ନୂତନ ବର୍ଷ ଅବସରରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭୂଟାନ ନରେଶ ଶ୍ରୀ ଜିଗମେ ଖେସର ନାମଗ୍ୟାଲ ୱାନଚୁକ ଓ ପ୍ରଧାନମନ୍ତ୍ରୀ ଡ. ଲ୍ୟୋନଚେନ ଲୋଟେ ସେରିଙ୍ଗ, ଶ୍ରୀଲଙ୍କା ରାଷ୍ଟ୍ରପତି ଶ୍ରୀ ଗୋଟାବାୟ ରାଜପକ୍ଷ ଏବଂ ପ୍ରଧାନମନ୍ତ୍ରୀ ଶ୍ରୀ ମହିନ୍ଦା ରାଜପକ୍ଷ, ମାଳଦୀପ ରାଷ୍ଟ୍ରପତି ଇବ୍ରାହିମ ମହମ୍ମଦ ସୋଲେ, ବାଂଲାଦେଶ ପ୍ରଧାନମନ୍ତ୍ରୀ ସୁଶ୍ରୀ ଶେଖ ହସିନା ଓ ନେପାଳ ପ୍ରଧାନମନ୍ତ୍ରୀ ଶ୍ରୀ କେପି ଶର୍ମା ଓଲିଙ୍କ ସହ ଟେଲିଫୋନ ଯୋଗେ ବାର୍ତ୍ତାଳାପ କରିଛନ୍ତି ।
ପ୍ରଧାନମନ୍ତ୍ରୀ ଏହି ନେତାମାନଙ୍କୁ ନିଜ ଏବଂ ଦେଶବାସୀଙ୍କ ତରଫରୁ ନବ ବର୍ଷର ଶୁଭେଚ୍ଛା ଜଣାଇଥିଲେ । ସେ ନିଜର ଶୁଭେଚ୍ଛା ବାର୍ତ୍ତାରେ ପ୍ରଥମେ ପଡୋଶୀ ନୀତି ଉପରେ ଅଙ୍ଗୀକାରବଦ୍ଧତା ବ୍ୟକ୍ତ କରିବା ସହ ଭାରତର ବନ୍ଧୁ ଓ ପଡୋଶୀ ରାଷ୍ଟ୍ରଗୁଡିକ ସହ ଶାନ୍ତି, ସୁରକ୍ଷା, ସମୃଦ୍ଧି ଓ ପ୍ରଗତି ଲାଗି ଭାରତର ଦୃଷ୍ଟିକୋଣ ଉପରେ ଆଲୋକପାତ କରିଥିଲେ ।
ଭୂଟାନ ନରେଶଙ୍କ ସହିତ କଥାବାର୍ତ୍ତା ବେଳେ ଗତ ଦୁଇ ବର୍ଷରେ ଉଭୟ ଦେଶ ମଧ୍ୟରେ ହୋଇଥିବା ରାଜିନାମା ସମ୍ପର୍କରେ ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ, ଯାହାଦ୍ୱାରା ଭାରତ-ଭୂଟାନ ମଧ୍ୟରେ ସମ୍ପର୍କ ଆହୁରି ସୁଦୃଢ଼ ହୋଇପାରିଛି । ପ୍ରଧାନମନ୍ତ୍ରୀ ତାଙ୍କ ଗତ ବର୍ଷର ଭୂଟାନ ଗସ୍ତକୁ ସ୍ମରଣ କରି ସେଠାକାର ଅଧିବାସୀଙ୍କ ପାଖରୁ ପାଇଥିବା ସ୍ନେହ ଓ ଆତ୍ମୀୟତାର ସ୍ମରଣ କରିଥିଲେ । ସେ ଉଭୟ ଦେଶର ଯୁବଗୋଷ୍ଠୀଙ୍କ ମଧ୍ୟରେ ସମ୍ପର୍କ ବିନିମୟ ଉପରେ ଗୁରୁତ୍ୱାରୋପ କରିଥିଲେ । ଏଥିସହିତ ଭୂଟାନ ନରେଶଙ୍କ ଆଗାମୀ ଭାରତ ଗସ୍ତକୁ ସେ ଆଗ୍ରହର ସହ ଅପେକ୍ଷା କରିଥିବା କହିଥିଲେ ।
