ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ 7 ଫେବୃଆରୀ 2020ରେ ଆସାମର କୋକ୍ରାଝର ଗସ୍ତ କରିବେ । ସେଠାରେ ସେ ଐତିହାସିକ ବୋଡୋ ରାଜିନାମା ସ୍ୱାକ୍ଷର ଉପଲକ୍ଷେ ଆୟୋଜିତ ସମାରୋହରେ ଅଂଶଗ୍ରହଣ କରିବେ ।
ଏହି କାର୍ଯ୍ୟକ୍ରମରେ ସମଗ୍ର ଆସାମ ଓ ବିଟିଏଡି ଜିଲ୍ଲାରୁ 4 ଲକ୍ଷରୁ ଊର୍ଦ୍ଧ୍ଵ ଲୋକ ଯୋଗ ଦେବେ ବୋଲି ଆଶା କରାଯାଉଛି । ରାଜ୍ୟର ବିବିଧତାକୁ ପ୍ରଦର୍ଶନ କରିବା ଲାଗି ରାଜ୍ୟ ସରକାରଙ୍କ ପକ୍ଷରୁ ଆସାମର ଜନଜାତି ସମୁଦାୟଙ୍କ ଦ୍ୱାରା ଏକ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଉଛି ।
ଚଳିତ ବର୍ଷ ଜାନୁଆରୀରେ ସମସ୍ତ ଅଗ୍ରଣୀ ଅଂଶୀଦାରମାନଙ୍କୁ ଗୋଟିଏ ବ୍ୟବସ୍ଥାରେ ସାମିଲ କରାଯାଇ ଐତିହାସିକ ବୋଡୋ ରାଜିନାମା ସ୍ୱାକ୍ଷରିତ ହୋଇଥିଲା । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଜନସମାରୋହକୁ ସମ୍ବୋଧିତ କରିବା ସମୟରେ ଏହି ରାଜିନାମାକୁ ପ୍ରଶଂସା କରିବେ ।
27 ଜାନୁଆରୀ 2020ରେ ଏହି ରାଜିନାମା ନୂଆଦିଲ୍ଲୀ ଠାରେ ସ୍ୱାକ୍ଷରିତ ହୋଇଥିଲା ।
ପ୍ରଧାନମନ୍ତ୍ରୀ ତାଙ୍କ ଟ୍ୱିଟର ହ୍ୟାଣ୍ଡେଲରେ ଏହି ତାରିଖକୁ ‘ଦେଶ ପାଇଁ ଅତ୍ୟନ୍ତ ସ୍ୱତନ୍ତ୍ର ଦିନ’ ଭାବେ ବର୍ଣ୍ଣନା କରିଥିଲେ । ଏହି ରାଜିନାମା ବୋଡୋ ଲୋକମାନଙ୍କ ଜୀବନରେ ବ୍ୟାପକ ପରିବର୍ତ୍ତନ ଆଣିବା ସହିତ ଶାନ୍ତି, ସଦଭାବ ଏବଂ ଭାଇଚାରାର ଏକ ନୂଆ ଯୁଗ ଆରମ୍ଭ କରିବ ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ।
ଏହି ରାଜିନାମା ପ୍ରଧାନମନ୍ତ୍ରୀଙ୍କ “ସବକା ସାଥ ସବକା ବିକାଶ” ସଂକଳ୍ପ ଏବଂ ଉତ୍ତର ପୂର୍ବାଂଚଳର ସାମଗ୍ରୀକ ବିକାଶ ଦିଗରେ ତାଙ୍କର ପ୍ରତିବଦ୍ଧତାକୁ ପୂରଣ କରିବା ସହ 5 ଦଶନ୍ଧି ପୁରୁଣା ବୋଡୋ ବିବାଦର ସମାଧାନ କରିଛି ।
ପ୍ରଧାନମନ୍ତ୍ରୀ ତାଙ୍କ ଟ୍ୱିଟରରେ କହିଥିଲେ ଯେ “ବୋଡୋ ରାଜିନାମା ବିଭିନ୍ନ କାରଣରୁ ଗୁରୁତ୍ୱପୂର୍ଣ୍ଣ । ଯେଉଁମାନେ ପୂର୍ବରୁ ହିଂସାତ୍ମକ ପ୍ରତିରୋଧ କରୁଥିଲେ ସେମାନେ ଏବେ ମୁଖ୍ୟଧାରାକୁ ଫେରିବା ସହିତ ଦେଶର ବିକାଶରେ ଯୋଗଦାନ ଦେଇପାରିବେ ।”
