প্ৰধানমন্ত্ৰী শ্ৰী নৰেন্দ্ৰ মোদীয়ে সংসদৰ চলিত অধিৱেশনক গুৰুত্বপূৰ্ণ বুলি অভিহিত কৰি কয় যে এই অধিৱেশনখন ৰাজ্যসভাৰ ২৫০তম অধিৱেশন হোৱাৰ লগতে ভাৰতীয় সংবিধানেও ৭০তম বৰ্ষত উপনীত হৈছে৷
প্ৰধানমন্ত্ৰীয়ে আজি সংসদৰ শীতকালীন অধিৱেশন আৰম্ভ হোৱাৰ পূৰ্বে সংবাদ মাধ্যমৰ সন্মুখত বক্তব্য প্ৰদান কৰে৷
ভাৰতক উন্নতিৰ পথত আগুৱাই নিয়াত ৰাজ্যসভাৰ গুৰুত্বপূৰ্ণ অৱদান সম্পৰ্কে প্ৰধানমন্ত্ৰীয়ে আলোকপাত কৰে৷
তেওঁ কয়, ‘‘বন্ধুসকল, এয়া ২০১৯ বৰ্ষৰ অন্তিমটো সংসদৰ অধিৱেশন আৰু ৰাজ্যসভাৰ ২৫০তম অধিৱেশন হিচাপেও গুৰুত্বপূৰ্ণ যিয়ে ভাৰতৰ উন্নতিত উল্লেখযোগ্য অৱদান আগবঢ়াইছে৷’’
২৬ নৱেম্বৰৰ দিনা ভাৰতে ৭০তম সংবিধান দিৱস পালন কৰিব৷ ১৯৪৯ চনৰ ২৬ নৱেম্বৰৰ দিনা ভাৰতীয় সংবিধান গ্ৰহণ কৰা হৈছিল৷
প্ৰধানমন্ত্ৰীয়ে কয় যে সংবিধানে ভাৰতৰ ঐক্যতা, সংহতি আৰু বৈচিত্ৰতাৰ মতবাদ দাঙি ধৰিছে৷
‘’২৬ নৱেম্বৰৰ দিনা আমি ৭০তম সংবিধান দিৱস পালন কৰাৰ পৰিপ্ৰেক্ষিতত দেশে সংবিধান গ্ৰহণৰ ৭০ বৰ্ষ অতিক্ৰম কৰিলে৷ এই সংবিধানে ভাৰতৰ ঐক্যতা, সংহতি আৰু বৈচিত্ৰতাৰ মতবাদ দাঙি ধৰিছে৷ ইয়াতেই ভাৰতৰ সৌন্দৰ্য সমাহিত হৈছে৷ আৰু ইয়েই হ’ল ভাৰতৰ চালন শক্তি৷ সংসদৰ এই অধিৱেশনৰ জৰিয়তে জনসাধাৰণে আমাৰ সংবিধানৰ ৭০তম বৰ্ষৰ বিষয়ে অৱগত হোৱা উচিত৷’’
প্ৰধানমন্ত্ৰীয়ে সাংসদসকলত পূৰ্বৰ অধিৱেশনসমূহৰ দৰে এইবাৰৰ অধিৱেশনতো সক্ৰিয়ভাৱে বিভিন্ন আলোচনাত অংশগ্ৰহণ কৰিবলৈ আহ্বান জনায় যাতে এই আলোচনাৰ ফলাফলৰ দ্বাৰা দেশ উপকৃত হয়৷
‘‘যোৱা কেইটামান দিনত আমি প্ৰায় সকলো দলৰ বিভিন্ন নেতাৰ সৈতে সাক্ষাৎ কৰাৰ সুবিধা লাভ কৰিছো৷ নতুন চৰকাৰ গঠন হোৱাৰ ঠিক পিছতে অনুষ্ঠিত হোৱা এই অধিৱেশনতো পূৰ্বৰ অধিৱেশনসমূহৰ দৰে সাংসদসকলৰ সক্ৰিয় অংশগ্ৰহণ হোৱাটো আৱশ্যক৷ শেষৰ অধিৱেশনটোত অতিশয় সফল আছিল৷ মই সগৌৰৱে ৰাজহুৱাভাৱে ঘোষণা কৰিব পাৰো যে এই সাফল্য কোনো চৰকাৰ অথবা ট্ৰেজাৰী বেঞ্চৰ নহয় বৰঞ্চ সমগ্ৰ সংসদৰে হয়; সকলো সদস্যই এই কৃতিত্বৰ অধিকাৰী৷
মই পুনৰবাৰ সকলো সাংসদক তেওঁলোকৰ সক্ৰিয় অংশগ্ৰহণৰ বাবে কৃতজ্ঞতা প্ৰকাশ কৰিছো আৰু আশা প্ৰকাশ কৰিছো যাতে এই অধিৱেশনে যাতে দেশৰ উন্নতিৰ কৰ্মসমূহ পুনৰুজ্জীৱিত কৰে৷
আমি সকলো বিষয় আলোচনা কৰিবলৈ বিচাৰিছো আৰু দেশৰ কল্যাণ তথা উন্নতিৰ বাবে এই আলোচনা অতিশয় প্ৰয়োজনীয়৷
মই সকলো সদস্যকে শুভেচ্ছা জনাইছো৷’’
