ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ତେଲେଙ୍ଗାନାର ଆଦିଲାବାଦ ଠାରେ ୫୬,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ବିଦ୍ୟୁତ, ରେଳ ଏବଂ ସଡ଼କ କ୍ଷେତ୍ର ସହିତ ଜଡ଼ିତ ଏକାଧିକ ଉନ୍ନୟନମୂଳକ ପ୍ରକଳ୍ପର ଶିଳାନ୍ୟାସ , ଉଦଘାଟନ କରିଛନ୍ତି ତଥା ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି ।
ସମାବେଶକୁ ସମ୍ବୋଧିତ କରି , ପ୍ରଧାନମନ୍ତ୍ରୀ କହିଥିଲେ ଯେ ଆଦିଲାବାଦର ଭୂମି କେବଳ ତେଲେଙ୍ଗାନାର ନୁହେଁ , ବରଂ ସମଗ୍ର ଦେଶ ସହ ଜଡିତ ବିକାଶ ପ୍ରକଳ୍ପର ସାକ୍ଷୀ ପାଲଟିଛି କାରଣ ୫୬,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ୩୦ରୁ ଅଧିକ ଉନ୍ନୟନ ପ୍ରକଳ୍ପ ଦେଶ ଉଦ୍ଦେଶ୍ୟରେ ଉତ୍ସର୍ଗ ହୋଇଛି କିମ୍ବା ଆଜି ଏହାର ଶିଳାନ୍ୟାସ କରାଯାଇଛି । ଏହି ପ୍ରକଳ୍ପଗୁଡ଼ିକ ମଧ୍ୟରେ ରାଜ୍ୟର ଶକ୍ତି, ପରିବେଶ ସ୍ଥାୟୀତା ଏବଂ ସଡ଼କ ଯୋଗାଯୋଗ ସହିତ ଜଡିତ ଅନେକ ପ୍ରକଳ୍ପ ଅନ୍ତର୍ଭୁକ୍ତ ।
କେନ୍ଦ୍ର ସରକାର ଏବଂ ତେଲେଙ୍ଗାନା ରାଜ୍ୟ ଉଭୟ ପ୍ରାୟ ୧୦ ବର୍ଷ ପୂରଣ କରିଛନ୍ତି ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଏବଂ କହିଥିଲେ ଯେ ନାଗରିକଙ୍କ ସ୍ୱପ୍ନକୁ ସାକାର କରିବା ପାଇଁ ସରକାର ରାଜ୍ୟକୁ ସମସ୍ତ ସମ୍ଭାବ୍ୟ ସହାୟତା ଯୋଗାଇ ଦେଉଛନ୍ତି । ଆଜି ମଧ୍ୟ ୮୦୦ ମେଗାୱାଟ କ୍ଷମତା ବିଶିଷ୍ଟ ଏନଟିପିସି ୟୁନିଟ ୨ ଉଦ୍ଘାଟିତ ହୋଇଛି , ଯାହା ତେଲେଙ୍ଗାନାର ବିଦ୍ୟୁତ ଉତ୍ପାଦନ କ୍ଷମତାକୁ ଆହୁରି ବୃଦ୍ଧି କରିବ ବୋଲି ପ୍ରଧାନମନ୍ତ୍ରୀ ସୂଚନା ଦେଇଛନ୍ତି । ସେ ଅମ୍ବାରୀ - ଆଦିଲାବାଦ - ପିମ୍ପଲଖୁଟି ରେଳ ଲାଇନର ବିଦ୍ୟୁତିକରଣ ଶେଷ ହେବା ଏବଂ ଆଦିଲାବାଦ, ବେଲା ଏବଂ ମୁଲୁଗୁରେ ଦୁଇଟି ପ୍ରମୁଖ ଜାତୀୟ ରାଜପଥ ପ୍ରକଳ୍ପର ଶିଳାନ୍ୟାସ ବିଷୟରେ ମଧ୍ୟ ଉଲ୍ଲେଖ କରିଥିଲେ ।
