ଭୁଟାନ ଗସ୍ତ ପୂର୍ବରୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ପ୍ରସ୍ଥାନ ବିବୃତ୍ତି ନିମ୍ନରେ ଦିଆଗଲା ।
“ମୁଁ 17-18 ଅଗଷ୍ଟ 2019ରେ ଭୁଟାନକୁ ସରକାରୀ ଗସ୍ତରେ ଯିବି ।
ନୂଆ ସରକାରଙ୍କ କାର୍ଯ୍ୟକାଳର ପ୍ରାରମ୍ଭିକ ଭାଗରେ ଭୁଟାନକୁ ମୋର ଗସ୍ତ ଆମର ବିଶ୍ୱସ୍ତ ସହଯୋଗୀ ତଥା ପଡୋଶୀ ଭୁଟାନ ସହ ଭାରତର ସମ୍ପର୍କ ପ୍ରତି ସରକାରଙ୍କ ବିଶେଷ ଗୁରୁତ୍ୱକୁ ପ୍ରତିଫଳିତ କରୁଛି ।
ଭାରତ ଏବଂ ଭୁଟାନ ମଧ୍ୟରେ ଚମତ୍କାର ଦ୍ୱିପାକ୍ଷିକ ସମ୍ପର୍କ ରହିଛି । ଆମର ବିସ୍ତୃତ ବିକାଶ ସହଭାଗୀତା, ଆପୋସ ଲାଭକାରୀ ଜଳବିଦ୍ୟୁତ ସହଯୋଗ ଏବଂ ଦୃଢ଼ ବାଣିଜ୍ୟ ଓ ଅର୍ଥନୈତିକ ସମ୍ପର୍କ ଯୋଗୁଁ ସମ୍ଭବ ହୋଇପାରିଛି । ଏସବୁ ଆମର ସହଭାଗୀ ଆଧ୍ୟାତ୍ମିକ ଐତିହ୍ୟ ଏବଂ ମଜବୁତ ଲୋକ ସମ୍ପର୍କ କାରଣରୁ ଆହୁରି ସୁଦୃଢ଼ ହୋଇଛି ।
ଗତବର୍ଷ ଔପଚାରିକ କୂଟନୈତିକ ସମ୍ପର୍କର ସୁବର୍ଣ୍ଣ ଜୟନ୍ତୀ ସମାରୋହକୁ ଦୁଇଦେଶ ମିଳିତ ଭାବେ ପାଳନ କରିଥିଲେ ।
ଆଜି ଏକ ସ୍ୱତନ୍ତ୍ର ପରିଚୟ ଓ ଉପାଦାନ ହାସଲ କରିଥିବା ଭାରତ-ଭୁଟାନ ଭାଗିଦାରୀ ଭାରତ ସରକାରଙ୍କ “ପଡୋଶୀ ପ୍ରଥମ ନୀତି”ର ଗୁରୁତ୍ୱପୂର୍ଣ୍ଣ ଆଧାର ହୋଇଛି ।
ଭୁଟାନର ମହାମହିମ ରାଜା, ମହାମହିମ ଚତୁର୍ଥ ଡ୍ରୁକ ଗ୍ୟାଲପୋ ଏବଂ ପ୍ରଧାନମନ୍ତ୍ରୀଙ୍କ ସହ ଆମ ଦ୍ୱିପାକ୍ଷିକ ସମ୍ପର୍କର ବ୍ୟାପକ ଦିଗରେ ଫଳପ୍ରଦ ଆଲୋଚନା କରିବା ଲାଗି ମୁଁ ଆଗ୍ରହୀ ଅଛି । ଭୁଟାନର ସମ୍ମାନଜନକ ରୟାଲ ବିଶ୍ୱବିଦ୍ୟାଳୟରେ ଯୁବ ଭୁଟାନୀ ଛାତ୍ରଛାତ୍ରୀଙ୍କୁ ଉଦ୍ବୋଧନ ଦେବା ଲାଗି ମଧ୍ୟ ମୁଁ ଆଗ୍ରହୀ ।
ମୋର ବିଶ୍ୱାସ ଯେ, ଏହି ଗସ୍ତ ଭୁଟାନ ସହିତ ଆମର ସମୟୋଚିତ ଓ ମୂଲ୍ୟବାନ ବନ୍ଧୁତାକୁ ପ୍ରୋତ୍ସାହିତ କରିବ ଏବଂ ଉଭୟ ରାଷ୍ଟ୍ରର ଲୋକମାନଙ୍କ ସମୃଦ୍ଧ ଭବିଷ୍ୟତ ଓ ପ୍ରଗତିକୁ ଆହୁରି ଆଗେଇନେବ” ।
