ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୧୪ ମାର୍ଚ୍ଚ ୨୦୨୬ରେ ପଶ୍ଚିମବଙ୍ଗ ଗସ୍ତ କରିବେ । ଦିନ ୨ଟା ସମୟରେ, ପ୍ରଧାନମନ୍ତ୍ରୀ କୋଲକାତାରେ ପ୍ରାୟ ୧୮,୬୮୦ କୋଟି ଟଙ୍କାର ବହୁବିଧ ଉନ୍ନୟନମୂଳକ ପ୍ରକଳ୍ପର ଉଦ୍ଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ କରିବେ ।
ଏହି ଅଞ୍ଚଳରେ ସଡ଼କ ଭିତ୍ତିଭୂମିକୁ ପ୍ରୋତ୍ସାହନ ଦେବା ପାଇଁ ପ୍ରଧାନମନ୍ତ୍ରୀ ପ୍ରାୟ ୧୬,୯୯୦ କୋଟି ଟଙ୍କା ବିନିଯୋଗରେ ୪୨୦ କିଲୋମିଟରରୁ ଅଧିକ ଲମ୍ବ ବିଶିଷ୍ଟ ଜାତୀୟ ରାଜପଥ ପ୍ରକଳ୍ପର ଉଦ୍ଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ କରିବେ । ଉଦ୍ଘାଟନ ହେବାକୁ ଥିବା ପ୍ରକଳ୍ପଗୁଡିକ ମଧ୍ୟରେ ପଶ୍ଚିମବଙ୍ଗ ଏବଂ ଝାଡଖଣ୍ଡରେ ଏନ୍ଏଚ୍-୧୯ ଏବଂ ପଶ୍ଚିମବଙ୍ଗରେ ଏନ୍ଏଚ୍-୧୧୪ର ଅଂଶ ଅନ୍ତର୍ଭୁକ୍ତ । ଏହି ପ୍ରକଳ୍ପଗୁଡିକ ସଡ଼କ ସୁରକ୍ଷା ବୃଦ୍ଧି କରିବ, ଯାତ୍ରା ସମୟ ହ୍ରାସ କରିବ, ଭିଡ଼ ଏବଂ ପ୍ରଦୂଷଣ କମ କରିବ, ଆଞ୍ଚଳିକ ସଂଯୋଗୀକରଣରେ ଉନ୍ନତି ଆଣିବ ଏବଂ ପର୍ଯ୍ୟଟନକୁ ପ୍ରୋତ୍ସାହିତ କରିବ ତଥା ଉକ୍ତ ଅଞ୍ଚଳରେ ଆର୍ଥିକ ଅଭିବୃଦ୍ଧିକୁ ତ୍ୱରାନ୍ୱିତ କରିବ ବୋଲି ଆଶା କରାଯାଉଛି ।
ପ୍ରଧାନମନ୍ତ୍ରୀ ଅନେକ ନୂତନ ଜାତୀୟ ରାଜପଥ ପ୍ରକଳ୍ପର ଶିଳାନ୍ୟାସ କରିବେ । ଏଥିରେ ଏନ୍ଏଚ୍-୧୧୬ଏର ୨୩୧ କିଲୋମିଟର ଲମ୍ବ ଚାରି ଲେନ୍ ବିଶିଷ୍ଟ ଖଡ଼ଗପୁର-ମୋରଗ୍ରାମ୍ ଅର୍ଥନୌତିକ କରିଡର ସେକ୍ସନ୍ର ପାଞ୍ଚଟି ପ୍ୟାକେଜ ଅନ୍ତର୍ଭୁକ୍ତ । ଏହି ପ୍ରକଳ୍ପ ଖଡ଼ଗପୁର ଏବଂ ସିଲିଗୁଡି ମଧ୍ୟରେ ଅର୍ଥନୈତିକ କରିଡରର ଏକ ଅଂଶ ଏବଂ ଏହା ପଶ୍ଚିମବଙ୍ଗର ପଶ୍ଚିମ ମେଦିନୀପୁର, ବାଙ୍କୁରା, ହୁଗଲି, ପୂର୍ବ ବର୍ଦ୍ଧମାନ, ବୀରୂମି ଏବଂ ମୁରଶିଦାବାଦ ଜିଲ୍ଲା ଦେଇ ଗତି କରିବ । ଖଡ଼ଗପୁର-ମୋରଗ୍ରାମ ସିଧାସଳଖ ସଂଯୋଗୀକରଣ ପ୍ରାୟ ୧୨୦ କିଲୋମିଟର ଯାତ୍ରା ଦୂରତା ହ୍ରାସ କରିବା ସହ ଯାତ୍ରା ସମୟ ପ୍ରାୟ ସାତରୁ ଆଠ ଘଣ୍ଟା ପର୍ଯ୍ୟନ୍ତ କମାଇବ । ଏହି କରିଡର ଏନ୍ଏଚ୍-୧୬, ଏନ୍ଏଚ୍-୧୯, ଏନ୍ଏଚ୍-୧୪ ଏବଂ ଏନ୍ଏଚ୍-୧୨ ସମେତ ପ୍ରମୁଖ ଜାତୀୟ ରାଜପଥ ସହିତ ମଧ୍ୟ ସଂଯୁକ୍ତ ହେବ, ଯାହାଦ୍ୱାରା ବହୁ-କରିଡର ସଂଯୋଗୀକରଣ ସୁଦୃଢ଼ ହେବ । ପ୍ରଧାନମନ୍ତ୍ରୀ ଏନ୍ଏଚ୍-୧୪ରେ ୫.୬ କିଲୋମିଟର ଲମ୍ବା ଚାରି ଲେନ୍ ବିଶିଷ୍ଟ ଦୁବରାଜପୁର ବାଇପାସ୍ ନିର୍ମାଣ ପାଇଁ ଶିଳାନ୍ୟାସ କରିବେ, ଯାହା ଦୁବରାଜପୁର ସହରର ଜନଗହଳି ପୂର୍ଣ୍ଣ ଅଞ୍ଚଳକୁ ଯାତାୟାତ କମ କରିବ ଏବଂ ଯାତ୍ରା ସମୟ ପ୍ରାୟ ଗୋଟିଏ ଘଣ୍ଟା ହ୍ରାସ କରିବ । ଏହାଛଡା ପ୍ରଧାନମନ୍ତ୍ରୀ ଏନ୍ଏଚ୍-୧୪ରେ କାଂଶବତୀ ଏବଂ ଶିଳାବତୀ ନଦୀ ଉପରେ ଅତିରିକ୍ତ ଚାରି ଲେନ୍ ବିଶିଷ୍ଟ ପ୍ରମୁଖ ସେତୁ ନିର୍ମାଣ ପାଇଁ ମଧ୍ୟ ଶିଳାନ୍ୟାସ କରିବେ ।
ଏହି ଗସ୍ତ ସମୟରେ, ପ୍ରଧାନମନ୍ତ୍ରୀ ଜାହାଜ ଚଳାଚଳ ଏବଂ ବନ୍ଦର ସମ୍ବନ୍ଧୀୟ ଅନେକ ପ୍ରକଳ୍ପର ଉଦ୍ଘାଟନ ତଥା ଭିତ୍ତିପ୍ରସ୍ତର ସ୍ଥାପନ କରିବେ । ସେ ହଳଦିଆ ଡକ୍ କମ୍ପେ୍ଲକ୍ସରେ ବର୍ଥ ନମ୍ବର ୨ର ଯାନ୍ତ୍ରିକୀକରଣ ପ୍ରକଳ୍ପର ଉଦ୍ଘାଟନ କରିବେ, ଯାହା ଦକ୍ଷ, ଦ୍ରୁତ ଏବଂ ପରିବେଶ-ଅନୁକୂଳ କାର୍ଗୋ ପରିଚାଳନାକୁ ସକ୍ଷମ କରିବ । ଏହି ପ୍ରକଳ୍ପ କାର୍ଗୋ ପରିଚାଳନା କ୍ଷମତାକୁ ବଢ଼ାଇବ, ଦକ୍ଷ ଫୁଲ-ରେକ୍ ରେଳ ଲୋଡିଂ ସିଷ୍ଟମ୍କୁ ସହଜ କରିବ, ପ୍ରମୁଖ କାର୍ଯ୍ୟଦକ୍ଷତା ସୂଚକଗୁଡିକୁ ଉନ୍ନତ କରିବ, ବିପଦପୂର୍ଣ୍ଣ କାର୍ଯ୍ୟରେ ମାନବ ସଂସ୍ପର୍ଶକୁ ହ୍ରାସ କରି ସୁରକ୍ଷା ବୃଦ୍ଧି କରିବ ଏବଂ ନିଯୁକ୍ତି ସୃଷ୍ଟି କରିବ । ପ୍ରଧାନମନ୍ତ୍ରୀ ଖଦ୍ଦିରପୁର ଡକ୍ସ (ଡକ୍ ୧-ପଶ୍ଚିମ) ରେ ପୁନରୁଦ୍ଧାର ପ୍ରକଳ୍ପର ମଧ୍ୟ ଉଦ୍ଘାଟନ କରିବେ।
