহাক পন্দিৎ নেহরুগী মন্ত্রীন্দলদা য়াওখি, রাজনিতিগী খেন্নবশিং লৈবা অঙনবা শরুকশিংদা লৈবাক শেমগৎপগী থবক্ত থাজবা লৈখি। পুকচেল শেংবা অমসুং অফবা ৱাখল্লোন অমগা লোয়ননা মহাক থবক তৌখি। লৈবাক্কী মরুওইবা থবকশিংগী ৱাহংশিং হংলকপদা তোঙানবা লম্বী অমা দরকার ওইরকপদা, ইকায়খুম্নবগা লোয়ননা মহাক্না ওফিস থাদোকখি অমসুং লৈবাক্কী দরকার ওই হায়না মহাক্না থাজবা রাজনিতিগী থবক্ত মহাক মশামক থৱায়-হকচাং য়াওনা কৎথোকখি।
চহি ৭৫ গী মমাংদা, পন্দিৎ নেহরুনা অহানবা এমেন্দমেন্ত পাংথোকখি অমসুং নিংতম্না ৱা ঙাংবদা হকথেংননা শিংনখি। মসিগী মায়োক্ত য়াম্না কন্না লেপখিবশিংগী মরক্ত দোক্তর শ্যাম প্রসাদ মুকর্জি য়াওখি। কংগ্রেসনা মসি পাংথোকপা ঙমগনি হায়বা মহাক্না মপুংফানা খঙখি। মহাক্না খনখিবা অদু চুমখি। চহি ৭৫ গী মমাংদা অহানবা এমেন্দেমেন্ত পাংথোকখিবা লুচিংবশিং অদুনা ১৯৭৫ দা ইমর্জেন্সি থমখি অমসুং চহি ৫০ গী মমাংদা, ৪২শুবা এমেন্দমেন্ত এক্ত চৎনহন্দুনা, অমুক হন্না মনিংতম্বা গনতন্ত্রগী গুনশিংদা চৈথেং পীখি।
মীওইবা খুন্নাইগী য়াইফনবা পায়খৎখিবা থবকশিংগীসু দোক্তর শ্যাম প্রসাদ মুকর্জি মীয়াম্না খঙনখি। ১৯৪৩ দা বেঙ্গলদা শাথিরবা চাক তাংবা থোকপা মতমদা, দোক্তর শ্যাম প্রসাদ মুকর্জি মশামক অৱাবা তারবশিংগী সেবা তৌবা য়াওখি। মীয়াম চাক পীজনবা মহাক্না তোঙান তোঙানবা কান্তিনশিং অমসুং রিলিফ সেন্তরশিং হাংদোকখি। অমরোমদা, মহাক্কী মীয়ামগী অৱাবদা মহাক থম্মোয় কায়খি, অদুগা অমরোমদা, লোয়লম লৈঙাক্কী মীনুংশিং খঙদ্রবা লৈঙাকপশিংনা মহাক নমথখি। মহাক্না পঞ্চশের মনবন্তর কৌবা লাইরিক অমা ইখি অমসুং মহাক্না মহাক্কী অশাওবা ফোঙদোকখি। ১৯৪২ দা মেদিনিপুরদা অকনবা নোংলৈ-নুংশিৎ অমা থেংনবা মতমদা, মহৌশাগী পুন্সিদা হল্লক্নবা মহাক্না পাংথোকখিবা থবকশিং পাক-শন্না থাগৎনখি।
কলকাতা কোলেজ অমদা ৱা ঙাংবদা, দোক্তর শ্যাম প্রসাদ মুকর্জিনা নহারোলশিংদা হায়খি, “ অদোম্না থবক তৌবা মতমদা, মদু থৱায় য়াওনা পাংথোকউ, মমুৎ তানা অমসুং মপুংফানা; কৈদৌঙৈদা তঙ্খায় নত্ত্রগা পাংথোক্তবা তৌগনু, মদু নহাক্না খ্বাইদগী ফজনা পাংথোক্ত্রি ফাওবা কৈদৌঙৈদা অদোম নশামক পেন্থোক্কনু”। বিকসিত ভারত অমগী মাইকৈদা ভারত চঙশিল্লি, ঐখোয়না মহাক্কী মফমদা উৎপা খ্বাইদগী মতিক চাবা ইকায়খুম্নবদি মহাক্না অশুক্কী মতিক থাজবা থমখিবা মপাঙ্গল কনবা, অপুনবা, মশানা মশাবু থাজবা অমসুং মীওইবগী অৱাবা খঙবা ভারত অমা শেমগৎনবা নুমিৎ খুদিংগী হোৎনবা অদুনি। ঙসিগী নহারোলশিং মশক খঙবগা লোয়ননা, অৱাবা কয়া মখোয়না মাইপাক্না মায়োক্নবা ঙমগনি হায়না ঐনা চেৎনা থাজৈ।
