ବନ୍ଧୁଗଣ,
ଆପଣମାନଙ୍କ ସହିତ କଥା ହୋଇ ମତେ ବହୁତ ଖୁସି ଲାଗିଲା। ଆଜି ଆମ ସହିତ ମୋର କେନ୍ଦ୍ର କ୍ୟାବିନେଟ୍ ସହଯୋଗୀ ମନସୁଖ ମାଣ୍ଡଭୀୟ, ମନ୍ତ୍ରୀ ରକ୍ଷା ଖଡ଼ସେ ଏବଂ ସାରା ଦେଶରୁ ଯୋଡ଼ି ହୋଇଥିବା ସମସ୍ତ ଯୁବ ସାଥୀ ଉପସ୍ଥିତ ଅଛନ୍ତି!
ଆଜିର ଏହି କାର୍ଯ୍ୟକ୍ରମ ଅତ୍ୟନ୍ତ ସ୍ୱତନ୍ତ୍ର। ଦେଶର ପ୍ରାୟ ୨୫୦ଟି ଜିଲ୍ଲାର ଯୁବ ସାଥୀମାନେ ଏହି କାର୍ଯ୍ୟକ୍ରମ ସହ ଯୋଡ଼ି ହୋଇଛନ୍ତି। ମୁଁ ଆପଣମାନଙ୍କ ସମସ୍ତଙ୍କୁ ଅଭିନନ୍ଦନ ଜଣାଉଛି।
ବନ୍ଧୁଗଣ,
କିଛି ବର୍ଷ ପୂର୍ବେ, ଆମେ "ମେରା ଯୁବା ଭାରତ -ମାଈ ଭାରତ" ପ୍ଲାଟଫର୍ମ ସୃଷ୍ଟି କରିଥିଲୁ। ଆଜି ଏହା ସହ ଦେଶର କୋଟି କୋଟି ଯୁବ ଯୋଡ଼ି ହୋଇଛନ୍ତି ଏବଂ ସମଗ୍ର ଦେଶରେ ମାଇ ଭାରତର ଯୁବ ସାଥୀମାନେ ଅତ୍ୟନ୍ତ ପ୍ରଶଂସନୀୟ କାର୍ଯ୍ୟ କରୁଛନ୍ତି। 'ବିକଶିତ ଭାରତ ଡାଏଲଗ୍' ଠାରୁ ଆରମ୍ଭ କରି 'ବିକଶିତ ଭାଇବ୍ରାଣ୍ଟ ଭିଲେଜ୍ କାର୍ଯ୍ୟକ୍ରମ' ପର୍ଯ୍ୟନ୍ତ ଆପଣମାନେ ନିଜର ସାମର୍ଥ୍ୟର ଉତ୍କୃଷ୍ଟ ପ୍ରଦର୍ଶନ କରିଛନ୍ତି।
ବନ୍ଧୁଗଣ,
'ବିକଶିତ ଭାରତ ଯଙ୍ଗ ଲିଡର୍ସ ଡାଏଲଗ୍' ସମୟରେ ମୁଁ ଯୁବପିଢ଼ିଙ୍କୁ ସମ୍ମୁଖରେ ଏକ ଚିନ୍ତାଧାରା ରଖିଥିଲି। ସେହି ଚିନ୍ତାଧାରା ଏହା ଥିଲା ଯେ ଯୁବ ସାଥୀମାନେ କେବଳ ଭର୍ଚୁଆଲ୍ ମାଧ୍ୟମରେ ଭାରତକୁ ଜାଣିବା ପରିବର୍ତ୍ତେ ପ୍ରକୃତ କ୍ଷେତ୍ରକୁ ଯାଇ ଭାରତକୁ ବୁଝିବା, ଭାରତ ସହ ଯୋଡ଼ି ହେବା ,ଭାରତକୁ ନିଜ ଜୀବନରେ ଅନୁଭବ କରିବା ଏବଂ ଭାରତକୁ ବୁଝିବାର ପ୍ରୟାସ କରିବେ । ଭାରତର ଗ୍ରାମଗୁଡ଼ିକରେ ବିକାଶ ପାଇଁ କେତେ ଆକାଙ୍କ୍ଷା ରହିଛି, ତାହା ସେଠାକୁ ଗଲେ ହିଁ ପ୍ରକୃତରେ ଜଣାପଡ଼େ। କେବେ କେବେ ତ ଏପରି ଲାଗେ ଯେ, ସେମାନଙ୍କ ପାଇଁ ନିଜଠାରୁ ମଧ୍ୟ ଦେଶ ବଡ଼। ପ୍ରଥମେ ଦେଶ, ତା’ପରେ ଅନ୍ୟ ସମସ୍ତ ସୁବିଧା ।