ମହାମହିମ ରାଷ୍ଟ୍ରପତି ଯୋକୋ ୱିଡୋଡୋ,
ବିଶିଷ୍ଟ ପ୍ରତିନିଧି ବୃନ୍ଦ,
ଗଣମାଧ୍ୟମର ବନ୍ଧୁଗଣ,
ମୋର ବକ୍ତବ୍ୟ ପ୍ରାରମ୍ଭରେ ସମ୍ପ୍ରତି ଇଣ୍ଡୋନେସିଆର ଆଚେ ପ୍ରଦେଶରେ ସଂଘଟିତ ଭୂମିକମ୍ପରେ ପ୍ରାଣ ହରାଇଥିବା ଲୋକମାନଙ୍କ ପ୍ରତି ମୁଁ ଗଭୀର ଶୋକବ୍ୟକ୍ତ କରୁଛି ।
ବନ୍ଧୁଗଣ,
ରାଷ୍ଟ୍ରପତି ଯୋକୋ ୱିଡୋଡୋଙ୍କୁ ସ୍ଵାଗତ କରି ମୁଁ ନିଜକୁ ଗୌରବାନ୍ୱିତ ମନେ କରୁଛି । ତାଙ୍କର ଏହା ପ୍ରଥମ ଭାରତ ଗସ୍ତ । ୨୦୧୪ ନଭେମ୍ବର ମାସରେ ପ୍ରଥମେ ରାଷ୍ଟ୍ରପତି ୱିଡୋଡୋଙ୍କ ସହ ମୋର ସାକ୍ଷାତ ହୋଇଥିଲା ଏବଂ ସେତେବେଳେ ଆମ ଦୁଇ ଦେଶର ସମ୍ପର୍କ କିଭଳି ଉଭୟ ରାଷ୍ଟ୍ର ଏବଂ ସମଗ୍ର କ୍ଷେତ୍ର ପ୍ରତି ସହାୟକ ହୋଇପାରିବ ସେ ସମ୍ପର୍କରେ ବିସ୍ତୃତ ଆଲୋଚନା କରିଥିଲୁ ।
ମହାନୁଭବ,
ଆପଣ ଏକ ମହାନ ରାଷ୍ଟ୍ରର ନେତା । ବିଶ୍ଵର ସର୍ବବୃହତ ମୁସଲମାନ ରାଷ୍ଟ୍ର ଭାବେ ଇଣ୍ଡୋନେସିଆ ଗଣତନ୍ତ୍ର, ବିବିଧତା, ବହୁବାଦ ଏବଂ ସାମାଜିକ ସଂହତିର ପ୍ରତୀକ ରୂପେ ଦଣ୍ଡାୟମାନ । ଏହି ସବୁ ଗୁଣ ମଧ୍ୟ ଆମର ମୂଲ୍ୟବୋଧର ଅଂଶ ବିଶେଷ । ଇତିହାସ ପୃଷ୍ଠାରେ ବହୁ କାଳ ଧରି ଆମ ଦୁଇରାଷ୍ଟ୍ର ବାଣିଜ୍ୟ ଓ ସାଂସ୍କୃତିକ ସହଯୋଗ ସୂତ୍ରରେ ଘନିଷ୍ଠ ଭାବେ ବାନ୍ଧି ହୋଇରହିଛି । ଆମେ ଏପରି ଏକ ଭୌଗୋଳିକ ଭୂଖଣ୍ଡରେ ବଂଚିଛୁ ଯାହା ବିଶ୍ଵରେ ଘଟୁଥିବା ରାଜନୈତିକ, ଅର୍ଥନୈତିକ ତଥା ପ୍ରତିରକ୍ଷା ସମ୍ବନ୍ଧୀୟ ପରିବର୍ତ୍ତନର କେନ୍ଦ୍ରସ୍ଥଳୀ ଭାବେ ବିବେଚିତ । ଆପଣଙ୍କର ଭାରତ ଗସ୍ତ ଆମର ଗୁରୁତ୍ଵପୂର୍ଣ୍ଣ ସୁରକ୍ଷା ସମ୍ପର୍କକୁ ଅଧିକ ଶକ୍ତି ଓ ବେଗ ପ୍ରଦାନ କରିବାରେ ସହାୟକ ହେବ । ପୁନଶ୍ଚ ଆମର ସମନ୍ୱିତ କାର୍ଯ୍ୟାନୁଷ୍ଠାନ ଏସିଆ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଶାନ୍ତି, ସମୃଦ୍ଧି ଓ ସ୍ଥିରତା ରକ୍ଷା ପାଇଁ ବଳ ଯୋଗାଇବ ।
ବନ୍ଧୁଗଣ,
