ଭିତ୍ତିଭୂମି ବିକାଶ ଏବଂ ସ୍ଥାୟୀ ଜୀବିକା ବୃଦ୍ଧି ପାଇଁ ତାଙ୍କର ପ୍ରତିବଦ୍ଧତା ଅନୁଯାୟୀ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଛତିଶଗଡ଼ର ବିଳାସପୁର ଠାରେ ୩୩,୭୦୦ କୋଟି ଟଙ୍କାରୁ ଅଧିକ ମୂଲ୍ୟର ଏକାଧିକ ବିକାଶ ମୂଳକ ପ୍ରକଳ୍ପର ଶିଳାନ୍ୟାସ, କାର୍ଯ୍ୟ ଆରମ୍ଭ କରିଛନ୍ତି ଏବଂ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଛନ୍ତି । ଆଜି ନୂଆ ବର୍ଷର ଶୁଭ ଆରମ୍ଭ ଏବଂ ନବରାତ୍ରିର ପ୍ରଥମ ଦିନରେ ସେ ମା' ମହାମାୟାଙ୍କ ଭୂମି ଏବଂ ମାତା କୌଶଲ୍ୟାଙ୍କ ମାତୃଭୂମି ଭାବେ ଛତିଶଗଡ଼ର ମହତ୍ତ୍ୱ ଉପରେ ଗୁରୁତ୍ୱାରୋପ କରିଥିଲେ। ରାଜ୍ୟ ପାଇଁ ଦେବୀଙ୍କ ପ୍ରତି ସମର୍ପିତ ଏହି ନଅ ଦିନର ବିଶେଷ ମହତ୍ତ୍ୱ ଉପରେ ସେ ଆଲୋକପାତ କରିଥିଲେ। ନବରାତ୍ରିର ପ୍ରଥମ ଦିନରେ ଛତିଶଗଡ଼ରେ ରହିବାର ସୌଭାଗ୍ୟ ସମ୍ପର୍କରେ ଉଲ୍ଲେଖ କରିବା ସହ ଭକ୍ତ ଶିରୋମଣି ମାତା କର୍ମାଙ୍କ ସମ୍ମାନରେ ନିକଟରେ ଡାକ ଟିକଟ ଜାରି ହୋଇଥିବାରୁ ସମସ୍ତଙ୍କୁ ଅଭିନନ୍ଦନ ଜଣାଇଥିଲେ। ସେ ଆହୁରି ମଧ୍ୟ କହିଥିଲେ ଯେ, ନବରାତ୍ରି ପର୍ବ ରାମନବମୀ ପାଳନ ସହିତ ଶେଷ ହେବ , ଏହା ସହିତ ଯେ ଛତିଶଗଡ଼ରେ ଭଗବାନ ରାମଙ୍କ ପ୍ରତି ଅନନ୍ୟ ଭକ୍ତି, ବିଶେଷ କରି ରାମନାମୀ ସମାଜର ଅସାଧାରଣ ସମର୍ପଣ, ଯିଏ କି ଭଗବାନ ରାମଙ୍କ ନାମରେ ନିଜର ସମଗ୍ର ଅସ୍ତିତ୍ୱ ଉତ୍ସର୍ଗ କରିଛନ୍ତି, ତାହା ଉପରେ ଆଲୋକପାତ କରିଥିଲେ। ସେ ଛତିଶଗଡ଼ବାସୀଙ୍କୁ ଭଗବାନ ରାମଙ୍କ ମାମୁଁ ଘର ପରିବାର ବୋଲି ଦର୍ଶାଇ ଶୁଭେଚ୍ଛା ଜଣାଇଥିଲେ।
ଏହି ପବିତ୍ର ଅବସରରେ ମୋହଭଟ୍ଟ ସ୍ୱୟଂଭୂ ଶିବଲିଙ୍ଗ ମହାଦେବଙ୍କ ଆଶୀର୍ବାଦରେ ଶ୍ରୀ ମୋଦୀ ଛତିଶଗଡରେ ବିକାଶକୁ ତ୍ୱରାନ୍ୱିତ କରିବାର ସୁଯୋଗ ଉପରେ ଆଲୋକପାତ କରିଥିଲେ । ଗରିବଙ୍କ ପାଇଁ ବାସଗୃହ, ସ୍କୁଲ, ସଡକ, ରେଳବାଇ, ବିଜୁଳି ଓ ଗ୍ୟାସ ପାଇପଲାଇନ ସମେତ ୩୩,୭୦୦ କୋଟି ରୁ ଅଧିକ ଟଙ୍କାର ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିଥିଲେ । ଛତିଶଗଡ଼ର ନାଗରିକଙ୍କ ସୁବିଧା ବୃଦ୍ଧି ଏବଂ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବା ଉଦ୍ଦେଶ୍ୟରେ ଏହି ପ୍ରକଳ୍ପଗୁଡ଼ିକ ରଖାଯାଇଛି ବୋଲି ସେ ଗୁରୁତ୍ୱାରୋପ କରିଥିଲେ। ଏହି ଉନ୍ନୟନମୂଳକ ପଦକ୍ଷେପ ମାଧ୍ୟମରେ ହୋଇଥିବା ଅଗ୍ରଗତି ପାଇଁ ସେ ସମସ୍ତଙ୍କୁ ଅଭିନନ୍ଦନ ଜଣାଇଥିଲେ ।
ଆଶ୍ରୟ ପ୍ରଦାନର ସାଂସ୍କୃତିକ ମହତ୍ତ୍ୱ ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ ଏହାକୁ ଏକ ମହାନ ପୁଣ୍ୟ କାର୍ଯ୍ୟ ବୋଲି କହିଥିଲେ ଯେ କାହାର ଗୃହର ସ୍ୱପ୍ନକୁ ସାକାର କରିବାର ଏହା ଏକ ଅତୁଳନୀୟ ଆନନ୍ଦ । ନବରାତ୍ରି ଏବଂ ନବବର୍ଷର ପବିତ୍ର ଅବସରରେ ସେ ଆଲୋକପାତ କରିଥିଲେ ଯେ ଛତିଶଗଡ଼ର ୩ ଲକ୍ଷ ଗରିବ ପରିବାର ସେମାନଙ୍କ ନୂଆ ଘରେ ପ୍ରବେଶ କରୁଛନ୍ତି। ନୂତନ ଆରମ୍ଭ ପାଇଁ ସେ ଏହି ପରିବାରଗୁଡ଼ିକୁ ହାର୍ଦ୍ଦିକ ଶୁଭେଚ୍ଛା ଜଣାଇଛନ୍ତି। ଛତିଶଗଡର ଲକ୍ଷ ଲକ୍ଷ ପରିବାର ପାଇଁ ସ୍ଥାୟୀ ଆବାସର ସ୍ୱପ୍ନ ପୂର୍ବରୁ ଅମଲାତାନ୍ତ୍ରିକ ଫାଇଲରେ ହଜି ଯାଇଥିବା ଦର୍ଶାଇ ସେ ଏହି ଗୃହ ଗୁଡ଼ିକର ପୁନରୁଦ୍ଧାର ପାଇଁ ତାଙ୍କ ନେତୃତ୍ୱରେ ସୃଷ୍ଟି ହୋଇଥିବା ବିଶ୍ଵାସକୁ ଶ୍ରେୟ ଦେଇଛନ୍ତି। ଏହି ସ୍ୱପ୍ନକୁ ପୂରଣ କରିବା ପାଇଁ ସରକାରଙ୍କ ପ୍ରତିବଦ୍ଧତାକୁ ସେ ମନେ ପକାଇଥିଲେ । ଶ୍ରୀ ବିଷ୍ଣୁ ଦେଓଙ୍କ ନେତୃତ୍ୱରେ ପ୍ରଥମ କ୍ୟାବିନେଟ୍ ନିଷ୍ପତ୍ତି ୧୮ ଲକ୍ଷ ଘର ନିର୍ମାଣ ପାଇଁ ଥିଲା, ଯେଉଁଥିରୁ ୩ ଲକ୍ଷ ନିର୍ମାଣ ସରିଛି। ଏସବୁ ମଧ୍ୟରୁ ଅଧିକାଂଶ ଘର ଆଦିବାସୀ ଅଂଚଳରେ ଥିବାରୁ ସେ ଖୁସି ବ୍ୟକ୍ତ କରିବା ସହ ବସ୍ତର ଓ ସରଗୁଜାରେ ଥିବା ପରିବାରମାନଙ୍କ ପାଇଁ ଏହି ଘରଗୁଡ଼ିକର ପରିବର୍ତନମୂଳକ ପ୍ରଭାବକୁ ସ୍ୱୀକାର କରିବା ସହ ଅସ୍ଥାୟୀ ଆଶ୍ରୟସ୍ଥଳୀରେ ଅନେକ ପିଢ଼ି କଷ୍ଟ ସହିଥିବା ପରିବାରମାନଙ୍କ ପାଇଁ ଏହାର ପରିବର୍ତନକାରୀ ପ୍ରଭାବକୁ ସ୍ୱୀକାର କରିବା ସହ ଏହାକୁ ଏକ ଗୁରୁତ୍ୱପୂର୍ଣ୍ଣ ଉପହାର ବୋଲି କହିଥିଲେ ।
"ଏହି ଘରଗୁଡ଼ିକ ନିର୍ମାଣରେ ସରକାର ସହାୟତା ପ୍ରଦାନ କରିଥିବା ବେଳେ ହିତାଧିକାରୀମାନେ ନିଜେ ନିଷ୍ପତ୍ତି ନେଇଥିଲେ ଯେ ସେମାନଙ୍କ ସ୍ୱପ୍ନର ଘର କିପରି ଡିଜାଇନ୍ କରାଯିବ", ଶ୍ରୀ ମୋଦୀ କହିଥିଲେ ଯେ ଏହି ଘରଗୁଡ଼ିକ କେବଳ ଚାରି କାନ୍ଥ ନୁହେଁ ବରଂ ଜୀବନର ପରିବର୍ତ୍ତନ । ଏହି ଘରଗୁଡ଼ିକୁ ଶୌଚାଳୟ, ବିଜୁଳି, ଉଜ୍ଜ୍ୱଳା ଗ୍ୟାସ୍ ସଂଯୋଗ ଏବଂ ପାଇପ୍ ପାଣି ଭଳି ଅତ୍ୟାବଶ୍ୟକ ସୁବିଧାରେ ସଜ୍ଜିତ କରିବାର ପ୍ରୟାସ ଉପରେ ସେ ଆଲୋକପାତ କରିଥିଲେ। ଏହି କାର୍ଯ୍ୟକ୍ରମରେ ମହିଳାଙ୍କ ଉଲ୍ଲେଖନୀୟ ଉପସ୍ଥିତିକୁ ସେ ଉଲ୍ଲେଖ କରିଥିଲେ ଏବଂ ମନ୍ତବ୍ୟ ଦେଇଥିଲେ ଯେ ଏହି ଘରଗୁଡ଼ିକ ମଧ୍ୟରୁ ଅଧିକାଂଶ ମହିଳାଙ୍କ ମାଲିକାନାରେ ରହିଛି। ପ୍ରଥମ ଥର ପାଇଁ ନିଜ ନାମରେ ସମ୍ପତ୍ତି ପଞ୍ଜୀକୃତ କରିଥିବା ହଜାର ହଜାର ମହିଳାଙ୍କ ସଫଳତାର ମାଇଲଖୁଣ୍ଟକୁ ସେ ସ୍ୱୀକାର କରିଛନ୍ତି। ଏହି ମହିଳାମାନଙ୍କ ମୁହଁରେ ପ୍ରତିଫଳିତ ହେଉଥିବା ଆନନ୍ଦ ଓ ଆଶୀର୍ବାଦ ପାଇଁ ସେ କୃତଜ୍ଞତା ଜ୍ଞାପନ କରିବା ସହ ଏହାକୁ ତାଙ୍କର ସର୍ବଶ୍ରେଷ୍ଠ ସମ୍ପତ୍ତି ବୋଲି କହିଥିଲେ।
ଲକ୍ଷ ଲକ୍ଷ ଗୃହ ନିର୍ମାଣର ବ୍ୟାପକ ପ୍ରଭାବ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ , ଏହା କେବଳ ସ୍ଥାନୀୟ କାରିଗର, ରାଜମିସ୍ତ୍ରୀ ଏବଂ ଗ୍ରାମରେ ଶ୍ରମିକମାନଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିନାହିଁ , ବରଂ ଏହି ଘରଗୁଡ଼ିକ ପାଇଁ ବ୍ୟବହୃତ ସାମଗ୍ରୀ ସ୍ଥାନୀୟ ସ୍ତରରେ ଉତ୍ପାଦିତ ହୁଏ, ଯାହା ଦ୍ୱାରା କ୍ଷୁଦ୍ର ଦୋକାନୀ ଏବଂ ପରିବହନ ଅପରେଟରମାନେ ଉପକୃତ ହୁଅନ୍ତି । ଏହି ଆବାସ ପ୍ରକଳ୍ପଗୁଡ଼ିକ ଛତିଶଗଡ଼ରେ ଉଲ୍ଲେଖନୀୟ ନିଯୁକ୍ତି ସୃଷ୍ଟି କରିଛି ଏବଂ ଅନେକଙ୍କ ଜୀବିକାରେ ଯୋଗଦାନ କରିଛି ବୋଲି ସେ ଉଲ୍ଲେଖ କରିଥିଲେ।