ଏହି ଭାବନା ସୀମାନ୍ତ ଗ୍ରାମଗୁଡ଼ିକରେ ଆମେ ବିଶେଷ ଭାବେ ଅନୁଭବ କରିଥାଉ। ସେଥିପାଇଁ ଆମର ଉଦ୍ଦେଶ୍ୟ ଥିଲା ଯେ, ଦେଶର ବିଭିନ୍ନ ଜିଲ୍ଲାର ଯୁବ ସାଥୀମାନେ ହିମାଚଳ ପ୍ରଦେଶ, ଉତ୍ତରାଖଣ୍ଡ ଏବଂ ଲଦାଖର ଗ୍ରାମଗୁଡ଼ିକୁ ଭ୍ରମଣ କରନ୍ତୁ। ସେଠାର ଲୋକମାନେ କିପରି ଜୀବନଯାପନ କରନ୍ତି? ସେମାନଙ୍କର ଖାଦ୍ୟପାନୀୟ କିପରି? ସେମାନଙ୍କର କାର୍ଯ୍ୟକଳାପ, ସଂସ୍କୃତି ଏବଂ ଜୀବନଶୈଳୀ କିପରି? ସେମାନେ କେଉଁ କେଉଁ ଚ୍ୟାଲେଞ୍ଜର ସମ୍ମୁଖୀନ ହୁଅନ୍ତି? ଦେଶର ପ୍ରଥମ ଗ୍ରାମରେ ବସବାସ କରୁଥିବା ଲୋକମାନେ ଦେଶର ସୁରକ୍ଷା ପ୍ରତି କେତେ ସଚେତନ? ଦେଶର ଅନ୍ୟାନ୍ୟ ଅଞ୍ଚଳ ସହ ସେମାନଙ୍କର କେତେ ଆତ୍ମୀୟତା ଓ ନିକଟତା ରହିଛି? ଏସବୁ ବିଷୟର ଅନୁଭବ ମୋ ଦେଶର ଯୁବମାନଙ୍କୁ ମିଳୁ,ଏହା ହିଁ ଆମର ଉଦ୍ଦେଶ୍ୟ ଥିଲା। ସମଗ୍ର ଦେଶର ଯୁବମାନଙ୍କ ମଧ୍ୟରେ ଯେଉଁ ଉତ୍ସାହ ଦେଖିବାକୁ ମିଳିଲା, ତାହା ଅଦ୍ଭୁତ ଥିଲା। ପ୍ରାୟ ୩ ଲକ୍ଷ ଯୁବ ଏହି ପ୍ରତିଯୋଗିତାରେ ଅଂଶଗ୍ରହଣ କରିଥିଲେ ଏବଂ ସେମାନଙ୍କ ମଧ୍ୟରୁ ୪୦୦ରୁ ଅଧିକ ଯୁବଙ୍କୁ ଚୟନ କରାଯାଇଥିଲା। ଆପଣମାନେ ଏହି ଦୁର୍ଗମ ଗ୍ରାମଗୁଡ଼ିକରେ ଏକ ସପ୍ତାହ ଧରି ରହିଥିଲେ। ସେହି ସ୍ଥାନଗୁଡ଼ିକ ଆପଣମାନଙ୍କ ପାଇଁ ସମ୍ପୂର୍ଣ୍ଣ ଅପରିଚିତ ଥିଲା। ଆପଣମାନେ ସେଠାର ଜୀବନକୁ ନିକଟରୁ ଅନୁଭବ କରିବାର ପ୍ରୟାସ କରିଥିଲେ। ସେଠାକାର ଲୋକମାନଙ୍କ ସହ ମିଶିମିଶି ରହିଥିଲେ। ନିଜ ସଂସ୍କୃତିକୁ ସେଠାର ସଂସ୍କୃତି ସହ ଯୋଡ଼ି ଏକ ଆତ୍ମୀୟ ସମ୍ପର୍କ ସ୍ଥାପନ କରିଥିଲେ। ‘ଏକ ଭାରତ, ଶ୍ରେଷ୍ଠ ଭାରତ’ର ଏହାଠାରୁ ଉତ୍ତମ ଉଦାହରଣ ସମ୍ଭବତଃ ଆଉ କିଛି ହୋଇପାରେ ନାହିଁ।
ବନ୍ଧୁଗଣ,