ଶ୍ରୀଲଙ୍କା ରାଷ୍ଟ୍ରପତି ଗୋଟାବାୟ ରାଜପକ୍ଷ ପ୍ରଧାନମନ୍ତ୍ରୀଙ୍କ ଶୁଭେଚ୍ଛା ବାର୍ତ୍ତାକୁ ଅତ୍ୟନ୍ତ ଉତ୍ସାହ ଏବଂ ଆତ୍ମୀୟତାର ସହିତ ଗ୍ରହଣ କରିବା ସହ ନିଜ ପ୍ରତ୍ୟୁତ୍ତରରେ ଭାରତ-ଶ୍ରୀଲଙ୍କା ମଧ୍ୟରେ ଥିବା ସମ୍ପର୍କ 2020ରେ ଅଧିକ ଦୃଢ଼ୀଭୂତ ହେବ ବୋଲି ବିଶ୍ଵାସ ପ୍ରକଟ କରିଥିଲେ । ଦୁଇ ନେତା ଏହି ଦିଗରେ ନିବିଡ ଭାବେ କାର୍ଯ୍ୟ କରିବେ ବୋଲି ସେମାନଙ୍କର ପ୍ରତିବଦ୍ଧତାକୁ ଦୋହରାଇଥିଲେ ।
ଶ୍ରୀଲଙ୍କା ପ୍ରଧାନମନ୍ତ୍ରୀ ଶ୍ରୀ ମହିନ୍ଦା ରାଜପକ୍ଷଙ୍କ ସହ କଥାବାର୍ତ୍ତା ବେଳେ ପ୍ରଧାନମନ୍ତ୍ରୀ ଶ୍ରୀ ମୋଦୀ ଉଭୟ ଦେଶ ମଧ୍ୟରେ ଥିବା ନିବିଡ ଓ ବ୍ୟାପକ ସହଯୋଗକୁ ଆହୁରି ସମ୍ପ୍ରସାରିତ କରିବା ଦିଗରେ ଭାରତ ଅଙ୍ଗୀକାରବଦ୍ଧ ବୋଲି କହିଥିଲେ । ପ୍ରଧାନମନ୍ତ୍ରୀ ରାଜପକ୍ଷ ଉଦାରତା ପୂର୍ବକ ଶୁଭେଚ୍ଛା ବାର୍ତ୍ତାକୁ ଗ୍ରହଣ କରିବା ସହିତ ଦୁଇ ଦେଶ ମଧ୍ୟରେ ସମ୍ପର୍କ ଅଧିକ ଦୃଢ଼ୀଭୂତ ହେବ ବୋଲି ବିଶ୍ଵାସ ପ୍ରକଟ କରିଥିଲେ ।
ପ୍ରଧାନମନ୍ତ୍ରୀ ଶ୍ରୀ ମୋଦୀ ମାଳଦୀପ ରାଷ୍ଟ୍ରପତି ଓ ଜନସାଧାରଣଙ୍କୁ ନବ ବର୍ଷର ଶୁଭେଚ୍ଛା ଜଣାଇବା ସହିତ ସାମଗ୍ରିକ ବିକାଶ ଦିଗରେ ସେମାନଙ୍କ ଉଦ୍ୟମ ପାଇଁ ସଫଳତା କାମନା କରିଥିଲେ । ମାଳଦୀପ ରାଷ୍ଟ୍ରପତି ଶ୍ରୀ ସୋଲେ ପ୍ରଧାନମନ୍ତ୍ରୀଙ୍କ ଶୁଭେଚ୍ଛା ପ୍ରତି କୃତଜ୍ଞତା ଜଣାଇଥିଲେ ଏବଂ ଭାରତ ସହ ସଂପର୍କକୁ ଆହୁରି ଗଭୀର ଓ ସୁଦୃଢ କରିବା ଲାଗି ବର୍ତ୍ତମାନର ଦ୍ୱିପାକ୍ଷିକ ସହଯୋଗକୁ ଆହୁରି ସମ୍ପ୍ରସାରିତ କରିବା ତଥା ନୂତନ କ୍ଷେତ୍ରରେ ମିଳିତ ଭାବେ କାମ କରିବାର ସମ୍ଭାବନା ଉଜାଗର କରିବା ନେଇ ଆଗ୍ରହ ପ୍ରକାଶ କରିଥିଲେ ।
