১২ ফেব্ৰুৱাৰী ২০১৯ তাৰিখে প্ৰধানমন্ত্ৰী শ্ৰী নৰেন্দ্ৰ মোদীয়ে হাৰিয়ানাৰ কুৰুক্ষেত্ৰ ভ্ৰমণ কৰিব৷ তাতে তেওঁ স্বচ্ছ শক্তি–২০১৯ত অংশগ্ৰহণ কৰিব৷ তাৰোপৰি তেওঁ হাৰিয়ানাত বিভিন্ন উন্নয়নমূলক প্ৰকল্পও মুকলি কৰিব৷
স্বচ্ছ শক্তি ২০১৯
প্ৰধানমন্ত্ৰীয়ে স্বচ্ছ শক্তি ২০১৯ত অংশগ্ৰহণ কৰি স্বচ্ছ শক্তি–২০১৯ বঁটা বিতৰণ কৰিব৷ কুৰুক্ষেত্ৰত অনুষ্ঠিত স্বচ্ছ সুন্দৰ শৌচালয়ৰ প্ৰদৰ্শনীত অংশগ্ৰহণ কৰাৰ পিছত তেওঁ জনতাক সম্বোধি ভাষণ প্ৰদান কৰিব৷
স্বচ্ছ শক্তি ২০১৯ত সমগ্ৰ দেশৰ পঞ্চায়তৰ মহিলা নেত্ৰীসকলে অংশগ্ৰহণ কৰিব৷ এই বৰ্ষত প্ৰায় ১৫,০০০ গৰাকী মহিলাই অংশগ্ৰহণ কৰাৰ সম্ভাৱনা আছে৷ এই অনুষ্ঠানৰ জৰিয়তে মহিলা সৱলীকৰণত গুৰুত্ব প্ৰদান কৰা হৈছে৷
উল্লেখ্য, স্বচ্ছ শক্তি কাৰ্যসূচীৰ প্ৰথম সংস্কৰণ গুজৰাটৰ গান্ধীনগৰত প্ৰধানমন্ত্ৰী নৰেন্দ্ৰ মোদীয়ে আন্তৰ্জাতিক মহিলা দিৱস উপলক্ষে মুকলি কৰিছিল৷ দ্বিতীয় সংস্কৰণ ২০১৮ চনত লক্ষ্ণৌত মুকলি কৰা হৈছিল৷ আৰু তৃতীয়টো সংস্কৰণ কুৰুক্ষেত্ৰত মুকলি কৰা হ’ব৷
উন্নয়নমূলক প্ৰকল্পসমূহ
ঝাঝৰৰ ভাড়চাৰ ৰাষ্ট্ৰীয় কৰ্কট প্ৰতিষ্ঠান ৰাষ্ট্ৰলৈ বুলি উচৰ্গা
৭০০খন বিচনাযুক্ত এই ৰাষ্ট্ৰীয় কৰ্কট প্ৰতিষ্ঠান ঝাঝৰৰ এইমছৰ প্ৰাংগনত নিৰ্মাণ কৰা হৈছে৷ ইয়াত ছাৰ্জিকেল অংকল’জি, ৰেডিয়েচন অংকল’জি, মেডিকেল অংকল’জি, এনাচথেচিয়া, পেলিভেটিভ কেয়াৰ আৰু নিউক্লিয়াৰ মেডিচিনৰ সুবিধা প্ৰদান কৰাৰ উপৰিও চিকিৎসক আৰু ৰোগীৰ সহযোগীৰ বাবে হোষ্টেলৰো ব্যৱস্থা কৰা হৈছে৷ এই প্ৰতিষ্ঠান দেশৰ কৰ্কট ৰোগৰ সকলো ধৰণৰ কাৰ্যকলাপৰ এক কেন্দ্ৰীয় স্থান হিচাপে পৰিগণিত হ’ব আৰু দেশৰ বিভিন্ন কৰ্কট প্ৰতিষ্ঠানৰ সৈতে সংযোজিত হ’ব৷ ভাৰতৰ কৰ্কট ৰোগৰ প্ৰিমিয়াৰ প্ৰতিষ্ঠান হিচাপে এনচিআইয়ে মলেকুলাৰ বায়’লজী, জিন’মিকছ, প্ৰ’টিঅ’মিকছ, কেন্সাৰ এপিডেমিঅ’ল’জি, ৰেডিয়েচন বায়’লজী আৰু কেন্সাৰ ভেকচিনৰ বাবে গৱেষণা তথা বিকাশৰ ক্ষেত্ৰসমূহ চিনাক্ত কৰাত অগ্ৰাধিকাৰ লাভ কৰিব৷