ଆଜିର ଏହି କାର୍ଯ୍ୟକ୍ରମ ମୋ ପାଇଁ ଅତ୍ୟନ୍ତ ବିଶେଷ। କାରଣ, ସରକାର ଓ ରାଜନୀତିରେ ସକ୍ରିୟ ହେବା ପୂର୍ବରୁ ମୋତେ ଅନେକ ଥର ଏପରି ସୀମାନ୍ତ ଗ୍ରାମଗୁଡ଼ିକୁ ଯିବାର ସୁଯୋଗ ମିଳିଥିଲା। ସେଠାକାର ଲୋକମାନଙ୍କ ସହିତ ମୋର ଘନିଷ୍ଠ ପରିଚୟ ଥିଲା ଏବଂ ଅନେକ ଗ୍ରାମ ସହିତ ମୋର ସମ୍ପର୍କ ଦୀର୍ଘ ସମୟ ଧରି ଅବ୍ୟାହତ ରହିଥିଲା। ସରକାରରେ ଆସିବା ପରେ ମଧ୍ୟ ଯେତେବେଳେ ସୁଯୋଗ ମିଳେ, ମୁଁ ସୀମାନ୍ତ ଗ୍ରାମଗୁଡ଼ିକୁ ଯିବାର ସୁଯୋଗକୁ କେବେ ହାତଛଡ଼ା କରେ ନାହିଁ।ଆପଣମାନେ ସମସ୍ତେ ଜାଣିଛନ୍ତି ଯେ, ଦୀପାବଳି ପର୍ବକୁ ମୁଁ ସୀମାରେ ମୋ ଦେଶର ସୁରକ୍ଷାରେ ନିୟୋଜିତ ଆମର ବୀର ସୈନିକମାନଙ୍କ ସହିତ ପାଳନ କରେ। ଗତ ୨୫ ବର୍ଷ ଧରି ଏହି ପରମ୍ପରା ନିରନ୍ତର ଚାଲିଆସୁଛି।ଏହି ଯାତ୍ରାରେ ସାମିଲ ହୋଇଥିବା ଯେଉଁ ସାଥୀମାନଙ୍କ ସହିତ ମୋର କଥା ହୋଇଛି, ସେମାନଙ୍କ ମଧ୍ୟରୁ ଅନେକେ ଏପରି ଗ୍ରାମକୁ ଅଛି , ଯେଉଁଠାକୁ ମୁଁ ପୂର୍ବରୁ ଯାଇସାରିଛି। ଆପଣମାନେ ସେହି ସ୍ଥାନଗୁଡ଼ିକର ବର୍ଣ୍ଣନା କରୁଥିବା ବେଳେ, ମୋର ସେହି ପୁରୁଣା ସ୍ମୃତିଗୁଡ଼ିକ ପୁଣିଥରେ ଆଖି ଆଗରେ ଜୀବନ୍ତ ହୋଇଉଠୁଥିଲା।
ବିକଶିତ ଗ୍ରାମଗୁଡ଼ିକ ଏକ ବିକଶିତ ଭାରତର ମୂଳଦୁଆ। ଏକ ବିକଶିତ ଭାରତ ନିର୍ମାଣ ପାଇଁ ଯାତ୍ରା ଚାଲିଛି, ଏବଂ ଏଥିରେ ଆପଣମାନଙ୍କ ସମସ୍ତ ଯୁବ ବନ୍ଧୁମାନଙ୍କର ପ୍ରମୁଖ ଭୂମିକା ରହିଛି। ତେଣୁ, ଯେତେବେଳେ ଦେଶର ଯୁବକମାନେ ଭୂମି ସହିତ ଯୋଡ଼ି ହୁଅନ୍ତି, ଏହା ଏକ ବିକଶିତ ଭାରତର ଦୃଷ୍ଟିକୋଣକୁ ବିସ୍ତାର କରେ। ଏହା ଯୁବ ମନରେ ଦେଶ ପାଇଁ ବଞ୍ଚିବା ଏବଂ ଏଥିପାଇଁ କିଛି କରିବା ପାଇଁ ସଂକଳ୍ପକୁ ଦୃଢ଼ କରେ। ମୋ ଭଳି ଆପଣମାନଙ୍କର ମଧ୍ୟ ଅଭିଜ୍ଞତା ଅତ୍ୟନ୍ତ ଚମତ୍କାର ରହିଛି। କେହି