প্ৰধানমন্ত্ৰী শ্ৰী নৰেন্দ্ৰ মোদীয়ে আজি ভিডিঅ’ কনফাৰেন্সযোগে বাৰাণসীত ক’ভিডৰ ভেকচিন গ্ৰহণ কৰা হিতাধিকাৰীসকলৰ সৈতে বাৰ্তালাপ কৰে৷
প্ৰধানমন্ত্ৰীয়ে বাৰাণসীৰ জনসাধাৰণ, এই কাৰ্যসূচীৰ সৈতে জড়িত চিকিৎসকসমূহ, স্বাস্থ্য কৰ্মী, পেৰা মেডিকেল কৰ্মী, চিকিৎসালয়ৰ অনাময় কৰ্মী আৰু ক’ৰোনাৰ প্ৰতিষেধকৰ সৈতে জড়িত আটাইবোৰ ব্যক্তিলৈ শুভেচ্ছা জ্ঞাপন কৰে৷ ক’ভিডৰ ফলত তেওঁ জনসাধাৰণৰ কাষত থাকিব নোৱাৰাৰ বাবে দুখ প্ৰকাশ কৰে৷ তেওঁ কয় যে আজি বিশ্বৰ সবাতোকৈ বৃহৎ টীকাকৰণ কাৰ্যসূচী অনুষ্ঠিত হৈছে৷ তেওঁ কয় যে প্ৰথম দুটা পৰ্যায়ত ৩০ কোটি লোকক টীকাকৰণ প্ৰদান কৰা হ’ব৷ দেশৰ নিজৰ প্ৰতিষেধক নিজে প্ৰস্তুত কৰিব পৰা ইচ্ছাশক্তি আছে বুলি তেওঁ প্ৰকাশ কৰে৷ আজি দেশৰ সৰ্বত্ৰ ক্ষীপ্ৰ গতিত প্ৰতিষেধক যোগানৰ কাম চলিবলৈ ধৰিছে৷ আজি ভাৰত স্ব-নিৰ্ভৰশীল হৈ উঠাৰ উপৰিও অন্য দেশলৈও সহায়ৰ হাত আগবঢ়াবলৈ সমৰ্থ হৈছে৷
প্ৰধানমন্ত্ৰীয়ে কয় যে বিগত ছটা বৰ্ষত বাৰাণসী আৰু ইয়াৰ নিকটৱৰ্তী অঞ্চলসমূহত চিকিৎসাৰ আন্তঃগাঁথনি যথেষ্ট পৰিমাণে পৰিৱৰ্তিত হৈছে৷ ইয়াৰ ফলত সমগ্ৰ পূৰ্বাঞ্চল ক’ৰোনাৰ সময়ত উপকৃত হৈছে৷ তেওঁ কয় যে বাৰাণসীত ২০ হাজাৰতকৈও অধিক স্বাস্থ্য কৰ্মীক টীকা প্ৰদান কৰা হ’ব৷ ইয়াৰ বাবে ১৫টা প্ৰতিষেধক কেন্দ্ৰ স্থাপন কৰা হৈছে৷ এই সন্দৰ্ভত তেওঁ উত্তৰ প্ৰদেশৰ মুখ্যমন্ত্ৰী আৰু তেওঁৰ দলটোক প্ৰশংসা কৰে৷
তেওঁ কয় যে আজিৰ টীকাকৰণ অনুষ্ঠানটোত জনসাধাৰণে কিবা সমস্যাৰ সন্মুখীন হৈছে নেকি সেয়া জানিবলৈ এই বাৰ্তালাপৰ আয়োজন কৰা হৈছে৷ তেওঁ টীকাকৰণ কাৰ্যসূচীৰ সৈতে জড়িত লোকসকলৰ সৈতেও বাৰ্তালাপ কৰে৷ বাৰাণসীৰ জনসাধাৰণে প্ৰকাশ কৰা প্ৰতিক্ৰিয়াৰ দ্বাৰা সমগ্ৰ দেশ উপকৃত হ’ব বুলি তেওঁ আশা প্ৰকাশ কৰে৷
অনুষ্ঠানটোত প্ৰধানমন্ত্ৰীয়ে মেট্ৰ’ন, এএনএম কৰ্মী, চিকিৎসক আৰু লেব টেকনিচিয়ানসকলৰ সৈতে ভাৱ বিনিময় কৰে৷ প্ৰধানমন্ত্ৰীয়ে তেওঁলোকক দেশবাসীৰ তৰফৰ পৰা কৃতজ্ঞতা প্ৰকাশ কৰে৷ প্ৰধানমন্ত্ৰীয়ে বিজ্ঞানী তথা ক’ৰোনা যোদ্ধাসকলৰো ভূয়সী প্ৰশংসা কৰে৷