ଆଜିର ଏହି ଆଧୁନିକ ରେଳ ଓ ସଡ଼କ ପ୍ରକଳ୍ପଗୁଡ଼ିକ ତେଲେଙ୍ଗାନା ତଥା ସମଗ୍ର ଅଞ୍ଚଳର ବିକାଶକୁ ତ୍ୱରାନ୍ୱିତ କରିବା ସହିତ ଯାତ୍ରା ସମୟ ହ୍ରାସ କରିବ, ପର୍ଯ୍ୟଟନକୁ ପ୍ରୋତ୍ସାହିତ କରିବ ଏବଂ ଅଗଣିତ ନିଯୁକ୍ତି ସୁଯୋଗ ସୃଷ୍ଟି କରିବ ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ।
ରାଜ୍ୟ ଗୁଡ଼ିକର ବିକାଶ ମାଧ୍ୟମରେ ଦେଶର ବିକାଶର ମନ୍ତ୍ରକୁ ପ୍ରଧାନମନ୍ତ୍ରୀ ଦୋହରାଇ ଥିଲେ । ଉନ୍ନତ ଅର୍ଥନୀତି ସହିତ ଦେଶ ଉପରେ ବିଶ୍ୱାସ ବୃଦ୍ଧି ପାଇଥାଏ ଏବଂ ରାଜ୍ୟରେ ପୁଞ୍ଜି ନିବେଶ ହେଲେ, ରାଜ୍ୟମାନେ ହିଁ ଲାଭବାନ ହୁଅନ୍ତି ବୋଲି ସେ କହିଛନ୍ତି । ଗତ ତ୍ରୈମାସିକରେ ଭାରତ ଏକମାତ୍ର ପ୍ରମୁଖ ଅର୍ଥନୀତି ଭାବେ ୮.୪ ପ୍ରତିଶତ ଅଭିବୃଦ୍ଧି ହାସଲ କରିଥିବାରୁ ଭାରତୀୟ ଅର୍ଥନୀତିର ଉଚ୍ଚ ଅଭିବୃଦ୍ଧି ହାରକୁ ନେଇ ବିଶ୍ୱବ୍ୟାପୀ ଚର୍ଚ୍ଚା ଜୋର ଧରିଛି ବୋଲି ସେ ଉଲ୍ଲେଖ କରିଥିଲେ । "ଏହି ଦ୍ରୁତ ଗତିରେ ଭାରତ ବିଶ୍ୱର ତୃତୀୟ ବୃହତ୍ତମ ଅର୍ଥନୀତିରେ ପରିଣତ ହେବ" ବୋଲି ପ୍ରଧାନମନ୍ତ୍ରୀ କହିବା ସହିତ ଏହା ମଧ୍ୟ ଉଲ୍ଲେଖ କରିଥିଲେ ଯେ, ଏହାର ଅର୍ଥ ହେଉଛି ତେଲେଙ୍ଗାନାର ଅର୍ଥନୀତି ମଧ୍ୟ ଉଚ୍ଚ ଅଭିବୃଦ୍ଧିସମ୍ପନ୍ନ ହେବ ।
