કોરિયાના રાજદૂતે મુખ્યમંત્રીશ્રી સાથે સૌજ્ન્ય મૂલાકાત કરી

કોરિયા અને ગુજરાત વચ્ચે ઔઘોગિક અને આર્થિક સંબંધોનું મજબૂત ફલક વિકસાવવા ફલદાયી પરામર્શ

ઓટોમોબાઇલ્સ, શીપીંગ, ઇલેકટ્રોનિકસ, નોલેજ ઇન્ડસ્ટ્રીઝના સેકટરોમાં સહભાગીતા

કોરિયન સરકારે મુખ્યમંત્રીશ્રીને કોરિયાની મૂલાકાતનું ભાવભર્યું ઇજન આપ્યું

મુખ્યમંત્રીશ્રીએ કોરિયાના સેમૂંગમ જળપ્રકલ્પની કોરિયાના પ્રવાસ દરમિયાન મૂલાકાત લીધેલી તેની યાદ આપી જણાવ્યું કે ગુજરાતના ૧૬૦૦ કી.મી. દરિયાકાંઠે શીપ બિલ્ડીંગ ઇન્ડસ્ટ્રીઝ વિકસાવવા અને કલ્પસર પ્રોજેકટ દ્વારા ૬૪ કી.મી.નો વિશ્વનો સૌથી મોટો માનવસર્જીત મીઠા પાણીનો જળાશય પ્રકલ્પ નિર્માણ કરવા તેઓ પ્રતિબધ્ધ છે, તેમાં કોરિયાની આધુનિક ટેકનોલોજી માટે ગુજરાત સરકાર આતુર છે.

ગુજરાત એશિયાના ઓટો હબ તરીકે નામના મેળવી રહ્યું છે અને નેનો, ફોર્ડ, પ્યુજોટ, મારૂતિ જેવી વિશ્વખ્યાત મોટરકાર મેન્યુફેકચરીંગ કંપનીઓ ગુજરાતમાં પ્રોજેકટ સ્થાપી રહી છે તેની રૂપરેખા સાથે મુખ્યમંત્રીશ્રીએ કોરિયાની હોન્ડાઇ કાર કંપની માટે પણ ગુજરાતના દ્વાર ખૂલ્લાં છે એમ જણાવ્યું હતું. આગામી વર્ષોમાં ગુજરાત એકલું પ૦ લાખ જેટલી મોટરકારોનું ઉત્પાદન કરનારૂં ઓટો હબ બનશે. ગુજરાતમાં ઔઘોગિક અને આર્થિક વિકાસની હરણફાળ તથા ઔઘોગિક મૂડીરોકાણ માટેનું શ્રેષ્ઠ સાનુકુળ વાતાવરણ, ગુજરાતની જનતાની આર્થિક વાણીજ્ય કુનેહ અને ઉઘમશીલ પુરૂષાર્થ સાથે રાજ્ય સરકારની પ્રગતિશીલ પારદર્શી નીતિઓ અને વિકાસ માટે જનતાની દૂરંદેશીતાના કારણોની ફલશ્રુતિ મુખ્યમંત્રીશ્રીએ દર્શાવી હતી જેનાથી કોરિયન રાજદૂત પ્રભાવિત થયા હતા.

મુખ્યમંત્રીશ્રી અને કોરિયન રાજદૂત કોરિયા અને ગુજરાતની વિકાસયાત્રાની સામ્યતા સાથે સહમત થયા હતા. ગુજરાતમાં ઔઘોગિક પ્રોજેકટ માટે જમીન કોઇ વિવાદ નથી અને શૂન્ય સપાટીએ માનવદિન નુકશાન અને શ્રમ-પુરૂષાર્થી ગુજરાતી સમાજના કારણે ગુજરાત પ્રગતિ કરતું રહ્યું છે, એમ તેમણે જણાવ્યું હતું. ગુજરાતમાં વિશ્વના સૌથી મોટા ભવ્ય બુધ્ધ-મંદિરના નિર્માણમાં કોરિયન ટેકનોલોજી માટે પણ મુખ્યમંત્રીશ્રીએ તત્પરતા વ્યકત કરી હતી.

આ બેઠકમાં, મુખ્યમંત્રીશ્રીના સચિવશ્રી એ. કે. શર્મા અને ઇન્ડેક્ષ્ટ-બી મેનેજિંગ ડિરેકટરશ્રી બી. બી. સ્વેન ઉપસ્થિત હતા