ଉଚ୍ଚ ପର୍ବତଶ୍ରେଣୀର ରୋମାଞ୍ଚକର ଅନୁଭୂତି ବିଷୟରେ କହିଛନ୍ତି। କେହି ସୀମାନ୍ତ ଗ୍ରାମର ଲୋକମାନଙ୍କ ସ୍ନେହ ଓ ଆପଣାପଣିଆ ବ୍ୟବହାରରେ ପ୍ରଭାବିତ ହୋଇଛନ୍ତି। କେହି ସେଠାକାର ଶିଶୁମାନଙ୍କର ସ୍ୱପ୍ନକୁ ନିକଟରୁ ଦେଖିଛନ୍ତି। ଆଉ କେହି ଆମ ସେନାବାହିନୀର ଅଦ୍ଭୁତ ସାହସ ଓ ଅନୁଶାସନର ପ୍ରତ୍ୟକ୍ଷ ସାକ୍ଷୀ ହୋଇଛନ୍ତି।ଅର୍ଥାତ୍,‘ବିକଶିତ ଭାଇବ୍ରାଣ୍ଟ ଭିଲେଜ୍’ର ଏହି ସମ୍ପୂର୍ଣ୍ଣ ଅନୁଭୂତି ଅତ୍ୟନ୍ତ ଅଦ୍ଭୁତ ଓ ସ୍ମରଣୀୟ ରହିଛି। ସଂଯୋଗବଶତଃ, ଆଜି କାର୍ଗିଲ ବିଜୟ ଦିବସ ମଧ୍ୟ ପାଳନ କରାଯାଉଛି। ଆପଣମାନଙ୍କ ମଧ୍ୟରୁ ଅନେକ ସାଥୀ କାର୍ଗିଲ ଆଖପାଖ ଅଞ୍ଚଳକୁ ମଧ୍ୟ ପରିଦର୍ଶନ କରିଛନ୍ତି। ସେଠାରେ କେତେ ପ୍ରତିକୂଳ ଓ ଚ୍ୟାଲେଞ୍ଜପୂର୍ଣ୍ଣ ପରିସ୍ଥିତି ମଧ୍ୟରେ ଆମର ବୀର ଯବାନମାନେ ବିଜୟର ପତାକା ଉଡ଼ାଇଥିଲେ, ତାହାକୁ ମଧ୍ୟ ଆପଣମାନେ ପ୍ରତ୍ୟକ୍ଷ ଭାବେ ଅନୁଭବ କରିଛନ୍ତି। ଏହି କାର୍ଯ୍ୟକ୍ରମରେ ଅଂଶଗ୍ରହଣ କରି ଏପରି ଏକ ଅନନ୍ୟ ଓ ସ୍ମରଣୀୟ ଅଭିଜ୍ଞତା ହାସଲ କରିଥିବାରୁ ମୁଁ ଆପଣମାନଙ୍କୁ ହୃଦୟର ସହ ବହୁତ ବହୁତ ଅଭିନନ୍ଦନ ଜଣାଉଛି।
ବନ୍ଧୁଗଣ,
ବିକଶିତ ଗ୍ରାମ ହେଉଛି ବିକଶିତ ଭାରତର ମୂଳଦୁଆ। ବିକଶିତ ଭାରତ ନିର୍ମାଣର ଯାତ୍ରା ନିରନ୍ତର ଭାବେ ଆଗେଇ ଚାଲିଛି। ଏହି ଯାତ୍ରାରେ ଆପଣମାନଙ୍କ ଭଳି ଯୁବ ସାଥୀମାନଙ୍କର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ସେଥିପାଇଁ ଯେତେବେଳେ ଦେଶର ଯୁବଶକ୍ତି ମାଟି ସହିତ ଯୋଡ଼ି ହୁଏ, ସେତେବେଳେ ସେମାନେ ବିକଶିତ ଭାରତର ଦୃଷ୍ଟିକୋଣକୁ ଆହୁରି ବ୍ୟାପକ କରିଥାନ୍ତି। ଏହା ଯୁବମାନଙ୍କ ମନରେ ଦେଶ ପାଇଁ ବଞ୍ଚିବା ଏବଂ ଦେଶ ପାଇଁ କିଛି କରିବାର ସଂକଳ୍ପକୁ ଆହୁରି ଦୃଢ଼ କରିଥାଏ।