ଆମର “ଏକ୍ଟ ଇଷ୍ଟ ନୀତି”ରେ ଇଣ୍ଡୋନେସିଆ ଏକ ଗୁରୁତ୍ଵପୂର୍ଣ୍ଣ ସହଭାଗୀ । ଦକ୍ଷିଣ ପୂର୍ବ ଏସିଆର ଏହା ସବୁଠାରୁ ବଡ ଆର୍ଥିକ ଶକ୍ତି । ଭାରତ ଏବେ ବିଶ୍ଵର ଅନ୍ୟତମ ଦ୍ରୁତ ପ୍ରଗତିଶୀଳ ବିଶାଳ ଅର୍ଥବ୍ୟବସ୍ଥାରେ ପରିଣତ ହୋଇଛି । ଦୁଇ ବିଶାଳ ଗଣତାନ୍ତ୍ରିକ ରାଷ୍ଟ୍ର ତଥା ଅଗ୍ରଣୀ ଅର୍ଥନୈତିକ ଶକ୍ତି ଭାବେ, ଆମର ପରସ୍ପର ସହ ଯଥେଷ୍ଟ ଆର୍ଥିକ ଏବଂ ପ୍ରତିରକ୍ଷା ସମ୍ପର୍କ ରହିଛି । ପୁନଶ୍ଚ ଆମର ସମାନ ଉଦବେଗ ଏବଂ ଚାଲେଞ୍ଜମାନ ମଧ୍ୟ ରହିଛି । ଆଜି ରାଷ୍ଟ୍ରପତିଙ୍କ ସହ ମୋର ଏ ସମ୍ବନ୍ଧରେ ବିସ୍ତୃତ ଆଲୋଚନା ହୋଇଛି ଯେଉଁଥିରେ ଅନେକ କ୍ଷେତ୍ରରେ ପୂର୍ଣ୍ଣ ସହଯୋଗ ଆଦାନପ୍ରଦାନ ସାମିଲ । ପ୍ରତିରକ୍ଷା ଓ ନିରାପତ୍ତା ସହଯୋଗ ପ୍ରତି ଆମେ ଗୁରୁତ୍ଵ ପ୍ରଦାନ କରିବା ସହ ଏ ଦିଗରେ ସହମତ ହୋଇଛୁ । ଦୁଇଟି ସାମୁଦ୍ରିକ ବାଣିଜ୍ୟ ତଥା ପ୍ରତିବେଶୀ ରାଷ୍ଟ୍ରଭାବେ ଆମର ସାମୁଦ୍ରିକ ପଥର ସୁରକ୍ଷା ଏବଂ ନିରାପତ୍ତା ନିମନ୍ତେ ପରସ୍ପରକୁ ସବୁପ୍ରକାର ସାହାଯ୍ୟ ଓ ସହଯୋଗ ଯୋଗାଇଦେବାକୁ ଆମେ ସହମତ ହୋଇଛୁ । ପୁନଶ୍ଚ, ବିପର୍ଯ୍ୟୟ ମୁକାବିଲା ତଥା ପର୍ଯ୍ୟାବରଣ ସୁରକ୍ଷା ଦିଗରେ ଦୁଇ ରାଷ୍ଟ୍ର ମଧ୍ୟରେ ସହଯୋଗ କାଏମ ରହିବ । ସାମୁଦ୍ରିକ ସହଯୋଗ ସମ୍ପର୍କୀତ ମିଳିତ ବିବୃତିରେ ଏହି ସବୁ କ୍ଷେତ୍ରରେ ଆମର ମିଳିତ କାର୍ଯ୍ୟକ୍ରମ ସମ୍ପର୍କରେ ବିସ୍ତୃତ ବିବରଣୀ ପ୍ରଦାନ କରାଯାଇଛି । ଏତଦବ୍ୟତୀତ, ଆତଙ୍କବାଦ ବିରୋଧୀ କାର୍ଯ୍ୟାନୁଷ୍ଠାନ, ସଂଗଠିତ ଅପରାଧ, ଚୋରା ନିଶାଦ୍ରବ୍ୟ କାରବାର ଓ ମାନବ ଚାଲାଣ ନିୟନ୍ତ୍ରଣ କ୍ଷେତ୍ରରେ ଆମେ ପରସ୍ପରକୁ ସବୁ ପ୍ରକାର ସାହାଯ୍ୟ ଓ ସହଯୋଗ ଯୋଗାଇଦେବାକୁ ସହମତ ହୋଇଛୁ ।
ବନ୍ଧୁଗଣ,
ରାଷ୍ଟ୍ରପତି ଏବଂ ମୁଁ ଏକ ସୁଦୃଢ଼ ଆର୍ଥିକ ଓ ବିକାଶ ସହଭାଗୀତା ନିମନ୍ତେ ସହମତ ହୋଇଛୁ । ଏହାଦ୍ଵାରା ପରସ୍ପର ମଧ୍ୟରେ ଚିନ୍ତନ, ବାଣିଜ୍ୟ, ପୁଞ୍ଜି ଏବଂ ମାନବସମ୍ବଳ ସହଜ ଓ ସରଳ ଭାବେ ବିନିମୟ ହୋଇପାରିବ । ମୁଁ ରାଷ୍ଟ୍ରପତି ୱିଡୋଡୋଙ୍କ ସହ ସମ୍ପୂର୍ଣ୍ଣ ଏକମତ ଯେ ଭାରତୀୟ କମ୍ପାନୀମାନେ ଫାର୍ମାସିଉଟିକାଲ, ଆଇଟି ଏବଂ ସଫ୍ଟୱେୟାର ତଥା କୌଶଳ ବିକାଶ କ୍ଷେତ୍ରରେ ଇଣ୍ଡୋନେସିଆ ସହ ଘନିଷ୍ଠ ଭାବେ ହାତ ମିଳାଇ କାର୍ଯ୍ୟ କରିପାରିବେ । ଦୁଇ ବିକାଶଶୀଳ ରାଷ୍ଟ୍ର