ତାଜିକିସ୍ତାନ ରାଷ୍ଟ୍ରପତିଙ୍କ ଭାରତ ଗସ୍ତବେଳେ ଗଣମାଧ୍ୟମକୁ ପ୍ରଧାନମନ୍ତ୍ରୀଙ୍କ ବିବୃତି

 

ତାଜିକିସ୍ତାନ ରିପବ୍ଲିକର ରାଷ୍ଟ୍ରପତି

ମହାମହିମ ଏମୋମାଲି ରହମାନ

ଦେବୀ ଓ ସଜ୍ଜନମାନେ,

ଗଣମାଧ୍ୟମର ସଦସ୍ୟମାନେ,

ରାଷ୍ଟ୍ରପତି ରହମାନ ଓ ତାଙ୍କ ପ୍ରତିନିଧିମଣ୍ଡଳୀକୁ ଭାରତରେ ମୁଁ ହାର୍ଦ୍ଧିକ ସ୍ୱାଗତ ଜଣାଉଛି । ତାଜିକିସ୍ତାନ ହେଉଛି ଏସିଆର ମହତ୍ୱପୂର୍ଣ୍ଣ ଓ ରଣନୀତିକ ଭାଗିଦାର । ରାଷ୍ଟ୍ରପତି ରହମାନ ନିଜେ ଭାରତ ସହ ଅତ୍ୟନ୍ତ ପରିଚିତ । ତାଙ୍କୁ ପୁଣିଥରେ ଆତିଥ୍ୟ ପ୍ରଦାନ କରି ମୁଁ ଖୁସି । ଆମର ଦ୍ୱିପାକ୍ଷିକ ସମ୍ପର୍କକୁ ସୁଦୃଢ଼ କରିବାରେ ତାଙ୍କର ନେତୃତ୍ୱ ଓ ଯୋଗଦାନକୁ ଭାରତରେ ଆମେ ଦୃଢ଼ ପ୍ରଶଂସା କରୁଛୁ । ଆମର ରଣନୀତିକ ଭାଗିଦାରୀର ମୂଳଦୂଆ ପାରସ୍ପରିକ ସମ୍ମାନ, ବିଶ୍ୱାସ ଓ କ୍ଷେତ୍ରୀୟ ସୁରକ୍ଷା ଓ ବିକାଶର ମିଳିତ ସ୍ୱାର୍ଥ ଆଧାରରେ ନିର୍ମିତ ହୋଇଛି । ଆମର ଦେଶ ଓ ସମାଜ ମଧ୍ୟ ସହଭାଗୀ ଇତିହାସ ଓ ଐତିହ୍ୟର ପ୍ରାକୃତିକ ଆକର୍ଷଣକୁ ଅନୁଭବ କରୁଛି । ଆମର ଅତୀତର ସାଂସ୍କୃତିକ, ଧାର୍ମିକ ଓ ଭାଷାଗତ ଆନ୍ତଃ ମିଶ୍ରଣ ଏବେ ଆମ ଲୋକଙ୍କ ମଧ୍ୟରେ ସମ୍ପର୍କର ସୌହାର୍ଦ୍ଧ୍ୟ ଓ ବନ୍ଧୁତ୍ୱକୁ ପ୍ରତିପାଦିତ କରୁଛି ।

ବନ୍ଧୁଗଣ

ରାଷ୍ଟ୍ରପତି ରହମାନ ଓ ମୁଁ ଆଜି ସଫଳ ଆଲୋଚନା କରିଛୁ । ସୁରକ୍ଷା ଓ ନିରାପତ୍ତା ଭାଗିଦାରୀ ସମେତ ଆମର ଦ୍ୱିପାକ୍ଷିକ ସମ୍ପର୍କର ସମସ୍ତ ଦିଗରେ ଆମେ ହାସଲ କରିଥିବା ବିକାଶକୁ ଆମେ ଆକଳନ କରିଛୁ । ଭାରତ ଓ ତାଜିକିସ୍ତାନର ଏଭଳି ଏକ ବିସ୍ତୃତ ପଡ଼ୋଶୀ ଅଛି ଯିଏ ବିଭିନ୍ନ ସୁରକ୍ଷା ଚାଲେଞ୍ଜ ଓ ଆଶଙ୍କା ମଧ୍ୟ ଦେଇ ଗତି କରୁଛି । ନା କେବଳ ଆମର ଦୁଇ ଦେଶ ପାଇଁ ଆତଙ୍କବାଦର ଆଶଙ୍କା ରହିଛି ବରଂ ହିଂସା ଓ ଅସ୍ଥିରତାର କଳା ବାଦଲ ସମଗ୍ର କ୍ଷେତ୍ର ପାଇଁ ବିପଦ ହୋଇଛି । ତେଣୁ ଆତଙ୍କବାଦ ଲଢ଼େଇରେ ଆମର ଭାଗିଦାରୀ ଏକ ମହତ୍ୱପୂର୍ଣ୍ଣ ଅଙ୍ଗ । ଚରମପନ୍ଥୀ, ଉଗ୍ରବାଦ ଓ ଆତଙ୍କବାଦୀ ଶକ୍ତି ବିରୋଧରେ ମଧ୍ୟ ଏସିଆ କ୍ଷେତ୍ରରେ ତାଜିକିସ୍ତାନର ଭୂମିକାକୁ ଆମେ ପ୍ରଶଂସା କରୁଛୁ । ରାଷ୍ଟ୍ରପତି ରହମାନ ଓ ମୁଁ ଆଜି ପରସ୍ପର ସହମତିରେ ପ୍ରାଥମିକତା ଆଧାରରେ ଏ ଦିଗରେ କାର୍ଯ୍ୟ ନିମନ୍ତେ ସହମତି ଜଣାଇଛୁ ।