ବନ୍ଧୁଗଣ,
ଏହି ଅଭିଯାନରେ, ଆପଣମାନେ ନିଶ୍ଚିତ ଭାବରେ ଅନୁଭବ କରିଥିବେ ଯେ ସୀମାନ୍ତ ଗ୍ରାମଗୁଡ଼ିକରେ ଜୀବନ କେତେ କଷ୍ଟଦାୟକ ।କିନ୍ତୁ ସମସ୍ତ ପ୍ରତିକୂଳତା ସତ୍ତ୍ୱେ ମଧ୍ୟ ସୀମାନ୍ତ ଗ୍ରାମର ଲୋକମାନେ ପ୍ରତିକ୍ଷଣ ଦେଶପ୍ରେମକୁ ଜୀବନରେ ପାଳନ କରିଆସୁଛନ୍ତି। କିଛି ବର୍ଷ ପୂର୍ବରୁ, ସୀମାନ୍ତ ଗ୍ରାମଗୁଡ଼ିକୁ ଶେଷ ଗ୍ରାମ ଭାବରେ ବିବେଚନା କରାଯାଉଥିଲା ଏବଂ ସେମାନଙ୍କୁ ନିଜ ଭାଗ୍ୟ ଉପରେ ଛାଡ଼ି ଦିଆଯାଇଥିଲା। ଏହି ଗ୍ରାମଗୁଡ଼ିକରେ ରାସ୍ତା, ବିଦ୍ୟୁତ୍, ପାଣି, ସ୍କୁଲ ଏବଂ ହସ୍ପିଟାଲ ଭଳି ସମସ୍ତ ମୌଳିକ ସୁବିଧାର ଅଭାବ ଥିଲା। ଆପଣମାନେ ମଧ୍ୟ ସେଠାକାର ଲୋକଙ୍କଠାରୁ ଏପରି ଅନେକ କାହାଣୀ ଶୁଣିଥିବେ। ସେମାନେ ସେମାନଙ୍କର ଅତୀତର ଅଭିଜ୍ଞତା ବର୍ଣ୍ଣନା କରିଥିବେ, ଏବଂ ଆମେ ଗର୍ବ କରିବା ଉଚିତ ଯେ ଏପରି ପରିସ୍ଥିତିରେ ମଧ୍ୟ ସୀମାନ୍ତ ଗ୍ରାମଗୁଡ଼ିକର ଲୋକଙ୍କ ଦେଶପ୍ରେମ କେବେ ବି ଦୁର୍ବଳ ହୋଇନଥିଲା।
ସେଥିପାଇଁ, ସାଥୀଗଣ,
ଆମର ସରକାର ଏହି ସୀମାନ୍ତ ଗ୍ରାମଗୁଡ଼ିକୁ ଦେଶର ପ୍ରଥମ ଗ୍ରାମ ଭାବରେ ମାନ୍ୟତା ଦେଇଛି। ପ୍ରଥମ ଗାଁ ଯେଉଁଠାରେ ସକାଳର ପ୍ରଥମ କିରଣ ଭାରତକୁ ସ୍ୱାଗତ କରେ ଏବଂ ଶେଷ କିରଣ ଶୁଭରାତ୍ରି ସହିତ ବିଦାୟ ଦିଏ। ଏଗୁଡ଼ିକ ସେହି ସ୍ଥାନ, ଯେଉଁଠାରେ ସର୍ବପ୍ରଥମେ ତ୍ରିରଙ୍ଗା ପତାକା ପବନ ସହ ସଂଳାପ କରେ ଏବଂ ଯେଉଁଠାରୁ ବିଶ୍ୱ ପ୍ରଥମ ଥର ପାଇଁ ଭାରତକୁ ଦେଖିଥାଏ। ଏହି ଚିନ୍ତାଧାରାରେ ପରିବର୍ତ୍ତନର ଫଳସ୍ୱରୂପ ଆଜି ଆମର ସୀମାନ୍ତ ଅଞ୍ଚଳଗୁଡ଼ିକ ପରିବର୍ତ୍ତନ ହେଉଛି। ସ୍ୱାଧୀନତା ପରେ ପ୍ରଥମ ଥର ପାଇଁ ଅନେକ ଗାଁରେ ବିଦ୍ୟୁତ୍ ପହଞ୍ଚିଛି, ପ୍ରଥମ ଥର ପାଇଁ ରାସ୍ତା, ପ୍ରଥମ ଥର ପାଇଁ ନଳକୂପ ପାଣି ଏବଂ ପ୍ରଥମ ଥର ପାଇଁ ଗ୍ୟାସ୍ ମଧ୍ୟ ଉପଲବ୍ଧ ହୋଇଛି । ସହରରେ ଏସବୁ ସୁବିଧା ସାଧାରଣ ବୋଲି ମନେହୋଇପାରେ। କିନ୍ତୁ ସେଠାକାର ଲୋକମାନଙ୍କ ପାଇଁ ଏଗୁଡ଼ିକ ଜୀବନରେ ଆମୂଳଚୂଳ ପରିବର୍ତ୍ତନ ଆଣିଥିବା ସୁବିଧା । ଏହି କାରଣରୁ, ଚାଷୀ ଏବଂ ଉଦ୍ୟାନଚାଷୀମାନଙ୍କ ଜୀବନ ପରିବର୍ତ୍ତନ ହେଉଛି। ପ୍ରମୁଖ ବଜାରକୁ ଫଳ ଏବଂ ପନିପରିବା ପରିବହନ ସହଜ ହୋଇଗଲାଣି। ଉନ୍ନତ ସଂଯୋଗୀକରଣ ଯୋଗୁଁ, ଜୀବନ ଆଉ ଅଟକି ନାହିଁ; ନିରବଚ୍ଛିନ୍ନ ଭାବେ ଆଗକୁ ବଢ଼ୁଛି । ଆପଣମାନେ ଏହା ମଧ୍ୟ ଦେଖିଥିବେ ଯେ, ଆଜି ଏହି ଦୂରଦୁରାନ୍ତର ଗ୍ରାମଗୁଡ଼ିକରେ ମଧ୍ୟ ଉତ୍କୃଷ୍ଟ ଇଣ୍ଟରନେଟ୍ ସଂଯୋଗ ଉପଲବ୍ଧ ହୋଇଛି। ଆପଣମାନେ ଏହି ଅନୁଭୂତିକୁ ବହୁତ ଆନନ୍ଦର ସହ ବାଣ୍ଟିଛନ୍ତି।
ବନ୍ଧୁଗଣ,
ଏପରି ପ୍ରତ୍ୟେକ ସୁବିଧା ଆଉ ଏକ ଲାଭ ଆଣିଛି। ଏହି ଅଞ୍ଚଳଗୁଡ଼ିକରେ ପର୍ଯ୍ୟଟନ ମଧ୍ୟ ସମୃଦ୍ଧ ହେଉଛି। ଯେଉଁ ଗାଁଗୁଡ଼ିକ ଜନଶୂନ୍ୟ ହୋଇଯାଇଥିଲା ସେଗୁଡ଼ିକ ଏବେ ପୁଣି କାର୍ଯ୍ୟକଳାପରେ ଚଳଚଞ୍ଚଳ। ଝିଅମାନେ ସ୍କୁଲ ଏବଂ କଲେଜକୁ ଯାଉଛନ୍ତି । ଭଲ ଶିକ୍ଷା ଏବଂ ଭଲ ରୋଜଗାର ପାଇଁ ଏକ ପରିବେଶ ମଧ୍ୟ ସୃଷ୍ଟି ହେଉଛି। ଭାଇବ୍ରାଣ୍ଟ ଭିଲେଜ୍ କାର୍ଯ୍ୟକ୍ରମ ସୀମାନ୍ତ ଗ୍ରାମଗୁଡ଼ିକର ଏହି ବିକାଶକୁ ଆହୁରି ଗତି ପ୍ରଦାନ କରୁଛି।
ବନ୍ଧୁଗଣ,
‘ବିକଶିତ ଭାଇବ୍ରାଣ୍ଟ ଭିଲେଜ୍’ ଯାତ୍ରା ସମସ୍ତଙ୍କୁ ଯୋଡ଼ିବା ଏବଂ ସମସ୍ତଙ୍କ ସହ ଯୋଡ଼ି ହେବାର ଏକ ଶକ୍ତିଶାଳୀ ମାଧ୍ୟମ। ବର୍ତ୍ତମାନ ଆପଣମାନଙ୍କର ଦାୟିତ୍ୱ ଆହୁରି ବଢ଼ିଯାଇଛି। ଏହି ଯାତ୍ରା‘ୟୁନିଟି ଥ୍ରୁ ପାର୍ଟିସିପେସନ୍’ର ଭାବନାକୁ ସାକାର କରୁଛି।। ଭାରତର ଯୁବଶକ୍ତି ଯେତେ ଅଧିକ ସୀମାନ୍ତ ଗ୍ରାମଗୁଡ଼ିକୁ ଜାଣିବେ, ସେତେ ଅଧିକ ସହଜରେ ସେମାନେ ଭାରତକୁ ବୁଝିପାରିବେ ଏବଂ ଦେଶର ପ୍ରତ୍ୟେକ କୋଣ ସହିତ ଯୋଡ଼ି ହୋଇପାରିବେ। ଏହି ପ୍ରୟାସ ଦେଶର ଏକତାକୁ ଆହୁରି ସୁଦୃଢ଼ କରିବ। ଆପଣମାନେ ମାନେ ପକାନ୍ତୁ , ଏହି ଗ୍ରାମଗୁଡ଼ିକରେ ଆପଣମାନଙ୍କ ରହିବା ପାଇଁ କୌଣସି ଅଲଗା ଅତିଥି ଗୃହ କିମ୍ବା ହୋଟେଲ ନଥିଲା। ଏସମଗ୍ର ଗ୍ରାମ ହିଁ ଆପଣମାନଙ୍କର ଆତିଥ୍ୟର ଦାୟିତ୍ୱ ନେଇଥିଲା। କିନ୍ତୁ ଆପଣ ନିଶ୍ଚିତ ଭାବରେ ଲକ୍ଷ୍ୟ କରିଛନ୍ତି ଯେ ଗାଁରେ ଆପଣଙ୍କର ରହଣି ଯଥେଷ୍ଟ ନଥିଲା। ଆପଣଙ୍କ ପାଇଁ, ଗ୍ରାମ ଜୀବନ ସହିତ ସଂଯୋଗ କରିବାର ଏହି ଯାତ୍ରା ମଧ୍ୟ ଏକ ପ୍ରକାରର ସାଂସ୍କୃତିକ ବିଦ୍ୟାଳୟ ହୋଇଗଲା। ସେଠାରେ, ଆପଣ ସୁବିଧା ଅପେକ୍ଷା ସନ୍ତୋଷ ଏବଂ ସମ୍ମାନ ପାଇଲେ। ଆପଣମାନେ ଯେଉଁ ଅନୁଭୂତି ହାସଲ କରିଛନ୍ତି, ତାହା କୌଣସି ଶ୍ରେଣୀଗୃହରେ ଶିଖିବା ସମ୍ଭବ ନୁହେଁ। ତେଣୁ ଆପଣମାନେ ନିଜ ଅନୁଭୂତିକୁ ଅନ୍ୟ ଯୁବମାନଙ୍କ ସହ ବାଣ୍ଟନ୍ତୁ। ସେମାନଙ୍କୁ ମଧ୍ୟ ପ୍ରେରଣା ଦିଅନ୍ତୁ ଯେ, ଅଧିକରୁ ଅଧିକ ସଂଖ୍ୟାରେ ଯୁବମାନେ ସୀମାନ୍ତ ଗ୍ରାମଗୁଡ଼ିକୁ ପରିଦର୍ଶନ କରନ୍ତୁ। ଯେତେ ଅଧିକ ଯୁବ ସେଠାକୁ ଯିବେ ଓ ରହିବେ, ସେତେ ଅଧିକ ସେମାନେ ଦେଶକୁ ଦେଖିବେ, ବୁଝିବେ। ଆଉ ଯେତେବେଳେ ଲୋକମାନଙ୍କର ଗ୍ରାମମୁଖୀ ଯାତ୍ରା ବଢ଼ିବ, ସେତେବେଳେ ସେହି ଗ୍ରାମଗୁଡ଼ିକରେ ମୌଳିକ ସୁବିଧା ମଧ୍ୟ ଆହୁରି ଦ୍ରୁତ ଗତିରେ ପହଞ୍ଚିବ।
ବନ୍ଧୁଗଣ,
ଆମ ସରକାର ସୀମାନ୍ତ ଗ୍ରାମଗୁଡ଼ିକରେ ପର୍ଯ୍ୟଟନକୁ ବ୍ୟାପକ ଭାବେ ପ୍ରୋତ୍ସାହିତ କରୁଛନ୍ତି। ସରକାରଙ୍କ ଏହି ପ୍ରୟାସକୁ ଆପଣମାନେ ଆହୁରି ବିସ୍ତାର କରିପାରିବେ। ମୋର ଅନୁରୋଧ, ଆପଣମାନଙ୍କ ମଧ୍ୟରୁ ପ୍ରତ୍ୟେକ ଯୁବ ସାଥୀ ଅତି କମରେ ୧୦୦ ଜଣ ଯୁବକ-ଯୁବତୀଙ୍କ ସହ ନିଜ ଅନୁଭୂତି ବାଣ୍ଟନ୍ତୁ। ଆପଣ ଯେଉଁ ଅଞ୍ଚଳରେ ରହୁଛନ୍ତି ସେହି ଅଞ୍ଚଳର ଲୋକଙ୍କ ସହିତ ସମ୍ପର୍କରେ ରୁହନ୍ତୁ। ଯଦି ଆପଣ ସେଠାରେ ଫଟୋ ଉଠାଇଛନ୍ତି କିମ୍ବା ଭିଡିଓ ତିଆରି କରିଛନ୍ତି, ତେବେ ସେଗୁଡ଼ିକୁ ଆପଣଙ୍କର ସୋସିଆଲ ମିଡିଆ ଆକାଉଣ୍ଟରେ ବ୍ୟାପକ ଭାବରେ ସେୟାର କରନ୍ତୁ। ସେଠାକାର କଣ୍ଟେଣ୍ଟ କ୍ରିଏଟରମାନଙ୍କ ସହ ସହଯୋଗ କରି ପ୍ରକୃତି ଓ ସଂସ୍କୃତିକୁ ପ୍ରୋତ୍ସାହିତ କରନ୍ତୁ। ସେଠାରେ ଦେଖିଥିବା ସ୍ଥାନୀୟ ଉତ୍ପାଦଗୁଡ଼ିକୁ ନିଜ ଅଞ୍ଚଳରେ କିପରି ପ୍ରଚାର କରିହେବ, ସେ ଦିଗରେ ମଧ୍ୟ ଚିନ୍ତା କରନ୍ତୁ। ଇଣ୍ଟରନେଟରେ ଅନେକ ସୂଚନା ଉପଲବ୍ଧ ଥାଏ, କିନ୍ତୁ ଏହି ଗ୍ରାମଗୁଡ଼ିକର ପ୍ରାମାଣିକ ସୂଚନା ଆପଣମାନେ ହିଁ ଲୋକମାନଙ୍କ ସହ ବାଣ୍ଟିପାରିବେ। ଆପଣମାନେ ନିଜେ ମଧ୍ୟ ବନ୍ଧୁ ଓ ପରିବାର ସହିତ ଏହି ଗ୍ରାମଗୁଡ଼ିକୁ ଭ୍ରମଣ କରନ୍ତୁ। ମୁଁ ବିଦ୍ୟାଳୟ, ମହାବିଦ୍ୟାଳୟ ଓ ବିଶ୍ୱବିଦ୍ୟାଳୟମାନଙ୍କୁ ମଧ୍ୟ ଆହ୍ୱାନ କରୁଛି ଯେ, ସେମାନେ ସୀମାନ୍ତ ଗ୍ରାମ ଶିକ୍ଷା ଭ୍ରମଣର ମଧ୍ୟ ଆୟୋଜନ କରନ୍ତୁ।
ବନ୍ଧୁଗଣ,
ମୁଁ ସର୍ବଦା ଦୃଢ଼ ଭାବରେ ବିଶ୍ୱାସ ଯେ ଆପଣମାନଙ୍କ ଭଳି ଭାରତର ଯୁବଶକ୍ତି ହିଁ ଏକବିଂଶ ଶତାବ୍ଦୀର ବିଶ୍ୱର ଭବିଷ୍ୟତକୁ ଦିଗଦର୍ଶନ ଦେବେ। ଏହା ହେଉଛି ଭାରତର ଯୁବପିଢ଼ିର ପ୍ରକୃତ ଭାଗ୍ୟ। ଆଜିର ଯୁବପିଢ଼ି ଏକ ବିକଶିତ ଭାରତର ଶକ୍ତି ଏବଂ ଏହାର ସବୁଠାରୁ ବଡ଼ ଲାଭାର୍ଥୀ। ତେଣୁ, ଯେତେବେଳେ ଯୁବଶକ୍ତି ସିଧାସଳଖ ଦେଶର ସମସ୍ୟା ଏବଂ ସମାଧାନ ସହିତ ସଂଯୋଗ ହେବ, ଭବିଷ୍ୟତ ନିଶ୍ଚିତ ଭାବରେ ଉଜ୍ଜ୍ୱଳ ହେବ। ଏହି ଭାବନା ସହିତ ମୁଁ ପୁଣିଥରେ ଆପଣମାନଙ୍କୁ ଅନେକ ଅନେକ ଶୁଭେଚ୍ଛା ଜଣାଉଛି। ଆପଣଙ୍କୁ ବହୁତ ବହୁତ ଧନ୍ୟବାଦ।