ଛତିଶଗଡ଼ବାସୀଙ୍କୁ ଦିଆଯାଇଥିବା ପ୍ରତ୍ୟେକ ପ୍ରତିଶ୍ରୁତି କୁ ସେମାନଙ୍କ ସରକାର ପୂରଣ କରୁଛନ୍ତି ବୋଲି ଆଲୋକପାତ କରି ଶ୍ରୀ ମୋଦୀ ବିଭିନ୍ନ ଯୋଜନାର ବହୁ ସଂଖ୍ୟକ ହିତାଧିକାରୀଙ୍କ ଉପସ୍ଥିତି ଉପରେ ଆଲୋକପାତ କରିବା ସହ ସରକାରୀ ଗ୍ୟାରେଣ୍ଟିକୁ ତ୍ୱରାନ୍ୱିତ କରିବା ଉପରେ ଗୁରୁତ୍ୱାରୋପ କରିଥିଲେ । ସେ ଉଲ୍ଲେଖ କରିଛନ୍ତି ଯେ ଛତିଶଗଡ଼ର ମହିଳାମାନଙ୍କୁ ଦିଆଯାଇଥିବା ପ୍ରତିଶ୍ରୁତି ପାଳନ କରାଯାଇଛି, ଯେଉଁଥିରେ ଧାନ ଚାଷୀଙ୍କୁ ଦୁଇ ବର୍ଷର ବକେୟା ବୋନସ୍ ବଣ୍ଟନ ଏବଂ ବର୍ଦ୍ଧିତ ଏମଏସପି ଦରରେ ଧାନ କ୍ରୟ ଅନ୍ତର୍ଭୁକ୍ତ । ଏହି ପଦକ୍ଷେପ ଲକ୍ଷ ଲକ୍ଷ କୃଷକ ପରିବାରକୁ ହଜାର ହଜାର କୋଟି ଟଙ୍କା ପ୍ରଦାନ କରିଛି। ପ୍ରଧାନମନ୍ତ୍ରୀ ନିଯୁକ୍ତି ପରୀକ୍ଷାରେ ଦୁର୍ନୀତି ପାଇଁ ପୂର୍ବ ସରକାରଙ୍କୁ ସମାଲୋଚନା କରିଥିଲେ ଏବଂ ସେମାନଙ୍କ ସରକାରଙ୍କ ସ୍ୱଚ୍ଛ ତଦନ୍ତ ଏବଂ ନିରପେକ୍ଷ ପରୀକ୍ଷା ଆୟୋଜନ ଉପରେ ଆଲୋକପାତ କରିଥିଲେ । ଛତିଶଗଡ଼ ବିଧାନସଭା, ଲୋକସଭା ଏବଂ ବର୍ତ୍ତମାନ ପୌର ନିର୍ବାଚନରେ ଏହାର ବିଜୟରୁ ସ୍ପଷ୍ଟ ହୋଇଛି ଯେ ଏହି ସଚ୍ଚୋଟ ପ୍ରୟାସ ବୃଦ୍ଧି ପାଉଥିବା ସମର୍ଥନ ସହିତ ଜନବିଶ୍ୱାସକୁ ସୁଦୃଢ଼ କରିଛି। ସରକାରଙ୍କ ଏହି ପଦକ୍ଷେପ ପାଇଁ ଜନସାଧାରଣଙ୍କ ପ୍ରବଳ ସମର୍ଥନ ଲାଗି ସେ କୃତଜ୍ଞତା ଜ୍ଞାପନ କରିଥିଲେ ।
ଚଳିତ ବର୍ଷ ଛତିଶଗଡ଼ ରାଜ୍ୟର ୨୫ତମ ବାର୍ଷିକୀ ଥିବାରୁ ଏହାକୁ ରାଜ୍ୟର ରୌପ୍ୟ ଜୟନ୍ତୀ ବର୍ଷ ଭାବେ ପାଳନ କରାଯାଉଥବା ବେଳେ, ଏହି ବର୍ଷ ଅଟଳ ବିହାରୀ ବାଜପେୟୀଙ୍କ ଜନ୍ମଶତବାର୍ଷିକୀ ପାଳନ ହେଉଛି ବୋଲି ଶ୍ରୀ ମୋଦୀ ଉଲ୍ଲେଖ କରିଥିଲେ। ଛତିଶଗଡ଼ ସରକାର ୨୦୨୫କୁ 'ଅଟଳ ନିର୍ମାଣ ବର୍ଷ' ଭାବେ ପାଳନ କରୁଛନ୍ତି ଏବଂ ଆମେ ଏହାକୁ ନିର୍ମାଣ କରିଛୁ ଏବଂ ଆମେ ଏହାକୁ ପୋଷଣ କରିବୁ ବୋଲି କହିଛନ୍ତି। ଆଜି ଉଦଘାଟନ ଓ ଶୁଭାରମ୍ଭ ହୋଇଥିବା ଭିତ୍ତିଭୂମି ପ୍ରକଳ୍ପଗୁଡ଼ିକ ଏହି ସଂକଳ୍ପର ଏକ ଅଂଶ ବୋଲି ସେ ଗୁରୁତ୍ୱାରୋପ କରିଥିଲେ।
ବିକାଶର ସୁଫଳ ଏହି ଅଞ୍ଚଳରେ ପହଞ୍ଚି ପାରୁ ନ ଥିବାରୁ ଛତିଶଗଡ଼କୁ ଏକ ଅଲଗା ରାଜ୍ୟ ଭାବେ ଗଠନ କରିବାକୁ ପଡ଼ିଥିଲା ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ପୂର୍ବ ସରକାରକୁ ବିକାଶରେ ବିଫଳତା ଏବଂ ହାତକୁ ନିଆଯାଇଥିବା ପ୍ରକଳ୍ପ ଗୁଡ଼ିକରେ ଦୁର୍ନୀତି ପାଇଁ ସମାଲୋଚନା କରିଥିଲେ। ସେ ଗୁରୁତ୍ୱାରୋପ କରିଥିଲେ ଯେ, ସେମାନଙ୍କ ସରକାର ଲୋକଙ୍କ କଲ୍ୟାଣକୁ ପ୍ରାଥମିକତା ଦେଇଛନ୍ତି ଏବଂ ସେମାନଙ୍କ ପିଲାମାନଙ୍କ ଜୀବନକୁ ଉନ୍ନତ କରିବା, ସୁବିଧା ଏବଂ ସୁଯୋଗରେ ଉନ୍ନତି ଆଣିବା ଉପରେ ଗୁରୁତ୍ୱ ଦେଇଛନ୍ତି । ଛତିଶଗଡ଼ର ପ୍ରତ୍ୟେକ ଗାଁରେ ଉନ୍ନୟନମୂଳକ ଯୋଜନା ପହଞ୍ଚାଇବାର ପ୍ରୟାସ ସମ୍ପର୍କରେ ସେ ଆଲୋକପାତ କରିଥିଲେ।
ଦୁର୍ଗମ ଆଦିବାସୀ ଅଂଚଳ, ଯେଉଁଠାରେ ବର୍ତ୍ତମାନ ପ୍ରଥମ ଥର ପାଇଁ ଗୁଣାତ୍ମକ ସଡ଼କ ପହଞ୍ଚିଛି, ସେଠାରେ ଅଗ୍ରଗତି ଉପରେ ଆଲୋକପାତ କରି ଶ୍ରୀ ମୋଦୀ ଏହି କାର୍ଯ୍ୟକ୍ରମରେ ପୂର୍ବରୁ ଏକ ନୂତନ ଟ୍ରେନ୍ ର ଶୁଭାରମ୍ଭ ସମେତ ଅନେକ ଅଞ୍ଚଳରେ ଟ୍ରେନ୍ ସେବା ଆରମ୍ଭ କରିବା ବିଷୟରେ ଉଲ୍ଲେଖ କରିଥିଲେ। ପୂର୍ବରୁ ଅନୁନ୍ନତ ଅଞ୍ଚଳରେ ବିଜୁଳି, ପାଇପ୍ ପାଣି ଓ ମୋବାଇଲ ଟାୱାରର ଉପଲବ୍ଧତା ଉପରେ ମଧ୍ୟ ସେ ଆଲୋକପାତ କରିଥିଲେ। ନୂଆ ସ୍କୁଲ, କଲେଜ ଓ ହସ୍ପିଟାଲ ନିର୍ମାଣ ଉପରେ ସେ ମନ୍ତବ୍ୟ ଦେଇ କହିଥିଲେ ଯେ , ଏହି ପଦକ୍ଷେପ ଗୁଡ଼ିକ ଛତିଶଗଡ଼ର ଚିତ୍ରକୁ ବଦଳାଇ ଦେଉଛି।
