ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ସହିତ ଆଜି ୟୁରୋପୀୟ ପରିଷଦର ଅଧ୍ୟକ୍ଷ ମହାମହିମ ଶ୍ରୀ ଚାର୍ଲ୍ସ ମିଶେଲ ଟେଲିଫୋନ ଯୋଗେ କଥାବାର୍ତ୍ତା କରିଛନ୍ତି ।
ପ୍ରଧାନମନ୍ତ୍ରୀ ଶ୍ରୀ ମୋଦୀ ୟୁରୋପୀୟ ପରିଷଦର ଅଧ୍ୟକ୍ଷ ପଦ ଗ୍ରହଣ କରିବା ଲାଗି ଶ୍ରୀ ମିଶେଲଙ୍କୁ ଅଭିନନ୍ଦନ ଜଣାଇବା ସହ ତାଙ୍କର ସଫଳ କାର୍ଯ୍ୟକାଳ ନିମନ୍ତେ ଶୁଭକାମନା ଜଣାଇଥିଲେ । ପ୍ରଧାନମନ୍ତ୍ରୀ ବିଶ୍ୱାସ ପ୍ରକଟ କରିଥିଲେ ଯେ ଶ୍ରୀ ମିଶେଲଙ୍କ ନେତୃତ୍ୱରେ ଭାରତ-ୟୁରୋପୀୟ ସଂଘର ଭାଗିଦାରୀକୁ ଆହୁରି ସୁଦୃଢ଼ କରାଯିବ ।
ଚଳିତବର୍ଷ ନ୍ୟୁୟର୍କରେ ମିଳିତ ଜାତିସଂଘ ସାଧାରଣ ପରିଷଦ ବୈଠକ ଅବସରରେ ଶ୍ରୀ ମିଶେଲଙ୍କ ସହିତ ନିଜ ସାକ୍ଷାତ ବିଷୟରେ ସ୍ମରଣ କରି ପ୍ରଧାନମନ୍ତ୍ରୀ କହିଥିଲେ ଯେ ଭାରତ ବିଟିଆଇଏ, କନେକ୍ଟିଭିଟି ପାର୍ଟନରସିପ, ୟୁରୋପୋଲ, ୟୁରୋଆଟମ, ଆତଙ୍କବାଦ ମୁକାବିଲା ଏବଂ ଜଳବାୟୁ ପରିବର୍ତ୍ତନ ସମେତ ଆପୋସ ସ୍ୱାର୍ଥ ପ୍ରସଙ୍ଗରେ ଅଗ୍ରଗତି କରିବା ଲାଗି ପ୍ରତିଶ୍ରୁତିବଦ୍ଧ ।
ଉଭୟ ନେତା ଆସନ୍ତା ବର୍ଷ ବ୍ରୁସେଲ୍ସରେ ପରବର୍ତ୍ତୀ ଭାରତ-ୟୁରୋପ ସଂଘ ଶିଖର ସମ୍ମିଳନୀ ଆୟୋଜନ କରିବା ଲାଗି ସହମତ ହୋଇଥିଲେ । ଏ ସମ୍ପର୍କରେ କୂଟନୈତିକ ମାଧ୍ୟମରେ ତାରିଖ ନିର୍ଦ୍ଧାରଣ କରାଯିବ ।
