প্ৰধানমন্ত্ৰী শ্ৰী নৰেন্দ্ৰ মোদীয়ে ২৮ এপ্ৰিলত অসম ভ্ৰমণ কৰিব। পুৱা প্ৰায় ১১:০০ বজাত তেওঁ কাৰ্বি আংলং জিলাৰ ডিফুত 'শান্তি, একতা আৰু উন্নয়ন ৰেলী' সম্বোধন কৰিব। এই কাৰ্যসূচীৰ সময়তে তেওঁ শিক্ষা খণ্ডৰ বিভিন্ন প্ৰকল্পৰ আধাৰশিলাও স্থাপন কৰিব। তাৰ পিছতে বিয়লি প্ৰায় ১:৪৫ বজাত প্ৰধানমন্ত্ৰীয়ে ডিব্ৰুগড়ৰ অসম চিকিৎসা মহাবিদ্যালয়ত উপস্থিত হৈ ডিব্ৰুগড় কৰ্কট চিকিৎসালয় দেশবাসীক উৎসৰ্গা কৰিব। ইয়াৰ পিছত, আবেলি প্ৰায় ৩ বজাত তেওঁ ডিব্ৰুগড়ৰ খনিকৰ খেলপথাৰত আয়োজিত এক ৰাজহুৱা অনুষ্ঠানত অংশগ্ৰহণ কৰিব আৰু ছয়খন কৰ্কট চিকিৎসালয় দেশবাসীৰ বাবে উৎসৰ্গা কৰিব। ইয়াৰ লগতে প্ৰধানমন্ত্ৰীয়ে আৰু সাতখন নতুন কৰ্কট চিকিৎসালয়ৰ আধাৰশিলা স্থাপন কৰিব।
কাৰ্বি আংলঙৰ ডিফুত প্ৰধানমন্ত্ৰী
এই অঞ্চলৰ শান্তি আৰু উন্নয়নৰ প্ৰতি প্ৰধানমন্ত্ৰীৰ অটল প্ৰতিশ্ৰুতিৰ এক উৎকৃষ্ট উদাহৰণ হৈছে ভাৰত চৰকাৰ আৰু অসম চৰকাৰে ছয়টা কাৰ্বি উগ্ৰপন্থী সংগঠনৰ সৈতে শেহতীয়াকৈ স্বাক্ষৰ কৰা মীমাংসা চুক্তি। মীমাংসা চুক্তিয়ে অঞ্চলটোত শান্তিৰ এক নতুন যুগৰ সূচনা কৰিছে। 'শান্তি, ঐক্য আৰু উন্নয়ন ৰেলী'ত প্ৰধানমন্ত্ৰীৰ ভাষণে সমগ্ৰ অঞ্চলটোত শান্তি প্ৰচেষ্টাক এক গুৰুত্বপূৰ্ণ উৎসাহ প্ৰদান কৰিব।
প্ৰধানমন্ত্ৰীয়ে পশু চিকিৎসা মহাবিদ্যালয় (ডিফু), ডিগ্ৰী মহাবিদ্যালয় (পশ্চিম কাৰ্বি আংলং) আৰু কৃষি মহাবিদ্যালয় (কলংগা,পশ্চিম কাৰ্বি আংলং)ৰ আধাৰশিলাও স্থাপন কৰিব। ৫০০ কোটি টকাৰো অধিক ব্যয়সাপেক্ষ এই প্ৰকল্পসমূহে অঞ্চলটোত দক্ষতা বিকাশ আৰু নিযুক্তিৰ বাবে নতুন সুযোগ প্ৰদান কৰিব।
এই কাৰ্যসূচীৰ সময়ত প্ৰধানমন্ত্ৰীয়ে ২৯৫০ৰো অধিক অমৃত সৰোবৰ প্ৰকল্পৰ আধাৰশিলা স্থাপন কৰিব। ৰাজ্যখনে এই অমৃত সৰোবৰবোৰ প্ৰায় ১১৫০ কোটি টকা ব্যয়েৰে বিকশিত কৰিব।
ডিব্ৰুগড়ত প্ৰধানমন্ত্ৰী
অসম চৰকাৰ আৰু টাটা ট্ৰাষ্টৰ যুটীয়া উদ্যোগ অসম কেন্সাৰ কেয়াৰ ফাউণ্ডেচনে ৰাজ্যৰ ১৭খন কেন্সাৰ কেয়াৰ হাস্পতালৰ সৈতে দক্ষিণ এছিয়াৰ সৰ্ববৃহৎ সুলভ কেন্সাৰ কেয়াৰ নেটৱৰ্ক স্থাপনৰ এটা প্ৰকল্প কাৰ্যকৰী কৰি আছে। প্ৰকল্পটোৰ প্ৰথম পৰ্যায়ত, ১০খন চিকিৎসালয়ৰ ভিতৰত সাতখন চিকিৎসালয়ৰ নিৰ্মাণ সম্পূৰ্ণ কৰা হৈছে। আনহাতে তিনিখন চিকিৎসালয় নিৰ্মাণৰ বিভিন্ন স্তৰত আছে। প্ৰকল্পটোৰ দ্বিতীয় পৰ্যায়ত সাতখন নতুন কৰ্কট চিকিৎসালয় নিৰ্মাণ কৰা হ'ব।
প্ৰধানমন্ত্ৰীয়ে প্ৰকল্পটোৰ প্ৰথম পৰ্যায়ৰ অধীনত সম্পূৰ্ণ হোৱা সাতখন কৰ্কট চিকিৎসালয় দেশবাসীৰ বাবে উৎসৰ্গা কৰিব। এই কৰ্কট চিকিৎসালয়সমূহ ডিব্ৰুগড়, কোকৰাঝাৰ, বৰপেটা, দৰং, তেজপুৰ, পঞ্চায়ত, লখিমপুৰ আৰু যোৰহাটত নিৰ্মাণ কৰা হৈছে। প্ৰধানমন্ত্ৰীয়ে প্ৰকল্পটোৰ দ্বিতীয় পৰ্যায়ত ধুবুৰী, নলবাৰী, গোৱালপাৰা, নগাঁও, শিৱসাগৰ, তিনিচুকীয়া আৰু গোলাঘাটত নিৰ্মাণ হ'বলগীয়া সাতখন নতুন কৰ্কট চিকিৎসালয়ৰ আধাৰশিলাও স্থাপন কৰিব।
