মঞ্চত উপস্থিত থকাপশ্চিম বংগৰ ৰাজ্যাপল জগদীপ ধনখড় মহোদয়, কেন্দ্ৰীয় চৰকাৰত মোৰ সহযোগী শ্ৰী ধৰ্মেন্দ্ৰ প্ৰধান মহোদয়, দেৱাশ্ৰী চৌধাৰী মহোদয়া, সাংসদ দিবেন্দু অধিকাৰী মহোদয়, বিধায়ক তাপসী মণ্ডল মহোদয়া, ভাই আৰু বন্ধুসকল।
আজি পশ্চিম বংগকে ধৰি সমগ্ৰ পূব ভাৰতৰ বাবে এটা গুৰুত্বপূৰ্ণ সুযোগ আহিছে। পূব ভাৰতৰ যোগাযোগ ব্যৱস্থা আৰু স্বচ্ছ ইন্ধনৰ আত্মনিৰ্ভৰশীলতাৰ ক্ষেত্ৰত আজি বহুত ডাঙৰ দিন। বিশেষকৈ এই সমগ্ৰ অঞ্চলটোৰ gas connectivity ক সৱল কৰিব পৰা এক বৃহৎ প্ৰকল্প আজি ৰাষ্ট্ৰৰ নামত মুকলি কৰা হৈছে। আজি যি চাৰিটা প্ৰকল্পৰ আধাৰশিলা স্থাপন আৰু উদ্বোধন কৰা হৈছে, ইয়াৰ ফলত পশ্চিম বংগকে ধৰি পূব ভাৰতৰ অনেক ৰাজ্যত Ease of Living আৰু Ease of Doing Business উভয়ে উদগণি লাভ কৰিব।
বন্ধুসকল,
গেছ নিৰ্ভৰ অৰ্থব্যৱস্থা আজি ভাৰতৰ বাবে জৰুৰী হৈ পৰিছে। এক দেশ, এক গেছ গ্ৰীডৰ ধাৰণা হ’ল এই প্ৰয়োজনীয়তা পূৰণৰ ক্ষেত্ৰত এক গুৰুত্বপূৰ্ণ অভিযান। ইয়াৰ বাবে পাইপলাইন নেটৱৰ্কৰ বিস্তাৰৰ সমান্তৰালকৈ প্ৰাকৃতিক গেছৰ মূল্য হ্ৰাস কৰাৰ ওপৰতো গুৰুত্ব দি থকা হৈছে। বিগত বছৰসমূহত তেল আৰু গেছ খণ্ডত বহু কেইটা বৃহৎ সংস্কাৰো সাধন কৰা হৈছে। আমাৰ এই প্ৰয়াসৰ ফলত আজি ভাৰত এছিয়াৰ সবাতোকৈ অধিক গেছ ব্যৱহাৰকাৰী দেশ হিচাপে পৰিগণিত হৈছে। এইবাৰ বাজেটত দেশে স্বচ্ছ আৰু সুলভ শক্তিৰ বাবে ‘হাইড্ৰ’জেন মিছন’ৰ কথা ঘোষণা কৰিছে, ই স্বচ্ছ ইন্ধন অভিযানক সৱল কৰিব।
বন্ধুসকল,
৬ বছৰ পূৰ্বে যেতিয়া দেশবাসীয়ে আমাক সুযোগ দিছিল, তেতিয়াই আমি বিকাশৰ যাত্ৰাত পিছ পৰি ৰোৱা পূব ভাৰতক উন্নত কৰাৰ এক সংকল্প গ্ৰহণ কৰিছিলো। পূব ভাৰতত জীৱন আৰু জীৱিকাৰ বাবে যিসমূহ আধুনিক সুবিধাৰ প্ৰয়োজন আছে, সেইবোৰৰ নিৰ্মাণৰ বাবে আমি ইটোৰ পিছত সিটো পদক্ষেপ গ্ৰহণ কৰিছো। ৰেলপথ, স্থলপথ, আকাশী পথ, জলপথ আদিৰ দৰে সকলো খণ্ডত আমি উন্নয়নমূলক কাম কৰিছো।
সতীৰ্থসকল,
প্ৰধানমন্ত্ৰী শক্তি গংগা পাইপলাইন এই লক্ষ্যৰে আগবাঢ়ি আছে। আজি এই পাইপলাইনৰ এটা বৃহৎ অংশ জনসাধাৰণৰ বাবে মুকলি কৰা হৈছে। প্ৰায় ৩৫০ কিলোমিটাৰ দৈৰ্ঘ্যৰ এই পাইপলাইন নিৰ্মাণে পশ্চিম বংগৰ লগতে বিহাৰ আৰু ঝাৰখণ্ডৰ দহখন জিলাক উপকৃত কৰিব। এই প্ৰকল্প নিৰ্মাণৰ সময়ত অঞ্চলটোৰ লোকে প্ৰায় ১১লাখ কৰ্মদিনৰ সংস্থাপন লাভ কৰিছে। এতিয়া এই পাইপলাইনৰ জৰিয়তে হাজাৰ হাজাৰ পৰিয়ালৰ ৰান্ধনিঘৰলৈ সুলভ মূল্যত গেছ উপলব্ধ হ’ব। CNG আধাৰিত কম প্ৰদূষণযুক্ত গাড়ী চলিব পাৰিব। ইয়াৰ লগতে পাইপলাইনৰ ফলত দূৰ্গাপুৰ আৰু সিন্ধৰীৰ সাৰ কাৰখানালৈ নিৰন্তৰ গেছ যোগান নিশ্চিত হ’ব। এই দুয়োটা কাৰখানাৰ শক্তি বৃদ্ধি হ’লে সংস্থাপনৰ নতুন সুযোগ সৃষ্টি হ’ব আৰু কৃষকে পৰ্যাপ্ত পৰিমাণৰ আৰু সুলভ মূল্যৰ সাৰ লাভ কৰিব।