ତେଲେଙ୍ଗାନା ଭଳି କ୍ଷେତ୍ରରେ ପୂର୍ବରୁ ହୋଇଥିବା ଅବହେଳାକୁ ମନେ ପକାଇ ପ୍ରଧାନମନ୍ତ୍ରୀ ଗତ ୧୦ ବର୍ଷ ମଧ୍ୟରେ ଶାସନର ନୂତନ ପଦ୍ଧତି ଉପରେ ଆଲୋକପାତ କରିଥିଲେ । ବିଗତ ୧୦ ବର୍ଷ ମଧ୍ୟରେ ରାଜ୍ୟର ବିକାଶ ପାଇଁ ଅଧିକ ଆବଣ୍ଟନ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ, ଆମ ପାଇଁ ବିକାଶର ଅର୍ଥ ହେଉଛି ଅତି ଗରିବ ଲୋକ ମାନଙ୍କର ବିକାଶ, ଦଳିତ, ଆଦିବାସୀ, ପଛୁଆ ଓ ବଞ୍ଚିତଙ୍କ ବିକାଶ । ପ୍ରଧାନମନ୍ତ୍ରୀ କହିଥିଲେ ଯେ ୨୫ କୋଟିରୁ ଅଧିକ ଲୋକ ଦାରିଦ୍ର୍ୟରୁ ମୁକୁଳିଛନ୍ତି ଏବଂ ଗରିବଙ୍କ ପାଇଁ ସରକାରୀ କଲ୍ୟାଣକାରୀ ଯୋଜନାଗୁଡ଼ିକୁ ସେ ଶ୍ରେୟ ଦେଇଥିଲେ ।
ବକ୍ତବ୍ୟ ଶେଷ କରି ପ୍ରଧାନମନ୍ତ୍ରୀ କହିଥିଲେ ଯେ ଆଗାମୀ ୫ ବର୍ଷ ମଧ୍ୟରେ ଏଭଳି ଅଭିଯାନକୁ ଆହୁରି ବ୍ୟାପକ କରାଯିବ । ଅନ୍ୟମାନଙ୍କ ମଧ୍ୟରେ ତେଲେଙ୍ଗାନା ରାଜ୍ୟପାଳ ଡ. ତାମିଲିସାଇ ସୌନ୍ଦରରାଜନ, ତେଲେଙ୍ଗାନା ମୁଖ୍ୟମନ୍ତ୍ରୀ ଶ୍ରୀ ରେବନ୍ତ ରେଡ୍ଡୀ ଏବଂ କେନ୍ଦ୍ର ମନ୍ତ୍ରୀ ଶ୍ରୀ ଜି. କିଶନ ରେଡ୍ଡୀ ଉପସ୍ଥିତ ଥିଲେ ।
ପୃଷ୍ଠଭୂମି
ପ୍ରଧାନମନ୍ତ୍ରୀ ସମଗ୍ର ଦେଶରେ ଶକ୍ତି କ୍ଷେତ୍ର ସହ ଜଡିତ ବିଭିନ୍ନ ପ୍ରକଳ୍ପର ଉଦଘାଟନ, ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ ଏବଂ ଶିଳାନ୍ୟାସ କରିଥିଲେ । ପ୍ରଧାନମନ୍ତ୍ରୀ ତେଲେଙ୍ଗାନାର ପେଡାପଲ୍ଲୀ ଠାରେ ଏନଟିପିସିର ୮୦୦ ମେଗାୱାଟ (ୟୁନିଟ-୨) ତେଲେଙ୍ଗାନା ସୁପର ଥର୍ମାଲ ପାୱାର ପ୍ରକଳ୍ପର ଲୋକାର୍ପଣ କରିଥିଲେ । ଅଲ୍ଟ୍ରା - ସୁପରକ୍ରିଟିକାଲ ଟେକ୍ନୋଲୋଜି ଉପରେ ଆଧାରିତ ଏହି ପ୍ରକଳ୍ପ ତେଲେଙ୍ଗାନାକୁ ୮୫% ବିଜୁଳି ଯୋଗାଣ କରିବ ଏବଂ ଭାରତରେ ଏନ୍ଟିପିସିର ସମସ୍ତ ପାୱାର ଷ୍ଟେସନ ମଧ୍ୟରେ ଏହାର ଉତ୍ପାଦନ ଦକ୍ଷତା ଅଧିକ ଅର୍ଥାତ୍ ପ୍ରାୟ ୪୨% ବିଦ୍ୟୁତ ଉତ୍ପାଦନ ଦକ୍ଷତା ରହିବ । ଏହି ପ୍ରକଳ୍ପର ଶିଳାନ୍ୟାସ ମଧ୍ୟ ପୂର୍ବରୁ ପ୍ରଧାନମନ୍ତ୍ରୀ କରିଥିଲେ ।