ଭାବେ ଆମେ ଭିତ୍ତିଭୂମି ବିକାଶ ଦିଗରେ ଅଗ୍ରସର ହେବାକୁ ସହମତ ହୋଇଛୁ । ଏ ଦିଗରେ ଉଭୟ ରାଷ୍ଟ୍ରରୁ ପୁଞ୍ଜି ପ୍ରବାହ ଆମର ଭିତ୍ତିଭୂମି ବିକାଶ ପରସ୍ପରର ଦକ୍ଷତା ଓ କାର୍ଯ୍ୟକ୍ରମକୁ ସୁଦୃଢ଼ କରିବ । ଏହି ପରିପ୍ରେକ୍ଷୀରେ CEOs ଫୋରମ ଅଗ୍ରଣୀ ଭୂମିକା ଗ୍ରହଣ କରିବା ଉଚିତ ଯଦ୍ଵାରା ଦୁଇ ରାଷ୍ଟ୍ରର ଶିଳ୍ପସଂସ୍ଥାମାନଙ୍କ ମଧ୍ୟରେ ବ୍ୟାପକ ଓ ଘନିଷ୍ଠ ସହଯୋଗ ନିମନ୍ତେ ନୂଆ ନୂଆ କ୍ଷେତ୍ର ଚିହ୍ନଟ କରାଯାଇପାରିବ । ଭାରତ-ଆସିଆନ ମୁକ୍ତ ବାଣିଜ୍ୟ ରାଜିନାମାକୁ ଯଥାଶୀଘ୍ର କାର୍ଯ୍ୟକାରୀ କରାଯିବ ନିମନ୍ତେ ଆମେ ସହମତ ହୋଇଛୁ । ପୁନଶ୍ଚ, ଏହି ପରିପ୍ରେକ୍ଷୀରେ କ୍ଷେତ୍ରୀୟ ଆର୍ଥିକ ସହଭାଗୀତା ରାଜିନାମାର ଚୂଡାନ୍ତକରଣ ଏ ଦିଗରେ ଏକ ଗୁରୁତ୍ଵପୂର୍ଣ୍ଣ ପଦକ୍ଷେପ ହେବ ବୋଲି ଆମର ପୂର୍ଣ୍ଣ ବିଶ୍ଵାସ । ସେହିଭଳି ଦୁଇ ଦଶନ୍ଧି ଧରି ମହାକାଶ ଗବେଷଣା କ୍ଷେତ୍ରରେ ଆମ ମଧ୍ୟରେ ଥିବା ସମ୍ପର୍କକୁ ଅଧିକ ଘନିଷ୍ଠ କରିବା ଉପରେ ଆମେ ଗୁରୁତ୍ଵ ଆରୋପ କରୁଛୁ । ଆମ ଦ୍ୱିପାକ୍ଷିକ ସହଯୋଗୀତାକୁ ଅଧିକ କ୍ରିୟାଶୀଳ କରିବା ସକାଶେ ରାଷ୍ଟ୍ରପତି ୱିଡୋଡୋ ଏବଂ ମୁଁ ପୂର୍ବରୁ ଗଠିତ ମନ୍ତ୍ରୀସ୍ତରୀୟ ଗୋଷ୍ଠୀ ଯଥାଶୀଘ୍ର ବୈଠକରେ ମିଳିତ ହୋଇ ଦ୍ୱିପାକ୍ଷିକ ସହଯୋଗ କାର୍ଯ୍ୟକ୍ରମକୁ ଆଗକୁ ଆଗେଇ ନେବା ଦିଗରେ କାର୍ଯ୍ୟାରମ୍ଭ ନିମନ୍ତେ ନିର୍ଦ୍ଦେଶ ଦେଇଛୁ ।
ବନ୍ଧୁଗଣ,
ଆମ ଦୁଇ ରାଷ୍ଟ୍ର ମଧ୍ୟରେ ଇତିହାସର ବନ୍ଧନ ଏବଂ ଦୃଢ଼ ସାଂସ୍କୃତିକ ସମ୍ପର୍କ ଆମ ସମାନ ଐତିହ୍ୟକୁ ପ୍ରତିପାଦିତ କରେ । ତେଣୁ ଆମର ଐତିହାସିକ ସମ୍ପର୍କ ଉପରେ ଅଧିକ ଗବେଷଣା କରାଯିବା ଉପରେ ରାଷ୍ଟ୍ରପତି ଓ ମୁଁ ଗୁରୁତ୍ଵ ଆରୋପ କରୁଛି । ଏବଂ ଏହି ପରିପ୍ରେକ୍ଷୀରେ ଆମେ ଉଭୟ ରାଷ୍ଟ୍ରର ବିଶ୍ଵବିଦ୍ୟାଳୟମାନଙ୍କରେ ଭାରତୀୟ ଏବଂ ଇଣ୍ଡୋନେସୀୟ ଅଧ୍ୟୟନ ଚେୟାର ସ୍ଥାପନ ପ୍ରକ୍ରିୟାକୁ ତ୍ଵରାନ୍ୱିତ କରିବାକୁ ସହମତ ହୋଇଛୁ । ସେହିପରି ଆମେ ଆମର ଛାତ୍ରବୃତ୍ତି ଏବଂ ତାଲିମ କାର୍ଯ୍ୟକ୍ରମ ସଂପ୍ରସାରଣ ନିମନ୍ତେ ରାଜି ହୋଇଛୁ । ପ୍ରତ୍ୟକ୍ଷ ସମ୍ପର୍କ ସ୍ଥାପନ ଏବଂ ଦୁଇ ରାଷ୍ଟ୍ରର ଲୋକଙ୍କ ମଧ୍ୟରେ ସହଯୋଗ ସ୍ଥାପନର ଗୁରୁତ୍ଵ ବିଷୟରେ ସଭିଏଁ ଅବଗତ ଅଛନ୍ତି ଏବଂ ଏହି ମର୍ମରେ, ଗରୁଡ ଇଣ୍ଡୋନେସିଆ ମୁମ୍ବାଇ ସହ ସିଧାସଳଖ ବିମାନସେବା ଆରମ୍ଭ କରିବା ନିଷ୍ପତ୍ତିକୁ ଆମେ ସ୍ଵାଗତ କରୁଛୁ ।
