ভূটানলৈ ৰাওনা হোৱাৰ পূৰ্বে প্ৰধানমন্ত্ৰী শ্ৰী নৰেন্দ্ৰ মোদীয়ে দিয়া প্ৰেছ বিবৃতি তলত উল্লেখ কৰা হ’ল৷
“অহা ১৭-১৯ আগষ্ট, ২০১৯ত মই ভূটান ভ্ৰমণলৈ যাম৷
চলিত কাৰ্যকালৰ আৰম্ভণিতে মোৰ ভূটান ভ্ৰমণে এইটো সূচাইছে যে চৰকাৰে আমাৰ বিশ্বাসী বন্ধু তথা প্ৰতিৱেশী ভূটানৰ সৈতে ভাৰতৰ সম্পৰ্ক অক্ষুণ্ণ ৰাখিছে৷
ভাৰত আৰু ভূটানে ব্যাপক উন্নয়ন অংশীদাৰিত্ব, পাৰস্পৰিক জলবিদ্যুৎ সহযোগিতা আৰু সুদৃঢ় বাণিজ্য আৰু অৰ্থনৈতিক যোগসূত্ৰৰ মাধ্যমেৰে উৎকৃষ্ট ৰূপত দ্বিপাক্ষিক সম্পৰ্ক বৰ্তাই ৰাখিছে৷
মিলিত আধ্যাত্মিক ঐতিহ্য আৰু দুয়োখন দেশৰ লোকসকলৰ মাজত অটুত থকা সম্পৰ্কই ইয়াক আৰু অধিক সুদৃঢ় কৰিছে৷
যোৱা বছৰ দুয়োখন দেশে আনুষ্ঠানিক কূটনৈতিক সম্পৰ্ক স্থাপনৰ সোণালী জয়ন্তী যুটীয়াভাৱে উদযাপন কৰে৷
ভাৰত ভূটান অংশীদাৰিত্বই বৰ্তমান এক বিশেষ চৰিত্ৰ আৰু বিষয় হোৱাৰ লগতে ভাৰত চৰকাৰৰ ‘প্ৰতিৱেশী প্ৰথম’ নীতিৰো এক গুৰুত্বপূৰ্ণ স্তম্ভ হৈ পৰিছে৷
ভ্ৰমণকালত মই মহামহিম ৰজা চতুৰ্থ দ্ৰুক গিয়ালপ’ আৰু ভূটানৰ প্ৰধানমন্ত্ৰীৰ সৈতে আমাৰ দ্বিপাক্ষিক সম্পৰ্কৰ সন্দৰ্ভত বিস্তাৰিত তথা ফলপ্ৰসূ আলোচনাত মিলিত হ’ম৷ মই ভূটানৰ সন্মানীয় ৰয়েল বিশ্ববিদ্যালয়ত একাংশ তৰুণ ভূটানী শিক্ষাৰ্থীক উদ্দেশ্যি ভাষণো আগবঢ়াম৷
মোৰ বিশ্বাস মোৰ এই ভ্ৰমণে ভূটানৰ সৈতে আমাৰ সময়-পৰীক্ষণ আৰু মূল্যবান বন্ধুত্বৰ লগতে দুয়োখন দেশৰ জনসাধাৰণৰ সমৃদ্ধিশালী ভৱিষ্যৎ তথা প্ৰগতিক আৰু অধিক আগুৱাই নিব৷”
