ঐগী নুংশিরবা ইরৈবাকচাশিং, খুরুমজরি!
নবরাত্রি, শক্তিবু থৌনিজবগী কুহ্মৈ অসি হয়েংদগী হৌরগনি। ময়াম পুম্নমকপু য়াইফ-পাউজেল পীজরি! নবরত্রিগী অহানবা নুমিৎতগী লৈবাক অসিনা আত্মনির্ভর ভারত কেম্পেনগী মায়কৈদা অতোপ্পা মরুওইবা অমদি অচৌবা খোঙথাং অমা লৌখৎলি। হয়েং, সেপ্তেম্বর 22, নবরত্রিগী অহানবা নুমিত্তা, নুমিৎ থোরকপগা লোয়ননা, নেক্স জেনরেসন GSTগী রিফোর্মশিং চৎনরগনি। মওং অমদা, লৈবাক অসিদা GST সেভিংস ফেস্তিবেল হৌরগনি। মসিগী GST সেভিং ফেস্তিবেল অসিনা অদোমগী সেভিংশিং হেনগৎহল্লগনি অমসুং অদোম্না পাম্লিবা পোৎলমশিং অদু হেন্না লায়না লৈবা ঙম্লগনি। ঐখোয়গী লৈবাক অসিগী লায়রবশিং, মিদল ক্লাস, নিও মিদল ক্লাস, নহারোলশিং, লৌমীশিং, নুপীশিং, দুকান ফম্বা মীওইশিং, লল্লোন ইতিক তৌবা মীওইশিং, ওন্তপ্রিন্যুওরশিং পুম্নমক্না মসিগী সেভিং ফেস্তিবেল অসিদগী কান্নবা ফংলগনি। মসিনা তাক্লিবদি কুহ্মৈগী মতম অসিদা মীপুম খুদিংমক্না অথুম্বা পোৎ অমা চাবা ফংলগনি, অমসুং লৈবাক অসিগী ইমুং খুদিংমক থৌজাল্লগনি। ঐহাক্না লৈবাক অসিগী ইমুং লাখ কয়াদা নক্স জেনরেসন GSTগী রিফোর্ম অমসুং সেভিং ফেস্তিবেল অসিগীদমক থম্মোয় শেংনা নুংঙাইবা ফোংদোকচরি। রিফোর্মশিং অসিনা ভারতকী গ্রোথ স্তোরী অসি খুমাং চাউশিলহল্লগনি, ললোন-ইতিক তৌবদা লাইথোকহল্লগনি, ইনভেস্তমেন্ত হেন্না পুক্নিং লাকহল্লগনি অমসুং চাউখৎপগী লমদা রাজ্য খুদিংমকপু মান্নবা পার্তনর অমা ওইহল্লগনি।
মরুপশিং,
ভারতনা 2017তা GSTগী রিফোর্ম হৌদোকখিবা মতমদা, মসিনা অরিবা পুৱারী অসি হোংদোকপা অমসুং অনৌবা পুৱারী অমা শেমগৎপগী হৌরকফম ওইখি। চহি তরাগী খুজিং কয়াগী মমাংদগী, ঐখোয়গী লৈবাক অসিগী মীয়াম, ময়াম পুম্নমক, লৈবাক অসিগী বিজিনেসমেনশিং অসি তোঙান তোঙানবা তেক্সশিংগী লাং অমদা থুদুনা লাকখি। ওক্তরোই, এন্ত্রী তেক্স, সেল্স তেক্স, এক্সিস, ভেত, সর্বিস তেক্স... অসিগুম্বা তেক্স কয়া ঐখোয়গী লৈবাক অসিদা লৈরম্মি। শহর অমদগী অতোপ্পা শহর অমদা পোৎ-চৈশিং য়োনবগীদমক্তা, মশীং থীঙমদ্রবা চেকপোইন্তশিং লান্থোকপা, মশীং থীঙমদ্রবা ফোর্মশিং মেনশিনবা, মশীং থীঙমদ্রবা খুদোংচাদবশিং থেংনবা তাই। মফম খুদিংমক্তা তোঙানবা তেক্স কাংলোন লৈ। ঐহাক্না নীংশিংলি মদুদি লৈবাক অসিনা ঐহাকপু 2014দা প্রধান মন্ত্রীগী থৌদাং অদু পীখিবা মতমদা, অহানবা তাঙ্কক অদুদা, ময়েক শেংবা খুদম অমা মপানগী ন্যুজ পেপর অমদা ফোঙখি। মদুদা কম্পনী অমগী অৱাবা অদু পনখি। কম্পনী অদুনা হায়খি মদুদি, করিগুম্বা মহাক্না বেঙ্গলোরদগী কিলোমীতর 570 লাপ্পা হায়দ্রবাদতা পোৎ-চৈ থাবগী মথৌ তারবদি, মদু য়াম্না অৱাবা ওইগনি। অমসুং মখোয়না হায়খি মদুদি বেঙ্গলোরদগী য়ুরোপতা হায়রিবা পোৎ অদু হান্না থানবা কম্পনীনা খনগনি অমসুং মদু য়ুরোপতগী অমুক হায়দ্রবাদতা অমুক থাগনি।
মরুপশিং,
তেক্স অমসুং তোলশিংগী কমপ্লেক্সিতীনা মরম ওইদুনা মতমদুগী ফিভম অসি অসুম্না ওইরম্মি। অমসুং ঐহাক্না অদোমদা অরিবা খুদম অমা খক্তমক নীংশিংহল্লি: মতম অদুদা, কম্পনী মিলিয়ন কয়া, নাগরিক মিলিয়ন কয়া, মখল কয়াগী তেক্সকী অৱাবা অসিনা মরম ওইদুনা নুমিৎ খুদিংগী অৱাবা মায়োক্নখি। শহর অমদগী অতোপ্পা শহর অমদা পোৎলমশিং পুথোক পুশিন তৌবদা চংবা শেনফম হেনগৎলকপা অসিসু লায়রবশিংনা পুথোকপা তাখি, অমসুং মসি অদোমগুম্বা কস্তমরশিংদগী লৌখৎখি।
মরুপশিং,
অসিগুম্বা ফিভম অসিদগী লৈবাক অসি লৌথোকপা অসি য়াম্না মরু ওই। মরম অদুনা, অদোম্না ঐখোয়দা 2014দা খুদোংচাবা পীখিবা মতমদা, ঐখোয়না মীয়ামগী কান্নবা অমসুং লৈবাক অসিগী কান্নবা ফংনবগীদমক GST শেমখি। ঐখোয়না স্তেকহোল্দর খুদিংগা ৱারী শানখি, রাজ্য খুদিংমক্কী চীংনবা খুদিংমক কোকহনখি, ৱাহং খুদিংমক্কী ৱারোইশিন পুরকখি, অমসুং রাজ্য খুদিংমকপু পুনশিন্নদুনা, নীংতম ভারতকী খ্বাইদগী চাউবা তেক্স রিফোর্ম অসি ওইথোকপা ঙমখি। সেন্তর অমসুং রাজ্যশিংনা হোৎনখিবগী মহৈনি মদুদি লৈবাক অসি তেক্স কয়াগী লাংদগী থোরকপা ঙমখি অমসুং লৈবাক পুম্বগীদমক্তা য়ুনিফোর্ম ওইবা পথাপ অমা শেমখি। ৱান নেসন-ৱান তেক্স অমগী মঙলান অদু মঙফাওনখ্রে।
মরুপশিং,
রিফোর্ম অসি লেপ্পা লৈতনা চত্থবা থৌওং অমনি। মতমগী অহোংবশিং অমসুং লৈবাক অমগী মথৌ তাবশিং হোংলকপগা লোয়ননা, মথংগী জেনরেসনগী রিফোর্মশিংসু চপ মান্ননা মথৌ তারক্লি। মরম অদুনা, লৈবাক অসিগী হৌজিক্কী মথৌ তাবশিং অমসুং তুংগী মংলানশিং য়েংলগা GSTগী অনৌবা রিফোর্মশিং অসি পায়খৎলি।
অনৌবা ফোর্মেত্তা, হৌজিক্তি 5% অমসুং 18%গী তেক্স স্লেবশিং খক্তমক লৈগনি। মসিনা তাক্লিবদি নুমিৎ খুদিংগী শীজিন্নবা পোৎলম অয়াম্বদি শেল চঙদনা লৈরগনি। চানবা পোৎলমশিং, হিদাক-লাংথকশিং, সাপোন, ব্রশশিং, তুথপেষ্ট, হেল্থ অমসুং লাইফ ইন্সুরেন্স - অসিগুম্বা পোৎলম অমসুং সর্ভিস কয়া অসি তেক্স-ফ্রী ওইগনি নত্ত্রগা মসিদা চাদা মঙাগী তেক্স খক্তমক লৌগনি। মমাংদা চাদা 12দা তেক্স লৌরম্বা পোৎলমশিংগী মনুংদা, চাদা 99, নৎত্রগা চাদা 100রোম, হৌজিক্তি চাদা 5গী তেক্স লৌরগনি।
মরুপশিং,
হৌখিবা চহি 11 অসিদা লৈবাক অসিগী মীওই মিলিয়ন 250না লাইরবদগী থোরকপা ঙমখ্রে, লাইরবা কনবা ঙমখ্রে, অমসুং লাইরবা কনবা ঙম্লবা মতুংদা, মীওই মিলিয়ন 250গী অচৌবা কাঙলুপ অমা, নিও-মিদল ক্লাস হায়না খঙনরি, ঙসি লৈবাক অসিদা মরু ওইবা থৌদাং অমা লৌরি। নিও-মিদল ক্লাস অসিগী মশাগী এস্পিরেসন অমসুং মঙলানশিং লৈ। চহি অসিদা, সরকারনা লুপা লাখ 12 ফাওবগী ইনকম তেক্স ফ্রী ওইহন্দুনা খুদোংচাবা অমা পীখি। অমসুং মহৌশানা, লুপা লাখ 12গী ইনকম তেক্স লৌথোকপা মতমদা, মিদল ক্লাসকী পুন্সিদা চাউনা অহোংবা লাকই। মসি য়াম্না লায়বা অমসুং খুদোংচাবা ওইরকই। হৌজিক্তি লাইরবশিং, নিও-মিদল ক্লাসকী মতম লাক্লে। মওং অমদা, লাইরবশিং, নিও-মিদল ক্লাস অমসুং মিদল ক্লাসনা দবল বোনানজা অমা ফংলি। GST হন্থরকপগা লোইননা লৈবাক অসিগী নাগরিকশিংনা মখোয়গী মঙলানশিং মপুং ফাহন্নবগীদমক হৌজিক্তি হেন্না লায়থোক্লগনি। য়ুম শাবা, TV, ফ্রিজ, স্কুতোর, বাইক, নৎত্রগা কার লৈবা ওইরবসু, মখোয়না মসি পুম্নমক্তা হৌজিক্তি শেল হেন্না চাদিং তৌরোইদৌরি। হোতেল অয়াম্বদা লৈরিবা রুমশিংদা GST হন্থখিবনা মরম ওইদুনা অদোমগীদমক চৎথোক-চৎশিন তৌবগী শেনফমসু হন্থরক্কনি।
অসুম্না মরুপশিং,