ମହାନୁଭବ,
ଆପଣଙ୍କ ଭାରତ ଗସ୍ତ ପାଇଁ ମୁଁ ପୁଣି ଥରେ ଆପଣଙ୍କୁ ଧନ୍ୟବାଦ ଜଣାଉଛି । ଆମର ଦ୍ୱିପାକ୍ଷିକ କଥାବାର୍ତ୍ତାକୁ ଏକ ନୂଆ ଶୀର୍ଷରେ ପହଂଚାଇବା ନିମନ୍ତେ ଆପଣଙ୍କ ଉଦ୍ଦେଶ୍ୟ ସହ ମୁଁ ସମ୍ପୂର୍ଣ୍ଣ ଏକମତ । ଏବଂ ମୁଁ ଦୃଢ଼ନିଶ୍ଚିତ ଯେ ଆମର ଆଜିର ଆଲୋଚନା ଏବଂ ସ୍ଵାକ୍ଷରିତ ରାଜିନାମା ଭବିଷ୍ୟତ ପାଇଁ କାର୍ଯ୍ୟଯୋଜନା ପ୍ରସ୍ତୁତ କରିବ । ଏ ଦିଗରେ ଦିଗଦର୍ଶନ ଦେବା ତଥା ଆମର ଗୁରୁତ୍ଵପୂର୍ଣ୍ଣ ପ୍ରତିରକ୍ଷା ସମ୍ପର୍କ ଆଗକୁ ବଢାଇ ନେବାରେ ସହାୟକ ହେବ । ମୋର ବକ୍ତବ୍ୟ ଶେଷ କରିବା ପୂର୍ବରୁ ଇଣ୍ଡୋନେସିଆରେ ଆମର ସମସ୍ତ ବନ୍ଧୁଙ୍କୁ ମୁଁ ଧନ୍ୟବାଦ ଜଣାଇବାକୁ ଚାହେଁ ।
ଆପଣମାନଙ୍କୁ ଅଶେଷ ଧନ୍ୟବାଦ ।
PM @narendramodi begins Press Statement by expressing condolences on the loss of life due to the recent earthquake in Aceh pic.twitter.com/rx0w7fSIQV
— Vikas Swarup (@MEAIndia) December 12, 2016
PM @narendramodi: I am honoured to welcome President @jokowi on his first State Visit to India. You are the Leader of a great nation. pic.twitter.com/KXIuYcO50t
— Vikas Swarup (@MEAIndia) December 12, 2016
PM: As the world’s most populous Muslim nation Indonesia stands for democracy, pluralism, & social harmony. These are also our values pic.twitter.com/LNt6QwBNar
— Vikas Swarup (@MEAIndia) December 12, 2016
