মহামহিম ৰাষ্ট্ৰপতি মহোদয়, উপস্থিত সকলো বিশিষ্ট ব্যক্তি তথা সন্মানপ্ৰাপক, সমাজৰ প্ৰতি সমৰ্পিত অতিথিবৰ্গ৷ মই সৰ্বপ্ৰথমে আপোনালোকৰ ওচৰত ক্ষমা বিচাৰিছো, কিয়নো অন্য এটি কামত ব্যস্ত থকাৰ বাবে ইয়ালৈ আহোতে মোৰ অলপ পলম হৈছে৷ আজি বিশ্বই যিসময়ত পূজ্য বাপুৰ ডেৰশ বছৰীয়া জয়ন্তী পালন কৰিছে, সেই বছৰতে ‘গান্ধী শান্তি বঁটা’ লাভ কৰাৰ গুৰুত্বই সুকীয়া৷ যিসকল ব্যক্তি আৰু সংগঠনে এই বঁটা লাভ কৰিছে, সেইসকলৰ ভিতৰত-কন্যাকুমাৰীৰ বিবেকানন্দ কেন্দ্ৰ, একল বিদ্যালয়ৰ দৰে সংস্থাসমূহে সমাজৰ অতি পিছপৰা শ্ৰেণী লোকসকলৰ সন্তানৰ শিক্ষা প্ৰসাৰৰ লগতে জীৱনধাৰণৰ মান উন্নয়নত সমর্পিত মনোভাৱেৰে কাম কৰি আহিছে-তেওঁলোকক মই বহুত বহুত অভিনন্দন জনাইছো৷
গান্ধীজীক এবাৰ প্ৰশ্ন কৰা হৈছিল যে তেওঁক স্বাধীনতা আৰু স্বচ্ছতাৰ ভিতৰত যিকোনো এটা বাচি ল’বলৈ ক’লে তেওঁ কোনটোক প্ৰাধান্য দিব? তেওঁ কৈছিল, ‘মই স্বচ্ছতাকে প্ৰাধান্য দিম’৷ স্বাধীন ভাৰতত পূজ্য বাপুৰ এই সপোন বাস্তবায়িত কৰাৰ দায়িত্ব আমাৰ সকলোৰে আছে৷ দেশৰ যি কোনো প্রান্তত আজি যিসকলে স্বচ্ছতাৰ স্বার্থত বা শৌচালয় নির্মাণত নিজকে উচর্গা কৰিছে, তেওঁলোক প্ৰত্যেকেই আমাৰ বাবে সন্মানীয় ব্যক্তি৷ দেশৰ শিশুসকলৰ মধ্যাহ্ন ভোজনৰ আঁচনি সকলো ৰাজ্যতে চলি আছে৷ কিন্তু অক্ষয়পাত্ৰ সংস্থাই এই সেৱাকর্মক এক সংগঠিত অভিযানলৈ পৰিণত কৰিছে। কেইদিনমান পূৰ্বে বৃন্দাবনলৈ গৈ অক্ষয়পাত্ৰ সংস্থাৰ ৩০০ কোটি লোকক খাদ্য পৰিৱেশনৰ মোৰ সৌভাগ্য হ’ল৷ কেন্দ্রীয় চৰকাৰেও দেশত অপুষ্টি নিবাৰণৰ এক ডাঙৰ অভিযান চলাই আছে। কাৰণ, আমি ভাৱো যে ভাৰতৰ শিশুসকল সুস্থ হ’লেই দেশ আৰু দেশৰ ভৱিষ্যৎ সুস্থ থাকিব৷ এই অভিযানৰ প্ৰতি সমগ্ৰ দেশতে গুৰুত্বপূৰ্ণ জন-অংশীদাৰিত্ব গঢ় লৈ উঠিছে। জনসাধাৰণে যেতিয়া স্ব-ইচ্ছাৰে কোনো অভিযানত অংশগ্ৰহণ কৰে, তেতিয়া তাৰ শক্তি আৰু অধিক বাঢ়ি যায়।