ବାଂଲାଦେଶ ପ୍ରଧାନମନ୍ତ୍ରୀ ସେଖ ହସିନାଙ୍କ ସହ କଥାବାର୍ତ୍ତା ବେଳେ ଉଭୟ ପରସ୍ପରଙ୍କୁ ଶୁଭେଚ୍ଛା ଜଣାଇଥିଲେ । ଆସନ୍ତା 3 ବର୍ଷ ପାଇଁ ଆୱାମୀ ଲିଗର ସଭାପତି ଭାବେ ପୁନଃ ନିର୍ବାଚିତ ହୋଇଥିବାରୁ ପ୍ରଧାନମନ୍ତ୍ରୀ ଶ୍ରୀ ମୋଦୀ ତାଙ୍କୁ ଅଭିନନ୍ଦନ ଜଣାଇଥିଲେ । ପ୍ରଧାନମନ୍ତ୍ରୀ ଭାରତରେ ଥିବା ବାଂଲାଦେଶ ହାଇକମିସନର ସୟଦ ମୁଆଁଜିମ ଅଲ୍ଲୀଙ୍କ ଅକାଳବିୟୋଗ ପାଇଁ ଗଭୀର ଶୋକ ପ୍ରକାଶ କରିବା ସହ 2019ରେ ଭାରତ-ବାଂଲାଦେଶ ସମ୍ପର୍କରେ ଅଗ୍ରଗତି ନେଇ ସନ୍ତୋଷ ବ୍ୟକ୍ତ କରିଥିଲେ । ଆଗକୁ ଥିବା ବଙ୍ଗବନ୍ଧୁଙ୍କ ଜନ୍ମ ଶତବାର୍ଷିକୀ, ବାଂଲାଦେଶ ସ୍ୱାଧୀନ ହେବା ଏବଂ ଭାରତ-ବାଂଲାଦେଶ ଦ୍ଵିପାକ୍ଷିକ କୂଟନୈତିକ ସମ୍ପର୍କର 50 ବର୍ଷ ପୂର୍ତ୍ତି ଉପରେ ଆଲୋକପାତ କରିବା ସହ ଶ୍ରୀ ମୋଦୀ ଦୁଇ ଦେଶ ମଧ୍ୟରେ ସମ୍ପର୍କର ଅଗ୍ରଗତି ତାଙ୍କ ସରକାରଙ୍କ ପ୍ରାଥମିକତା ବୋଲି ସୂଚାଇ ଥିଲେ ।
ନେପାଳ ପ୍ରଧାନମନ୍ତ୍ରୀ ଶ୍ରୀ ଓଲିଙ୍କ ସହ କଥାବାର୍ତ୍ତା ବେଳେ 2019ରେ ଭାରତ-ନେପାଳ ସମ୍ପର୍କର ଅଗ୍ରଗତି ଓ ବିଭିନ୍ନ ପ୍ରକଳ୍ପର ସମାପନ ଲାଗି ଶ୍ରୀ ମୋଦୀ ସନ୍ତୋଷ ବ୍ୟକ୍ତ କରିଥିଲେ। ସେ ବିଶେଷ କରି ଭାରତର ମୋତିହାରି ଏବଂ ନେପାଳର ଆମଲେଖଗଞ୍ଜ ମଧ୍ୟରେ ପେଟ୍ରୋଲଜାତ ସାମଗ୍ରୀ ପାଇପ ଲାଇନର ରେକର୍ଡ ସମୟ ମଧ୍ୟରେ ନିର୍ମାଣ ସଂପୂର୍ଣ୍ଣ ହେବାର ଅବତାରଣା କରିଥିଲେ । ଭିଡିଓ କନଫରେନ୍ସ ଜରିଆରେ ବିରାଟନଗରର ସମନ୍ୱିତ ତନଖି ଫାଟକ ଏବଂ ନେପାଳରେ ଆବାସ ପୁନଃ ନିର୍ମାଣ ପ୍ରକଳ୍ପର ଆଗୁଆ ଉଦଘାଟନ ପାଇଁ ଉଭୟ ନେତା ସମ୍ମତ ହୋଇଥିଲେ ।
