ગુજરાત વિધાનસભાની સુરત પશ્ચિમ (૧૬૭) બેઠક માટે તાજેતરમાં યોજાયેલી પેટા ચૂંટણીમાં વિજયને વરેલા ભારતીય જનતા પાર્ટીના નવનિર્વાચીત સભ્યશ્રી પૂર્ણેશભાઇ મોદીએ આજે મુખ્યમંત્રીશ્રી નરેન્દ્રભાઇ મોદીની પ્રેરક ઉપસ્થિતિમાં ગુજરાત વિધાનસભા અધ્યક્ષશ્રી વજુભાઇ વાળા સમક્ષ વિધાનસભા કાર્યાલયમાં ધારાસભ્ય પદના શપથ ગ્રહણ કર્યા હતા.
મુખ્યમંત્રીશ્રીએ શ્રી પૂર્ણેશ મોદીને વિજયના અભિનંદન અને શુભેચ્છાઓ પાઠવી હતી. આ પ્રસંગે રાજ્ય મંત્રીમંડળના મંત્રીઓ શ્રીમતી આનંદીબેન પટેલ, રમણભાઇ વોરા, સૌરભભાઇ પટેલ તથા રાજ્યકક્ષાના મંત્રીશ્રીઓ પરબતભાઇ પટેલ, પ્રદીપસિંહ જાડેજા, ગોવિંદભાઇ પટેલ, વાસણભાઇ આહિર, રજનીભાઇ પટેલ, જયેશભાઇ રાદડીયા તેમજ પદાધિકારીઓ, શુભેચ્છકો અને વિધાનસભા સચિવશ્રી ડી. એન. પટેલ ઉપસ્થિત રહયા હતા.