মহাত্মা গান্ধীৰ জীৱনৰ সফলতাৰ আটাইতকৈ ডাঙৰ কথাটো হ’ল, স্বাধীনতাৰ বাবে দেহ-প্ৰাণ ত্যাগ কৰা পৰম্পৰা কেতিয়াও এই দেশত বন্ধ হোৱা নাই৷ যিমান বছৰ পৰাধীন আছিল, সিমান দিনেই একোগৰাকী বীৰ পুৰুষ ওলাই আছিল৷ এয়াই এই দেশৰ বৈশিষ্ট্য আৰু গান্ধীজীয়ে স্বাধীনতাক জন-আন্দোলনত পৰিণত কৰিছিল৷ সমাজৰ বাবে যি কামেই নকৰক কিয়, তাৰ দ্বাৰা স্বাধীনতা আহিব, এনে মনোভাৱ গঢ়ি তুলিছিল৷ জন-অংশীদাৰিত্ব, জন-আন্দোলন স্বাধীনতা সংগ্ৰামৰ সময়ত যিমান গুৰু্ত্ব আছিল, এখন সমৃদ্ধিশালী আৰু সুখী ভাৰতৰ বাবেও সিমানেই আৱশ্যক৷
গান্ধীজীৰ দ্বাৰা প্ৰদর্শিত সেই পথেৰেই আমি তেওঁৰ ডেৰশ বছৰীয়া জয়ন্তীত তেওঁৰ সপোন বাস্তবায়িত কৰাৰ দিশত কাম কৰি আহিছো৷ ২০২২ চনত দেশে যেতিয়া স্বাধীনতাৰ ৭৫সংখ্যক বর্ষপূর্তি পালন কৰিব, তাৰ পূৰ্বেই আমি গান্ধীজীৰ সপোনৰ ভাৰত গঢ়ি তুলিব বিচাৰো৷ পূজ্য বাপু এগৰাকী বিশ্ব মানৱ আছিল৷ স্বাধীনতা আন্দোলনত নেতৃত্ব প্ৰদানৰ চৰম ব্যস্ততাৰ মাজতো তেওঁ সপ্তাহত এদিন জণ্ডিছ আৰু কুষ্ঠ ৰোগীসকলৰ সেৱাত নিজকে নিয়োজিত কৰিছিল৷ কুষ্ঠ ৰোগীসকলৰ প্ৰতি সমাজৰ মানসিকতা পৰিৱর্তনৰ বাবে তেওঁৰ অনুগামী সস্কাওজীয়েও প্রায় চাৰি দশক ধৰি কাম কৰি আহিছে৷ তেওঁৰ নেতৃত্বত কুষ্ঠ ৰোগীসকলক লৈ জনজাগৰণ সৃষ্টি হৈছে৷ তেওঁ দৰে ব্যক্তিক সন্মানীত কৰি পূজ্য বাপুক প্ৰকৃতাৰ্থত শ্ৰদ্ধাঞ্জলি নিবেদনৰ এই প্ৰচেষ্টাক মই অভিনন্দন জনাইছো৷ বিশ্বজুৰি মহাত্মা গান্ধীৰ ডেৰশ বছৰীয়া জয়ন্তী পালন উপলক্ষে সমগ্ৰ পৃথিৱীৰ ১৫০খন দেশৰ ১৫০গৰাকী বিখ্যাত শিল্পীয়ে গান্ধীজীৰ প্রিয় ভজন “বৈষ্ণৱ জন তো তেনে কহিয়ো” সুন্দৰভাৱে পৰিৱেশন কৰিছে৷ যিটো কোনোবাই চাব বিচাৰিলে ইউ টিউৱত তেওঁলোকে গোৱা গানসমূহ শুনিবলৈ পাব৷ এই অভিজ্ঞতাই প্ৰমাণ কৰে যে সমগ্ৰ পৃথিৱীত ভাৰতৰ সন্মান বৃদ্ধি পাইছে। বিশ্বজুৰি আজি অনুধাৱন কৰিছে যে গান্ধীজীৰ আদর্শ মানৱকল্যাণাৰ্থে কিমান উপকাৰী! সেইবাবে ভাৰতৰ প্ৰতিটো শিশু, প্ৰত্যেক নাগৰিকে গৌৰৱ কৰিব পাৰে৷ আপোনালোক সকলোকে পুনৰবাৰ শুভেচ্ছা জনাই, পূজ্য বাপুৰ চৰণত প্ৰণাম জনাই, বিনম্ৰ শ্ৰদ্ধাঞ্জলি জনাই মোৰ বক্তব্যৰ সামৰণী মাৰিলো৷ বহুত বহুত ধন্যবাদ৷
