ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀର ଡ. ଆମ୍ବେଦକର ଅନ୍ତର୍ଜାତୀୟ କେନ୍ଦ୍ରରେ 'କର୍ମଯୋଗୀ ସପ୍ତାହ' - ଜାତୀୟ ଶିକ୍ଷା ସପ୍ତାହର ଶୁଭାରମ୍ଭ କରିଛନ୍ତି ।
ଉପସ୍ଥିତ ବ୍ୟକ୍ତିମାନଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ମିଶନ କର୍ମଯୋଗୀ ମାଧ୍ୟମରେ ଆମର ଲକ୍ଷ୍ୟ ହେଉଛି ମାନବ ସମ୍ବଳ ସୃଷ୍ଟି କରିବା ଯାହା ଆମ ଦେଶର ବିକାଶର ପ୍ରେରକ ଶକ୍ତିରେ ପରିଣତ ହେବ । ଏହି ଅଗ୍ରଗତିରେ ସନ୍ତୋଷ ବ୍ୟକ୍ତ କରି ପ୍ରଧାନମନ୍ତ୍ରୀ କହିଥିଲେ ଯେ ଯଦି ଆମେ ଏହି ଉତ୍ସାହର ସହ କାର୍ଯ୍ୟ ଜାରି ରଖିବୁ, ତେବେ ଦେଶକୁ ପ୍ରଗତିରୁ କେହି ଅଟକାଇ ପାରିବେ ନାହିଁ । ଜାତୀୟ ଶିକ୍ଷା ସପ୍ତାହ ନୂତନ ଶିକ୍ଷା ଏବଂ ଅଭିଜ୍ଞତା ପ୍ରଦାନ କରିବ ଏବଂ କାର୍ଯ୍ୟ ପ୍ରଣାଳୀରେ ଉନ୍ନତି ଆଣିବାରେ ସାହାଯ୍ୟ କରିବ ଯାହା ଆମକୁ ୨୦୪୭ ସୁଦ୍ଧା ବିକଶିତ ଭାରତର ଲକ୍ଷ୍ୟ ହାସଲ କରିବାରେ ସାହାଯ୍ୟ କରିବ ।
ଗତ ୧୦ ବର୍ଷ ମଧ୍ୟରେ ସରକାରଙ୍କ ମାନସିକତା ବଦଳାଇବା ପାଇଁ ନିଆଯାଇଥିବା ପଦକ୍ଷେପ ବିଷୟରେ ପ୍ରଧାନମନ୍ତ୍ରୀ ଆଲୋଚନା କରିଥିଲେ, ଯାହାର ପ୍ରଭାବ ଆଜି ଲୋକମାନେ ଅନୁଭବ କରୁଛନ୍ତି । ସରକାରରେ କାର୍ଯ୍ୟରତ ଲୋକଙ୍କ ପ୍ରୟାସ ଓ ମିଶନ କର୍ମଯୋଗୀ ଭଳି ପଦକ୍ଷେପର ପ୍ରଭାବ ଯୋଗୁଁ ଏହା ସମ୍ଭବ ହୋଇପାରିଛି ବୋଲି ସେ କହିଛନ୍ତି।
ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ)କୁ ବିଶ୍ୱ ଏକ ସୁଯୋଗ ଭାବେ ଦେଖୁଥିବା ବେଳେ ଭାରତ ପାଇଁ ଏହା ଉଭୟ ଆହ୍ୱାନ ଓ ସୁଯୋଗ ସୃଷ୍ଟି କରୁଛି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ସେ ଦୁଇଟି ଏଆଇ ବିଷୟରେ କହିଥିଲେ, ଗୋଟିଏ ଆର୍ଟିଫିସିଆଲ ଇଣ୍ଟେଲିଜେନ୍ସ ଏବଂ ଅନ୍ୟଟି ହେଉଛି ଆକାଂକ୍ଷୀ ଭାରତ । ପ୍ରଧାନମନ୍ତ୍ରୀ ଉଭୟଙ୍କୁ ସନ୍ତୁଳନ କରିବା ଉପରେ ଗୁରୁତ୍ୱାରୋପ କରିଥିଲେ ଏବଂ କହିଥିଲେ ଯେ ଯଦି ଆମେ ଆକାଂକ୍ଷୀ ଭାରତର ପ୍ରଗତିକୁ ତ୍ୱରାନ୍ୱିତ କରିବା ପାଇଁ ଆର୍ଟିଫିସିଆଲ ଇଣ୍ଟେଲିଜେନ୍ସକୁ ସଫଳତାର ସହ ବ୍ୟବହାର କରୁ, ତେବେ ଏହା ପରିବର୍ତ୍ତନ ଆଣିପାରିବ ।