ଛତିଶଗଡ଼ର ସମ୍ପୂର୍ଣ୍ଣ ବିଦ୍ୟୁତୀକରଣ ରେଳ ନେଟୱାର୍କ ଥିବା ରାଜ୍ୟ ମାନଙ୍କ ମଧ୍ୟରୁ ଅନ୍ୟତମ ହେବାର ସଫଳତା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ , ରାଜ୍ୟରେ ବର୍ତ୍ତମାନ ପ୍ରାୟ ୪୦,୦୦୦ କୋଟି ଟଙ୍କାର ରେଳ ପ୍ରକଳ୍ପ ଚାଲିଛି ଏବଂ ବିଭିନ୍ନ ଅଞ୍ଚଳ ଏବଂ ପଡ଼ୋଶୀ ରାଜ୍ୟରେ ରେଳ ସଂଯୋଗରେ ଉନ୍ନତି ଆଣିବା ପାଇଁ ଚଳିତ ବର୍ଷ ବଜେଟରେ ୭,୦୦୦ କୋଟି ଟଙ୍କାର ବ୍ୟୟବରାଦ କରାଯାଇଛି । ବିକାଶ ପାଇଁ ଉଭୟ ବଜେଟ୍ ସମର୍ଥନ ଏବଂ ସଚ୍ଚୋଟ ଉଦ୍ଦେଶ୍ୟର ଆବଶ୍ୟକତା ରହିଛି ବୋଲି ଗୁରୁତ୍ୱାରୋପ କରି ଶ୍ରୀ ମୋଦୀ ପୂର୍ବ ସରକାରଙ୍କ ଦୁର୍ନୀତି ଏବଂ ଅପାରଗତା, ଯାହା ଆଦିବାସୀ ଅଂଚଳର ପ୍ରଗତିରେ ବାଧା ସୃଷ୍ଟି କରିଥିଲା ତାହାକୁ ସମାଲୋଚନା କରିଥିଲେ । ସେ କୋଇଲାର ଉଦାହରଣ ଦେଇ କହିଛନ୍ତି ଯେ ଛତିଶଗଡ଼ର ପ୍ରଚୁର ସଂରକ୍ଷଣ ସତ୍ତ୍ୱେ ପୂର୍ବ ସରକାରମାନେ ବିଦ୍ୟୁତ ପ୍ଲାଣ୍ଟଗୁଡ଼ିକୁ ଅବହେଳା କରିଥିବାରୁ ରାଜ୍ୟରେ ବିଦ୍ୟୁତ୍ ଅଭାବ ଦେଖାଦେଇଛି। ଏସବୁ ସମସ୍ୟାର ସମାଧାନ ଏବଂ ରାଜ୍ୟ ପାଇଁ ଭରସାଯୋଗ୍ୟ ବିଜୁଳି ସୁନିଶ୍ଚିତ କରିବା ଲାଗି ସେମାନଙ୍କ ସରକାରଙ୍କ ଅଧୀନରେ ନୂତନ ବିଦ୍ୟୁତ୍ ପ୍ଲାଣ୍ଟ ପ୍ରତିଷ୍ଠା କରାଯାଉଛି ବୋଲି ସେ କହିଥିଲେ।
ସୌର ଶକ୍ତି ଉପରେ ସରକାରଙ୍କ ଗୁରୁତ୍ବ ଏବଂ 'ପିଏମ୍ ସୂର୍ଯ୍ୟଘର ମାଗଣା ବିଜୁଳି ଯୋଜନା' ପ୍ରଚଳନ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ସରକାର ସୌର ପ୍ୟାନେଲ ସ୍ଥାପନ ପାଇଁ ପରିବାର ପିଛା ୭୮,୦୦୦ ଟଙ୍କା ସହାୟତା ପ୍ରଦାନ କରୁଛନ୍ତି। ସେ ଆହୁରି ମଧ୍ୟ କହିଥିଲେ ଯେ ଛତିଶଗଡ଼ର ଦୁଇ ଲକ୍ଷରୁ ଅଧିକ ପରିବାର ଏହି ଯୋଜନା ପାଇଁ ପଞ୍ଜୀକରଣ କରିସାରିଛନ୍ତି ଏବଂ ଅନ୍ୟମାନଙ୍କୁ ଏହି ଗୁରୁତ୍ୱପୂର୍ଣ୍ଣ ଲାଭ ପାଇବା ପାଇଁ ଏଥିରେ ଯୋଗ ଦେବାକୁ ସେ ଉତ୍ସାହିତ କରିଥିଲେ।
ସ୍ଥଳଭାଗ ଦ୍ଵାରା ଆବଦ୍ଧ ରାଜ୍ୟ ଛତିଶଗଡ଼କୁ ଗ୍ୟାସ ପାଇପଲାଇନ୍ ପହଞ୍ଚାଇବାର ଆହ୍ୱାନର ମୁକାବିଲା ପାଇଁ ସରକାରଙ୍କ ପ୍ରୟାସ ଉପରେ ଗୁରୁତ୍ୱାରୋପ କରି ଶ୍ରୀ ମୋଦୀ ଗ୍ୟାସ ଭିତ୍ତିଭୂମିରେ ଆବଶ୍ୟକ ପୁଞ୍ଜିନିବେଶକୁ ଅବହେଳା କରିଥିବାରୁ ପୂର୍ବ ସରକାରଙ୍କୁ ସମାଲୋଚନା କରିଥିଲେ ଏବଂ ଏହି ଅଞ୍ଚଳରେ ଗ୍ୟାସ ପାଇପଲାଇନ ବିଛାଇବା ପାଇଁ ଚାଲିଥିବା କାର୍ଯ୍ୟ ଉପରେ ଆଲୋକପାତ କରିଥିଲେ । ଏହି ପାଇପ୍ ଲାଇନ୍ ଗୁଡ଼ିକ ପେଟ୍ରୋଲିୟମ୍ ଉତ୍ପାଦ ପାଇଁ ଟ୍ରକ୍ ପରିବହନ ଉପରେ ନିର୍ଭରଶୀଳତା ହ୍ରାସ କରିବ, ଉପଭୋକ୍ତାଙ୍କ ଖର୍ଚ୍ଚ କମ୍ କରିବ ଏବଂ ସିଏନଜି ଯାନବାହନର ବ୍ୟବହାରକୁ ସକ୍ଷମ କରିବ ବୋଲି ସେ ଉଲ୍ଲେଖ କରିଛନ୍ତି। ୨ ଲକ୍ଷରୁ ଅଧିକ ଘରେ ପହଞ୍ଚାଇବାକୁ ଲକ୍ଷ୍ୟ ରଖାଯାଇଥିବା ବେଳେ ପାଇପ୍ ଯୋଗେ ରନ୍ଧନ ଗ୍ୟାସ ଦ୍ୱାରା ପରିବାର ଉପକୃତ ହେବେ ବୋଲି ସେ କହିଛନ୍ତି। ଗ୍ୟାସର ଉପଲବ୍ଧତା ଛତିଶଗଡ଼ରେ ନୂତନ ଶିଳ୍ପ ପ୍ରତିଷ୍ଠାରେ ସହାୟକ ହେବ ଏବଂ ଉଲ୍ଲେଖନୀୟ ନିଯୁକ୍ତି ସୁଯୋଗ ସୃଷ୍ଟି କରିବ ବୋଲି ସେ ଗୁରୁତ୍ୱାରୋପ କରିଥିଲେ ।
