বিশ্ব খাদ্য ভাৰত ২০২৪ ৰ সংগঠনৰ বিষয়ে জানি আনন্দিত হৈছো। বিশ্বৰ বিভিন্ন প্ৰান্তৰ পৰা অহা সকলো অংশগ্ৰহণকাৰীক শুভেচ্ছা তথা শুভকামনা জনাইছো।
কেইবাখনো ৰাষ্ট্ৰৰ অংশগ্ৰহণে বিশ্ব খাদ্য উদ্যোগ ২০২৪ক শিক্ষা আৰু গৱেষণাৰ আটাইতকৈ উজ্জ্বল মনৰ বাবে বৰ্ধিত সুযোগৰ সৰ্বাধিক সদ্ব্যৱহাৰ কৰাৰ লগতে ইজনে সিজনৰ অভিজ্ঞতাৰ পৰা দ্বিমুখী শিক্ষা লাভ কৰিব পৰা এক সক্ৰিয় মঞ্চ হিচাপে প্ৰতিফলিত কৰিছে।
ভাৰতৰ খাদ্য সংস্কৃতি জীৱন্ত আৰু বৈচিত্ৰ্যপূৰ্ণ। ভাৰতীয় খাদ্য পৰিৱেশ তন্ত্ৰৰ মেৰুদণ্ড হৈছে কৃষক। কৃষকসকলেই ৰন্ধন উৎকৰ্ষতাৰ পুষ্টিকৰ আৰু সুস্বাদু পৰম্পৰা সৃষ্টি কৰাটো সুনিশ্চিত কৰে। আমি তেওঁলোকৰ কঠোৰ পৰিশ্ৰমক অভিনৱ নীতি আৰু বিশেষভাবে কেন্দ্ৰীভূত ৰূপায়ণৰ জৰিয়তে সমৰ্থন কৰি আছো।
আধুনিক যুগত আমাৰ প্ৰচেষ্টা হৈছে প্ৰগতিশীল কৃষি পদ্ধতি, শক্তিশালী প্ৰশাসনিক পৰিকাঠামো আৰু অত্যাধুনিক প্ৰযুক্তিৰ জৰিয়তে খাদ্য খণ্ডত উদ্ভাৱন, স্থিৰতা আৰু সুৰক্ষাৰ বাবে ভাৰতে বিশ্বব্যাপী মান নিৰ্ধাৰণ কৰাটো নিশ্চিত কৰা।
বিগত ১০ বছৰত, আমি খাদ্য প্ৰক্ৰিয়াকৰণ খণ্ডৰ পৰিৱৰ্তনৰ বাবে বিস্তৃত সংস্কাৰ আৰম্ভ কৰিছো। খাদ্য প্ৰক্ৰিয়াকৰণত ১০০% এফডিআই, প্ৰধানমন্ত্ৰী কিষাণ সম্পদ যোজনা, মাইক্ৰ' ফুড প্ৰচেছিং এণ্টাৰপ্ৰাইজেছৰ আনুষ্ঠানিকীকৰণ, খাদ্য প্ৰক্ৰিয়াকৰণ উদ্যোগৰ বাবে উৎপাদন সংযোজিত ইনচেণ্টিভ আঁচনিৰ দৰে বহু-মাত্ৰিক পদক্ষেপৰ জৰিয়তে আমি সমগ্ৰ দেশতে আধুনিক আন্তঃগাঁথনি, শক্তিশালী যোগান শৃংখলা আৰু নিযুক্তি সৃষ্টিৰ এক শক্তিশালী পৰিৱেশ তৈয়াৰ কৰিছো।
আমাৰ দৃষ্টিভংগীৰ এটা গুৰুত্বপূৰ্ণ অংশ হ'ল ক্ষুদ্ৰ উদ্যোগসমূহক শক্তিশালী কৰা। আমি বিচাৰো যে আমাৰ এমএছএমই সমূহ বিকশিত হওক আৰু গোলকীয় মূল্য শৃংখলাৰ এক অবিচ্ছেদ্য অংশ হওক আৰু ইয়াৰ সমান্তৰালকৈ, মহিলাসকলক ক্ষুদ্ৰ উদ্যোগী হ'বলৈ উৎসাহিত কৰক।
এনে এক সন্ধিক্ষণত, বিশ্ব খাদ্য ভাৰত হৈছে ব্যৱসায়িক বাৰ্তালাপ আৰু প্ৰদৰ্শনী, ক্ৰেতা-বিক্ৰেতাৰ বৈঠক, আৰু দেশ, ৰাজ্য আৰু খণ্ড-নিৰ্দিষ্ট অধিৱেশনৰ জৰিয়তে বিশ্বৰ সৈতে কাম কৰাৰ বাবে এক আদৰ্শ মঞ্চ।
ইয়াৰ উপৰি, ভাৰতীয় খাদ্য সুৰক্ষা আৰু মানক প্ৰাধিকৰণৰ গোলকীয় খাদ্য নিয়ন্ত্ৰক সন্মিলনৰ সংগঠন - এফএছএছএআইয়ে বিশ্ব স্বাস্থ্য সংস্থা, এফ.এ.ও. আৰু কেইবাটাও সন্মানীয় ঘৰুৱা প্ৰতিষ্ঠানকে ধৰি গোলকীয় নিয়ন্ত্ৰকসকলক একত্ৰিত কৰি খাদ্য সুৰক্ষা, মান আৰু উৎকৃষ্ট পদ্ধতিৰ দৰে বিভিন্ন বিষয় সন্দৰ্ভত আলোচনা কৰিব।
লগতে, মই নিশ্চিত যে খাদ্য সুৰক্ষা বৃদ্ধি আৰু খাদ্যৰ অপচয় হ্ৰাস কৰাৰ বাবে খাদ্য বিকিৰণ, পুষ্টি আৰু স্থিৰতা বৃদ্ধিৰ বাবে উদ্ভিদ-আধাৰিত প্ৰ'টিনৰ দৰে গুৰুত্বপূৰ্ণ বিষয়বোৰ প্ৰদৰ্শন কৰা হ'ব, লগতে বৃত্তীয় অৰ্থনীতি প্ৰদৰ্শন কৰা হ'ব।
আহক আমি আগবাঢ়ি যাওঁ আৰু এক বহনক্ষম, সুৰক্ষিত, সামগ্ৰিক আৰু পুষ্টিকৰ পৃথিৱী গঢ়াৰ সপোন বাস্তৱায়িত কৰোঁ।
