ঙসি প্রধান মন্ত্রী শ্রী নরেন্দ্র মোদীনা লুচিংবা কেবিনেত কম্মিতি ওন ইকোনোমিক এফেয়ার্সনা লাদাখতা গিগাৱাত ১৩গী রিনিউএবল ইনর্জি প্রোজেক্কী গ্রিন ইনর্জি কোরিদোর(জি ই সি)ফেজ-২-ইন্তর-স্তেৎ ত্রান্সমিসন সিস্তেম(আই এস তি এস) অয়াবা পীখ্রে।
প্রোজেক অসি শেনবা চহি ২০২৯-৩০দা লুপা করোর ২০,৭৭৩.৭০গী শেনফম অমনা পায়খৎনবা পান্দম থম্লি অমসুং প্রোজেক্কী অপুনবা শেনফমগী চাদা ৪০ হায়বদি লুপা করোর ৮,৩০৯.৪৮ সেন্ত্রেল ফাইনান্সিএল এসিস্তেন্স(সি এফ এ) ওইনা পীগনি।
লাদাখ লমদমগী লম্মিৎ-তুম্মিৎকী খুদোংচাদবা, শাথিবা নোংজু-নুংশাগী ফিবম অমসুং ঙাক-শেনগী মরুওইবশিং য়েংলগা, পৱার গ্রিদ কোর্পোরেসন ওফ ইন্দিয়া লিমিতেৎ(পৱারগ্রিদ)না প্রোজেক অসি পায়খৎকনি। অনৌবা ভোলতেচ সোর্স কনভর্তর(ভি এস সি)দা য়ুম্ফম ওইবা হায় ভোলতেচ দাইরেক্ত করেন্ত(ঐচ ভি দি সি) অমসুং এক্সত্রা ভোলতেচ অলতর্নেতিপ করেন্ত(ই ঐচ ভি এ সি) সিস্তেমশিং থমগনি।
প্রোজেক অসিগী ত্রান্সমিসন পৱার লাইন হিমাচল প্রদেস অমসুং পঞ্জাব ফাওরগা হরিয়ানাগী কাইথাল ফাওবা তিংগনি অমসুং মসিনা নেসনেল গ্রিদতা পুনগনি। লাদাখ লমদমদা মৈ চাংনাইনা পীনবা হৌজিক লৈরিবা লাদাখ গ্রিদ অসিদা প্রোজেক অসিদগী লেহদা শম্ননবা থৌরাং তৌরি। মসিনা জম্মু অমসুং কাস্মিরদা মৈ পীনবা লেহ-অলুসতেং-শ্রীনগর লাইনগা শম্নগনি। প্রোজেক অসিনা কিমি ৭১৩গী ত্রান্সমিসন লাইনশিং তিংগনি অমসুং পাং(লাদাখ) অমসুং কাইথাল(হরিয়ানাদা) গিগাৱাত ৫গী ঐচ.ভি.দি.সি তর্মিনেল অমমম লৈগনি।
২০৩০ ফাওবগী মনুংদা নন-ফোসিল ফুয়েলশিংদগী মৈ গিগাৱাত ৫০০ পুথোক্নবা পান্দম থম্লিবা অসি ফংনবা প্রোজেক অসিনা মতেং পাংগনি। প্রোজেক অসিনা লৈবাক অসিদা মতম শাংনা ইনর্জি ৱাৎহন্দনবা ঙমগনি অমসুং কার্বোন থাদোকপা হন্থহন্দুনা মহৌশাগী অকোয়বগী ফিবম ফগৎহনবদা মতেং পাংগনি। মসি পৱারগী লমদা হৈথোই-শিংথোইবা অমসুং অনস্কিল মীওইশিং হকথেংননা অমসুং নাকোইননা থবক পীবা ঙমগনি অমসুং লাদাখ লমদমদা অতোপ্পা মরী লৈনবা হীরমশিংদা থবক পীগনি।
গ্রিদ পুনশিন্নবা অমসুং মৈ লৌথোক্নবগীদমক ইন্তর-স্তেৎ ত্রান্সমিসন সিস্তেম গ্রিন ইনর্জি কোরিদোর ফেজ-২ অসি গুজরাত, হিমাচল প্রদেস, কর্নাতকা, কেরলা, রাজস্থান, তমিল নাদু অমসুং উত্তর প্রদেসতা চৎনবা হৌখ্রে।ইন্তর-স্তেৎ ত্রান্সমিসন সিস্তেম গ্রিন ইনর্জি কোরিদোর ফেজ-২ অসিনা সিকিমি ১০৭৫৩গী ত্রান্সমিসন লাইনশিং হাপচিন্নবা পান্দম থম্লি অমসুং লুপা করোর ১২,০৩১.৩৩ চঙনা এম.ভি.এ ২৭৫৪৬গী সবস্তেনশিং শেমগৎকনি অমসুং মসিদা কেন্দ্রগী শেন্থং ওইনা লুপা করোর ৩৯৭০.৩৪(চাদা ৩৩) পুথোক্কনি।
নুঙগীৱারোল
প্রধান মন্ত্রীনা ২০২০গী নিংতম্বা নুমিৎতা ৱা ঙাংবদা লাদাখতা গিগাৱাত ৭.৫গী সোলার পার্ক অমা লিংখৎকনি হায়না লাউথোকখি। কুপ্না সর্ভে পাংথোক্লবা মতুংদা, নিউ অমসুং রিনিউএবল ইনর্জি মিনিস্ত্রিনা লাদাখকী পাংদা গিগাৱাত ১৩ পুথোকপা প্রোজেক অমা অমসুং গিগাৱাত অৱার ১২গী বেত্তরি ইনর্জি স্তোরেজ সিস্তেম(বেস) লিংখৎনবা থৌরাং তৌখি। মসিদগী য়াম্লবা মৈ পুথোকখিনবা, ইন্তর-স্তেৎ ত্রান্সমিসন ইনফ্রাস্ত্রচর শেমগৎপা দরকার ওই।