ଛତିଶଗଡ଼ ଏବଂ ଅନ୍ୟାନ୍ୟ ରାଜ୍ୟରେ ନକ୍ସଲବାଦର ବୃଦ୍ଧି ପାଇବାରେ ଏହା ସହାୟକ ହୋଇଛି ବୋଲି କହି ଦଶନ୍ଧି ଧରି ପୂର୍ବ ସରକାରଙ୍କ ନୀତିକୁ ସମାଲୋଚନା କରି ପ୍ରଧାନମନ୍ତ୍ରୀ କହିଥିଲେ ଯେ , ବିକାଶ ଏବଂ ସମ୍ବଳ ଅଭାବ ଥିବା ଅଞ୍ଚଳରେ ନକ୍ସଲବାଦ ବୃଦ୍ଧି ପାଉଛି ଏବଂ ଏହି ପ୍ରସଙ୍ଗ ଗୁଡ଼ିକର ସମାଧାନ କରିବା ପରିବର୍ତ୍ତେ ଏଭଳି ଜିଲ୍ଲାଗୁଡ଼ିକୁ ପଛୁଆ ବୋଲି ଘୋଷଣା କରାଯାଇଛି। ପୂର୍ବ ସରକାରଙ୍କ ଶାସନ ସମୟରେ ଛତିଶଗଡ଼ର ଅନେକ ଜିଲ୍ଲାରେ ସବୁଠାରୁ ଗରିବ ଆଦିବାସୀ ପରିବାର ସାମନା କରୁଥିବା ଅବହେଳା ଉପରେ ସେ ଆଲୋକପାତ କରିଥିଲେ। ଅପରପକ୍ଷରେ ଗରିବ ଆଦିବାସୀ ସଂପ୍ରଦାୟର ଆବଶ୍ୟକତା ପୂରଣ ପାଇଁ ସେମାନଙ୍କ ସରକାରଙ୍କ ପ୍ରୟାସ ଉପରେ ସେ ଗୁରୁତ୍ୱାରୋପ କରିଥିଲେ । ଶୌଚାଳୟ ଯୋଗାଇବା ପାଇଁ ସ୍ୱଚ୍ଛ ଭାରତ ଅଭିଯାନ, ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ପ୍ରଦାନ କରୁଥିବା ଆୟୁଷ୍ମାନ ଭାରତ ଯୋଜନା ଏବଂ ୮୦% ରିହାତିରେ ଔଷଧ ପ୍ରଦାନ କରୁଥିବା ପିଏମ ଜନ ଔଷଧି କେନ୍ଦ୍ର ପ୍ରତିଷ୍ଠା ଭଳି ପଦକ୍ଷେପ ବିଷୟରେ ସେ ଉଲ୍ଲେଖ କରିଥିଲେ ।
ଆଦିବାସୀ ସମ୍ପ୍ରଦାୟକୁ ଅବହେଳା କରି ସାମାଜିକ ନ୍ୟାୟ ପାଇଁ ମିଥ୍ୟା ଦାବି କରୁଥିବା ଲୋକମାନଙ୍କୁ ପ୍ରଧାନମନ୍ତ୍ରୀ ସମାଲୋଚନା କରିଥିଲେ। ଆଦିବାସୀ ସମାଜର ବିକାଶ ପାଇଁ ତାଙ୍କ ସରକାରଙ୍କ ପ୍ରତିବଦ୍ଧତା ଉପରେ ସେ ଗୁରୁତ୍ୱାରୋପ କରିଥିଲେ ଏବଂ "ଧରତି ଆବା ଜନଜାତି ଉତ୍କର୍ଷ ଅଭିଯାନ"ର ଶୁଭାରମ୍ଭ ଉପରେ ଆଲୋକପାତ କରିଥିଲେ, ଯାହା ଅଧୀନରେ ଆଦିବାସୀ ଅଂଚଳରେ ପାଖାପାଖି ୮୦,୦୦୦ କୋଟି ଟଙ୍କା ବିନିଯୋଗ କରାଯାଉଛି, ଯାହା ଦ୍ୱାରା ଛତିଶଗଡ଼ର ପ୍ରାୟ ୭,୦୦୦ ଆଦିବାସୀ ଗ୍ରାମ ଉପକୃତ ହେଉଛନ୍ତି । ବିଶେଷ କରି ଦୁର୍ବଳ ଜନଜାତି ଗୋଷ୍ଠୀମାନେ ସାମନା କରୁଥିବା ଅନନ୍ୟ ଆହ୍ୱାନଗୁଡ଼ିକୁ ଉଲ୍ଲେଖ କରି ଶ୍ରୀ ମୋଦୀ ଏହି ସମ୍ପ୍ରଦାୟମାନଙ୍କ ପାଇଁ ପ୍ରଥମ ପଦକ୍ଷେପ "ପିଏମ୍ ଜନମନ ଯୋଜନା" ଆରମ୍ଭ କରିବା ବିଷୟରେ ଉଲ୍ଲେଖ କରିଥିଲେ । ଏହି ଯୋଜନା ଅଧୀନରେ ଛତିଶଗଡ଼ର ୧୮ଟି ଜିଲ୍ଲାର ୨ହଜାରରୁ ଅଧିକ ବସ୍ତିର ବିକାଶ କରାଯାଉଛି। ପ୍ରଧାନମନ୍ତ୍ରୀ ଜନମନ ଯୋଜନାରେ ଛତିଶଗଡ଼ରେ ପ୍ରାୟ ଅଧା ଅର୍ଥାତ୍ ୨୫୦୦ କିଲୋମିଟର ରାସ୍ତା ନିର୍ମାଣ ହେଉଥିବା ବେଳେ ସାରା ଦେଶରେ ଆଦିବାସୀ ବସତି ପାଇଁ ୫,୦୦୦ କିଲୋମିଟର ରାସ୍ତା ମଞ୍ଜୁର କରାଯିବା ଉପରେ ସେ ଆଲୋକପାତ କରିଥିଲେ। ଏହି ପଦକ୍ଷେପ ଅଧୀନରେ ଅନେକ ହିତାଧିକାରୀ ସ୍ଥାୟୀ ଘର ପାଇଛନ୍ତି ବୋଲି ସେ ଉଲ୍ଲେଖ କରିଛନ୍ତି।
କେନ୍ଦ୍ର ଏବଂ ରାଜ୍ୟ ସରକାରଙ୍କ ଅଧୀନରେ ଛତିଶଗଡ଼ର ଦ୍ରୁତ ପରିବର୍ତ୍ତନ ଉପରେ ଆଲୋକପାତ କରି ଶ୍ରୀ ମୋଦୀ ସୁକମା ଜିଲ୍ଲାର ସ୍ୱାସ୍ଥ୍ୟ କେନ୍ଦ୍ରକୁ ଜାତୀୟ ଗୁଣବତ୍ତା ପ୍ରମାଣପତ୍ର ମିଳିବା ଏବଂ ଅନେକ ବର୍ଷ ପରେ ଦାନ୍ତେଓ୍ଵାଡାରେ ଏକ ସ୍ୱାସ୍ଥ୍ୟ କେନ୍ଦ୍ର ଖୋଲିବା ଭଳି ସଫଳତା ନୂତନ ଆତ୍ମବିଶ୍ୱାସ ଆଣିଛି ବୋଲି କହିଥିଲେ। ଏହି ପ୍ରୟାସ ନକ୍ସଲ ପ୍ରଭାବିତ ଅଂଚଳରେ ସ୍ଥାୟୀ ଶାନ୍ତିର ଏକ ନୂତନ ଯୁଗ ଆରମ୍ଭ କରୁଛି ବୋଲି ସେ ଗୁରୁତ୍ୱାରୋପ କରିଥିଲେ । ଡିସେମ୍ବର ୨୦୨୪ରେ 'ମନ୍ କି ବାତ୍' କାର୍ଯ୍ୟକ୍ରମରେ ଆଲୋଚନା ହୋଇଥିବା ବସ୍ତର ଅଲିମ୍ପିକ୍ସକୁ ଛତିଶଗଡ଼ର