ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏବଂ ଲକ୍ସମବର୍ଗର ପ୍ରଧାନମନ୍ତ୍ରୀ ମହାମହିମ ଜାଭିଏର ବେଟେଲଙ୍କ ମଧ୍ୟରେ ଭର୍ଚୁଆଲ ଶିଖର ସମ୍ମିଳନୀ ଅନୁଷ୍ଠିତ ହୋଇଯାଇଛି । ପ୍ରଧାନମନ୍ତ୍ରୀ ଶ୍ରୀ ମୋଦୀ କୋଭିଡ-19 ଯୋଗୁଁ ବହୁମୂଲ୍ୟ ଜୀବନହାନୀ ଘଟିଥିବା ନେଇ ଲକ୍ସମବର୍ଗ ପ୍ରଧାନମନ୍ତ୍ରୀଙ୍କ ନିକଟରେ ଶୋକ ବ୍ୟକ୍ତ କରିଥିବା ବେଳେ ପରିସ୍ଥିତିର ସୁପରିଚାଳନା ନେଇ ଜାଭିଏର ବେଟେଲ ଶ୍ରୀ ମୋଦୀଙ୍କୁ ସାଧୁବାଦ ଜଣାଇଛନ୍ତି । କୋଭିଡ ପରବର୍ତ୍ତୀ ସମୟରେ ଭାରତ–ଲକ୍ସମବର୍ଗ ମଧ୍ୟରେ ସମ୍ପର୍କକୁ ମଜବୁତ କରିବା ନେଇ ଦୁଇ ନେତା ମତ ବିନିମୟ କରିଥିଲେ । ବିଶେଷକରି ଆର୍ଥିକ ବୈଷୟିକଜ୍ଞାନ, ପରିବେଶ, ମହାକାଶ ଗବେଷଣା, ଡିଜିଟାଲ ଇନୋଭେସନ ଓ ଷ୍ଟାର୍ଟ ଅପ ନେଇ ମୁଖ୍ୟତଃ ଏହି ଆଲୋଚନା ହୋଇଥିଲା । ଉଭୟ ନେତା ଦୁଇ ଦେଶ ମଧ୍ୟରେ ଥିବା ବିଭିନ୍ନ ରାଜିନାମାର ସଫଳ ସମାପ୍ତିକୁ ସ୍ଵାଗତ କରିଥିଲେ । ଏଥିରେ ଉଭୟ ଦେଶର ଆର୍ଥିକ ଓ ବଜାର ନିୟନ୍ତ୍ରଣ, ଷ୍ଟକ ଏକ୍ସଚେଞ୍ଜ ଏବଂ ଉଦ୍ଭାବନ ସଂସ୍ଥା ଇତ୍ୟାଦି ଅନ୍ତର୍ଭୁକ୍ତ ।
ଦୁଇ ପ୍ରଧାନମନ୍ତ୍ରୀ କୋଭିଡ-19 ଭଳି ବୈଶ୍ଵିକ ମହାମାରୀରୁ ଉତ୍ପନ୍ନ ସ୍ଥିତିର ସୁଧାର ନେଇ ସହଯୋଗ, ଆତଙ୍କବାଦ ଓ ଜଳବାୟୁ ପରିବର୍ତ୍ତନ ବିଷୟ ଉପରେ ସମନ୍ଵୟ ରକ୍ଷା ପାଇଁ ସହମତି ପ୍ରକାଶ କରିଥିଲେ । ଆନ୍ତର୍ଜାତିକ ସୌରଶକ୍ତି ମେଣ୍ଟରେ ସାମିଲ ହେବା ପାଇଁ ଲକ୍ସମବର୍ଗର ଘୋଷଣାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସ୍ଵାଗତ କରିଥିବା ବେଳେ ଆପତକାଳୀନ ପରିସ୍ଥିତିର ମୁକାବିଲା ନେଇ ଭିତ୍ତିଭୂମିର ବିକାଶ ଦିଗରେ ସହଯୋଗ ପାଇଁ ଆମନ୍ତ୍ରଣ ଜଣାଇଥିଲେ ।
କୋଭିଡ-19 ପରିସ୍ଥିତି ସୁଧୁରିବା ପରେ ଲକ୍ସମବର୍ଗର ପ୍ରଧାନମନ୍ତ୍ରୀ ବେଟେଲ ଭାରତ ପରିଦର୍ଶନରେ ଆସିବେ ବୋଲି ପ୍ରଧାନମନ୍ତ୍ରୀ ଆଶାବ୍ୟକ୍ତ କରିଥିଲେ । ସେହିପରି ପ୍ରଧାନମନ୍ତ୍ରୀ ନିଜର ସୁବିଧା ଅନୁସାରେ ଲକ୍ସମବର୍ଗ ପରିଦର୍ଶନ କରିବାକୁ ପ୍ରଧାନମନ୍ତ୍ରୀ ବେଟେଲ ଆମନ୍ତ୍ରଣ କରିଥିଲେ ।