ପ୍ରଧାନମନ୍ତ୍ରୀ ଝାଡ଼ଖଣ୍ଡର ଛତ୍ରା ଠାରେ ଉତ୍ତର କରଣପୁରା ସୁପର ଥର୍ମାଲ ପାୱାର ପ୍ରକଳ୍ପର ୬୬୦ ମେଗାୱାଟ (ୟୁନିଟ-୨) ଲୋକାର୍ପଣ କରିଥିଲେ । ଏୟାର କୁଲ୍ଡ କଣ୍ଡେନସର (ଏସିସି) ସହ ଏତେ ବଡ଼ ଧରଣର ପରିକଳ୍ପନା କରାଯାଇଥିବା ଏହି ପ୍ରକଳ୍ପ ହେଉଛି ଦେଶର ପ୍ରଥମ ସୁପରକ୍ରିଟିକାଲ ଥର୍ମାଲ ପାୱାର ପ୍ରକଳ୍ପ ଯାହା ପାରମ୍ପରିକ ୱାଟର - କୁଲ୍ଡ କଣ୍ଡେନସର୍ ତୁଳନାରେ ଜଳ ବ୍ୟବହାରକୁ ୧/୩ ଭାଗକୁ ହ୍ରାସ କରିଥାଏ । ପ୍ରଧାନମନ୍ତ୍ରୀ ଏହି ପ୍ରକଳ୍ପ କାର୍ଯ୍ୟର ଶୁଭାରମ୍ଭ କରିଥିଲେ ।
ପ୍ରଧାନମନ୍ତ୍ରୀ ଛତିଶଗଡ଼ର ବିଳାସପୁରର ସିପତ ଠାରେ ଫ୍ଲାଇ ଆଶ୍ ଆଧାରିତ ହାଲୁକା ଓଜନ ଏଗ୍ରିଗେଟ୍ ପ୍ଲାଣ୍ଟ ; ଉତ୍ତର ପ୍ରଦେଶର ଗ୍ରେଟର ନୋଏଡାରେ ଥିବା ଏସ୍ଟିପି ୱାଟରରୁ ଗ୍ରୀନ ହାଇଡ୍ରୋଜେନ ପ୍ଲାଣ୍ଟକୁ ଲୋକାର୍ପଣ କରିଥିଲେ । ଏହାବ୍ୟତୀତ ପ୍ରଧାନମନ୍ତ୍ରୀ ଉତ୍ତରପ୍ରଦେଶର ସୋନଭଦ୍ରା ଠାରେ ସିଙ୍ଗରୌଲି ସୁପର ଥର୍ମାଲ ପାୱାର ପ୍ରକଳ୍ପ, ପର୍ଯ୍ୟାୟ - ୩ (୨ x ୮୦୦ ମେଗାୱାଟ); ଛତିଶଗଡ଼ର ରାୟଗଡ଼ର ଲାରା ଠାରେ ଫ୍ଲୁ ଗ୍ୟାସ୍ କାର୍ବନ ଡାଇଅକ୍ସାଇଡ୍ରୁ ୪ଜି ଇଥାନଲ ପ୍ଲାଣ୍ଟ; ଆନ୍ଧ୍ରପ୍ରଦେଶର ବିଶାଖାପାଟଣାର ସିଂହାଦ୍ରି ଠାରେ ସମୁଦ୍ର ଜଳରୁ ସବୁଜ ହାଇଡ୍ରୋଜେନ୍ ପ୍ଲାଣ୍ଟ ; ଏବଂ ଛତିଶଗଡ଼ର କୋରବା ଠାରେ ଫ୍ଲାଇ ଆଶ୍ ଆଧାରିତ ଫ୍ଲାଗ୍ ଏଗ୍ରିଗେଟ୍ ପ୍ଲାଣ୍ଟ୍ର ଶିଳାନ୍ୟାସ କରିଛନ୍ତି ।
ପ୍ରଧାନମନ୍ତ୍ରୀ ପାୱାର ଗ୍ରିଡ୍ କର୍ପୋରେସନ୍ ଅଫ୍ ଇଣ୍ଡିଆର ୭ଟି ପ୍ରକଳ୍ପର ଉଦ୍ଘାଟନ କରିବା ସହ ଗୋଟିଏ ପ୍ରକଳ୍ପର ଶିଳାନ୍ୟାସ କରିଛନ୍ତି । ଜାତୀୟ ଗ୍ରିଡ୍କୁ ସୁଦୃଢ଼ କରିବାରେ ଏହି ପ୍ରକଳ୍ପଗୁଡ଼ିକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ।