ସକାରାତ୍ମକ ପରିବର୍ତ୍ତନର ପ୍ରମାଣ ବୋଲି ଉଲ୍ଲେଖ କରି ସେ ଏହି କାର୍ଯ୍ୟକ୍ରମରେ ହଜାର ହଜାର ଯୁବକଙ୍କ ଉତ୍ସାହଜନକ ଅଂଶଗ୍ରହଣକୁ ଉଲ୍ଲେଖ କରିଥିଲେ, ଯାହା ରାଜ୍ୟର ପ୍ରଗତିକୁ ପ୍ରତିଫଳିତ କରିଥାଏ। ଛତିଶଗଡ଼ର ଯୁବପିଢ଼ିଙ୍କ ଉଜ୍ଜ୍ୱଳ ଭବିଷ୍ୟତକୁ ନେଇ ସେ ଆଶାବାଦୀ ହେବା ସହ ନୂଆ ଶିକ୍ଷାନୀତିର ପ୍ରଭାବଶାଳୀ କାର୍ଯ୍ୟକାରିତାକୁ ପ୍ରଶଂସା କରିଥିଲେ। ଛତିଶଗଡରେ ପ୍ରାୟ ୩୫୦ଟି ସମେତ ସମଗ୍ର ଦେଶରେ ୧୨,୦୦୦ରୁ ଅଧିକ ଆଧୁନିକ ପିଏମ୍ ଶ୍ରୀ ବିଦ୍ୟାଳୟ ପ୍ରତିଷ୍ଠା ଉପରେ ସେ ଆଲୋକପାତ କରିଥିଲେ, ଯାହା ଅନ୍ୟ ବିଦ୍ୟାଳୟ ପାଇଁ ମଡେଲ ଭାବରେ କାର୍ଯ୍ୟ କରିବ ଏବଂ ରାଜ୍ୟର ଶିକ୍ଷା ବ୍ୟବସ୍ଥାକୁ ଉନ୍ନତ କରିବ ।
ଛତିଶଗଡ଼ର ଏକଲବ୍ୟ ମଡେଲ ସ୍କୁଲ ଏବଂ ନକ୍ସଲ ପ୍ରଭାବିତ ଅଞ୍ଚଳରେ ସ୍କୁଲ ଖୋଲିବା ପାଇଁ କରାଯାଇଥିବା ଉତ୍କୃଷ୍ଟ କାର୍ଯ୍ୟକୁ ପ୍ରଧାନମନ୍ତ୍ରୀ ସ୍ୱୀକାର କରିଥିଲେ । ରାଜ୍ୟରେ ବିଦ୍ୟା ସମୀକ୍ଷା କେନ୍ଦ୍ରକୁ ଉଦଘାଟନ କରିବା ସହ ଏହା ଦେଶର ଶିକ୍ଷା ବ୍ୟବସ୍ଥା ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ସେ କହିଥିଲେ । ଏହି ପଦକ୍ଷେପ ଶିକ୍ଷାର ଗୁଣବତ୍ତା ବୃଦ୍ଧି କରିବା ସହ ଶ୍ରେଣୀଗୃହରେ ଶିକ୍ଷକ ଓ ଛାତ୍ରଛାତ୍ରୀଙ୍କୁ ବାସ୍ତବ ସମୟ ସହାୟତା ପ୍ରଦାନ କରିବ ବୋଲି ସେ ଗୁରୁତ୍ୱାରୋପ କରିଥିଲେ।
ହିନ୍ଦୀରେ ଡାକ୍ତରୀ ଓ ଇଞ୍ଜିନିୟରିଂ ପାଠପଢ଼ାକୁ ସକ୍ଷମ କରୁଥିବା ନୂତନ ଜାତୀୟ ଶିକ୍ଷା ନୀତି ଅଧୀନରେ ଆଉ ଏକ ପ୍ରତିଶ୍ରୁତି ପୂରଣ ବିଷୟରେ ଉଲ୍ଲେଖ କରି ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ ଯେ ଏହି ପଦକ୍ଷେପ ଗ୍ରାମ, ଅବହେଳିତ ଏବଂ ଆଦିବାସୀ ପରିବାରର ଯୁବକମାନଙ୍କ ପାଇଁ ଭାଷା ପ୍ରତିବନ୍ଧକକୁ ଦୂର କରିବ ଏବଂ ସେମାନଙ୍କୁ ସେମାନଙ୍କ ସ୍ୱପ୍ନ ସାକାର କରିବାରେ ସାହାଯ୍ୟ କରିବ । ବିଗତ ବର୍ଷ ଗୁଡ଼ିକରେ ଶ୍ରୀ ରମଣ ସିଂହଙ୍କ ଦ୍ୱାରା ସ୍ଥାପିତ ସୁଦୃଢ଼ ଭିତ୍ତିଭୂମିକୁ ସେ ସ୍ୱୀକାର କରିଥିଲେ ଏବଂ ଏହାକୁ ଆହୁରି ସୁଦୃଢ଼ କରିବା ପାଇଁ ବର୍ତ୍ତମାନର ସରକାରଙ୍କ ପ୍ରୟାସକୁ ଦୋହରାଇଥିଲେ । ଆଗାମୀ ୨୫ ବର୍ଷ ମଧ୍ୟରେ ଏହି ଭିତ୍ତିଭୂମିରେ ବିକାଶର ଏକ ଭବ୍ୟ ଢାଞ୍ଚା ନିର୍ମାଣ କରିବାକୁ ସେ ଲକ୍ଷ୍ୟ ସ୍ଥିର କରିଥିଲେ।
ଛତିଶଗଡ଼ର ପ୍ରଚୁର ସମ୍ବଳ, ସ୍ୱପ୍ନ ଏବଂ ସାମର୍ଥ୍ୟ ବିଷୟରେ ମନ୍ତବ୍ୟ ଦେଇ, ଏହାର ୫୦ ତମ ବାର୍ଷିକୀ ପାଳନ ବେଳକୁ ରାଜ୍ୟ ଦେଶର ଅନ୍ୟତମ ଅଗ୍ରଣୀ ରାଜ୍ୟ ରେ ପରିଣତ ହେବାର ଲକ୍ଷ୍ୟ ଧାର୍ଯ୍ୟ କରି ପ୍ରଧାନମନ୍ତ୍ରୀ ଶେଷରେ ପ୍ରତିଶ୍ରୁତି ଦେଇଥିଲେ ଯେ ବିକାଶର ସୁଫଳ ଛତିଶଗଡ଼ର ପ୍ରତ୍ୟେକ ପରିବାର ପାଖରେ ପହଞ୍ଚାଇବା ପାଇଁ ସରକାର କୌଣସି ପ୍ରଚେଷ୍ଟା କରିବା ଛାଡ଼ିବେ ନାହିଁ ।
ଏହି କାର୍ଯ୍ୟକ୍ରମରେ ଛତିଶଗଡ଼ର ରାଜ୍ୟପାଳ ଶ୍ରୀ ରାମେନ ଡେକା, ମୁଖ୍ୟମନ୍ତ୍ରୀ ଶ୍ରୀ ବିଷ୍ଣୁ ଦେଓ ସାଏ, କେନ୍ଦ୍ରମନ୍ତ୍ରୀ ଶ୍ରୀ ମନୋହର ଲାଲ ଏବଂ ଶ୍ରୀ ତୋଖନ ସାହୁ, ଛତିଶଗଡ଼ ବିଧାନସଭା ବାଚସ୍ପତି ଶ୍ରୀ ରମଣ ସିଂହ ପ୍ରମୁଖ ଉପସ୍ଥିତ ଥିଲେ ।
ପୃଷ୍ଠଭୂମି