ফৰিদাবাদৰ ইএছআইচি চিকিৎসা মহাবিদ্যালয় আৰু চিকিৎসালয়ৰ মুকলি
ই উত্তৰ ভাৰতৰ প্ৰথমখন ইএছআইচি চিকিৎসা মহাবিদ্যালয় আৰু চিকিৎসালয় হিচাপে পৰিচিত হ’ব৷ ৫১০খন বিচনাযুক্ত এই চিকিৎসালয়খনে বীমাকৃত ব্যক্তিক সামাজিক নিৰাপত্তা প্ৰদান কৰিব৷
পঞ্চকুলাৰ আয়ুৰ্বেদৰ ৰাষ্ট্ৰীয় প্ৰতিষ্ঠানৰ আধাৰশিলা স্থাপন
পঞ্চকুলাৰ আয়ুৰ্বেদ ৰাষ্ট্ৰীয় প্ৰতিষ্ঠান পঞ্চকুলাৰ শ্ৰী মাতা মনসা দেৱী মন্দিৰৰ প্ৰাংগনত স্থাপন কৰা হৈছে৷ ই আয়ুৰ্বেদিক চিকিৎসা, শিক্ষা আৰু গৱেষণাৰ এক ৰাষ্ট্ৰীয় পৰ্যায়ৰ প্ৰতিষ্ঠান হিচাপে পৰিগণিত হ’ব৷ এবাৰ সম্পূৰ্ণ হোৱাৰ পিছত ই হাৰিয়ানা তথা নিকটৱৰ্তী ৰাজ্যসমূহক উপকৃত কৰিব৷
কুৰুক্ষেত্ৰত শ্ৰী কৃষ্ণ আয়ুস বিশ্ববিদ্যালয়ৰ আধাৰশিলা স্থাপন
শ্ৰী কৃষ্ণ আয়ুস বিশ্ববিদ্যালয় ভাৰতীয় পৰম্পৰাগত চিকিৎসাৰ শিক্ষা প্ৰদান কৰা প্ৰথমখন বিশ্ববিদ্যালয় হিচাপে পৰিগণিত হ’ব৷
পাণিপথত ‘পাণিপথ যুদ্ধৰ সংগ্ৰহালয়’ৰ আধাৰশিলা স্থাপন
এই সংগ্ৰহালয়টোৰ জৰিয়তে পাণিপথৰ যোদ্ধাসকলক সন্মান প্ৰদৰ্শন কৰা হ’ব৷ এই সংগ্ৰহালয়টো কেন্দ্ৰীয় চৰকাৰৰ ভাৰতৰ অজানা নায়কসকলৰ প্ৰতি শ্ৰদ্ধা নিবেদন এক পদক্ষেপ হিচাপে বিবেচিত হ’ব৷
কাৰ্ণালত স্বাস্থ্য বিজ্ঞানৰ পণ্ডিত দীন দয়াল উপাধ্যায় বিশ্ববিদ্যালয়ৰ আধাৰশিলা স্থাপন
প্ৰধানমন্ত্ৰীয়ে কাৰ্ণালত স্বাস্থ্য বিজ্ঞানৰ পণ্ডিত দীন দয়াল উপাধ্যায় বিশ্ববিদ্যালয়ৰ আধাৰশিলা স্থাপন কৰিব৷
এই প্ৰকল্পসমূহৰ জৰিয়তে হাৰিয়ানাৰ শিক্ষা, স্বাস্থ্য আৰু সাংস্কৃতিক দিশ বিকশিত হ’ব বুলি আশা প্ৰকাশ কৰা হৈছে৷