ପ୍ରଧାନମନ୍ତ୍ରୀ ରାଜ୍ୟରେ ବହୁ ବନ୍ଦର ଭିତ୍ତଭୂମି ପ୍ରକଳ୍ପ ପାଇଁ ମଧ୍ୟ ଶିଳାନ୍ୟାସ କରିବେ । ଏଥିରେ ଶ୍ୟାମା ପ୍ରସାଦ ମୁଖାର୍ଜୀ ବନ୍ଦରର ହଳଦିଆ ଡକ୍ କମ୍ପେ୍ଲକ୍ସରେ ବର୍ଥ ନମ୍ବର ୫ର ଯାନ୍ତ୍ରିକୀକରଣ ଅନ୍ତର୍ଭୁକ୍ତ । ଅନ୍ୟାନ୍ୟ ପ୍ରକଳ୍ପ ମଧ୍ୟରେ କୋଲକାତା ଡକ୍ ସିଷ୍ଟମ୍ରେ ବାସ୍କ୍ୟୁଲ ସେତୁର ନବୀକରଣ; କିଦ୍ଦରପୁର ଡକ୍-୧ (ପୂର୍ବ) ଏବଂ ଡକ୍-୨ (ପୂର୍ବ) ରେ ଡ୍ରେନେଜ୍ ସିଷ୍ଟମ୍ ସମେତ ୟାର୍ଡ ବିକାଶ; ହାୱଡା ବ୍ରିଜ୍ ପାଇଲନ୍ରୁ ନିମତଲା ଘାଟ ପର୍ଯ୍ୟନ୍ତ କୋଲକାତା ନଦୀ କୂଳରେ କୂଳ ସୁରକ୍ଷା କାର୍ଯ୍ୟ ଏବଂ କୋଲକାତା ଡକ୍ ସିଷ୍ଟମ୍ରେ ଇଣ୍ଡେଞ୍ଚର ମେମୋରିଆଲ୍ କମ୍ପେ୍ଲକ୍ସ ନିକଟରେ ଏକ ନଦୀ କ୍ରୁଜ୍ ଟର୍ମିନାଲ ତଥା ନଦୀ ପର୍ଯ୍ୟଟନ ସୁବିଧା ପାଇଁ ଏକ ଟର୍ମିନାଲ କୋଠା ନିର୍ମାଣ ମଧ୍ୟ ରହିଛି ।
ରେଳ କ୍ଷେତ୍ରରେ, ପ୍ରଧାନମନ୍ତ୍ରୀ ପୁରୁଲିଆ-ଆନନ୍ଦ ବିହାର ଟର୍ମିନାଲ (ଦିଲ୍ଲୀ) ଏକ୍ସପ୍ରେସ୍କୁ ପତାକା ଦେଖାଇ ଶୁଭାରମ୍ଭ କରିବେ, ଯାହା ପଶ୍ଚିମବଙ୍ଗ, ଉତ୍ତର ପ୍ରଦେଶ, ବିହାର, ଝାଡଖଣ୍ଡ ଏବଂ ଜାତୀୟ ରାଜଧାନୀ କ୍ଷେତ୍ର ମଧ୍ୟରେ ରେଳ ସଂଯୋଗକୁ ସୁଦୃଢ଼ କରିବ ।
ପ୍ରଧାନମନ୍ତ୍ରୀ ଅମୃତ ଷ୍ଟେସନ୍ ଯୋଜନା ଅଧୀନରେ ଛଅଟି ପୁନଃବିକଶିତ ରେଳ ଷ୍ଟେସନ୍ ମଧ୍ୟ ଉଦ୍ଘାଟନ କରିବେ । ଏହି ଷ୍ଟେସନ୍ଗୁଡିକ ମଧ୍ୟରେ କାମାକ୍ଷାଗୁରୀ, ଅନାରା, ତାମଲୁକ, ହଳଦିୟା, ବରଭୂମ ଏବଂ ସିଉରି ଅନ୍ତର୍ଭୁକ୍ତ ।
ପ୍ରଧାନମନ୍ତ୍ରୀ ଦୁଇଟି ରେଳ ପ୍ରକଳ୍ପକୁ ମଧ୍ୟ ଦେଶକୁ ଉତ୍ସର୍ଗ କରିବେ: ବେଲଦା ଏବଂ ଦନ୍ତାନ ମଧ୍ୟରେ ୧୬ କିଲୋମିଟର ଲମ୍ବା ତୃତୀୟ ରେଳ ଲାଇନ୍ ଏବଂ କଲାଇକୁଣ୍ଡା ଏବଂ କାନିମୋହୁଲି ମଧ୍ୟରେ ସ୍ୱୟଂଚାଳିତ ବ୍ଲକ ସିଗନାଲିଂ ସିଷ୍ଟମ । ଏହି ପ୍ରକଳ୍ପଗୁଡିକ ଟ୍ରେନ୍ ସୁରକ୍ଷା ଏବଂ ସମୟାନୁବର୍ତ୍ତିତାକୁ ଉନ୍ନତ କରିବ, ଭିଡ଼ ହ୍ରାସ କରିବ ଏବଂ ଏହି ଅଞ୍ଚଳର ଯାତ୍ରୀମାନଙ୍କ ପାଇଁ ସାମଗ୍ରିକ ଯାତ୍ରାର ସହଜତାକୁ ବୃଦ୍ଧି କରିବ ।
ଏହି ପ୍ରକଳ୍ପଗୁଡିକ ପଶ୍ଚିମବଙ୍ଗ ଏବଂ ପୂର୍ବ ଭାରତରେ ଭିତ୍ତିଭୂମିକୁ ସୁଦୃଢ଼ କରିବା, ସଂଯୋଗୀକରଣ ବୃଦ୍ଧି କରିବା ଏବଂ ଆର୍ଥିକ ଅଭିବୃଦ୍ଧିକୁ ତ୍ୱରାନ୍ୱିତ କରିବା ପାଇଁ ସରକାରଙ୍କ ନିରନ୍ତର ପ୍ରତିବଦ୍ଧତାକୁ ପ୍ରତିଫଳିତ କରୁଛି ।