ସମଗ୍ର ଦେଶରେ ଶକ୍ତି କ୍ଷେତ୍ରର ଉନ୍ନତି ପାଇଁ ପ୍ରଧାନମନ୍ତ୍ରୀ ପ୍ରତିଶ୍ରୁତିବଦ୍ଧ । ଏହି ପରିପ୍ରେକ୍ଷୀରେ ସୁଲଭ ଓ ଭରସାଯୋଗ୍ୟ ବିଜୁଳି ଯୋଗାଇବା ଏବଂ ଛତିଶଗଡ଼କୁ ବିଜୁଳି ଉତ୍ପାଦନରେ ଆତ୍ମନିର୍ଭରଶୀଳ କରିବା ଦିଗରେ ଏକାଧିକ ପଦକ୍ଷେପ ନିଆଯାଇଛି। ପ୍ରଧାନମନ୍ତ୍ରୀ ବିଳାସପୁର ଜିଲ୍ଲାରେ ୯,୭୯୦ କୋଟି ଟଙ୍କାରୁ ଅଧିକ ମୂଲ୍ୟର ଏନଟିପିସିର ସିପତ ସୁପର ଥର୍ମାଲ ପାୱାର ପ୍ରୋଜେକ୍ଟ ଷ୍ଟେଜ-୩ (୧×୮୦୦ ମେଗାୱାଟ)ର ଶିଳାନ୍ୟାସ କରିଛନ୍ତି । ଉଚ୍ଚ ଶକ୍ତି ଉତ୍ପାଦନ ଦକ୍ଷତା ସହିତ ଅତ୍ୟାଧୁନିକ ଅଲଟ୍ରା-ସୁପରକ୍ରିଟିକାଲ ଟେକ୍ନୋଲୋଜି ଉପରେ ଆଧାରିତ ହେଉଛି ଏହି ପିଟ୍ ହେଡ୍ ପ୍ରକଳ୍ପ । ସେ ଛତିଶଗଡ଼ ଷ୍ଟେଟ୍ ପାୱାର ଜେନେରେସନ୍ କମ୍ପାନୀ ଲିମିଟେଡ୍ (ସିଏସ୍ ପିଜିସିଏଲ୍)ର ୧୫,୮୦୦ କୋଟି ଟଙ୍କାରୁ ଅଧିକ ମୂଲ୍ୟର ପ୍ରଥମ ସୁପର କ୍ରିଟିକାଲ୍ ଥର୍ମାଲ ପାୱାର ପ୍ରୋଜେକ୍ଟ (୨ଏକ୍ସ୬୬୦ ମେଗାୱାଟ୍)ର କାର୍ଯ୍ୟର ଶୁଭାରମ୍ଭ କରିଛନ୍ତି। ୫୬୦ କୋଟି ଟଙ୍କାରୁ ଅଧିକ ମୂଲ୍ୟର ପଶ୍ଚିମାଞ୍ଚଳ ସମ୍ପ୍ରସାରଣ ଯୋଜନା (ଡବ୍ଲ୍ୟୁଆରଇଏସ୍) ଅଧୀନରେ ପାୱାରଗ୍ରିଡର ତିନୋଟି ପାୱାର ଟ୍ରାନ୍ସମିସନ ପ୍ରକଳ୍ପକୁ ସେ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଥିଲେ।
ଭାରତର ନିଟ୍-ଶୂନ୍ୟ ନିର୍ଗମନ ଲକ୍ଷ୍ୟ, ବାୟୁ ପ୍ରଦୂଷଣ ହ୍ରାସ ଏବଂ ସ୍ୱଚ୍ଛ ଶକ୍ତି ସମାଧାନ ପ୍ରଦାନ କରିବା ପାଇଁ ପ୍ରଧାନମନ୍ତ୍ରୀ କୋରେଆ, ସୁରଜପୁର, ବଳରାମପୁର ଏବଂ ସରଗୁଜା ଜିଲ୍ଲାରେ ଭାରତ ପେଟ୍ରୋଲିୟମ କର୍ପୋରେସନ୍ ଲିମିଟେଡ୍ (ବିପିସିଏଲ୍)ର ସିଟି ଗ୍ୟାସ୍ ବିତରଣ (ସିଜିଡି) ପ୍ରକଳ୍ପର ଶିଳାନ୍ୟାସ କରିଥିଲେ । ଏଥିରେ ୨୦୦ କିଲୋମିଟରରୁ ଅଧିକ ହାଇପ୍ରେସର ପାଇପଲାଇନ୍ ଏବଂ ୮୦୦ କିଲୋମିଟରରୁ ଅଧିକ ଏମଡିପିଇ (ମିଡିୟମ୍ ଡେନସିଟି ପଲିଥିନ୍) ପାଇପ୍ ଲାଇନ୍ ଏବଂ ୧୨୮୫ କୋଟି ଟଙ୍କାରୁ ଅଧିକ ମୂଲ୍ୟର ଏକାଧିକ ସିଏନଜି ବିତରଣ କେନ୍ଦ୍ର ଅନ୍ତର୍ଭୁକ୍ତ। ସେ ହିନ୍ଦୁସ୍ତାନ ପେଟ୍ରୋଲିୟମ୍ କର୍ପୋରେସନ୍ ଲିମିଟେଡ୍ (ଏଚପିସିଏଲ୍ )ର ୨୨୧୦ କୋଟି ଟଙ୍କାରୁ ଅଧିକ ମୂଲ୍ୟର ୫୪୦ କିଲୋମିଟର ବ୍ୟାପ୍ତ ବିଶାଖ-ରାୟପୁର ପାଇପଲାଇନ୍ (ଭିଆରପିଏଲ୍) ପ୍ରକଳ୍ପର ଶିଳାନ୍ୟାସ କରିଛନ୍ତି। ଏହି ମଲ୍ଟିପ୍ରଡକ୍ଟ (ପେଟ୍ରୋଲ, ଡିଜେଲ, କିରୋସିନ) ପାଇପଲାଇନର ବାର୍ଷିକ କ୍ଷମତା ୩ ନିୟୁତ ମେଟ୍ରିକ୍ ଟନ୍ ରୁ ଅଧିକ ହେବ ।
ଏହି ଅଞ୍ଚଳରେ ଯୋଗାଯୋଗରେ ଉନ୍ନତି ଆଣିବା ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ ମୋଟ ୧୦୮ କିଲୋମିଟର ଦୈର୍ଘ୍ୟ ବିଶିଷ୍ଟ ୭ଟି ରେଳ ପ୍ରକଳ୍ପର ଶିଳାନ୍ୟାସ କରିଥିଲେ ଏବଂ ୨,୬୯୦ କୋଟି ଟଙ୍କାରୁ ଅଧିକ ମୂଲ୍ୟର ମୋଟ ୧୧୧ କିଲୋମିଟର ଦୈର୍ଘ୍ୟ ବିଶିଷ୍ଟ ତିନୋଟି ରେଳ ପ୍ରକଳ୍ପକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଥିଲେ । ମାନ୍ଦିର ହାସୁଦ ଦେଇ ଅଭନପୁର - ରାୟପୁର ସେକ୍ସନରେ ମେମୁ ଟ୍ରେନ୍ ସେବାକୁ ସେ ପତାକା ଦେଖାଇ ଶୁଭାରମ୍ଭ କରିଥିଲେ। ଛତିଶଗଡରେ ଭାରତୀୟ ରେଳବାଇର ରେଳ ନେଟୱାର୍କର ଶତ ପ୍ରତିଶତ ବିଦ୍ୟୁତୀକରଣକୁ ସେ ଲୋକାର୍ପିତ କରିଥିଲେ । ଏହି ପ୍ରକଳ୍ପଗୁଡ଼ିକ ଭିଡ଼ ହ୍ରାସ କରିବ, ଯୋଗାଯୋଗରେ ଉନ୍ନତି ଆଣିବ ଏବଂ ସମଗ୍ର ଅଞ୍ଚଳରେ ସାମାଜିକ ଓ ଅର୍ଥନୈତିକ ଅଭିବୃଦ୍ଧିକୁ ବଢ଼ାଇବ।