ପ୍ରଧାନମନ୍ତ୍ରୀ ରାଜସ୍ଥାନର ଜୈସଲମେର ଠାରେ ଜାତୀୟ ଜଳବିଦ୍ୟୁତ୍ ଶକ୍ତି ନିଗମ (ଏନ୍ଏଚ୍ପିସି)ର ୩୮୦ ମେଗାୱାଟ୍ ସୌର ପ୍ରକଳ୍ପର ଉଦଘାଟନ କରିଥିଲେ । ଏହି ପ୍ରକଳ୍ପରୁ ପ୍ରତି ବର୍ଷ ପ୍ରାୟ ୭୯୨ ନିୟୁତ ୟୁନିଟ୍ ସବୁଜ ଶକ୍ତି ଉତ୍ପାଦନ ହେବ ।
ପ୍ରଧାନମନ୍ତ୍ରୀ ଉତ୍ତରପ୍ରଦେଶର ଜାଲୌନ ଠାରେ ବୁନ୍ଦେଲଖଣ୍ଡ ସୌର ଉର୍ଜା ଲିମିଟେଡ୍ (ବିଏସ୍ ୟୁଏଲ୍)ର ୧୨୦୦ ମେଗାୱାଟ୍ ଜାଲୌନ୍ ଅଲ୍ଟ୍ରା ମେଗା ନବୀକରଣୀୟ ଶକ୍ତି ପାର୍କର ଶିଳାନ୍ୟାସ କରିଛନ୍ତି । ଏହି ପାର୍କରୁ ପ୍ରତି ବର୍ଷ ପ୍ରାୟ ୨୪୦୦ ନିୟୁତ ୟୁନିଟ୍ ବିଦ୍ୟୁତ୍ ଉତ୍ପାଦନ ହେବ ।
ପ୍ରଧାନମନ୍ତ୍ରୀ ଉତ୍ତରପ୍ରଦେଶର ଜାଲୌନ ଏବଂ କାନପୁର ଦେହାଟରେ ସତଲେଜ୍ ଜଳ ବିଦ୍ୟୁତ ନିଗମ (ଏସ୍ଜେଭିଏନ୍)ର ତିନୋଟି ସୌର ଶକ୍ତି ପ୍ରକଳ୍ପର ଉଦଘାଟନ କରିଥିଲେ । ଏହି ପ୍ରକଳ୍ପ ଗୁଡ଼ିକର ସମୁଦାୟ କ୍ଷମତା ୨୦୦ ମେଗାୱାଟ୍ । ଏହି ସବୁ ପ୍ରକଳ୍ପର ଶିଳାନ୍ୟାସ ମଧ୍ୟ ପ୍ରଧାନମନ୍ତ୍ରୀ କରିଥିଲେ । ପ୍ରଧାନମନ୍ତ୍ରୀ ଉତ୍ତରାଖଣ୍ଡର ଉତ୍ତରକାଶୀରେ ନୈତୱାର ମୋରି ଜଳ ବିଦ୍ୟୁତ୍ କେନ୍ଦ୍ର ସହିତ ଆନୁସଙ୍ଗିକ ଟ୍ରାନ୍ସମିସନ ଲାଇନ୍କୁ ଉଦ୍ଘାଟନ କରିଥିଲେ । ପ୍ରଧାନମନ୍ତ୍ରୀ ହିମାଚଳ ପ୍ରଦେଶର ବିଳାସପୁର ଏବଂ ଆସାମର ଧୁବରି ଠାରେ ଏସ୍ଜେଭିଏନ୍ର ଦୁଇଟି ସୌର ପ୍ରକଳ୍ପ ଏବଂ ହିମାଚଳ ପ୍ରଦେଶରେ ୩୮୨ ମେଗାୱାଟ ସୁନ୍ନି ଡ୍ୟାମ୍ ଜଳ ବିଦ୍ୟୁତ ପ୍ରକଳ୍ପର ମଧ୍ୟ ଶିଳାନ୍ୟାସ କରିଥିଲେ ।