PM: As two large democracies and major emerging economies, we have shared economic & strategic interests. We also face common challenges
— Vikas Swarup (@MEAIndia) December 12, 2016
PM: My extensive conversation with President focused on the full range of our coop'n. We agreed to prioritize defence & security cooperation pic.twitter.com/sC5rGWrNBQ
— Vikas Swarup (@MEAIndia) December 12, 2016
PM: President and I also agreed to build a strong eco & development partnership that strengthens the flow of ideas, trade, capital & people pic.twitter.com/SjFRC5rSga
— Vikas Swarup (@MEAIndia) December 12, 2016
PM: We agreed on imp of stimul'g research on historical linkages & speed up establishment of Chairs of Indian & Indonesian Studies
— Vikas Swarup (@MEAIndia) December 12, 2016
PM: The imp of improving direct connectivity is well-known, so we welcome @IndonesiaGaruda's decision to commence direct flights to Mumbai. pic.twitter.com/Ogw8GW6WUa
— Vikas Swarup (@MEAIndia) December 12, 2016
PM: I am confident that our discussions & the agreements will help shape an action agenda and add new intensity to our Strategic engagement pic.twitter.com/xDiR9hCuDL
— Vikas Swarup (@MEAIndia) December 12, 2016
PM concludes Press Statement by wishing the people of Indonesia on this day: Salamat Mamparigati Hari Raya Mawlid Nabi Mohammed pic.twitter.com/3oHIeg0AyV
— Vikas Swarup (@MEAIndia) December 12, 2016