ଏହି ଅଞ୍ଚଳରେ ସଡ଼କ ଭିତ୍ତିଭୂମିକୁ ଉନ୍ନତ କରି , ପ୍ରଧାନମନ୍ତ୍ରୀ ଜାତୀୟ ରାଜପଥ - ୯୩୦ (୩୭ କିମି)ର ଉନ୍ନତ ଝାଲମଲାରୁ ଶେରପର ସେକ୍ସନ ଏବଂ ଜାତୀୟ ରାଜପଥ -୪୩ (୭୫ କିଲୋମିଟର)ର ଅମ୍ବିକାପୁର - ପଥଲଗାଓଁ ସେକ୍ସନକୁ ପେଭଡ ସୋଲଡର ସହିତ ୨ ଲେନ୍ କୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଥିଲେ । ପ୍ରଧାନମନ୍ତ୍ରୀ ଜାତୀୟ ରାଜପଥ - ୧୩୦ଡିର କୋଣ୍ଡାଗାଁ - ନାରାୟଣପୁର ସେକ୍ସନ ପର୍ଯ୍ୟନ୍ତ ୪୭.୫ କିଲୋମିଟରକୁ ପେଭଡ ସୋଲଡର ସହିତ ୨ ଲେନ୍ କୁ ଉନ୍ନତ କରିବା କାର୍ଯ୍ୟର ଶିଳାନ୍ୟାସ କରିଥିଲେ । ୧୨୭୦ କୋଟି ଟଙ୍କାରୁ ଅଧିକ ମୂଲ୍ୟର ଏହି ପ୍ରକଳ୍ପଗୁଡ଼ିକ ଆଦିବାସୀ ଅଂଚଳ ଓ ଶିଳ୍ପାଞ୍ଚଳରେ ଉପଲବ୍ଧତାରେ ଯଥେଷ୍ଟ ଉନ୍ନତି ଆଣିବ ଏବଂ ଏହି ଅଞ୍ଚଳର ସାମଗ୍ରିକ ବିକାଶ କରିବ।
ସମସ୍ତଙ୍କ ପାଇଁ ଶିକ୍ଷା ସୁନିଶ୍ଚିତ କରିବା ଲାଗି ପ୍ରଧାନମନ୍ତ୍ରୀ ତାଙ୍କର ପ୍ରତିବଦ୍ଧତା ଅନୁଯାୟୀ, ରାଜ୍ୟର ୨୯ଟି ଜିଲ୍ଲାର ୧୩୦ଟି ପିଏମ୍ ଶ୍ରୀ ବିଦ୍ୟାଳୟ ଏବଂ ରାୟପୁରରେ ବିଦ୍ୟା ସମୀକ୍ଷା କେନ୍ଦ୍ର (ଭିଏସକେ) ନାମକ ଦୁଇଟି ପ୍ରମୁଖ ଶିକ୍ଷାମୂଳକ ପଦକ୍ଷେପକୁ ଲୋକାର୍ପିତ କରିଥିଲେ। ପିଏମ ସ୍କୁଲ ଫର ରାଇଜିଂ ଇଣ୍ଡିଆ ରେ ୧୩୦ ଟି ବିଦ୍ୟାଳୟର ଉନ୍ନତିକରଣ କରାଯିବ । ଏହି ବିଦ୍ୟାଳୟଗୁଡ଼ିକ ସୁସଂଗଠିତ ଭିତ୍ତିଭୂମି, ସ୍ମାର୍ଟ ବୋର୍ଡ, ଆଧୁନିକ ପରୀକ୍ଷାଗାର ଏବଂ ପାଠାଗାର ମାଧ୍ୟମରେ ଉନ୍ନତମାନର ଶିକ୍ଷା ପ୍ରଦାନ କରିବାରେ ସହାୟକ ହେବ । ରାୟପୁରରେ ଭିଏସକେ ବିଭିନ୍ନ ଶିକ୍ଷା ସମ୍ବନ୍ଧୀୟ ସରକାରୀ ଯୋଜନାର ଅନଲାଇନ୍ ଯାଂଚ ଏବଂ ତଥ୍ୟ ବିଶ୍ଳେଷଣକୁ ସକ୍ଷମ କରିବ ।
ଗ୍ରାମୀଣ ପରିବାରମାନଙ୍କ ପାଇଁ ଉପଯୁକ୍ତ ଆବାସ ଉପଲବ୍ଧ କରାଇବା ଏବଂ ସେମାନଙ୍କ ସ୍ୱାସ୍ଥ୍ୟ, ନିରାପତ୍ତା ଏବଂ ସାମଗ୍ରିକ ଜୀବନଧାରଣମାନରେ ଉନ୍ନତି ଆଣିବା ପାଇଁ ଦିଆଯାଇଥିବା ପ୍ରତିଶ୍ରୁତିକୁ ପୂରଣ କରିବା ପାଇଁ ପ୍ରଧାନମନ୍ତ୍ରୀ ଆବାସ ଯୋଜନା - ଗ୍ରାମୀଣ (ପିଏମଏୱାଇ-ଜି) ଅଧୀନରେ ୩ ଲକ୍ଷ ହିତାଧିକାରୀଙ୍କ ଗୃହ ପ୍ରବେଶ ଅନୁଷ୍ଠିତ ହୋଇଛି ଏବଂ ପ୍ରଧାନମନ୍ତ୍ରୀ ଏହି ଯୋଜନା ଅଧୀନରେ କିଛି ହିତାଧିକାରୀଙ୍କୁ ଚାବି ହସ୍ତାନ୍ତର କରିଛନ୍ତି ।
ସମ୍ପୂର୍ଣ୍ଣ ଅଭିଭାଷଣ ପଢିବା ପାଇଁ ଏଠାରେ କ୍ଲିକ କରନ୍ତୁ
आज नवरात्र के शुभ दिन, नव वर्ष पर छत्तीसगढ़ के तीन लाख गरीब परिवार, अपने नए घर में गृह प्रवेश कर रहे हैं: PM @narendramodi pic.twitter.com/FZKTFSJubC
— PMO India (@PMOIndia) March 30, 2025
हमने गरीब आदिवासियों के इलाज की चिंता की: PM @narendramodi pic.twitter.com/PsCGIEalbI
— PMO India (@PMOIndia) March 30, 2025
हम आदिवासी समाज के विकास के लिए भी विशेष अभियान चला रहे हैं: PM @narendramodi pic.twitter.com/QupZy3elIK
— PMO India (@PMOIndia) March 30, 2025