ଆମେ ଏସବୁ ବିଭିନ୍ନ ସ୍ତରରେ କାର୍ଯ୍ୟକାରୀ କରିବୁ:-

- ସମଗ୍ର ଦ୍ୱିପାକ୍ଷିକ ସୁରକ୍ଷା ସହଯୋଗ ଲାଗୁ କରିବାର ମାଧ୍ୟମ;

- ବୃହତ୍ତର ପ୍ରଶିକ୍ଷଣ, ଦକ୍ଷତା ନିର୍ମାଣ ଓ ସୂଚନାର ଆଦାନ ପ୍ରଦାନର ମାଧ୍ୟମ ଓ

- ଆଂଚଳିକ ଓ ବହୁପାକ୍ଷିକ ପ୍ରସଙ୍ଗରେ ସକ୍ରିୟ ସମନ୍ୱୟର ମାଧ୍ୟମ

ତାଜିକିସ୍ତାନର ସମଗ୍ର ଆଂଚଳିକ ସୁରକ୍ଷା ଓ ଆତଙ୍କବାଦ ନିରୋଧୀ ଦିଗରେ ଏକାଠି କାମ କରିବାରେ ସଂଘାଇ ସହଯୋଗ ସଂଗଠନରେ ଭାରତର ସଦସ୍ୟତା ଏକ ମୂଲ୍ୟବାନ ସହଯୋଗୀ ହେବ । ରାଷ୍ଟ୍ରପତି ଓ ମୁଁ ଆମର ଆଂଚଳିକ ଗତିବିଧି ଉପରେ ବିଚାର ବିମର୍ଶ କରିଛୁ । ଏହି ଅଚଂଳ ପାଇଁ ଆଫଗାନିସ୍ତାନରେ ଶାନ୍ତି, ସ୍ଥାୟିତ୍ୱ ଓ ସମୃଦ୍ଧି ମହତ୍ୱପୂର୍ଣ୍ଣ ବୋଲି ଆମେ ସହମତ ହୋଇଛୁ । ଆଫଗାନର ଲୋକଙ୍କୁ ଅଧିକ ଶାନ୍ତିପୂର୍ଣ୍ଣ ଓ ସମୃଦ୍ଧ ରାଷ୍ଟ୍ର ପାଇଁ ସେମାନଙ୍କ ଆକାଂକ୍ଷାକୁ ସମର୍ଥନ ଦେବା ଦିଗରେ ଭାରତ ଓ ତାଜିକିସ୍ତାନ ଏକଜୁଟ ଅଛନ୍ତି ।

ବନ୍ଧୁଗଣ

ଆମର ଆର୍ଥିକ କାରବାର ବିଶେଷକରି ବାଣିଜ୍ୟ ଓ ନିବେଶ କ୍ଷେତ୍ରରେ ଏହାର ଆକାର ଓ ସ୍ୱରୂପକୁ ବୃଦ୍ଧିର ଆବଶ୍ୟକତା ଉପରେ ରାଷ୍ଟ୍ରପତି ଓ ମୁଁ ସହମତ ହୋଇଛୁ । ଏ ଦିଗରେ ଜଳବିଦ୍ୟୁତ, ସୂଚନା ପ୍ରଯୁକ୍ତିବିଦ୍ୟା, ଫାର୍ମାସ୍ୟୁଟିକାଲ ଓ ସ୍ୱାସ୍ଥ୍ୟ ପ୍ରାଥମିକତା କ୍ଷେତ୍ର ହେବ । ଆମ ଦେଶର ସ୍ୱାର୍ଥ ହେତୁ ଆମର ଆର୍ଥିକ ଭାଗିଦାରୀର ପ୍ରତିଶ୍ରୁତିବଦ୍ଧତାର ପାଳନ ପାଇଁ ବୃହତ୍ ଭୂ-ଭାଗ ଯୋଗାଯୋଗ ଅତ୍ୟନ୍ତ ଆବଶ୍ୟକ ବୋଲି ଆମେ ସହମତ ହୋଇଛୁ ।

ଭାରତ ଏବେ ବନ୍ଦର ଓ ପରିବହନ ଭିତିଭୂମିର ବିକାଶ ଓ ଏହାକୁ ଆଫଗାନିସ୍ତାନ, ତାଜିକିସ୍ତାନ ଓ ମଧ୍ୟଏସିଆ ସହ ସଡ଼କ ଓ ରେଳ ନେଟୱାର୍କକୁ ଯୋଡ଼ିବାର ପ୍ରୟାସକୁ ସମର୍ଥନ କରୁଛି । ଏଦିଗରେ ଆମେ ଇରାନର ଚାବାହାର ବନ୍ଦର ମାଧ୍ୟମରେ ବ୍ୟବସାୟ ଓ ସଂଚାର ଲିଙ୍କ୍ ନିର୍ମାଣ କରିବୁ । ତାଜିକିସ୍ତାନ ସମେତ ଅନ୍ୟ ସଦସ୍ୟ ରାଷ୍ଟ୍ର ସହ ଆନ୍ତର୍ଜାତିକ ଉତ୍ତର-ଦକ୍ଷିଣ ପରିବହନ କରିଡରର ନିର୍ମାଣ ପାଇଁ ଭାରତ କାର୍ଯ୍ୟ କରୁଛି । ଏହା ଆମର ଏସଗାବାତ ଚୁକ୍ତି ଦ୍ୱାରା ତାଜିକିସ୍ତାନ ଓ ମଧ୍ୟଏସିଆ ସହ ଯୋଡ଼ିବାରେ ସହାୟତା ମିଳିବ । ଭାରତ ଓ ତାଜିକିସ୍ତାନ ଭାରତୀୟ ଜ୍ଞାନକୌଶଳ ଓ ଆର୍ଥିକ ସହଯୋଗ ପ୍ରଶିକ୍ଷଣ କାର୍ଯ୍ୟକ୍ରମ ସମେତ ସଂସ୍ଥାଗତ ଓ ଦକ୍ଷତା ନିର୍ମାଣର କ୍ଷେତ୍ରରେ ଭାଗିଦାରୀ ରହିଛି । ରାଷ୍ଟ୍ରପତି ରହମାନ ଓ ମୁଁ ଏହି ଭାଗିଦାରୀକୁ ସ୍ଥାୟୀ ଓ ସୁଦୃଢ଼ କରିବା ନିମନ୍ତେ ସହମତ ହୋଇଛୁ ।

ବନ୍ଧୁଗଣ,

ଆସନ୍ତା ବର୍ଷ ଆମେ ଭାରତ ଓ ତାଜିକିସ୍ତାନ ମଧ୍ୟରେ କୂଟନୀତିକ ସମ୍ବନ୍ଧର ସ୍ଥାପନାର ୨୫ତମ ବାର୍ଷିକୀ ପାଳନ କରିବୁ । ଏହି ଗସ୍ତ ଅବସରରେ ରାଷ୍ଟ୍ରପତି ରହମାନ ଓ ମୁଁ ଆମ ଦେଶ ଭିତରେ ଯେଉଁ ବ୍ୟାପକ ଏଜେଣ୍ଡା ପ୍ରସ୍ତୁତ କରିଛୁ, ସେଥିରେ ମୁଁ ଉତ୍ସାହିତ । ମୁଁ ଆଶା କରୁଛି ଯେ ଆଜି ଶେଷ ହୋଇଥିବା ଚୁକ୍ତି ଓ ଆମ ମଧ୍ୟରେ ହୋଇଥିବା ଆଲୋଚନାରେ ଭାରତ ଓ ତାଜିକିସ୍ତାନ ବିଭିନ୍ନ କ୍ଷେତ୍ରରେ ବ୍ୟବହାରିକ ସହଯୋଗକୁ ପ୍ରୋତ୍ସାହିତ କରିବାରେ ସହାୟକ ହେବେ । ମୁଁ ପୁଣିଥରେ ରାଷ୍ଟ୍ରପତି ରହମାନଙ୍କୁ ଅଭିନନ୍ଦନ ଜଣାଉଛି ଓ ତାଙ୍କର ସୌହାର୍ଦ୍ଦ୍ୟପୂର୍ଣ୍ଣ ରହଣି କାମନା କରୁଛି ।

ଆପଣଙ୍କୁ ବହୁତ ବହୁତ ଧନ୍ୟବାଦ ।