ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି 15 ଜାନୁଆରୀ, 2019ରେ କେରଳର କୋଲ୍ଲମ ଏବଂ ଥିରୁଅନନ୍ତପୁରମ ଗସ୍ତ କରିବେ ।
କେରଳର କୋଲ୍ଲମରେ ପ୍ରଧାନମନ୍ତ୍ରୀ 66ନଂ ଜାତୀୟ ରାଜପଥରେ କୋଲ୍ଲମ ବାଇପାସର ଉଦଘାଟନ କରିବେ । 13 କିଲୋମିଟର ଲମ୍ବ ଦୁଇ ଲେନ ବିଶିଷ୍ଟ ଏହି ବାଇପାସ ନିମନ୍ତେ 352 କୋଟି ଟଙ୍କା ବ୍ୟୟ କରାଯାଇଛି । ଏଥିରେ ଅଷ୍ଟାମୁଡ଼ି ହ୍ରଦରେ ମୋଟ 1540 ମିଟର ଲମ୍ବ ତିନୋଟି ସେତୁ ମଧ୍ୟ ସାମିଲ ଅଛି । ଏହି ପ୍ରକଳ୍ପ ଦ୍ୱାରା ଅଳପୁଜା ଏବଂ ଥିରୁଅନନ୍ତପୁରମ ମଧ୍ୟରେ ଯାତ୍ରା ସମୟ ହ୍ରାସ ପାଇବ ଏବଂ କୋଲ୍ଲମ ସହରରେ ଟ୍ରାଫିକ ଜାମ ସମସ୍ୟା ମଧ୍ୟ କମ ହେବ ।
ପ୍ରଧାନମନ୍ତ୍ରୀ ଥିରୁଅନନ୍ତପୁରମରେ ପଦ୍ମନାଭ ସ୍ୱାମୀ ମନ୍ଦିର ଦର୍ଶନ କରିବେ । ସେଠାରେ ସେ ଆଗନ୍ତୁକମାନଙ୍କ ପାଇଁ କେତେକ ସୁବିଧାର ଶୁଭାରମ୍ଭ କରି ଏକ ଫଳକ ଅନାବରଣ କରିବେ ।
ପ୍ରଧାନମନ୍ତ୍ରୀଙ୍କର କୋଲ୍ଲମକୁ ଏହା ତୃତୀୟ ଗସ୍ତ । ପ୍ରଥମ ଥର ପ୍ରଧାନମନ୍ତ୍ରୀ ଡିସେମ୍ବର 2015ରେ କୋଲ୍ଲମ ଗସ୍ତ କରିଥିଲେ ଏବଂ ସେ ଆର.ଶଙ୍କରଙ୍କ ମୂର୍ତ୍ତି ଅନାବରଣ କରିଥିଲେ । ଦ୍ୱିତୀୟ ଥର ଏପ୍ରିଲ, 2016ରେ ସେ ଅଗ୍ନିକାଣ୍ଡ ଘଟଣା ପରେ ମଧ୍ୟ କୋଲ୍ଲମ ଗସ୍ତ କରିଥିଲେ ।