ତାହା ହିଁ ହୋଇଛି, 1615ରୁ ଊର୍ଦ୍ଧ୍ଵ ଏନଡିଏଫବିର ବିଭିନ୍ନ ସଂଗଠନର ସଦସ୍ୟ ରାଜିନାମା ସ୍ୱାକ୍ଷରିତ ହେବାର ମାତ୍ର 2 ଦିନ ମଧ୍ୟରେ ଅସ୍ତ୍ରଶସ୍ତ୍ର ସହ ଆତ୍ମସମର୍ପଣ କରିବା ସହିତ ମୁଖ୍ୟଧାରାକୁ ଫେରିଛନ୍ତି ।
ପ୍ରଧାନମନ୍ତ୍ରୀ ତାଙ୍କ ଟ୍ୱିଟରେ କହିଥିଲେ ଯେ “ବୋଡୋ ସମୁଦାୟଙ୍କ ସହିତ ଏହି ରାଜିନାମା ବୋଡୋ ଲୋକମାନଙ୍କ ଅଭିନବ ସଂସ୍କୃତିକୁ ସଂରକ୍ଷଣ ଯୋଗାଇ ଦେବା ସହିତ ଏହାକୁ ଲୋକପ୍ରିୟ କରିବ । ସେମାନେ ବିଭିନ୍ନ ବିକାଶମୂଳକ ଯୋଜନାର ଲାଭ ପାଇପାରିବେ । ବୋଡୋ ଲୋକମାନଙ୍କ ଆଶାଆକାଂକ୍ଷା ପୂରଣ କରିବା ଲାଗି ଯଥାସମ୍ଭବ କାର୍ଯ୍ୟ କରିବା ଲାଗି ଆମେ ପ୍ରତିଶ୍ରୁତିବଦ୍ଧ ।”
ଏହି ଅଂଚଳର ବିକାଶ ପାଇଁ 1500 କୋଟି ଟଙ୍କାର ସ୍ୱତନ୍ତ୍ର ପ୍ୟାକେଜ ଘୋଷଣା କରାଯାଇଛି ।
ନିକଟରେ ଭାରତ ସରକାର ଏବଂ ମିଜେରାମ ଓ ତ୍ରିପୁରା ସରକାରଙ୍କ ମଧ୍ୟରେ ବ୍ରୁ-ରେଙ୍ଗ ରାଜିନାମା ସ୍ୱାକ୍ଷରିତ ହୋଇଛି । ଏହାଦ୍ୱାରା 35 ହଜାର ବ୍ରୁ-ରେଙ୍ଗ ଶରଣାର୍ଥୀଙ୍କୁ ଆଶ୍ୱସ୍ତି ମିଳିଛି । ତ୍ରିପୁରାରେ ଏନଏଲଏଫଟିର 85 କ୍ୟାଡର ଆତ୍ମସମର୍ପଣ କରିଛନ୍ତି । ଏହା ଉତ୍ତର ପୂର୍ବାଂଚଳର ବିକାଶ ଓ ଶାନ୍ତି ପ୍ରତି ପ୍ରଧାନମନ୍ତ୍ରୀଙ୍କ ପ୍ରତିବଦ୍ଧତାକୁ ଦର୍ଶାଉଛି ।
ଗଣତନ୍ତ୍ର ଦିବସରେ ପ୍ରସାରିତ ‘ମନ କୀ ବାତ’ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ହିଂସା ମାର୍ଗରେ ଚାଲୁଥିବା ସମସ୍ତଙ୍କୁ ଆତ୍ମସମର୍ପଣ କରିବା ଏବଂ ମୁଖ୍ୟଧାରାରେ ସାମିଲ ହେବା ନିମନ୍ତେ ଆହ୍ୱାନ କରିଥିଲେ ।
ସେ କହିଥିଲେ ଯେ “ଗଣତନ୍ତ୍ର ଦିବସର ପବିତ୍ର ଅବସରରେ ମୁଁ ଦେଶର ଯେକୌଣସି ଭାଗରେ ରହୁଥିବା ସେହି ଲୋକମାନଙ୍କୁ ମୁଖ୍ୟଧାରାକୁ ଫେରିବା ଲାଗି ଅପିଲ କରୁଛି ଯେଉଁମାନେ ହିଂସା ଓ ଅସ୍ତ୍ରଶସ୍ତ୍ର ମାଧ୍ୟମରେ ସମସ୍ୟା ସମାଧାନ କରିବାକୁ ଚାହୁଁଛନ୍ତି । ସେମାନଙ୍କର ନିଜ କ୍ଷମତା ସହିତ ଦେଶର କ୍ଷମତା ଉପରେ ମଧ୍ୟ ଭରସା ରହିବା ଉଚିତ । ଶାନ୍ତିପୂର୍ଣ୍ଣ ପରିବେଶ ମଧ୍ୟରେ ସବୁ ସମସ୍ୟାର ସମାଧାନ ହୋଇପାରିବ ।”