দুকান ফম্লিবশিংসু GSTগী রিফোর্ম অসিদা য়াম্না হরাওবা উবদা ঐহাক নুংঙাইবা ফাওই। মখোয়না কস্তমরশিংদা GST হন্থহনবগী মতাংদা পাউ খঙহন্ননবা থবক পায়খৎলি। মমাংগী অমসুং হৌজিক্কী মমলশিং উৎলিবা সাইনবোর্দশিং মফম কয়াদা থেৎলি।
মরুপশিং,
ঐখোয়না, নাগরিকশিংনা, মাংলোমদা চংশিল্লিবা মন্ত্র অসি নক্স জেনরেসন GSTগী রিফোর্মদা ময়েক শেংনা উৎলি। করিগুম্বা ঐখোয়না ইনকম তেক্স অমসুং GSTদগী লৌথোকপা য়াহল্লবদি চহি অমদা লৌখিবা ৱারেপশিং অসিনা লৈবাক অসিগী মীয়ামদা লুপা করোর লাখ 2.5 হেন্না কনবা ঙমগনি। মরম অসিনা মসি সেভিং ফেস্তিবেল অমনি হায়না ঐনা হায়জরিবনি।
মরুপশিং,
চাউখৎলবা ভারত অমগী পান্দম ফংনবগীদমক, ঐখোয়না মশা-মরোমদোম লেপচবা লম্বীদা চংশিনবা তাই। অমসুং ঐখোয়গী MSMEশিং, নৎত্রগা অপীকপা, ময়াই ওইবা, অমসুং কুতেজ ইন্দস্ত্রীশিং অসিনা ভারতপু মশা-মরোমদোম লেপচবদা মরু ওইবা থৌদাং অমা লৌরি। লৈবাক অসিগী মীশিংনা করিগুম্বা অমা মথৌ তারকপা তারগদি, ঐখোয়না লৈবাক অসিদা শেম্বা য়াবা করিগুম্বা অমা লৈরগদি, ঐখোয়না মদু লৈবাক অসিদা শেমগদবনি।
মরুপশিং,
GSTগী চাং হন্থরকপা অমসুং চৎন-কাঙলোনশিং অমসুং থৌওংশিং লাইথোকহন্দুনা, ঐখোয়গী MSMEশিং, অপীকপা ইন্দস্ত্রীশিং, অমসুং কোতেজ ইন্দস্ত্রীশিংনা চাউনা কান্নবা ফংগনি। মখোয়গী য়োনবা হেনগৎলক্কনি, অমসুং মখোয়না তেক্স হন্থনা পীবা তাই। মসিনা তাকপদি মখোয়না শরুক অনিগী কান্নবা ফংগনি। মরম অদুনা, ঙসি ঐহাক্না ময়াম পুম্নমক্তগী, MSMEশিং, অপীকপা ইন্দস্ত্রীশিং, মাইক্রো ইন্দস্ত্রীশিং অমসুং কোতেজ ইন্দস্ত্রীশিংদগী চাউনা আশা তৌরি। ভারতনা চাউখৎপগী অৱাংবা থাক্তা লৈরিঙৈদা, ঐখোয়গী MSMEশিং, ঐখোয়গী অপীকপা অমসুং কোতেজ ইন্দস্ত্রীশিং অসি ভারতকী শেন্মিৎলোনগী মরুওইবা য়ুম্ফম ওইরম্মি। ভারতকী মেনুফেকচরিং, ভারত্তা শাবা পোৎলমশিং অসি খ্বাইদগী ফবা ওইরম্মি। ঐখোয়না চাউথোকচবা অদু অমুক হন্না ফংবা তাই। ঐখোয়গী অপীকপা ইন্দস্ত্রীশিংনা পুথোক্লিবা পোৎলমশিং অসি, মখোয় অসি ক্রাইতেরিয়া খুদিংমক্তা মালেমদা খ্বাইদগী ফবা ওইগদবনি, খ্বাইদগী ফবা ওইগদবনি। ঐখোয়না পুথোকপা পোৎলম খুদিংমক মালেমদা চাউথোকচবা অমসুং ইকাই খুম্নবা লৈহন্দুনা খ্বাইদগী ফবা ওইগদবনি। ঐখোয়না পান্দম অসিগী মায়কৈদা থবক তৌগদবনি: ঐখোয়গী পোত্থোকশিংগী মগুন হেনগৎহনবা, মালেমদা ভারতকী শকখঙবা হেনগৎহনবা, ভারতকী ইকাই খুম্নবা হেনগৎহনবা।