বন্ধুসকল,
প্ৰাকৃতিক গেছৰ সমান্তৰালকৈ এই অঞ্চলটোত এলপিজি গেছৰ আন্তঃগাথনি মজবুত কৰিবলৈ অবিৰতভাৱে কাম চলি আছে। পূব ভাৰতত উজ্জ্বলা যোজনাৰ পিছত এলপিজি গেছৰ কভাৰেজ যথেষ্ট বৃদ্ধি পাইছে, যাৰ ফলত চাহিদাও বাঢ়িছে। উজ্জলা যোজনাৰ অধীনত পশ্চিম বংগত প্ৰায় ৯০লাখ লোকে বিনামমূলীয়া গেছ সংযোগ লাভ কৰিছে। ইয়াৰ ভিতৰত ৩৬লাখৰো অধিক এছটি, এছচি শ্ৰেণীৰ মহিলা। ২০১৪ বৰ্ষত পশ্চিম বংগত এলপিজি গেছৰ কভাৰেজ মাত্ৰ ৪১ শতাংশ আছিল। আমাৰ চৰকাৰৰ নিৰন্তৰ চেষ্টাৰ ফলত এতিয়া পশ্চিম বংগৰ এলপিজি গেছৰ কভাৰেজ ৯৯ শতাংশতকৈও বৃদ্ধি পাইছে। এইবাৰৰ বাজেটতটো দেশত উজ্জ্বলা যোজনাৰ অধীনত পুনৰ ১কোটি বিনামূলীয়া গেছ সংযোগ দৰিদ্ৰ লোকক আগবঢ়োৱাৰ ব্যৱস্থা কৰা হৈছে। এই বৰ্ধিত চাহিদা পূৰণ কৰিবলৈ হলদিয়াত নিৰ্মাণ কৰা এলপিজি ইমপ’ৰ্ট টাৰ্মিনেলে গুৰুত্বপূৰ্ণ ভূমিকা পালন কৰিব। পশ্চিম বংগ, ওড়িশা, বিহাৰ, ঝাৰখণ্ড, ছত্তীশগড়, উত্তৰ প্ৰদেশ আৰু উত্তৰ পূৰ্বাঞ্চলৰ কোটি কোটি পৰিয়ালে ইয়াৰ ফলত উপকৃত হ’ব।
সতীৰ্থসকল,
স্বচ্ছ ইন্ধনক লৈ আমাৰ দায়িত্ব পূৰণ কৰিবলৈ আজি ইয়াত BS-6 ইন্ধন প্ৰস্তুত কৰিব পৰা প্ৰকল্পৰ কাম আৰম্ভ কৰা হৈছে। হালডিয়া শোধনাগাৰত এই দ্বিতীয়টো Catalytic Dewaxing Unit যেতিয়া তৈয়াৰ হৈ উঠিবে, তেতিয়া lube base oils ৰ বাবে বিদেশৰ ওপৰত আমাৰ নিৰ্ভৰতা কমি যাব। ইয়াৰ ফলত প্ৰতি বছৰে দেশৰ কোটি কোটি টকা ৰাহি হ’ব।
সতীৰ্থসকল,
পশ্চিম বংগক পুনৰ দেশৰব্যৱসায় আৰু ঔদ্যোগিক কেন্দ্ৰ হিচাপে গঢ়ি তুলিবলৈ আমি নিৰন্তৰ কাম কি আছো। ইয়াত Port Lead Development ৰ সুন্দৰ আৰ্হি আছে। কলকাতাৰ শ্যামা প্ৰসাদ মূখাৰ্জী প’ৰ্ট ট্ৰাষ্টক আধুনিক ৰূপত বনাবলৈ বিগত বছৰসমূহত বহুতো পদক্ষেপ হাতত লোৱা হৈছে।এই সকলো ধৰণৰ কামৰ বাবে সতীৰ্থ সহযোগী ধৰ্মেন্দ্ৰ প্ৰধান মহোদয় আৰু তেওঁৰ গোটেই টীমটোক মই হৃদয়ৰ পৰা বহুত বহুত অভিনন্দন জ্ঞাপন কৰিছো। শেষত পশ্চিম বংগ আৰু সমগ্ৰ পূব ভাৰতৰ জনসাধাৰণক এই সুবিধা লাভৰ বাবে মোৰ তৰফৰ পৰা বহুত বহুত শুভকামনা জনালো।
বহুত বহুত ধন্যবাদ।