ପ୍ରଧାନମନ୍ତ୍ରୀ ଉତ୍ତର ପ୍ରଦେଶର ଲଳିତପୁର ଜିଲ୍ଲାରେ ଟୁସ୍କୋର ୬୦୦ ମେଗାୱାଟ ଲଳିତପୁର ସୌର ଶକ୍ତି ପ୍ରକଳ୍ପର ଶିଳାନ୍ୟାସ କରିଥିଲେ । ଏହି ପ୍ରକଳ୍ପରେ ବାର୍ଷିକ ୧୨୦୦ ନିୟୁତ ୟୁନିଟ୍ ସବୁଜ ଶକ୍ତି ଉତ୍ପାଦନ ହେବ ।
ନବୀକରଣୀୟ ଶକ୍ତିରୁ ୨୫୦୦ ମେଗାୱାଟ୍ ବିଦ୍ୟୁତ୍ ନିଷ୍କାସନ ପାଇଁ ପ୍ରଧାନମନ୍ତ୍ରୀ ରିନ୍ୟୁଜ୍ର କୋପ୍ପାଲ - ନରେନ୍ଦ୍ର ଟ୍ରାନ୍ସମିସନ୍ ଯୋଜନାର ଉଦଘାଟନ କରିଥିଲେ । ଏହି ଆନ୍ତଃରାଜ୍ୟ ଯୋଜନା କର୍ଣ୍ଣାଟକର କୋପ୍ପାଲ ଜିଲ୍ଲାରେ ଅବସ୍ଥିତ । ଦାମୋଦର ଭ୍ୟାଲି କର୍ପୋରେସନ୍ ଏବଂ ଇଣ୍ଡିଗ୍ରିଡ୍ ବିଦ୍ୟୁତ୍ କ୍ଷେତ୍ର ସମ୍ବନ୍ଧୀୟ ଅନ୍ୟାନ୍ୟ ପ୍ରକଳ୍ପକୁ ମଧ୍ୟ ପ୍ରଧାନମନ୍ତ୍ରୀ ଉଦ୍ଘାଟନ କରିବେ ।
ଏହି ଗସ୍ତ ସମୟରେ ଶକ୍ତି କ୍ଷେତ୍ର ବ୍ୟତୀତ ସଡ଼କ ଓ ରେଳ କ୍ଷେତ୍ରର ମଧ୍ୟ ପ୍ରକଳ୍ପ ହାତକୁ ନିଆଯାଇଥିଲା । ପ୍ରଧାନମନ୍ତ୍ରୀ ନୂତନ ଭାବେ ବିଦ୍ୟୁତ୍ ସଂଯୋଗ ହୋଇଥିବା ଅମ୍ବାରୀ - ଆଦିଲାବାଦ - ପିମ୍ପଲଖୁଟି ରେଳ ଲାଇନକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଥିଲେ । ସେ ଜାତୀୟ ରାଜପଥ- ୩୫୩ବି ଏବଂ ଜାତୀୟ ରାଜପଥ- ୧୬୩ ମାଧ୍ୟମରେ ତେଲେଙ୍ଗାନାକୁ ମହାରାଷ୍ଟ୍ର ଏବଂ ତେଲେଙ୍ଗାନାକୁ ଛତିଶଗଡ଼ ସହିତ ସଂଯୋଗ କରୁଥିବା ଦୁଇଟି ପ୍ରମୁଖ ଜାତୀୟ ରାଜପଥ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଥିଲେ ।
जिस विकास का सपना तेलंगाना के लोगों ने देखा था, उसे पूरा करने में केंद्र सरकार हर तरह से सहयोग कर रही है: PM pic.twitter.com/8I3Z7ksFP2
— PMO India (@PMOIndia) March 4, 2024
राज्यों के विकास से देश का विकास। pic.twitter.com/11cmY9t9wf
— PMO India (@PMOIndia) March 4, 2024