মরুপশিং,
স্বদেশীগী মন্ত্রনা লৈবাক অসিগী নীংতম্বা মপাঙ্গল কনখৎহনখিবগুম্না, স্বদেশীগী মন্ত্রনা লৈবাক অসিগী চাউখৎপা মপাঙ্গল কনখৎহনগনি। ঙসিদি, ঐখোয়না খঙনা নত্ত্রগা খঙদনা, মপানগী পোৎলম কয়া অমা ঐখোয়গী পুন্সিগী শরুক অমা ওইরে, অমসুং ঐখোয়না মসি খঙদে। ঐখোয়গী ফুরুৎ খাওদা য়াওরিবা শমচেৎ অসি মপান লৈবাক্কীরা নৎত্রগা ভারতকীরা হায়বসু ঐখোয়না খঙদে। ঐখোয়না মখোয়শিং অসিদগীসু ঐখোয় ইশানা ইশাবু নীংতমহনগদবনি। ঐখোয়না মেদ ইন ইন্দিয়াগী পোৎলমশিং, ঐখোয়গী নহারোলশিংগী কন্না হোৎনজবা, ঐখোয়গী ইচিল-ইনাওগী হুমাং মমল য়াওবা, ইনভেস্তমেন্ত তৌরবা পোৎলমশিং লৈগদবনি। ঐখোয়না য়ুমথোং খুদিংমক স্বদেশীগী খুদম অমা ওইহনগদবনি। দুকান খুদিংমক স্বদেশীনা লৈতেংহনগদবনি। মসি স্বদেশীনি হায়না চাউথোক্না ফোংদোক্কদবনি। ঐহাক্না স্বদেশীগী পোৎলমশিং লৈবগা লোয়ননা স্বদেশীগী পোৎলমশিংসু য়োল্লি হায়না চাউথোক্না ফোংদোকউ। মসি ভারত মচা খুদিংমক্কী ৱাখল্লোন ওইগদবনি। মসি তৌরবা মতমদা, ভারতনা খোঙজেল য়াংনা চাউখৎলগনি। ঙসি ঐহাক্না রাজ্য সরকার পুম্নমক্তা মশাগী রাজ্যশিংদা মেনুফেকচরিংগী থবকশিং অসি আত্মনির্ভর ভারতকী কেম্পেন, স্বদেশীগী কেম্পেন অসিগা লোয়ননা খুমাং চাউশিলহন্নবা হায়জরি। মপুং ফানা ইনর্জী অমসুং পুক্নিং থৌগৎপগা লোয়ননা শরুক য়াবীয়ু। ইনভেস্তমেন্তকীদমক অকোয়রোন ফগৎহনবা। কেন্দ্র অমসুং রাজ্যশিংনা অমত্তা ওইনা মাংলোমদা চংশিল্লকপা মতমদা, আত্মনির্ভর ভারত অমগী মঙলান অসি মপুং ফাহনগনি। ভারতকী রাজ্য খুদিংমক চাউখৎলগনি, অমসুং ভারতসু চাউখৎলগনি। মসিগী ৱাখল্লোন অসিগা লোয়ননা, ঐহাক্না অমুক্কা হন্না মসিগী সেভিং ফেস্তিবেল অসিগীদমক্তা য়াইফ-পাউজেল পীদুনা ঐহাক্কী ৱারোল লোইশিনজরি। অমুক্কা হন্না নবরত্রি অমসুং GST সেভিং ফেস্তিবেলগীদমক্তা য়াইফ-পাউজেল পীজরি। হন্না-হন্না থাগৎচরি!