ଡିଜିଟାଲ ବିପ୍ଳବ ଏବଂ ସୋସିଆଲ ମିଡିଆର ପ୍ରଭାବ ଯୋଗୁଁ ସୂଚନା ସମାନତା ଏକ ନିୟମରେ ପରିଣତ ହୋଇଛି ବୋଲି ପ୍ରଧାନମନ୍ତ୍ରୀ କହିଥିଲେ । ଏଆଇ ସହିତ, ସୂଚନା ପ୍ରକ୍ରିୟାକରଣ ମଧ୍ୟ ସମାନ ଭାବରେ ସହଜ ହେଉଛି ଯାହା ନାଗରିକମାନଙ୍କୁ ସଚେତନ କରୁଛି ଏବଂ ସରକାରଙ୍କ ସମସ୍ତ କାର୍ଯ୍ୟକଳାପ ଉପରେ ନଜର ରଖିବାକୁ ସଶକ୍ତ କରୁଛି । ତେଣୁ ସରକାରୀ କର୍ମଚାରୀମାନେ ଅତ୍ୟାଧୁନିକ ବୈଷୟିକ ଉନ୍ନତି ସହିତ ନିଜକୁ ସଚେତନ ରଖିବା ଆବଶ୍ୟକ, ଯାହା ଦ୍ୱାରା ଉନ୍ନତ ମାନଦଣ୍ଡକୁ ପୂରଣ କରାଯାଇପାରିବ, ଯେଉଁଥିରେ ମିଶନ କର୍ମଯୋଗୀ ସହାୟକ ସାବ୍ୟସ୍ତ ହୋଇପାରିବ ।
ଅଭିନବ ଚିନ୍ତାଧାରା ଏବଂ ନାଗରିକ କେନ୍ଦ୍ରୀତ ଆଭିମୁଖ୍ୟ ଅନୁସରଣ କରିବା ଉପରେ ସେ ଗୁରୁତ୍ୱାରୋପ କରିଥିଲେ। ନୂତନ ଚିନ୍ତାଧାରା ପାଇବା ପାଇଁ ସେ ଷ୍ଟାର୍ଟଅପ୍, ଗବେଷଣା ଏଜେନ୍ସି ଏବଂ ଯୁବବର୍ଗଙ୍କ ସାହାଯ୍ୟ ଲୋଡ଼ିବା କଥା ଉଲ୍ଲେଖ କରିଥିଲେ। ମତାମତ ବ୍ୟବସ୍ଥାର ବ୍ୟବସ୍ଥା କରିବାକୁ ସେ ବିଭାଗଗୁଡ଼ିକୁ ଅନୁରୋଧ କରିଥିଲେ।
ପ୍ରଧାନମନ୍ତ୍ରୀ ଆଇଜିଓଟି ପ୍ଲାଟଫର୍ମକୁ ପ୍ରଶଂସା କରିଥିଲେ ଏବଂ କହିଥିଲେ ଯେ ପ୍ଲାଟଫର୍ମରେ ୪୦ ଲକ୍ଷରୁ ଅଧିକ ସରକାରୀ କର୍ମଚାରୀ ପଞ୍ଜୀକରଣ କରିଛନ୍ତି । ୧୪୦୦ରୁ ଅଧିକ ପାଠ୍ୟକ୍ରମ ଉପଲବ୍ଧ ଅଛି ଏବଂ ବିଭିନ୍ନ ପାଠ୍ୟକ୍ରମରେ ସମାପ୍ତ ହେବାର ଦେଢ଼ କୋଟିରୁ ଅଧିକ ସାର୍ଟିଫିକେଟ୍ ଅଧିକାରୀମାନଙ୍କୁ ମିଳିଛି।
ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ବେସାମରିକ ସେବା ପ୍ରଶିକ୍ଷଣ ଅନୁଷ୍ଠାନଗୁଡ଼ିକ ଖାଲରେ ପଡି କାମ କରିବାର ଶିକାର ହୋଇଛନ୍ତି । ସେ କହିଛନ୍ତି ଯେ ଆମେ ସେମାନଙ୍କ ମଧ୍ୟରେ ଭାଗିଦାରୀ ଏବଂ ସହଯୋଗ ବୃଦ୍ଧି କରିବାକୁ ଚେଷ୍ଟା କରିଛୁ । ଯୋଗାଯୋଗର ଉପଯୁକ୍ତ ମାଧ୍ୟମ ପ୍ରତିଷ୍ଠା କରିବା, ପରସ୍ପରଠାରୁ ଶିଖିବା, ବିଶ୍ୱସ୍ତରୀୟ ସର୍ବୋତ୍ତମ ଅଭ୍ୟାସ ବିଷୟରେ ଆଲୋଚନା କରିବା ଏବଂ ଗ୍ରହଣ କରିବା ଏବଂ ଏକ ସମ୍ପୂର୍ଣ୍ଣ ସରକାରୀ ଆଭିମୁଖ୍ୟ ସୃଷ୍ଟି କରିବାକୁ ସେ ପ୍ରଶିକ୍ଷଣ ଅନୁଷ୍ଠାନଗୁଡ଼ିକୁ ଅନୁରୋଧ କରିଥିଲେ।
ସେପ୍ଟେମ୍ବର ୨୦୨୦ରେ ମିଶନ କର୍ମଯୋଗୀ ଆରମ୍ଭ କରାଯାଇଥିଲା, ଯେଉଁଥିରେ ବିଶ୍ୱସ୍ତରୀୟ ଦୃଷ୍ଟିକୋଣରୁ ଭାରତୀୟ ମୂଲ୍ୟବୋଧରେ ଆଧାରିତ ଭବିଷ୍ୟତରେ ପ୍ରସ୍ତୁତ ସିଭିଲ ସର୍ଭିସର ପରିକଳ୍ପନା କରାଯାଇଥିଲା । ଜାତୀୟ ଶିକ୍ଷଣ ସପ୍ତାହ (ଏନଏଲଡବ୍ଲୁ) ସରକାରୀ କର୍ମଚାରୀମାନଙ୍କ ପାଇଁ ବ୍ୟକ୍ତିଗତ ଏବଂ ସାଂଗଠନିକ ଦକ୍ଷତା ବିକାଶ ଦିଗରେ ଏକ "ଏକ ସରକାର" ବାର୍ତ୍ତା ସୃଷ୍ଟି କରିବା ଏବଂ ସମସ୍ତଙ୍କୁ ଜାତୀୟ ଲକ୍ଷ୍ୟ ସହିତ ଯୋଡ଼ିବା ଏବଂ ଆଜୀବନ ଶିକ୍ଷାକୁ ପ୍ରୋତ୍ସାହିତ କରିବା ଦିଗରେ ନୂତନ ପ୍ରୋତ୍ସାହନ ପ୍ରଦାନ କରିବ ।
